Богослужебные чтения 13 февраля 2026 года

Соборное послание Иоаннова второе, зачало 75

Ста́рец избра́нней господы́не и ча́дом ея́, и́хже аз люблю́ вои́стинну, и не аз то́чию, но и вси разуме́вшии и́стину. За и́стину пребыва́ющую в нас, и с на́ми бу́дет во ве́ки. Да бу́дет с ва́ми благода́ть, ми́лость, мир от Бо́га Отца́, и от Го́спода Иису́са Христа́, Сы́на О́тча, во и́стине и любви́. Возра́довахся зело́, я́ко обрето́х от чад твои́х ходя́щя во и́стине, я́коже за́поведь прия́хом от Отца́. И ны́не молю́ тя, госпоже́, не я́ко за́поведь пишу́ тебе́ но́ву, но ю́же и́мамы испе́рва, да лю́бим друг дру́га. И сия́ есть любы́, да хо́дим по за́поведем Его́. Сия́ есть за́поведь, я́коже слы́шасте испе́рва, да в ней хо́дите. Зане́ мно́зи лестцы́ внидо́ша в мир, не испове́дающе Иису́са Христа́ прише́дша во пло́ти, сей есть льстец и анти́христ. Блюди́те себе́, да не погубите́ я́же де́ласте до́брая, но да мзду соверше́нну восприи́мете. Всяк преступа́яй и не пребыва́яй во уче́нии Христо́ве, Бо́га не и́мать, пребыва́яй же во уче́нии Христо́ве, сей и Отца́ и Сы́на и́мать. А́ще кто прихо́дит к вам, и сего́ уче́ния не прино́сит, не прие́млите его́ в дом, и ра́доватися ему́ не глаго́лите. Глаго́ляй бо ему́ ра́доватися, сообща́ется дело́м его́ злым. Мно́га име́х писа́ти вам, и не восхоте́х хартие́ю и черни́лом, но наде́юся приити́ к вам и усты́ ко усто́м глаго́лати, да ра́дость ва́ша бу́дет испо́лнена. Целу́ют тя ча́да сестры́ твоея́ избра́нныя. Ами́нь.

Евангелие от Марка, зачало 68

Во вре́мя о́но, во́ини пое́мше Иису́са, ведо́ша да Его́ ра́спнут, и приведо́ша Его́ на Голго́фу ме́сто, е́же есть сказа́емо Ло́бное ме́сто. Бе же час тре́тий, и распя́ша Его́. Бы́вшу же часу́ шесто́му, тма бысть по всей земли́ до часа́ девя́таго. И в час девя́тый возопи́ Иису́с гла́сом ве́лиим, глаго́ля: Елои́, Елои́, лима́ савахфани́? Е́же есть сказа́емо: Бо́же Мой, Бо́же Мой, почто́ Мя оста́вил еси́? И не́цыи от предстоя́щих слы́шавше, глаго́лаху: се Илию́ гласи́т. Тек же еди́н, и напо́лнив гу́бу о́цта, и возло́жь на трость, напоя́ше Его́, глаго́ля: оста́вите, да ви́дим, а́ще прии́дет Илиа́ сня́ти Его́. Иису́с же пущь глас ве́лий, и́здше. И заве́са церко́вная раздра́ся на дво́е, свы́ше до ни́зу. Ви́дев же со́тник стоя́й пря́мо Ему́, я́ко та́ко возопи́в и́здше, рече́: вои́стинну Челове́к Сей Сын бе Бо́жий. Бя́ху же и жены́ издале́ча зря́ще, в ни́хже бе Мари́а Магдали́на, и Мари́а Иа́кова ма́лаго и Иоси́и ма́ти, и Саломи́а, я́же, и егда́ бе в Галиле́и, хожда́ху по Нем и служа́ху Ему́, и и́ны мно́гия, я́же взыдо́ша с Ним во Иерусали́м.

Послание к коринфяном первое, зачало 153

Бра́тие, вы есте́ те́ло Христо́во и у́ди от ча́сти. И о́вы у́бо положи́ Бог в Це́ркви, пе́рвее апо́столы, второ́е проро́ки, тре́тие учи́тели, пото́м же си́лы, та́же дарова́ния исцеле́ний, заступле́ния, правле́ния, ро́ди язы́ков. Еда́ вси апо́столи? Еда́ вси проро́цы? Еда́ вси учи́тели? Еда́ вси си́лы? Еда́ вси дарова́ния и́мут исцеле́ний? Еда́ вси язы́ки глаго́лют? Еда́ вси сказу́ют? Ревну́йте же дарова́ний бо́льших, и еще́ по превосхожде́нию путь вам показу́ю. А́ще язы́ки челове́ческими глаго́лю и а́нгельскими, любве́ же не и́мам, бых я́ко медь звеня́щи, или́ кимва́л звяца́яй. И а́ще и́мам проро́чество и вем та́йны вся, и весь ра́зум, и а́ще и́мам всю ве́ру, я́ко и го́ры преставля́ти, любве́ же не и́мам, ничто́же есмь. И а́ще разда́м вся име́ния моя́, и а́ще преда́м те́ло мое́, во е́же сжещи́ е́, любве́ же не и́мам, ника́я по́льза ми есть. Любы́ долготерпи́т, милосе́рдствует, любы́ не зави́дит, любы́ не превозно́сится, не горди́тся, ни безчи́нствует, не и́щет своя́ си, не раздража́ется, не мы́слит зла, не ра́дуется о непра́вде, ра́дуется же о и́стине; вся лю́бит, всему́ ве́ру е́млет, вся упова́ет, вся терпи́т. Любы́ николи́же отпа́дает.

Евангелие от Матфеа, зачало 34Б

Во вре́мя о́но, призва́ Иису́с обана́десять ученики́ Своя́, даде́ им власть на дусе́х нечи́стых, я́ко да изго́нят их, и цели́ти всяк неду́г и вся́ку боле́знь. Сия́ обана́десять посла́ Иису́с, запове́да им, глаго́ля: на путь язы́к не иди́те и во град Самаря́нский не вни́дите. Иди́те же па́че ко овца́м поги́бшым до́му Изра́илева. Ходя́ще же пропове́дуйте, глаго́люще, я́ко прибли́жися Ца́рствие Небе́сное. Боля́щыя изцеля́йте, прокаже́нныя очища́йте, ме́ртвыя воскреша́йте, бе́сы изгоня́йте, ту́не прия́сте, ту́не дади́те.

Послание ко евреем, зачало 318А

Бра́тие, тако́в нам подоба́ше Архиере́й, преподо́бен, незло́бив, безскве́рнен, отлуче́н от гре́шник и вы́шше Небе́с быв. И́же не и́мать по вся дни ну́жды, я́коже первосвяще́нницы, пре́жде о свои́х гресе́х же́ртвы приноси́ти, пото́м же о людски́х: сие́ бо сотвори́ еди́ною, Себе́ прине́с. Зако́н бо челове́ки поставля́ет первосвяще́нники, иму́щыя не́мощь, сло́во же кля́твенное, е́же по зако́не, Сы́на во ве́ки соверше́нна. Глава́ же о глаго́лемых, такова́ и́мамы Первосвяще́нника, и́же се́де одесну́ю Престо́ла Вели́чествия на Небесе́х, святы́м служи́тель и ски́нии и́стинней, ю́же водрузи́ Госпо́дь, а не челове́к.

Евангелие от Иоанна, зачало 36

Рече́ Госпо́дь ко прише́дшым к Нему́ иуде́ем: Аз есмь дверь, Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т, Аз приидо́х, да живо́т и́мут и ли́шше и́мут. Аз есмь па́стырь до́брый, па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя́. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет еди́но ста́до, и еди́н Па́стырь.