Богослужебные чтения 14 мая 2026 года

Деян., 35 зач., XIV, 20–27. Ин., 35 зач., IX, 39 – X, 9. Прор.: 1 Кор., 156 зач., XIV, 20–25. Лк., 14 зач., IV, 22–30 .

Апостол в Деяниих, зачало 35.

Во дни о́ны, изы́де Па́вел с Варна́вою в Де́рвию. Благовествова́ста же гра́ду тому́ и научи́ста мно́ги, возврати́стася в Ли́стру и Икони́ю и Антиохи́ю, утвержда́юща ду́шы ученико́в, моля́ща пребы́ти в ве́ре, и я́ко мно́гими скорбьми́ подоба́ет нам вни́ти в Ца́рствие Бо́жие. Рукополо́жше же им пресви́теры на вся це́ркви и помоли́вшеся с посто́м, преда́ста их Го́сподеви, в Него́же ве́роваша. И проше́дша Писиди́ю, приидо́ста в Памфили́ю. И глаго́лавша в Перги́и сло́во Госпо́дне, снидо́ста во Аттали́ю. И отту́ду отплы́ста во Антиохи́ю, отню́дуже бе́ста пре́дана благода́ти Бо́жией в де́ло, е́же сконча́ста. Прише́дша же и собра́вша це́рковь, сказа́ста, ели́ка сотвори́ Бог с ни́ма и я́ко отве́рзе язы́ком дверь ве́ры.

Евангелие Иоанна, зачало 35.

Рече́ Госпо́дь ко прише́дшым к Нему́ иуде́ем: на суд Аз в мир сей приидо́х, да неви́дящии ви́дят, и ви́дящии сле́пи бу́дут. И слы́шаша от фарисе́й сия́ су́щии с Ним и ре́ша Ему́: еда́ и мы сле́пи есмы́? Рече́ им Иису́с: а́ще бы́сте сле́пи бы́ли, не бы́сте име́ли греха́, ны́не же глаго́лете, я́ко ви́дим, грех ваш пребыва́ет. Ами́нь, ами́нь глаго́лю вам, не входя́й две́рьми во двор о́вчий, но прела́зя и́нуде, той тать есть и разбо́йник, а входя́й две́рьми па́стырь есть овца́м, сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их. И егда́ своя́ о́вцы иждене́т, пред ни́ми хо́дит, и о́вцы по нем и́дут, я́ко ве́дят глас его́, по чужде́м же не и́дут, но бежа́т от него́, я́ко не зна́ют чужда́го гла́са. Сию́ при́тчу рече́ им Иису́с, они́ же не разуме́ша, что бя́ше, я́же глаго́лаше им. Рече́ же па́ки им Иису́с: ами́нь, ами́нь глаго́лю вам, я́ко Аз есмь дверь овца́м. Вси, ели́ко их прии́де пре́жде Мене́, та́тие суть и разбо́йницы, но не послу́шаша их о́вцы. Аз есмь дверь, Мно́ю а́ще кто вни́дет, спасе́тся, и вни́дет и изы́дет, и па́жить обря́щет.

Послание к коринфяном первое, зачало 156

Бра́тие, не де́ти быва́йте умы́, но зло́бою младе́нствуйте, умы́ же соверше́ни быва́йте. В зако́не пи́шет: я́ко ины́ми язы́ки и устны́ ины́ми возглаго́лю лю́дем сим, и ни та́ко послу́шают Мене́, глаго́лет Госпо́дь. Те́мже язы́цы в зна́мение суть не ве́рующым, но неве́рным, а проро́чество не неве́рным, но ве́рующым. А́ще у́бо сни́дется це́рковь вся вку́пе, и вси язы́ки глаго́лют, вни́дут же и неразу́мивии или́ неве́рнии, не реку́т ли, я́ко бесну́етеся? А́ще же вси проро́чествуют, вни́дет же не́кий неве́рен или́ неве́жда, облича́ется все́ми, и истязу́ется от всех, и си́це та́йная се́рдца его́ явле́на быва́ют, и та́ко пад ниц покло́нится Бо́гови, возвеща́я, я́ко вои́стинну Бог с ва́ми есть.

Евангелие от Луки, зачало 14

Во вре́мя о́но, дивля́хуся наро́ди о словесе́х благода́ти, исходя́щих из уст Иису́совых, и глаго́лаху: не Сей ли есть сын Ио́сифов? И рече́ к ним: вся́ко рече́те Ми при́тчу сию́: врачу́, исцели́ся Сам, ели́ка слы́шахом бы́вшая в Капернау́ме, сотвори́ и зде во оте́чествии Свое́м. Рече́ же: ами́нь глаго́лю вам, я́ко ни кото́рый проро́к прия́тен есть во оте́чествии свое́м. Пои́стинне же глаго́лю вам: мно́ги вдови́цы бе́ша во дни Илиины́ во Изра́или, егда́ заключи́ся не́бо три ле́та и ме́сяц шесть, я́ко бысть глад вели́к по всей земли́, и ни ко еди́ной их по́слан бысть Илиа́, то́кмо в Саре́пту Сидо́нскую к жене́ вдови́це. И мно́зи прокаже́ни бе́ху при Елиссе́и проро́це во Изра́или, и ни еди́н же от них очи́стися, то́кмо Неема́н Сириани́н. И испо́лнишася вси я́рости в со́нмищи, слы́шавшии сия́. И воста́вше изгна́ша Его́ вон из гра́да, и ведо́ша Его́ до верху́ горы́, на не́йже град их со́здан бя́ше, да бы́ша Его́ низри́нули. Он же проше́д посреде́ их, идя́ше.