Богослужебные чтения 20 сентября 2025 года

Послание к коринфяном первое, зачало 126

Бра́тие, Прему́дрость глаго́лем в соверше́нных, прему́дрость же не ве́ка сего́, ни князе́й ве́ка сего́ престаю́щих, но глаго́лем прему́дрость Бо́жию, в та́йне сокрове́нную, и́же предуста́ви Бог пре́жде век в сла́ву на́шу, ю́же никто́же от князе́й ве́ка сего́ разуме́. А́ще бо бы́ша разуме́ли, не бы́ша Го́спода сла́вы ра́спяли. Но я́коже есть пи́сано: и́хже о́ко не ви́де, и у́хо не слы́ша, и на се́рдце челове́ку не взыдо́ша, я́же угото́ва Бог лю́бящым Его́.

Евангелие от Матфеа, зачало 39

Рече́ Госпо́дь: и́же лю́бит отца́ или́ ма́терь па́че Мене́, несть Мене́ досто́ин, и и́же лю́бит сы́на или́ дщерь па́че Мене́, несть Мене́ досто́ин. И и́же не прии́мет креста́ своего́ и вслед Мене́ гряде́т, несть Мене́ досто́ин. Обреты́й ду́шу свою́ погуби́т ю́, а и́же погуби́т ду́шу свою́ Мене́ ра́ди, обря́щет ю́. И́же вас прие́млет, Мене́ прие́млет, и и́же прие́млет Мене́, прие́млет Посла́вшаго Мя. Прие́мляй проро́ка во и́мя проро́че, мзду проро́чу прии́мет, и прие́мляй пра́ведника во и́мя пра́ведниче, мзду пра́ведничу прии́мет. И и́же а́ще напои́т еди́наго от ма́лых сих ча́шу студены́ воды́ то́кмо, во и́мя ученика́, ами́нь глаго́лю вам, не погуби́т мзды своея́. И бысть, егда́ соверши́ Иису́с запове́дая обемана́десяте ученико́ма Свои́ма, пре́йде отту́ду учи́ти и пропове́дати во гра́дех их.

Послание к коринфяном первое, зачало 132

Бра́тие, посла́х к вам Тимофе́а, и́же ми есть ча́до возлю́блено и ве́рно о Го́споде, и́же вам воспомя́нет пути́ моя́, я́же о Христе́ Иису́се я́коже везде́ и во вся́кой це́ркви учу́. Я́ко не гряду́щу ми к вам, разгорде́шася не́цыи. Прииду́ же ско́ро к вам, а́ще Госпо́дь восхо́щет, и уразуме́ю не сло́во разгорде́вшихся, но си́лу. Не в словеси́ бо Ца́рство Бо́жие, но в си́ле. Что хо́щете? С па́лицею ли прииду́ к вам, или́ с любо́вию и ду́хом кро́тости? Отню́д слы́шится в вас блуже́ние, и таково́ блуже́ние, яково́ же ни во язы́цех имену́ется, я́ко не́коему име́ти жену́ о́тчую. И вы разгорде́сте, и не па́че пла́касте, да и́змется от среды́ вас соде́явый де́ло сие́. Аз у́бо я́ко не у вас сый те́лом, ту же живы́й ду́хом, уже́ суди́х, я́ко та́мо сый, соде́явшаго си́це сие́, о и́мени Го́спода на́шего Иису́са Христа́ собра́вшымся вам и моему́ ду́ху, с си́лою Го́спода на́шего Иису́са Христа́, преда́ти такова́го сатане́ во изможде́ние пло́ти, да дух спасе́тся в день Го́спода на́шего Иису́са Христа́.

Евангелие от Матфеа, зачало 97

Во вре́мя о́но, приступи́ша ко Иису́су ученицы́ Его́ показа́ти Ему́ зда́ния церко́вная. Иису́с же рече́ им: не ви́дите ли вся сия́? Ами́нь глаго́лю вам, не и́мать оста́ти зде ка́мень на ка́мени, и́же не разори́тся. Седя́щу же Ему́ на го́ре Елео́нстей, приступи́ша к Нему́ ученицы́ на едине́, глаго́люще: рцы нам, когда́ сия́ бу́дут? И что есть зна́мение Твоего́ прише́ствия и кончи́на ве́ка? И отвеща́в Иису́с рече́ им: блюди́те, да никто́же вас прельсти́т. Мно́зи бо прии́дут во и́мя Мое́, глаго́люще: аз есмь Христо́с, и мно́ги прельстя́т. Услы́шати же и́мате бра́ни и слы́шания бра́нем. Зри́те, не ужаса́йтеся, подоба́ет бо всем сим бы́ти, но не тогда́ есть кончи́на. Воста́нет бо язы́к на язы́к, и ца́рство на ца́рство, и бу́дут гла́ди и па́губы и тру́си по ме́стом, вся же сия́ нача́ло боле́знем. Тогда́ предадя́т вы в ско́рби и убию́т вы, и бу́дете ненави́дими все́ми язы́ки и́мене Моего́ ра́ди. И тогда́ соблазня́тся мно́зи, и друг дру́га предадя́т, и возненави́дят друг дру́га, и мно́зи лжепроро́цы воста́нут и прельстя́т мно́гия, и за умноже́ние беззако́ния, изся́кнет любы́ мно́гих. Претерпе́вый же до конца́, той спасе́тся.

Послание ко ефесеем, зачало 233

Бра́тие, возмога́йте о Го́споде и в держа́ве кре́пости Его́, облецы́теся во вся ору́жия Бо́жия, я́ко возмощи́ вам ста́ти проти́ву ко́знем диа́вольским, я́ко несть на́ша брань к кро́ви и пло́ти, но к нача́лом и ко власте́м и к миродержи́телем тмы ве́ка сего́, к духово́м зло́бы поднебе́сным. Сего́ ра́ди приими́те вся ору́жия Бо́жия, да возмо́жете проти́витися в день лют и вся соде́явше ста́ти. Ста́ните у́бо препоя́сани чресла́ ва́ша и́стиною, и обо́лкшеся в броня́ пра́вды, и обу́вше но́зе во угото́вание благовествова́ния ми́ра, над все́ми же восприи́мше щит ве́ры, в не́мже возмо́жете вся стре́лы лука́ваго разжже́нныя угаси́ти. И шлем спасе́ния восприими́те, и мечь духо́вный, и́же есть глаго́л Бо́жий.

Евангелие от Иоанна, зачало 52

Рече́ Госпо́дь Свои́м ученико́м: си запове́даю вам, да лю́бите друг дру́га. А́ще мир вас ненави́дит, ве́дите, я́ко Мене́ пре́жде вас возненави́де. А́ще от ми́ра бы́сте бы́ли, мир у́бо свое́ люби́л бы, я́коже от ми́ра не́сте, но Аз избра́х вы от ми́ра, сего́ ра́ди ненави́дит вас мир. Помина́йте сло́во, е́же Аз рех вам: несть раб бо́лий го́спода своего́. А́ще Мене́ изгна́ша, и вас изжену́т, а́ще сло́во Мое́ соблюдо́ша, и ва́ше соблюду́т. Но сия́ вся творя́т вам за и́мя Мое́, я́ко не ве́дят Посла́вшаго Мя. А́ще не бых прише́л и глаго́лал им, греха́ не бы́ша име́ли, ны́не же вины́ не и́мут о гресе́ свое́м. Ненави́дяй Мене́, и Отца́ Моего́ ненави́дит. А́ще дел не бых сотвори́л в них, и́хже ин никто́же сотвори́, греха́ не бы́ша име́ли, ны́не же и ви́деша, и возненави́деша Мене́ и Отца́ Моего́. Но да сбу́дется сло́во, пи́санное в зако́не их, я́ко возненави́деша Мя ту́не. Егда́ же прии́дет Уте́шитель, Его́же Аз послю́ вам от Отца́, Дух и́стины, И́же от Отца́ исхо́дит, Той свиде́тельствует о Мне. И вы же свиде́тельствуете, я́ко искони́ со Мно́ю есте́. Сия́ глаго́лах вам, да не соблазните́ся. От со́нмищ иждену́т вы, но прии́дет час, да всяк, и́же убие́т вы, мни́тся слу́жбу приноси́ти Бо́гу.