Богослужебные чтения 18 сентября 2025 года

Паримии на святых пророка Захарии и праведныя Елисаветы

1. Бытия́ чте́ние.

Яви́ся Бог Авраа́му у ду́ба Мамври́а, седя́щему пред две́рьми се́ни своея́ в полу́дне, воззре́в же очи́ма свои́ма, и узре́, и се Трие́ Му́жи стоя́ху пря́мо ему́. И ви́дев Я́, притече́ в сре́тение Им от две́рий се́ни своея́, и поклони́ся до земли́, и рече́: Го́споди, а́ще обрето́х благода́ть пред Лице́м Твои́м, не мини́ раба́ Твоего́, да принесе́тся вода́, и омы́ются но́ги Ва́ша, и прохладите́ся под ду́бом, и принесу́ хле́бы, да я́сте. И посе́м минете́ на путь Свой, его́же ра́ди соврати́стеся се́мо к рабу́ Своему́. И ре́ша: та́ко сотвори́, я́коже глаго́ла. И потща́вся Авраа́м в сень к Са́рре, и рече́ ей: ускори́ взя́ти три спу́ды муки́ чи́сты, и сотвори́ потре́бники. И тече́ Авраа́м в кра́вы, и поя́ теле́ц млад и добр, и даде́ и рабу́, и ускори́ пригото́вити е́. И взя ма́сло и млеко́ и теле́ц, е́же пригото́ва, и поста́ви пред Ни́ми и ядо́ша. Сам же стоя́ше пред Ни́ми под дре́вом, и реко́ста к нему́: где Са́рра, жена́ твоя́? Он же отвеща́в, рече́: се в се́ни. И рече́: се обра́щься прииду́ к тебе́, о вре́мени сем в часе́, и роди́т сы́на Са́рра, жена́ твоя́. Са́рра же услы́ша пред две́рьми се́ни, су́щи за ним. Авраа́м же и Са́рра ста́ра бе́ста, жи́вши дни мно́ги, и мину́ла бя́ше Са́рры же́нская не́мощь. И посмея́ся Са́рра, глаго́лющи в себе́: не у́бо бы́ло ми досе́ле, се муж мой стар. И рече́ Госпо́дь ко Авраа́му: что я́ко посмея́ся Са́рра, к себе́ глаго́лющи: и а́ще пра́во рожду́, аз бо состаре́хся? Еда́ не́мощно есть от Бо́га вся́ко сло́во? В сие́ вре́мя возвращу́ся, и бу́дет Са́рре сын.

Быт 18:1–14

2. Суде́й Изра́илевых чте́ние.

Бя́ше муж во Апса́ре от пле́мене Да́нова, и́мя же ему́ Мано́е, и жена́ ему́ бя́ше непло́ды и не ражда́ше. И яви́ся А́нгел Госпо́день к жене́ и рече́ к ней: се у́бо ты непло́ды и не роди́ши, се бо зачне́ши и роди́ши сы́на, и ны́не снабди́ у́бо. Не пий вина́, ни сике́ра и не яждь нечи́сто ничто́же, я́ко се ты в утро́бе прии́меши и породи́ши сы́на. И желе́зо на главу́ его́ не взы́дет, я́ко назоре́й Бо́гови бу́дет сие́ отроча́ из чре́ва. И сей на́чнет спасти́ Изра́иля из руки́ иноплеме́нник. И вни́де жена́ и рече́ му́жеви своему́, глаго́лющи: челове́к Бо́жий прии́де ко мне, и о́браз его́, я́ко о́браз А́нгела Бо́жия, стра́шен зело́, и вопроша́х его́: отку́ду еси́? И и́мене своего́ не пове́да ми, и рече́ ми: се ты во утро́бе зачне́ши и роди́ши сы́на. И ны́не не пий вина́, ни олови́ны, и не яждь ничто́же нечи́сто, я́ко назоре́й Бо́гу бу́дет о́трочищ, от утро́бы до дне сме́рти его́. И помоли́ся Мано́е к Го́сподеви, и рече́: о Го́споди! Челове́к Бо́жий, его́же Ты посла́, да прии́дет к нам и нака́жет ны, что сотвори́м отроча́ти ражда́ющемуся. И послу́ша Бог моли́твы Мано́евы. И прии́де па́ки А́нгел Бо́жий к жене́. Сия́ же седя́ще на селе́, Мано́е же, муж ея́, не бя́ше с не́ю. И потща́ся жена́, и те́кши ско́ро пове́да му́жу своему́, и рече́ к нему́: се яви́ся ми муж, и́же приходи́ в день он ко мне. И воста́в и́де Мано́е в след жены́ своея́, и прии́де к му́жу, и рече́ ему́: ты ли еси́ муж, глаго́лавый к жене́ мое́й? И рече́ А́нгел: аз есмь. И рече́ Мано́е: ны́не у́бо да прии́дет сло́во твое́, что есть суд отроча́те и что есть творе́ние его́? И рече́ А́нгел Госпо́день к Мано́еви: от сего́, е́же глаго́лах жене́, да сохрани́тся от всего́; и от всего́, е́же исхо́дит из виногра́да, да не яст, и вина́ и сике́ра да не пие́т, и всего́ нечи́ста да не яст, и все, ели́ко запове́дах, сие́ да снабди́т. И рече́ Мано́е ко А́нгелу Бо́жию: да тя пону́дим и сотвори́м пред тобо́ю ко́злище от коз. И рече́ А́нгел Бо́жий к Мано́еви: а́ще мя ну́диши, и не ям хле́ба твоего́. Но а́ще сотвори́ши всесожже́ние Го́сподеви, то вознеси́ е́. Не ве́дяше бо Мано́е, я́ко А́нгел Госпо́день есть. И рече́ Мано́е ко А́нгелу Госпо́дню: что есть и́мя твое́, да егда́ сбу́дется сло́во твое́, просла́вим тя? И рече́ ему́ А́нгел Госпо́день: почто́ се вопроша́еши и́мене моего́? Се же есть чу́дно. И взя Мано́е ко́злищ от коз и тре́бу, и вознесе́ на ка́мень Го́сподеви, и сотвори́ чу́дно. Мано́е же и жена́ его́ гляде́ста. И бысть, егда́ пла́мень взы́де вы́ше олтаря́ до небесе́, и взы́де А́нгел Госпо́день в пла́мени олтаря́. Мано́е же и жена́ его́ смотря́ста, и падо́ста ниц на земли́.

Суд 13:2–20

3. Царств пе́рвых чте́ние.

Воста́вши А́нна по яде́нии их, и́де в Сило́м и ста пред Го́сподем. Или́й же, жрец, седя́ше на престо́ле при пра́зе две́ри хра́ма Госпо́дня. И та умиле́нною душе́ю поклони́ся Го́споду, и пла́чущи пропла́ка. И помоли́ся моли́твою к Го́споду, глаго́лющи: Адонаи́ Го́споди Елои́ Савао́ф, а́ще призря́ при́зриши на смире́ние рабы́ Твоея́, и помяне́ши мя, и да́си рабе́ Твое́й се́мя му́жеско, то дам е́ пред Тобо́ю в дар до дне сме́рти его́, вина́ и пия́нства не пие́т, и желе́зо не взы́дет на главу́ его́. И бысть егда́ умно́жи моля́щися пред Го́сподем, Или́й же, жрец, взира́ше на уста́ ея́. И та глаго́лаше в се́рдцы свое́м, то́кмо устне́ ея́ двиза́стеся, а глас ея́ не слы́шашеся. И мня́ше ю́ Или́й пия́ну су́щу. И рече́ ей Или́й: доко́ле пия́на еси́? Отыми́ вино́ твое́ и иди́ от ме́ста Госпо́дня. И отвеща́ А́нна, и рече́: ни, господи́не мой, но жена́ в же́сток день аз есмь, вина́ и пия́нства не пих, но излия́х пред Го́сподем ду́шу мою́. Не даждь рабы́ твоея́ дще́рем поруга́ния, я́ко от мно́жества уны́ния моего́ и от мно́жества се́тования моего́ стоя́х да́же досе́ле. И отвеща́ Или́й, и рече́ к ней: иди́ с ми́ром, Бог Изра́илев даст ти вся́ко проше́ние твое́, его́же про́сиши от Него́. И рече́ А́нна: да обря́щет раба́ твоя́ благода́ть пред очи́ма твои́ма. И и́де жена́ путе́м свои́м, и вни́де во оби́тель свою́, и яде́ с му́жем свои́м и пи, и лице́ ея́ не испаде́ ктому́. И у́треневаше зау́тра, и поклони́шася Го́сподеви, и идо́ша путе́м свои́м. И вни́де Елкана́ в дом свой во Ексармафе́м, и разуме́ Елкана́ жену́ свою́ А́нну. И помяну́ ю́ Госпо́дь, и зача́т, и бысть во вре́мя дний, и роди́ А́нна сы́на и нарече́ и́мя ему́ Саму́ил, я́ко от Го́спода Бо́га Савао́фа испроси́х его́.

1 Цар 1:9–20

Гал., 208 зач., III, 23 – IV, 5. Мк., 25 зач., VI, 30–45. Прор.: Евр., 314 зач., VI, 13–20. Мф., 96 зач., XXIII, 29–39.

Послание к галатом, зачало 208Б

Бра́тие, пре́жде прише́ствия ве́ры, под зако́ном стрего́ми бе́хом, затворе́ни в хотя́щую ве́ру откры́тися. Те́мже зако́н пе́стун нам бысть во Христа́, да от ве́ры оправди́мся. Прише́дши же ве́ре, уже́ не под пе́стуном есмы́. Вси бо вы сы́нове Бо́жии есте́ ве́рою о Христе́ Иису́се: ели́цы бо во Христа́ крести́стеся, во Христа́ облеко́стеся. Несть иуде́й, ни е́ллин, несть раб, ни свобо́дь, несть му́жеский пол, ни же́нский, вси бо вы еди́но есте́ о Христе́ Иису́се. А́ще ли вы Христо́вы, у́бо Авраа́мле се́мя есте́, и по обетова́нию насле́дницы. Глаго́лю же: в нели́ко вре́мя насле́дник млад есть, ничи́мже лу́чший есть раба́, госпо́дь сый всех, но под повели́тели и приста́вники есть да́же до наро́ка о́тча. Та́кожде и мы, егда́ бе́хом мла́ди, под стихи́ами бе́хом ми́ра порабоще́ни. Егда́ же прии́де кончи́на ле́та, посла́ Бог Сы́на Своего́ Единоро́днаго, ражда́емаго от жены́, быва́ема под зако́ном, да подзако́нныя иску́пит, да всыновле́ние восприи́мем.

Евангелие от Марка, зачало 25

Во вре́мя о́но, собра́шася Апо́столи ко Иису́су и возвести́ша Ему́ вся, и ели́ка сотвори́ша, и ели́ка научи́ша. И рече́ им: прииди́те вы са́ми в пу́сто ме́сто еди́ни и почи́йте ма́ло. Бя́ху бо приходя́щии и отходя́щии мно́зи, и ни я́сти им бе когда́. И идо́ша в пу́сто ме́сто корабле́м еди́ни. И ви́деша их иду́щя, и позна́ша их мно́зи, и пе́ши от всех градо́в стица́хуся та́мо, и предвари́ша их, и снидо́шася к Нему́. И изше́д ви́де Иису́с наро́д мног и милосе́рдова о них, зане́ бя́ху я́ко о́вцы не иму́щыя па́стыря, и нача́т их учи́ти мно́го. И уже́ часу́ мно́гу бы́вшу, присту́пльше к Нему́ ученицы́ Его́, глаго́лаша, я́ко пу́сто есть ме́сто, и уже́ час мног. Отпусти́ их, да ше́дше во окре́стных се́лех и ве́сех ку́пят себе́ хле́бы, не и́мут бо чесо́ я́сти. Он же отвеща́в рече́ им: дади́те им вы я́сти. И глаго́лаша Ему́: да ше́дше ку́пим двема́ сто́ма пе́нязь хле́бы и да́мы им я́сти? Он же рече́ им: коли́ко хле́бы и́мате? Иди́те и ви́дите. И уве́девше глаго́лаша: пять хлеб, и две ры́бе. И повеле́ им посади́ти вся на спо́ды на спо́ды на траве́ зелене́. И возлего́ша на ле́хи на ле́хи по сту и по пяти́десят. И прие́м пять хлеб и две ры́бе, воззре́в на не́бо, благослови́ и преломи́ хле́бы, и дая́ше ученико́м Свои́м, да предлага́ют пред ни́ми, и о́бе ры́бе раздели́ всем. И ядо́ша вси и насы́тишася. И взя́ша укру́хи, двана́десяте ко́шя испо́лнь, и от ры́бу. Бя́ше же я́дших хле́бы я́ко пять ты́сящ муже́й. И а́бие пону́ди ученики́ Своя́ вни́ти в кора́бль и вари́ти Его́ на о́ном полу́ к Вифсаи́де, до́ндеже Сам отпу́стит наро́ды.

Послание ко евреем, зачало 314

Бра́тие, Авраа́му обетова́я Бог, поне́же ни eди́нем имя́ше бо́льшим кля́тися, кля́тся Собо́ю, глаго́ля: вои́стинну благосло́вствуя благословлю́ тя, и мно́жя умно́жу тя. И та́ко долготерпе́в, получи́ обетова́ние. Челове́цы у́бо бо́льшим клену́тся, и вся́кому их прекосло́вию кончи́на во извеще́ние, кля́тва eсть. В не́мже ли́шше хотя́ Бог показа́ти насле́дником обетова́ния непрело́жное сове́та Своего́, хода́тайствова кля́твою. Я́ко да двема́ ве́щма непрело́жныма, в не́юже не возмо́жно солга́ти Бо́гу, кре́пкое утеше́ние и́мамы прибе́гшии, я́тися за предлежа́щее упова́ние. Éже а́ки ко́тву и́мамы души́, тве́рду же и изве́стну, и входя́щую во вну́треннее заве́сы. Иде́же предте́ча о нас вни́де Иису́с, по чи́ну Мелхиседе́кову, Первосвяще́нник быв во ве́ки.

Евангелие от Матфеа, зачало 96

Рече́ Госпо́дь ко прише́дшым к Нему́ иуде́ем: го́ре вам, кни́жницы и фарисе́е, лицеме́ри, я́ко зи́ждете гро́бы проро́ческия, и кра́сите ра́ки пра́ведных, и глаго́лете: а́ще бы́хом бы́ли во дни оте́ц на́ших, не бы́хом у́бо о́бщницы им бы́ли в кро́ви проро́к. Те́мже са́ми свиде́тельствуете себе́, я́ко сы́нове есте́ изби́вших проро́ки, и вы испо́лните ме́ру оте́ц ва́ших. Змия́, порожде́ния ехи́днова, ка́ко убежите́ от суда́ огня́ гее́нскаго? Сего́ ра́ди, се Аз послю́ к вам проро́ки и прему́дры и кни́жники, и от них убие́те и ра́спнете, и от них бие́те на со́нмищах ва́ших, и изжене́те от гра́да во град, я́ко да прии́дет на вы вся́ка кровь пра́ведна, пролива́емая на земли́, от кро́ве А́веля пра́веднаго до кро́ве Заха́рии сы́на Варахи́ина, его́же уби́сте между́ це́рковию и олтаре́м. Ами́нь глаго́лю вам, я́ко прии́дут вся сия́ на род сей. Иерусали́ме, Иерусали́ме, изби́вый проро́ки и ка́мением побива́яй по́сланныя к нему́, колькра́ты восхоте́х собра́ти ча́да твоя́, я́коже собира́ет ко́кош птенцы́ своя́ под криле́, и не восхоте́сте? Се, оставля́ется вам дом ваш пуст. Глаго́лю бо вам, я́ко не и́мате Мене́ ви́дети отсе́ле, до́ндеже рече́те: благослове́н Гряды́й во и́мя Госпо́дне.