Шрифт

Месяцеслов / Календарь 2020

26 июня 2020 года - Пятница

Седмица 3-я по Пятидесятнице, глас 1

Апостольский пост

Сегодня Святая Церковь совершает память:

Мц. Акили́ны Старшей (293); свт. Трифи́ллия, епископа Левкусии Кипрской (ок. 370); прп. Александры Дивеевской (Мельгуновой) (1789).

Прпп. Андрони́ка, игумена (1395), и Са́ввы (XV), Московских; мц. Антони́ны Никейской (284–305); прпп. А́нны (Евфимиа́на) (826) и сына ее, Иоа́нна Вифинского (IX).

Сщмч. Алекси́я Архангельского, пресвитера (1918); мц. Пелаги́и Жидко (1944).

Мученице Акилине Старшей

Тропарь, глас 4:

А́гница Твоя́, Иису́се, Акилина, зове́т ве́лиим гла́сом: Тебе́, Женише́ мой, люблю́, и Тебе́ и́щущи, страда́льчествую и сраспина́юся и спогреба́юся Креще́нию Твое́му и стражду́ Тебе́ ра́ди, я́ко да ца́рствую в Тебе́ и умира́ю за Тя, да и живу́ с Тобо́ю; но я́ко же́ртву непоро́чную приими́ мя, с любо́вию поже́ршуюся Тебе́. Тоя́ моли́твами, я́ко Ми́лостив, спаси́ ду́ши на́ша.

Кондак, глас 2:

Де́вства твоего́ добро́тами предочи́стивши ду́шу твою́,/ на высоту́ муче́нием востекла́ еси́, Акили́но всечестна́я,/ любо́вию Жениха́ твоего́ Христа́ уязви́вшися,/ Ему́же со А́нгелы предстои́ши, веселя́щися,// с ни́миже не преста́й моля́ся о всех нас.

Святителю Трифиллию, епископу Левкусии Кипрской

Тропарь, глас 4:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́,/ Я́же веще́й И́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Трифи́ллие,/ моли́ Христа́ Бо́га// спасти́ся душа́м на́шим.

Кондак, глас 8:

Изря́дством жития́ чистоту́ де́вства прие́м, Трифи́ллие,/ первопресто́льник показа́лся еси́ Левкуси́и/ и яви́лся еси́ тем провозвести́тель и Богоразу́мия наста́вник./ Сего́ ра́ди ра́достно взыва́ем ти:// ра́дуйся, святи́телей украше́ние.

Преподобной Александре Дивеевской

Тропарь, глас 3:

Раба́ Христо́ва и избра́ннице Пречи́стыя Его́ Ма́тери, Ки́евского уде́ла Ея́ жи́тельнице и моли́твеннице, земли́ Ея́ обетова́нныя иска́тельнице, Диве́евския оби́тели первонача́льнице и зижди́тельнице, моли́ся за ны, Алекса́ндро преподо́бная, да спасе́т нас Пресвята́я Богоро́дица и поми́лует Свята́я Тро́ица, да изба́вимся мы му́ки а́дския и насле́дуем блаже́нство ра́йское.

Кондак, глас 3:

Преподо́бная ма́ти Алекса́ндро, любо́вь двуеди́ную к Бо́гу и бли́жним твои́м стяжа́ла еси́ и избра́нницею Бо́жией Ма́тери яви́лася. Ея́же после́дний уде́л в земли́ Росси́стей обрела́ еси́, и Диве́евскою первонача́льницею ста́ти сподо́бившися, вели́кому Серафи́му печа́ловатися о нем завеща́ла еси́. Зде́ же и поко́ишися с ним. Ны́не моле́ния на́ша приими́ и ко Го́споду вознеси́, да поми́лует ны.

Молитва:

О, преподо́бная и богоно́сная ма́ти Алекса́ндро, Диве́евская первона́чальнице и похвало́, ве́ру несумне́нную дела́ми богоуго́дными яви́вшая, во исполне́ние обетова́ния Богоро́дицы в труде́х и по́двизех непреста́нных неле́стно потруди́вшаяся, и в благоустрое́нии земли́ святы́я Ея́ все име́ние и житие́ твое́ ижди́вшая, проро́чество Цари́цы Небе́сныя в насле́дие избра́ннику Ея́ саро́вскому пред кончи́ною твое́ю пра́ведною вве́рившая, и ду́шу твою́, сами́м Го́сподом предочи́щенную, в ру́це Бо́жии преда́вшая, моли́ся за ны, малове́рныя и неради́выя, да и мы присту́пим к до́брому де́ланию с пра́вою ве́рою, в терпе́нии содева́я свое́ спасе́ние, за Златоу́стом взыва́юще в печа́ли и ра́дости, ско́рби и утеше́нии: сла́ва Бо́гу за вся́. Ами́нь.

Преподобным Андронику, Савве, Александру Московским, Даниилу Черному и Андрею Рублеву

Тропарь, глас 2:

Плоды́ доброде́телей на земли́ прине́сше,/ преподо́бнии отцы́,/ в Небе́сных черто́зех ны́не благоуха́ете, я́ко ра́йстии цве́ти,/ и лице́м к лицу́ зри́те Пресвяту́ю Тро́ицу,// Ю́же дерзнове́нно моли́те// спасти́ся душа́м на́шим.

Кондак, глас 3:

Вас мо́лим, преподо́бнии отцы́ на́ши,/ те́лом почива́ющия на земли́,/ ду́хом же Бо́жию Престо́лу предстоя́щия:/ моли́теся о гра́де Москве́// и о всех, почита́ющих честну́ю па́мять ва́шу.

Молитва:

О, преподо́бнии и Богоно́снии отцы́, па́стырие и учи́телие и неле́ностнии наста́вницы на́ши! О земны́х небре́гше, в зе́млю кро́тких всели́лися есте́, из нея́же израсти́ли есте́ плоды́ доброде́телей; тле́нныя тала́нты не сокро́виществовавше, нетле́нныя тала́нты преумно́жили есте́ во сто крат и мно́жае; челове́ческия сла́вы теку́щия не иска́вше, возда́ли есте́ сла́ву Бо́гу и Спа́су всех и сего́ ра́ди прославля́етеся ны́не на Небесе́х в Це́ркви перворо́дных. Моли́те Человеколю́бца Спа́са Христа́, да просвети́т ны, помраче́нныя, покая́нием, да освяти́т ны, гре́шныя, си́лою, наи́тием и де́йствием благода́ти Свята́го Ду́ха, чрез досто­пок­ла­ня́емыя ико́ны подае́мою, да поми́лует ны, немощны́я, моли́твами ва́шими и предста́тельством Пренепоро́чныя Его́ Ма́тере и сподо́бит узре́ти сла́ву Пречи́стого ли́ка Своего́ во Ца́рствии Небе́снем. Ами́нь.