Богослужебные чтения 14 июля 2024 года

Утр. – Ев. 3-е, Мк., 71 зач., XVI, 9–20. Лит. – Рим., 88 зач., V, 1–10. Мф., 18 зач., VI, 22–33. Бессребреников: 1 Кор., 153 зач., XII, 27 – XIII, 8. Мф., 34 зач. (от полу'), X, 1, 5–8.

Евангелие от Марка, зачало 71

Во вре́мя о́но, воскре́с Иису́с зау́тра в пе́рвую суббо́ту, яви́ся пре́жде Мари́и Магдали́ни, из нея́же изгна́ седмь бесо́в. Она́ же ше́дши возвести́ с Ним бы́вшым, пла́чущымся и рыда́ющым, и они́ слы́шавше, я́ко жив есть и ви́ден бысть от нея́, не я́ша ве́ры. По сих же двема́ от них гряду́щема яви́ся ине́м о́бразом, иду́щема на село́. И та ше́дша возвести́ста про́чым, и ни те́ма ве́ры я́ша. Последи́ же возлежа́щым им единомуна́десяте яви́ся, и поноси́ неве́рствию их и жестосе́рдию, я́ко ви́девшым Его́ воста́вша не я́ша ве́ры. И рече́ им: ше́дше в мир весь, пропове́дите Ева́нгелие всей тва́ри. И́же ве́ру име́т и крести́тся, спасе́н бу́дет, а и́же не име́т ве́ры, осужде́н бу́дет. Зна́мения же ве́ровавшым сия́ после́дуют: и́менем Мои́м бе́сы иждену́т, язы́ки возглаго́лют но́вы, змия́ во́змут, а́ще и что сме́ртно испию́т, не вреди́т их, на неду́жныя ру́ки возложа́т, и здра́ви бу́дут. Госпо́дь же у́бо, по глаго́лании Его́ к ним, вознесе́ся на не́бо и се́де одесну́ю Бо́га. Они́ же изше́дше пропове́даша всю́ду, Го́споду поспе́шствующу и сло́во утвержда́ющу после́дствующими зна́меньми. Ами́нь.

Послание к римляном, зачало 88А

Бра́тие, оправди́вшеся ве́рою, мир и́мамы к Бо́гу Го́сподем на́шим Иису́с Христо́м, И́мже и приведе́ние обрето́хом ве́рою во благода́ть сию́, в не́йже стои́м, и хва́лимся упова́нием сла́вы Бо́жия. Не то́чию же, но и хва́лимся в ско́рбех, ве́дяще, я́ко скорбь терпе́ние соде́ловает, терпе́ние же иску́сство, иску́сство же упова́ние, упова́ние же не посрами́т. Я́ко любы́ Бо́жия излия́ся в сердца́ на́ша Ду́хом Святы́м да́нным нам. Еще́ бо Христо́с су́щым нам немощны́м, по вре́мени за нечести́вых у́мре. Едва́ бо за пра́ведника кто у́мрет, за блага́го бо не́гли кто и де́рзнет умре́ти. Составля́ет же Свою́ любо́вь к нам Бог, я́ко еще́ гре́шником су́щым нам, Христо́с за ны у́мре. Мно́го у́бо па́че, оправда́ни бы́вше ны́не Кро́вию Его́, спасе́мся Им от гне́ва. А́ще бо врази́ бы́вше примири́хомся Бо́гу сме́ртию Сы́на Его́, мно́жае па́че примири́вшеся спасе́мся в животе́ Его́.

Евангелие от Матфеа, зачало 18

Рече́ Госпо́дь: свети́льник те́лу есть о́ко. А́ще у́бо бу́дет о́ко твое́ про́сто, все те́ло твое́ све́тло бу́дет. А́ще ли о́ко твое́ лука́во бу́дет, все те́ло твое́ те́мно бу́дет. А́ще у́бо свет, и́же в тебе́, тма есть, то тма кольми́? Никто́же мо́жет двема́ господи́нома рабо́тати: лю́бо еди́наго возлю́бит, а друга́го возненави́дит, или́ еди́наго держи́тся, о друзе́м же нераде́ти на́чнет. Не мо́жете Бо́гу рабо́тати и мамо́не. Сего́ ра́ди глаго́лю вам: не пецы́теся душе́ю ва́шею, что я́сте, или́ что пие́те, ни те́лом ва́шим, во что облече́теся. Не душа́ ли бо́льши есть пи́щи, и те́ло оде́жди? Воззри́те на пти́цы небе́сныя, я́ко не се́ют, ни жнут, ни собира́ют в жи́тницы, и Оте́ц ваш Небе́сный пита́ет их. Не вы ли па́че лу́чши их есте́? Кто же от вас пеки́йся мо́жет приложи́ти во́зрасту своему́ ла́коть еди́н? И о оде́жди что пече́теся? Смотри́те крин се́льных, ка́ко расту́т, не тружда́ются, ни пряду́т. Глаго́лю же вам, я́ко ни Соломо́н во всей сла́ве свое́й облече́ся, я́ко еди́н от сих. А́ще же се́но се́льное, днесь су́ще и у́тре в пещь вмета́емо, Бог та́ко одева́ет, не мно́го ли па́че вас, малове́ри? Не пецы́теся у́бо, глаго́люще: что я́мы, или́ что пие́м, или́ чим оде́ждемся? Всех бо сих язы́цы и́щут, весть бо Оте́ц ваш Небе́сный, я́ко тре́буете сих всех. Ищи́те же пре́жде Ца́рствия Бо́жия и пра́вды Его́, и сия́ вся приложа́тся вам.

Послание к коринфяном первое, зачало 153

Бра́тие, вы есте́ те́ло Христо́во и у́ди от ча́сти. И о́вы у́бо положи́ Бог в Це́ркви, пе́рвее апо́столы, второ́е проро́ки, тре́тие учи́тели, пото́м же си́лы, та́же дарова́ния исцеле́ний, заступле́ния, правле́ния, ро́ди язы́ков. Еда́ вси апо́столи? Еда́ вси проро́цы? Еда́ вси учи́тели? Еда́ вси си́лы? Еда́ вси дарова́ния и́мут исцеле́ний? Еда́ вси язы́ки глаго́лют? Еда́ вси сказу́ют? Ревну́йте же дарова́ний бо́льших, и еще́ по превосхожде́нию путь вам показу́ю. А́ще язы́ки челове́ческими глаго́лю и а́нгельскими, любве́ же не и́мам, бых я́ко медь звеня́щи, или́ кимва́л звяца́яй. И а́ще и́мам проро́чество и вем та́йны вся, и весь ра́зум, и а́ще и́мам всю ве́ру, я́ко и го́ры преставля́ти, любве́ же не и́мам, ничто́же есмь. И а́ще разда́м вся име́ния моя́, и а́ще преда́м те́ло мое́, во е́же сжещи́ е́, любве́ же не и́мам, ника́я по́льза ми есть. Любы́ долготерпи́т, милосе́рдствует, любы́ не зави́дит, любы́ не превозно́сится, не горди́тся, ни безчи́нствует, не и́щет своя́ си, не раздража́ется, не мы́слит зла, не ра́дуется о непра́вде, ра́дуется же о и́стине; вся лю́бит, всему́ ве́ру е́млет, вся упова́ет, вся терпи́т. Любы́ николи́же отпа́дает.

Евангелие от Матфеа, зачало 34Б

Во вре́мя о́но, призва́ Иису́с обана́десять ученики́ Своя́, даде́ им власть на дусе́х нечи́стых, я́ко да изго́нят их, и цели́ти всяк неду́г и вся́ку боле́знь. Сия́ обана́десять посла́ Иису́с, запове́да им, глаго́ля: на путь язы́к не иди́те и во град Самаря́нский не вни́дите. Иди́те же па́че ко овца́м поги́бшым до́му Изра́илева. Ходя́ще же пропове́дуйте, глаго́люще, я́ко прибли́жися Ца́рствие Небе́сное. Боля́щыя изцеля́йте, прокаже́нныя очища́йте, ме́ртвыя воскреша́йте, бе́сы изгоня́йте, ту́не прия́сте, ту́не дади́те.