Богослужебные чтения 31 декабря 2025 года

Послание ко евреем, зачало 323

Бра́тие, сень имы́й зако́н гряду́щих благ, а не са́мый о́браз веще́й, на вся́кое ле́то те́миже же́ртвами, и́хже прино́сят вы́ну, никогда́же мо́жет приступа́ющих соверши́ти. Поне́же преста́ли бы бы́ти приноси́мы, ни еди́ну ктому́ иму́щым со́весть о гресе́х служа́щым, еди́ною очище́нным. Но в них воспомина́ние грехо́в на ко́еждо ле́то быва́ет, невозмо́жно бо кро́ви ю́нчей и ко́злей отпуща́ти грехи́. Те́мже входя́ в мир, глаго́лет: же́ртвы и приноше́ния не восхоте́л еси́, те́ло же соверши́л Ми еси́, всесожже́ний и о гресе́ не благоволи́л еси́. Тогда́ рех: се иду́, в глави́зне кни́жней написа́ся о Мне, е́же сотвори́ти во́лю Твою́, Бо́же. Вы́ше глаго́ля: я́ко же́ртвы и приноше́ния и всесожже́ний и о гресе́х не восхоте́л еси́, ниже́ благоволи́л еси́, я́же по зако́ну прино́сятся. Тогда́ рече́: се иду́ сотвори́ти во́лю Твою́, Бо́же. Оте́млет пе́рвое, да второ́е поста́вит. О не́йже во́ли освяще́ни есмы́ принесе́нием те́ла Иису́с Христо́ва еди́ною. И всяк у́бо свяще́нник стои́т на всяк день служя́ и ты́я же мно́жицею принося́ же́ртвы, я́же никогда́же мо́гут отя́ти грехо́в. Он же еди́ну о гресе́х прине́с же́ртву, всегда́ седи́т одесну́ю Бо́га, про́чее ожида́я, до́ндеже положа́тся врази́ Его́ подно́жие нога́ма Его́. Еди́нем бо приноше́нием соверши́л есть во ве́ки освяща́емых. Свиде́тельствует же нам и Дух Святы́й, по рече́нному пре́жде: сей заве́т, его́же завеща́ю к ним по днех о́нех, глаго́лет Госпо́дь, дая́ зако́ны Моя́ на сердца́ их, и в помышле́ниих их напишу́ их. Та́же глаго́лет Госпо́дь: и грехо́в их и беззако́ний их не и́мам помяну́ти ктому́. А иде́же отпуще́ние сих, ктому́ несть приноше́ния о гресе́х.

Евангелие от Марка, зачало 44

Рече́ Госпо́дь: и́же а́ще пу́стит жену́ свою́ и оже́нится ино́ю, прелюбы́ твори́т на ню. И а́ще жена́ пу́стит му́жа своего́ и пося́гнет за ино́го, прелюбы́ твори́т. И приноша́ху к Нему́ де́ти, да ко́снется их, ученицы́ же преща́ху принося́щым. Ви́дев же Иису́с негодова́ и рече́ им: оста́вите дете́й приходи́ти ко Мне и не брани́те им, таце́х бо есть Ца́рствие Бо́жие. Ами́нь глаго́лю вам, и́же а́ще не прии́мет Ца́рствия Бо́жия я́ко отроча́, не и́мать вни́ти в не. И обе́м их, возло́жь ру́це на них, благословля́ше их.