Богослужебные чтения 31 декабря 2026 года

Соборное послание Иаковле, зачало 51Б

Бра́тие моя́ возлю́бленная, да бу́дет всяк челове́к скор услы́шати и ко́сен глаго́лати, ко́сен во гнев, гнев бо му́жа, пра́вды Бо́жия не соде́ловает. Сего́ ра́ди отло́жше вся́ку скве́рну и избы́ток зло́бы, в кро́тости приими́те всажде́нное сло́во, могу́щее спасти́ ду́шы ва́ша. Быва́йте же творцы́ сло́ва, а не то́чию слы́шатели, прельща́юще себе́ саме́х. Зане́ а́ще кто есть слы́шатель сло́ва, а не творе́ц, таковы́й уподо́бися му́жу смотря́ющу лице́ бытия́ своего́ в зерца́ле: усмотри́ бо себе́ и оты́де, и а́бие забы́, како́в бе. Прини́кий же в зако́н соверше́н свобо́ды, и пребы́в, сей не слы́шатель забы́тлив быв, но творе́ц де́ла, сей блаже́н в де́лании свое́м бу́дет. А́ще кто мни́тся ве́рен бы́ти в вас, и не обуздова́ет язы́ка своего́, но льстит се́рдце свое́, сего́ су́етна есть ве́ра. Ве́ра бо чиста́ и нескве́рна пред Бо́гом и Отце́м сия́ есть, е́же посеща́ти си́рых и вдови́ц в ско́рбех их, и нескве́рна себе́ блюсти́ от ми́ра.

Евангелие от Марка, зачало 39

Во вре́мя о́но, удержа́ша в себе́ ученицы́ сло́во Иису́сово, стяза́ющеся, что есть, е́же из ме́ртвых воскре́снути. И вопроша́ху Его́ глаго́люще: ка́ко глаго́лют кни́жницы, я́ко Илии́ подоба́ет приити́ пре́жде? Он же отвеща́в рече́ им: Илиа́ у́бо прише́д пре́жде, устро́ит вся, и ка́ко есть пи́сано о Сы́не Челове́честем, да мно́го постра́ждет и уничиже́н бу́дет, но глаго́лю вам, я́ко и Илиа́ прии́де, и сотвори́ша ему́, ели́ка хоте́ша, я́коже есть пи́сано о нем. И прише́д ко ученико́м, ви́де наро́д мног о них и кни́жники стяза́ющяся с ни́ми. И а́бие весь наро́д ви́дев Его́ ужасе́ся, и прири́щуще целова́ху Его́. И вопроси́ кни́жники: что стяза́етеся к себе́?