Богослужебные чтения 14 февраля 2025 года

1 Ин., 70 зач., II, 7–17. Мк., 63 зач., XIV, 3–9, и за субботу (под зачало): 2 Тим., 295 зач., III, 1–9. Лк., 103 зач., XX, 45 – XXI, 4. Мч.: Рим., 99 зач., VIII, 28–39. Лк., 51 зач. (от полу'), X, 19–21.

Соборное послание Иоаннова первое, зачало 70

Возлю́бленнии, не за́поведь но́ву пишу́ вам, но за́поведь ве́тху, ю́же име́сте испе́рва. За́поведь ве́тха есть сло́во, е́же слы́шасте испе́рва. Па́ки за́поведь но́ву пишу́ вам, е́же есть пои́стинне в Нем и в вас, я́ко тма ми́мо хо́дит и свет и́стинный сей сия́ет. Глаго́ляй во све́те бы́ти, а бра́та своего́ ненави́дит, во тме есть досе́ле. Любя́й бра́та своего́ во све́те пребыва́ет, и собла́зна в нем несть. А ненави́дяй бра́та своего́ во тме есть, и во тме хо́дит, и не весть ка́мо и́дет, я́ко тма ослепи́ о́чи ему́. Пишу́ вам ча́дца, я́ко оставля́ются вам греси́ и́мене Его́ ра́ди. Пишу́ вам отцы́, я́ко позна́сте Безнача́льнаго. Пишу́ вам ю́ноши, я́ко победи́сте лука́ваго. Пишу́ вам де́ти, я́ко позна́сте Отца́. Писа́х вам отцы́, я́ко позна́сте Иско́ннаго. Писа́х вам ю́ноши, я́ко кре́пцы есте́, и сло́во Бо́жие в вас пребыва́ет, и победи́сте лука́ваго. Не люби́те ми́ра, ни я́же в ми́ре, а́ще кто лю́бит мир, несть любве́ О́тчи в нем. Я́ко все е́же в ми́ре, по́хоть плотска́я и по́хоть очи́ма и го́рдость жите́йская, несть от Отца́, но от ми́ра сего́ есть. И мир прехо́дит, и по́хоть его́, а творя́й во́лю Бо́жию пребыва́ет во ве́ки.

Евангелие от Марка, зачало 63

Во вре́мя о́но, су́щу Иису́сови в Вифа́нии, в дому́ Си́мона прокаже́ннаго, возлежа́щу Ему́, прии́де жена́, иму́щи алава́стр ми́ра на́рднаго пистики́я многоце́нны, и сокру́шши алава́стр, возлива́ше Ему́ на главу́. Бя́ху же не́цыи негоду́юще в себе́ и глаго́люще: во что ги́бель сия́ ми́рная бысть? Можа́ше бо сие́ продано́ бы́ти вя́щше трех сот пе́нязь и да́тися ни́щым. И преща́ху ей. Иису́с же рече́: оста́вите ю́, что ей труды́ даете́? Добро́ де́ло соде́ла о Мне. Всегда́ бо ни́щыя и́мате с собо́ю, и егда́ хо́щете, мо́жете им добро́ твори́ти, Мене́ же не всегда́ и́мате. Е́же име́ сия́, сотвори́, предвари́ пома́зати Мое́ те́ло на погребе́ние. Ами́нь глаго́лю вам: иде́же а́ще пропове́стся Ева́нгелие сие́ во всем ми́ре, и е́же сотвори́ сия́, глаго́лано бу́дет в па́мять ея́.

Послание к Тимофею второе, зачало 295

Ча́до Тимофе́е, сие́ веждь, я́ко в после́дния дни наста́нут времена́ лю́та. Бу́дут бо челове́цы самолю́бцы, сребролю́бцы, велича́ви, го́рды, ху́льницы, роди́телем проти́вящиися, неблагода́рни, непра́ведни, нелюбо́вни, непримири́тельни, проде́рзиви, возносли́ви, прелага́тае, клеветницы́, невозде́ржницы, некро́тцы, неблаголю́бцы, преда́теле, на́гли, напыще́ни, сластолю́бцы па́че не́жели боголю́бцы, иму́щии о́браз благоче́стия, си́лы же его́ отве́ргшиися. И сих отвраща́йся. От сих бо суть поныря́ющии в до́мы и пленя́ющии жени́шца отягоще́ны греха́ми, води́мы по́хотьми разли́чными, всегда́ уча́щяся и николи́же в ра́зум и́стины приити́ могу́щя. Я́коже Ианни́й и Иамври́й проти́вистася Моисе́ю, та́кожде и си́и противля́ются и́стине, челове́цы растле́нни умо́м и неиску́сни о ве́ре. Но не преуспе́ют бо́лее: безу́мие бо их явле́но бу́дет всем, я́коже и о́нех бысть.

Евангелие от Луки, зачало 103

Рече́ Госпо́дь Свои́м ученико́м: внемли́те себе́ от кни́жник хотя́щих ходи́ти во оде́ждах и лю́бящих целова́ния на то́ржищих и председа́ния на со́нмищах и преждезва́ния на ве́черях, и́же снеда́ют до́мы вдови́ц и вино́ю дале́че мо́лятся, си́и прии́мут ли́шше осужде́ние. Воззре́в же ви́де вмета́ющыя в храм набдя́щий име́ния да́ры своя́ бога́тыя. Ви́дев же и не́кую вдови́цу убо́гу вмета́ющу ту две ле́пте, и рече́: вои́стинну глаго́лю вам, я́ко вдови́ца сия́ убо́гая мно́жае всех вве́рже, вси бо си́и от избы́тка своего́ вверго́ша в да́ры Бо́гови, сия́ же от лише́ния своего́ все житие́, е́же име́, вве́рже.

Послание к римляном, зачало 99

Бра́тие, ве́мы я́ко лю́бящым Бо́га вся поспешеству́ют во благо́е, су́щым по предуве́дению зва́нным. И́хже бо предуве́де, тех и предуста́ви сообра́зным бы́ти о́бразу Сы́на Своего́, я́ко бы́ти Ему́ перворо́дну во мно́гих бра́тиях. А и́хже предуста́ви, тех и призва́, а и́хже призва́, сих и оправда́, а и́хже оправда́, сих и просла́ви. Что у́бо рече́м к сим, а́ще Бог по нас, кто на ны? И́же у́бо Своего́ Сы́на не пощаде́, но за ны вся пре́дал есть Его́, ка́ко у́бо не и с Ним вся нам да́рствует? Кто пое́млет на избра́нныя Бо́жия? Бог оправда́яй. Кто осужда́яй? Христо́с Иису́с уме́рый, па́че же и воскресы́й, И́же и есть одесну́ю Бо́га, И́же и хода́тайствует о нас. Кто ны разлучи́т от любве́ Бо́жия? Скорбь ли, или́ теснота́, или́ гоне́ние, или́ глад, или́ нагота́, или́ беда́, или́ мечь? Я́коже есть пи́сано: я́ко Тебе́ ра́ди умерщвля́еми есмы́ весь день, вмени́хомся я́коже о́вцы заколе́ния. Но о сих всех препобежда́ем за Возлю́бльшаго ны. Извести́хся бо, я́ко ни смерть, ни живо́т, ни А́нгели, ни Нача́ла, ниже́ Си́лы, ни настоя́щая, ни гряду́щая, ни высота́, ни глубина́, ни и́на тварь ка́я возмо́жет нас разлучи́ти от любве́ Бо́жия, я́же о Христе́ Иису́се Го́споде на́шем.

Евангелие от Луки, зачало 51Б

Рече́ Госпо́дь Свои́м ученико́м: се даю́ вам власть наступа́ти на змию́ и на скорпи́ю и на всю си́лу вра́жию, и ничесо́же вас вреди́т. Оба́че о сем не ра́дуйтеся, я́ко ду́си вам повину́ются, ра́дуйтеся же, я́ко имена́ ва́ша напи́сана суть на небесе́х. В той час возра́довася ду́хом Иису́с и рече́: испове́даю Ти ся, О́тче, Го́споди небесе́ и земли́, я́ко утаи́л еси́ сия́ от прему́дрых и разу́мных, и откры́л еси́ та младе́нцем, ей, О́тче, я́ко та́ко бысть благоволе́ние пред Тобо́ю.