Богослужебные чтения 7 октября 2026 года

Послание к филипписием, зачало 237

Бра́тие, разуме́ти вам хощу́, я́ко я́же о мне па́че во успе́х благовествова́ния приидо́ша, я́ко у́зам мои́м явле́нным о Христе́ бы́вшым во всем суди́щи и в про́чиих всех, и мно́жайшии бра́тия о Го́споде, наде́явшиися о у́зах мои́х, па́че дерза́ти без стра́ха сло́во Бо́жие глаго́лати. Не́цыи у́бо по за́висти и ре́вности, друзи́и же и за благоволе́ние Христа́ пропове́дают. О́ви у́бо от рве́ния Христа́ возвеща́ют нечи́сте, мня́ще печа́ль нанести́ у́зам мои́м, о́ви же от любве́, ве́дяще, я́ко во отве́те благовествова́ния лежу́. Что у́бо? Оба́че вся́цем о́бразом, а́ще вино́ю, а́ще и́стиною Христо́с пропове́даемь есть, и о сем ра́дуюся, но и возра́дуюся. Вем бо, я́ко сие́ сбу́дется ми во спасе́ние ва́шею моли́твою и подая́нием Ду́ха Иису́с Христо́ва, по ча́янию и упова́нию моему́.

Евангелие от Луки, зачало 12

Во вре́мя о́но, возврати́ся Иису́с испо́лнь Ду́ха Свя́та от Иорда́на, и ведя́шеся Ду́хом в пусты́ню. Дний четы́ридесять искуша́емь от диа́вола, и не яст ничесо́же во дни ты́я, и сконча́вшымся им, последи́ взалка́. И рече́ Ему́ диа́вол: а́ще Сын еси́ Бо́жий, рцы ка́меневи сему́, да бу́дет хлеб. И отвеща́в Иису́с к нему́, глаго́ля: пи́сано есть, я́ко не о хле́бе еди́ном жив бу́дет челове́к, но о вся́ком глаго́ле Бо́жии. И возве́д Его́ диа́вол на гору́ высоку́, показа́ Ему́ вся ца́рствия вселе́нныя в часе́ вре́менне, и рече́ Ему́ диа́вол: Тебе́ дам власть сию́ всю и сла́ву их, я́ко мне предана́ есть, и ему́же а́ще хощу́, дам ю́. Ты у́бо а́ще поклони́шися пре́до мно́ю, бу́дут Тебе́ вся. И отвеща́в рече́ ему́ Иису́с: иди́ за Мно́ю, сатана́. Пи́сано есть: поклони́шися Го́споду Бо́гу твоему́, и Тому́ еди́ному послу́жиши. И веде́ Его́ во Иерусали́м, и поста́ви Его́ на криле́ церко́внем, и рече́ Ему́: а́ще Сын еси́ Бо́жий, ве́рзися отсю́ду до́лу. Пи́сано бо есть, я́ко А́нгелом Свои́м запове́сть о Тебе́ сохрани́ти Тя, и на рука́х во́змут Тя, да не когда́ преткне́ши о ка́мень но́гу Твою́. И отвеща́в рече́ ему́ Иису́с, я́ко рече́но есть: не иску́сиши Го́спода Бо́га твоего́. И сконча́в все искуше́ние диа́вол, оты́де от Него́ до вре́мене. И возврати́ся Иису́с в си́ле духо́вней в Галиле́ю, и весть изы́де по всей стране́ о Нем. И той уча́ше на со́нмищах их, сла́вимь все́ми.

Послание к филипписием, зачало 238

Бра́тие, ни о еди́ном постыжу́ся, но во вся́ком дерзнове́нии, я́коже всегда́, и ны́не возвели́чится Христо́с в те́ле мое́м, а́ще живото́м, а́ще ли сме́ртию. Мне бо е́же жи́ти, Христо́с, и е́же умре́ти, приобре́тение есть. А́ще ли е́же жи́ти ми те́лом, сие́ мне плод дела́, и что изво́лю, не вем. Обдержи́мь же есмь от обою́, жела́ние имы́й разреши́тися и со Христо́м бы́ти, мно́го па́че лу́чше, а е́же пребыва́ти во пло́ти, ну́жднейше есть вас ра́ди. И сие́ изве́стне вем, я́ко бу́ду и спребу́ду вам всем в ваш успе́х и ра́дость ве́ры, я́ко да похвала́ ва́ша избы́точествует о Христе́ Иису́се во мне, мои́м прише́ствием па́ки к вам. То́чию досто́йне благовествова́нию Христо́ву жи́тельствуйте.

Евангелие от Луки, зачало 13

Во вре́мя о́но, прии́де Иису́с в Назаре́т, иде́же бе воспита́н. И вни́де, по обы́чаю Своему́, в день суббо́тный в со́нмище, и воста́ чести́. И да́ша Ему́ кни́гу Иса́ии проро́ка, и разгну́в кни́гу, обре́те ме́сто, иде́же бе напи́сано: Дух Госпо́день на Мне, Его́же ра́ди пома́за Мя благовести́ти ни́щым, посла́ Мя исцели́ти сокруше́нныя се́рдцем, пропове́дати плене́нным отпуще́ние и слепы́м прозре́ние, отпусти́ти сокруше́нныя во отра́ду, пропове́дати ле́то Госпо́дне прия́тно. И согну́в кни́гу, отда́в слузе́, се́де, и всем в со́нмищи о́чи бе́ху зря́ще Нань. И нача́т глаго́лати к ним, я́ко днесь сбы́стся писа́ние сие́ во у́шию ва́шею. И вси свиде́тельствоваху Ему́, и дивля́хуся о словесе́х благода́ти, исходя́щих из уст Его́.

Послание к Тимофею второе, зачало 296

Ча́до Тимофе́е, ты после́довал еси́ моему́ уче́нию, житию́, приве́ту, ве́ре, долготерпе́нию, любви́, терпе́нию, изгна́нием, страда́нием, якова́ ми бы́ша во Антиохи́и, и во Икони́и, и в Ли́стрех, якова́ изгна́ния прия́х, и от всех мя изба́вил есть Госпо́дь. И вси же хотя́щии благоче́стно жи́ти о Христе́ Иису́се гони́ми бу́дут. Лука́вии же челове́цы и чароде́и преуспе́ют на го́ршее, прельща́юще и прельща́еми. Ты же пребыва́й в ни́хже науче́н еси́ и я́же вве́рена суть тебе́, ве́дый, от кого́ научи́лся еси́. И я́ко из мла́да свяще́нная писа́ния уме́еши, могу́щая тя умудри́ти во спасе́ние ве́рою, я́же о Христе́ Иису́се.

Евангелие от Матфеа, зачало 104

Рече́ Госпо́дь при́тчу сию́: уподо́бися Ца́рствие Небе́сное десяти́м де́вам, я́же прия́ша свети́льники своя́ и изыдо́ша в сре́тение жениху́, пять же бе от них мудры́ и пять юро́дивы. Юро́дивыя же, прие́мше свети́льники своя́, не взя́ша с собо́ю еле́а, му́дрыя же прия́ша еле́й в сосу́дех со свети́льники свои́ми, косня́щу же жениху́, воздрема́шася вся и спа́ху. Полу́нощи же вопль бысть: се жени́х гряде́т, исходи́те в сре́тение его́. Тогда́ воста́вше вся де́вы ты́я и украси́ша свети́льники своя́. Юро́дивыя же му́дрым ре́ша: дади́те нам от еле́а ва́шего, я́ко свети́льницы на́ши угаса́ют. Отвеща́ша же му́дрыя, глаго́люще: еда́ ка́ко не доста́нет нам и вам, иди́те же па́че к продаю́щым и купи́те себе́. Иду́щым же им купи́ти, прии́де жени́х, и гото́выя внидо́ша с ним на бра́ки, и затворе́ны бы́ша две́ри. Последи́ же приидо́ша и про́чыя де́вы, глаго́люще: Го́споди, Го́споди, отве́рзи нам. Он же отвеща́в рече́ им: ами́нь глаго́лю вам, не вем вас. Бди́те у́бо, я́ко не ве́сте дне ни часа́, во́ньже Сын Челове́ческий прии́дет.