Богослужебные чтения 27 ноября 2024 года

Паримии на святаго Апостола Филиппа

1. Собо́рнаго посла́ния Петро́ва чте́ние.

Петр, Апо́стол Иису́с Христо́в, избра́нным прише́льцем разсе́яния По́нта, Галати́и, Каппадоки́и, Аси́и и Вифи́нии, по прозре́нию Бо́га Отца́, во святы́ню Ду́ха, в послуша́ние и кропле́ние Кро́ве Иису́с Христо́вы, благода́ть вам и мир да умно́жится. Благослове́н Бог и Оте́ц Го́спода на́шего Иису́с Христа́, И́же по мно́зей Свое́й ми́лости порожде́й нас во упова́ние жи́во воскресе́нием Иису́с Христо́вым от ме́ртвых, в насле́дие нетле́нно, и нескве́рно, и неувяда́емо, соблюде́но на Небесе́х вас ра́ди, и́же си́лою Бо́жиею соблюде́ни ве́рою во спасе́ние гото́вое яви́тися во вре́мя после́днее. О не́мже ра́дуйтеся, ма́ло ны́не, а́ще ле́по есть, приско́рбни бы́вше в разли́чных напа́стех, да искуше́ние ва́шея ве́ры многоче́стнейше зла́та ги́бнуща, огне́м же искуше́на, обря́щется в похвалу́ и честь и сла́ву, во открове́нии Иису́с Христо́ве. Его́же не ви́девше лю́бите, и на Него́же ны́не не зря́ще, ве́рующе же, ра́дуетеся ра́достию неизглаго́ланною и просла́вленною, прие́млюще кончи́ну ве́ре ва́шей спасе́ние душа́м. О не́мже спасе́нии взыска́ша и испыта́ша проро́цы, и́же о ва́шей благода́ти прореко́ша, испыта́юще, в каково́ и́ли в ко́е вре́мя явля́ше в них Дух Христо́в, пре́жде свиде́тельствуя о Христо́вех страсте́х и я́же по сих сла́вах, и́мже откры́ся, я́ко не им саме́м, но нам служа́ху сия́, я́же ны́не возвести́шася вам, благовествова́вшими вам Ду́хом Святы́м, по́сланным с Небесе́, в ня́же жела́ют А́нгели прини́кнути. Те́мже, возлю́бленнии, препоя́савше чре́сла помышле́ния ва́шего, трезвя́щеся, соверше́нне упова́йте на приноси́мую вам благода́ть открове́нием Иису́с Христо́вым. Я́ко ча́да послу́шания, не преобразу́ющеся пе́рвыми неве́дения ва́шего похоте́нии, но по зва́вшему вы Свято́му, и са́ми свя́ти во всем житии́ бу́дите. Зане́ пи́сано есть: свя́ти бу́дите, я́ко Аз Свят есмь. И а́ще Отца́ называ́ете нелицеме́рно судя́ща кому́ждо по де́лу, со стра́хом жития́ ва́шего вре́мя жи́тельствуйте, ве́дяще, я́ко не истле́нным сребро́м или́ зла́том изба́вистеся от су́етнаго ва́шего жития́, отцы́ пре́даннаго, но честно́ю Кро́вию я́ко А́гнца непоро́чна и пречи́ста Христа́, предуве́дена у́бо пре́жде сложе́ния ми́ра, я́вльшася же в после́дняя ле́та вас ра́ди. И́же Его́ ра́ди ве́ровавших в Бо́га, воздви́гшаго Его́ из ме́ртвых и сла́ву Ему́ да́вша, я́ко да ве́ра ва́ша и упова́ние бу́дет на Бо́га. Ду́ши ва́ша очи́стивше в послуша́ние и́стины ду́хом, в братолю́бие нелицеме́рно, от чи́ста се́рдца друг дру́га люби́те приле́жно, порожде́ни не от се́мене истле́нна, но неистле́нна, сло́вом Жива́го Бо́га и пребыва́юща во ве́ки. Зане́ вся́ка плоть, я́ко трава́, и вся́ка сла́ва челове́ча, я́ко цвет травны́й. И́зсше трава́ и цвет ея́ отпаде́, глаго́л же Госпо́днь пребыва́ет во ве́ки, се же есть глаго́л благовествова́нный в вас. Отло́жше у́бо вся́ку зло́бу и вся́ку лесть, и лицеме́рие, и за́висть и вся клеветы́, я́ко новорожде́ни младе́нцы, слове́сное и неле́стное млеко́ возлюби́те, я́ко да о нем возрасте́те во спасе́ние, поне́же вкуси́сте, я́ко благ Госпо́дь. К Нему́же приходя́ще, Ка́мени Жи́ву, от челове́к у́бо уничиже́ну, от Бо́га же избра́нну, че́стну, и са́ми, я́ко ка́мение жи́во, зижди́теся во храм духо́вен, святи́тельство свя́то, возноси́ти же́ртвы духо́вны, благоприя́тны Бо́гови Иису́с Христо́м. Зане́ пи́сано есть в Писа́нии: се полага́ю в Сио́не Ка́мень Краеуго́лен, избра́н, че́стен, и ве́руяй в Онь не постыди́тся.

1 Петр 1:1 – 2:6

2. Собо́рнаго посла́ния Петро́ва чте́ние.

Возлю́бленнии, Христо́с пострада́ по нас, нам оста́вль о́браз, да после́дуем стопа́м Его́. И́же греха́ не сотвори́, ни обре́теся лесть во усте́х Его́, И́же укаря́емь проти́ву не укаря́ше, стражда́ не преща́ше, предая́ше же Судя́щему пра́ведно. И́же грехи́ на́ша Сам вознесе́ на те́ле Свое́м на дре́во, да от грех избы́вше, пра́вдою поживе́м, Его́же я́звою исцеле́сте. Бе́сте бо, я́ко о́вцы заблу́ждшыя, не иму́щя па́стыря, но возврати́стеся ны́не к Па́стырю и Посети́телю душ ва́ших. Та́кожде же и жены́, повину́ющеся свои́м муже́м, да и а́ще не́цыи не повину́ются сло́ву, же́нским житие́м без сло́ва плене́ни бу́дут, ви́девше е́же со стра́хом чи́сто житие́ ва́ше. И́мже да есть не вне́шняя, плете́ния влас и обложе́ния зла́та, или́ одея́ния риз, ле́пота, но потае́ный се́рдца челове́к, в неистле́нии кро́ткаго и молчали́ваго ду́ха, е́же есть пред Бо́гом многоце́нно. Та́ко бо иногда́ и святы́я жены́, упова́ющыя на Бо́га, украша́ху себе́, повину́ющеся свои́м муже́м, я́коже Са́рра послу́шаше Авраа́ма, господи́на того́ зову́ще, ея́же бы́сте ча́да, благотворя́ще и не боя́щеся ни еди́наго стра́ха. Му́жие, та́кожде вку́пе живу́ще со свои́ми жена́ми по ра́зуму, я́ко немощне́йшу сосу́ду, же́нскому воздаю́ще честь, я́ко и снасле́дницы благода́тныя жи́зни, во е́же не прекраща́тися моли́твам ва́шим. Коне́ц же, вси единому́дрени бу́дите, ми́лостиви, братолю́бцы, милосе́рдни, благоутро́бни, мудролю́бцы, смиреному́дри, не воздаю́ще зла за зло и́ли досажде́ния за досажде́ние, супроти́вное же благословя́ще, ве́дяще, я́ко на се зва́ни бы́сте, да благослове́ние насле́дите.

1 Петр 2:21Б – 3:9

3. Собо́рнаго посла́ния Петро́ва чте́ние.

Возлю́бленнии, Христу́ пострада́вшу за ны пло́тию, и вы в ту же мысль вооружи́теся, зане́ пострада́вый пло́тию, преста́ от греха́. Во е́же не ктому́ в челове́ческия по́хоти, но в во́лю Бо́жию про́чее во пло́ти жи́ти вре́мя. Довле́ет бо вам мимоше́дшее вре́мя жития́, во́лю язы́ческую твори́вшим, хо́ждшим в нечистота́х, в по́хотех, в скотоло́жстве, в по́мыслех, в пия́нстве, в козлогласова́ниих, в лихоима́нии и богоме́рзких идолослуже́ниих. О не́мже дивя́тся, не сходя́щимся вам в то же блуда́ разлия́ние, ху́ляще, и́же воздадя́т сло́во гото́ву Су́щему суди́ти живы́м и ме́ртвым. На се бо и ме́ртвым благовести́ся, да Суд у́бо прии́мут по челове́ку пло́тию, поживу́т же по Бо́зе Ду́хом. Всем же кончи́на прибли́жися, уцелому́дритеся у́бо и трезви́теся в моли́твах. Пре́жде же всех друг ко дру́гу любо́вь приле́жну име́йте, зане́ любо́вь покрыва́ет мно́жество грехо́в. Страннолю́бцы друг ко дру́гу, без ропта́ний. Ки́йждо я́коже прия́т дарова́ние, между́ себе́ сим служа́ще, я́ко до́брии строи́телие разли́чныя благода́ти Бо́жия. А́ще кто глаго́лет, я́ко словеса́ Бо́жия, а́ще кто слу́жит, я́ко от кре́пости, ю́же подае́т Бог, да о всем сла́вится Бог Иису́с Христо́м, Ему́же есть сла́ва и держа́ва во ве́ки веко́в, ами́нь.

1 Петр 4:1–11

Утр. – Ин., 67 зач., XXI, 15–25. Лит. – 1 Сол., 264 зач., II, 1–8. Лк., 78 зач., XV, 1–10. Ап.: 1 Кор., 131 зач., IV, 9–16. Ин., 5 зач., I, 43–51.

Евангелие от Иоанна, зачало 67

Во вре́мя о́но, яви́ся Иису́с ученико́м Свои́м, воста́в от ме́ртвых. И глаго́ла Си́мону Петру́: Си́моне Ио́нин, лю́биши ли Мя па́че сих? Глаго́ла Ему́: ей, Го́споди, Ты ве́си, я́ко люблю́ Тя. Глаго́ла ему́: паси́ а́гнцы Моя́. Глаго́ла ему́ па́ки второ́е: Си́моне Ио́нин, лю́биши ли Мя? Глаго́ла ему́: ей, Го́споди, Ты ве́си, я́ко люблю́ Тя. Глаго́ла ему́: паси́ о́вцы Моя́. Глаго́ла ему́ тре́тие: Си́моне Ио́нин, лю́биши ли Мя? Оскорбе́ же Петр, я́ко рече́ ему́ тре́тие, лю́биши ли Мя; и глаго́ла Ему́: Го́споди, Ты вся ве́си, Ты ве́си, я́ко люблю́ Тя. Глаго́ла ему́ Иису́с: паси́ о́вцы Моя́. Ами́нь, ами́нь, глаго́лю тебе́, егда́ бе юн, поя́сашеся сам, и хожда́ше, а́може хотя́ше, егда́ же состаре́ешися и возде́жеши ру́це твои́, и ин тя поя́шет, и веде́т, а́може не хо́щеши. Сие́ же рече́, назна́менуя, ко́ею сме́ртию просла́вит Бо́га. И сия́ рек, глаго́ла ему́: иди́ по Мне. Обра́щься же Петр, ви́де ученика́, его́же любля́ше Иису́с, во след иду́ща, и́же и возлеже́ на ве́чери на пе́рси Его́, и рече́: Го́споди, кто есть предая́й Тя? Сего́ ви́дев Петр, глаго́ла Иису́сови: Го́споди, сей же что? Глаго́ла ему́ Иису́с: а́ще хощу́, да той пребыва́ет, до́ндеже прииду́, что к тебе́? Ты по Мне гряди́. Изы́де же сло́во се в бра́тию, я́ко учени́к той не у́мрет, и не рече́ ему́ Иису́с, я́ко не у́мрет, но а́ще хощу́ тому́ пребыва́ти, до́ндеже прииду́, что к тебе́? Сей есть учени́к свиде́тельствуяй о сих, и́же и написа́ сия́, и вем, я́ко и́стинно есть свиде́тельство его́. Суть же и и́на мно́га, я́же сотвори́ Иису́с, я́же а́ще по еди́ному пи́сана быва́ют, ни самому́ мню всему́ ми́ру вмести́ти пи́шемых книг. Ами́нь.

Послание к солуняном первое, зачало 264

Бра́тие, ве́сте вход наш и́же к вам, я́ко не вотще́ бысть, но предпострада́вше и досажде́ни бы́вше, я́коже ве́сте, в Фили́ппех, дерзну́хом о Бо́зе на́шем глаго́лати к вам благовествова́ние Бо́жие со мно́гим по́двигом. Утеше́ние бо на́ше не от пре́лести, ни от нечистоты́, ни ле́стию, но я́коже искуси́хомся от Бо́га ве́рни бы́ти прия́ти благовествова́ние, та́ко глаго́лем, не а́ки челове́ком угожда́юще, но Бо́гу искуша́ющему сердца́ на́ша. Никогда́же бо в словеси́ ласка́ния бы́хом к вам, я́коже ве́сте, ниже́ вино́ю лихоима́ния, Бог свиде́тель! Ни и́щуще от челове́к сла́вы, ни от вас, ни от ине́х, могу́ще в тяготе́ бы́ти, я́коже Христо́вы Апо́столи, но бы́хом ти́си посреде́ вас, я́коже дои́лица гре́ет своя́ ча́да. Та́ко жела́юще вас, благоволи́хом пода́ти вам не то́чию благовествова́ние Бо́жие, но и ду́шы своя́, зане́же возлю́блени бы́сте нам.

Евангелие от Луки, зачало 78

Во вре́мя о́но, бя́ху приближа́ющеся Иису́су вси мытари́е и гре́шницы, послу́шати Его́. И ропта́ху фарисе́е и кни́жницы, глаго́люще, я́ко Сей гре́шники прие́млет и с ни́ми яст. Рече́ же к ним при́тчу сию́, глаго́ля: кий челове́к от вас имы́й сто ове́ц, и погу́бль еди́ну от них, не оста́вит ли девяти́десят и девяти́ в пусты́ни и и́дет вслед поги́бшия, до́ндеже обря́щет ю́? И обре́т возлага́ет на ра́ме свои́ ра́дуяся. И прише́д в дом, созыва́ет дру́ги и сосе́ды, глаго́ля им: ра́дуйтеся со мно́ю, я́ко обрето́х овцу́ мою́ поги́бшую. Глаго́лю вам, я́ко та́ко ра́дость бу́дет на небеси́ о еди́нем гре́шнице ка́ющемся, не́жели о девяти́десятих и девяти́ пра́ведник, и́же не тре́буют покая́ния. Или́ ка́я жена́ иму́щи де́сять драхм, а́ще погуби́т дра́хму еди́ну, не вжига́ет ли свети́льника, и помете́т хра́мину, и и́щет приле́жно, до́ндеже обря́щет? И обре́тши созыва́ет други́ни и сосе́ды, глаго́лющи: ра́дуйтеся со мно́ю, я́ко обрето́х дра́хму поги́бшую. Та́ко, глаго́лю вам, ра́дость быва́ет пред А́нгелы Бо́жиими о еди́ном гре́шнице ка́ющемся.

Послание к коринфяном первое, зачало 131

Бра́тие, Бог ны посла́нники после́дния яви́, я́ко насме́ртники, зане́ позо́р бы́хом ми́ру и А́нгелом и челове́ком. Мы у́бо бу́и Христа́ ра́ди, вы же му́дри о Христе́, мы не́мощни, вы же кре́пцы, вы сла́вни, мы же безче́стни. До ны́нешняго часа́ и а́лчем, и жа́ждем, и наготу́ем, и стра́ждем, и скита́емся, и тружда́емся, де́лающе свои́ми рука́ми. Укоря́еми, благословля́ем, гони́ми, терпи́м, ху́лими, утеша́емся, я́коже отре́би ми́ру бы́хом, всем попра́ние досе́ле. Не срамля́я вас сия́ пишу́, но я́коже ча́да моя́ возлю́бленная наказу́ю. А́ще бо и мно́ги пе́стуны и́мате о Христе́, но не мно́ги отцы́, о Христе́ бо Иису́се благовествова́нием аз вы роди́х. Молю́ же вас: подо́бни мне быва́йте, я́коже аз Христу́.

Евангелие от Иоанна, зачало 5

Во вре́мя о́но, восхоте́ Иису́с изы́ти в Галиле́ю, и обре́те Фили́ппа и глаго́ла ему́: гряди́ по Мне. Бе же Фили́пп от Вифсаи́ды, от гра́да Андре́ова и Петро́ва. Обре́те Фили́пп Нафана́ила и глаго́ла ему́: Его́же писа́ Моисе́й в зако́не и проро́цы, обрето́хом Иису́са сы́на Ио́сифова, и́же от Назаре́та. И глаго́ла ему́ Нафана́ил: от Назаре́та мо́жет ли что добро́ бы́ти? Глаго́ла ему́ Фили́пп: прииди́ и виждь. Ви́де же Иису́с Нафана́ила гряду́ща к Себе́ и глаго́ла о нем: се вои́стинну Изра́ильтянин, в не́мже льсти несть. Глаго́ла Ему́ Нафана́ил: ка́ко мя зна́еши? Отвеща́ Иису́с и рече́ ему́: пре́жде да́же не возгласи́ тебе́ Фили́пп, су́ща под смоко́вницею ви́дех тя. Отвеща́ Нафана́ил и глаго́ла Ему́: Равви́, Ты еси́ Сын Бо́жий, Ты еси́ Царь Изра́илев. Отвеща́ Иису́с и рече́ ему́: зане́ рех ти, я́ко ви́дех тя под смоко́вницею, ве́руеши, бо́льша сих у́зриши. И глаго́ла ему́: ами́нь, ами́нь глаго́лю вам, отсе́ле у́зрите не́бо отве́рсто и А́нгелы Бо́жия восходя́щя и нисходя́щя над Сы́на Челове́ческаго.