Богослужебные чтения 26 сентября 2024 года

Послание ко евреем, зачало 307

Бра́тие свята́я, зва́ния небе́снаго прича́стницы, разуме́йте Посла́нника и Святи́теля испове́дания на́шего Иису́са Христа́, ве́рна су́ща Сотво́ршему Его́, я́коже и Моисе́й во всем дому́ Его́. Мно́жайшей бо сла́ве Сей па́че Моисе́а сподо́бися, ели́ко мно́жайшую честь и́мать па́че до́му сотвори́вый его́. Всяк бо дом созида́ется от не́коего, а сотвори́вый вся́ческая Бог.

Евангелие от Матфеа, зачало 67Б

Во вре́мя о́но, прише́д Иису́с во страны́ Кесари́и Фили́пповы, вопроша́ше ученики́ Своя́, глаго́ля: кого́ Мя глаго́лют челове́цы бы́ти, Сы́на Челове́ческаго? Они́ же ре́ша: о́ви у́бо Иоа́нна Крести́теля, ини́и же Илию́, друзи́и же Иереми́ю, или́ еди́наго от проро́к. Глаго́ла им Иису́с: вы же кого́ Мя глаго́лете бы́ти? Отвеща́в же Си́мон Петр рече́: Ты еси́ Христо́с, Сын Бо́га жива́го. И отвеща́в Иису́с рече́ ему́: блаже́н еси́, Си́моне, вар Ио́на, я́ко плоть и кровь не яви́ тебе́, но Оте́ц Мой, и́же на Небесе́х. И Аз же тебе́ глаго́лю, я́ко ты еси́ Петр, и на сем ка́мени сози́жду Це́рковь Мою́, и врата́ а́дова не одоле́ют ей.

Послание к коринфяном первое, зачало 126

Бра́тие, Прему́дрость глаго́лем в соверше́нных, прему́дрость же не ве́ка сего́, ни князе́й ве́ка сего́ престаю́щих, но глаго́лем прему́дрость Бо́жию, в та́йне сокрове́нную, и́же предуста́ви Бог пре́жде век в сла́ву на́шу, ю́же никто́же от князе́й ве́ка сего́ разуме́. А́ще бо бы́ша разуме́ли, не бы́ша Го́спода сла́вы ра́спяли. Но я́коже есть пи́сано: и́хже о́ко не ви́де, и у́хо не слы́ша, и на се́рдце челове́ку не взыдо́ша, я́же угото́ва Бог лю́бящым Его́.

Евангелие от Матфеа, зачало 39

Рече́ Госпо́дь: и́же лю́бит отца́ или́ ма́терь па́че Мене́, несть Мене́ досто́ин, и и́же лю́бит сы́на или́ дщерь па́че Мене́, несть Мене́ досто́ин. И и́же не прии́мет креста́ своего́ и вслед Мене́ гряде́т, несть Мене́ досто́ин. Обреты́й ду́шу свою́ погуби́т ю́, а и́же погуби́т ду́шу свою́ Мене́ ра́ди, обря́щет ю́. И́же вас прие́млет, Мене́ прие́млет, и и́же прие́млет Мене́, прие́млет Посла́вшаго Мя. Прие́мляй проро́ка во и́мя проро́че, мзду проро́чу прии́мет, и прие́мляй пра́ведника во и́мя пра́ведниче, мзду пра́ведничу прии́мет. И и́же а́ще напои́т еди́наго от ма́лых сих ча́шу студены́ воды́ то́кмо, во и́мя ученика́, ами́нь глаго́лю вам, не погуби́т мзды своея́. И бысть, егда́ соверши́ Иису́с запове́дая обемана́десяте ученико́ма Свои́ма, пре́йде отту́ду учи́ти и пропове́дати во гра́дех их.

Послание к галатом, зачало 201

Бра́тие, от мня́щихся бы́ти что, якови́ не́когда бе́ша, ничто́же ми ра́знствует: лица́ Бог челове́ча не прие́млет. Мне бо мни́мии ничто́же привозложи́ша, но сопроти́вное, уразуме́вше, я́ко уве́рено ми бысть благове́стие необре́зания, я́коже Петру́ обре́зания. И́бо Споспе́шествовавый Петру́ в посла́ние обре́зания, поспе́шествова и мне во язы́ки. И позна́вше благода́ть да́нную ми, Иа́ков и Ки́фа и Иоа́нн, мни́мии столпи́ бы́ти, де́сная да́ша мне и Варна́ве обще́ния, да мы во язы́ки, они́ же во обре́зание, то́чию ни́щих да по́мнима, е́же и потща́хся сие́ и́стое сотвори́ти.

Евангелие от Марка, зачало 20

Во вре́мя о́но, прии́де ко Иису́су еди́н от архисинаго́г, и́менем Иаи́р, и ви́дев Его́, паде́ при ногу́ Его́ и моля́ше Его́ мно́го, глаго́ля, я́ко дщи моя́ на кончи́не есть, да прише́д возложи́ши на ню ру́це, я́ко да спасе́тся и жива́ бу́дет. И и́де с ним, и по Нем идя́ху наро́ди мно́зи и угнета́ху Его́. И приидо́ша от архисинаго́га, глаго́люще, я́ко дщи твоя́ у́мре, что еще́ дви́жеши Учи́теля? Иису́с же а́бие слы́шав сло́во глаго́лемое, глаго́ла архисинаго́гови: не бо́йся, то́кмо ве́руй. И не оста́ви по Себе́ ни еди́наго ити́, то́кмо Петра́ и Иа́кова и Иоа́нна бра́та Иа́ковля. И прии́де в дом архисинаго́гов и ви́де молву́, пла́чущыяся и крича́щыя мно́го. И вшед глаго́ла им: что мо́лвите и пла́четеся? Отрокови́ца несть умерла́, но спит. И руга́хуся Ему́. Он же изгна́в вся, поя́т отца́ отрокови́цы и ма́терь, и и́же бе́ху с Ним, и вни́де, иде́же бе отрокови́ца лежа́щи. И ем за ру́ку отрокови́цу, глаго́ла ей: талифа́ ку́ми, е́же есть сказа́емо, деви́це, тебе́ глаго́лю, воста́ни. И а́бие воста́ деви́ца и хожда́ше, бе бо лет двоюна́десяте. И ужасо́шася у́жасом ве́лиим. И запрети́ им мно́го, да никто́же уве́сть сего́, и рече́: дади́те ей я́сти. И изы́де отту́ду и прии́де во оте́чествие Свое́, и по Нем идо́ша ученицы́ Его́.