17 февраля 2025 года - Понедельник

Сретению Господню (житие / история праздника)

Тропарь, глас 1:

Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды, Христо́с Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,// да́рующаго нам воскресе́ние.

Кондак, глас 1:

Утро́бу Деви́чу освяти́вый Рождество́м Твои́м/ и ру́це Симео́не благослови́вый,/ я́коже подоба́ше, предвари́в,/ и ны́не спасл еси́ нас, Христе́ Бо́же,/ но умири́ во бране́х жительство// и укрепи́ лю́ди, и́хже возлюби́л еси́, еди́не Человеколю́бче.

Преподобному Исидору Пелусиоту

Тропарь, глас 8:

В тебе́, о́тче, изве́стно спасе́ся, е́же по о́бразу: / прии́м бо крест, после́довал еси́ Христу́ / и, де́я, учи́л еси́ презира́ти у́бо плоть, прехо́дит бо, / прилежа́ти же о души́, ве́щи безсме́ртней. // Те́мже и со А́нгелы сра́дуется, преподо́бне Иси́доре, дух твой.

Кондак, глас 4:

Денни́цу другу́ю тя Це́рковь обре́тши, пресла́вне, / твои́х слове́с мо́лниями освеща́ема, / взыва́ет ти: // ра́дуйся, всеблаже́нне Богому́дре Иси́доре.

Благоверному князю Георгию (Юрию) Всеволодовичу Владимирскому (житие / история праздника)

Тропарь, глас 8:

На высоте́ вели́каго княже́ния седя́,/ яви́лся еси́, благоче́стием и ве́рою сия́я оте́честву своему́, я́ко со́лнце;/ по Святе́й Тро́ице ре́вностию разже́гся/ и за ве́ру кре́пко пострада́в, кровь твою́ пролия́л еси́./ Тем и отсе́ченая твоя́ за Христа́ глава́ свиде́тельствует я́ве о тебе́,/ приле́пшая по сме́рти к телеси́ твоему́,/ с не́юже и до днесь нетле́нны пребыва́ют мо́щи твоя́,/ от ни́хже источа́еши исцеле́ния душа́м и телесе́м на́шим./ Но я́ко дерзнове́ние име́я ко Христу́, страстоте́рпче Гео́ргие,/ непреста́нно моли́ держа́ву твою́ и сро́дник твои́х// безвре́дну сохрани́ти моли́твами твои́ми.

Кондак, глас 8:

Христо́ве сме́рти подо́бяся/ и Того́ испи́ти ча́шу возжеле́в, я́ко Живота́,/ за Него́же му́жески подвиза́лся еси́, презре́в земно́е ца́рство,/ от безбо́жных ва́рвар пострада́в до сме́рти,/ Гео́ргие Богому́дре.// Тем моли́, спасти́ся ве́рным лю́дем моли́твами твои́ми.

Молитва князю Георгию:

О, богоизбра́нный чудотво́рче, пресла́вный уго́дниче Христо́в, Це́ркве Правосла́вныя побо́рниче, Ца́рства Росси́йскаго защи́тниче, вели́кий кня́же Гео́ргие! Прекло́ньше коле́на, мо́лим тя: при́зри на ны гре́шныя, прибега́ющия к твоему́ заступле́нию, услы́ши сие́ ма́лое моле́ние на́ше и те́плым твои́м предста́тельством умоли́ ми́лостиваго Бо́га, Ему́же предстои́ши с ли́ки А́нгел и со все́ми святы́ми, да сохрани́т нас в едине́нии Правосла́вныя Це́ркве и утверди́т в сердца́х на́ших дух пра́выя ве́ры и благоче́стия, и изба́вит нас от вся́каго зла́го искуше́ния. По вели́цей любви́ твое́й, е́юже бли́жния твоя́ возлюби́л еси́, испроси́ у всеще́драго Го́спода Оте́честву твоему́, и на́шему ку́пно, мир и благоустрое́ние; всем же нам, недосто́йным, усе́рдно к тебе́ припа́дающим, богоуго́дное и безмяте́жное житие́. О святы́й засту́пниче наш, не оста́ви нас сла́бых и безпо́мощных, моли́ся за ны ко Го́споду и Пречи́стей Влады́чице Богоро́дице, подви́гни с собо́ю на моли́тву о нас богопросла́вленныя сро́дники твоя́, святы́я кня́зи Андре́я и Гле́ба, с ни́миже вку́пе зде на земли́ нетле́нными моща́ми почива́еши и на Небеси́, у Престо́ла Царя́ Небе́сного предстои́ши, да да́рует Он всеще́дрый вся нам, я́же к по́льзе вре́менней и ве́чней потре́бная; да не возда́ст нам по дело́м на́шим, но по неизрече́нному человеколю́бию Своему́ прости́т согреше́ния на́ша, да изба́вит нас от вся́кия ну́жды и печа́ли, ско́рби и боле́зни; да ниспосле́т нам благо́е наме́рение и си́лу подвиза́тися в исправле́нии жития́ на́шего, и в бу́дущем ве́це да сподо́бит нас вни́ти в Ца́рствие Небе́сное и сла́вити всесвято́е и́мя Отца́ и Сы́на и Свята́го Ду́ха во ве́ки веко́в. Ами́нь.

Преподобному Кириллу Новоезерскому (житие / история праздника)

Тропарь, глас 8:

Бо́жиим Ду́хом подвиза́емь,/ слез твои́х ту́чами изсо́хшее напои́л еси́,/ и безпло́тное в пусты́ни житие́ показа́л еси́,/ и е́же из глубины́ се́рдца бо́дренными моли́твами и посто́м/ благодея́ния труды́ уплодоноси́л еси́,/ и вселе́нную всю просвети́л еси́ сия́нием чуде́с твои́х,/ о́тче наш Кири́лле.// Моли́ Христа́ Бо́га, спасти́ся душа́м на́шим.

Кондак, глас 8:

Взбра́нному и кре́пкому адама́нту,/ прогони́телю бесо́в, но́вому чудотво́рцу/ победи́тельная, страсте́й злых свободи́вшеся,/ благода́рственная воспису́ем ти, о́тче наш Кири́лле./ Но я́ко име́я дерзнове́ние у Престо́ла Христо́ва,/ ве́рою чту́щих тя, град же и лю́ди, моли́твою твое́ю сохраня́й,// ты бо еси́ ста́ду твоему́ похвала́ и утвержде́ние.

Молитва Кириллу Новоезерскому:

О, вели́кий уго́дниче, пресла́вный чудотво́рче, Кири́лле блаже́нне! Душе́ю на Небеси́ Престо́лу Бо́жию предстоя́й и Тро́ичныя сла́вы наслажда́яйся, те́лом же на земли́ в Боже́ствественном хра́ме сем почива́яй и от него́ да́нною ти свы́ше благода́тию разли́чная источа́яй чудеса́: при́зри ми́лостивым о́ком на предстоя́щия честне́й твое́й ри́зе лю́ди и прося́щия си́льныя твоея́ по́мощи. Ты у́бо, я́ко стяжа́вый дерзнове́ние, испроси́ Це́ркви благостоя́ние, возду́ха благорастворе́ние, земли́ плодоно́сие. Изба́ви всех, ве́рою несумне́нною к Бо́гу приходя́щих и многоцеле́бныя мо́щи твоя́ благогове́йно почита́ющих, от вся́ких бед душе́вных и теле́сных, от всех томле́ний и прило́гов диа́вольских. Я́ко да твои́ми моли́твами наставля́еми, путь на земли́ маловре́меннаго жития́ на́шего безбе́дне соверши́м: улучи́м же на Небеси́ неконча́емый поко́й и просла́вим ку́пно с тобо́ю всех благи́х Да́теля, еди́наго в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Священномученику Николаю Кандаурову (житие / история праздника)

Тропарь, глас 3:

Це́ркве Ру́сския сто́лпе непоколеби́мый,/ благоче́стия пра́вило,/ жития́ ева́нгельскаго о́бразе,/ священному́чениче Нико́лае,/ Христа́ ра́ди пострада́вый да́же до кро́ве,/ Его́же моли́ усе́рдно,/ я́ко Нача́льника и Соверши́теля спасе́ния,/ Ру́сь Святу́ю утверди́ти в Правосла́вии// до сконча́ния ве́ка.

Кондак, глас 2:

Восхва́лим, ве́рнии,/ изря́днаго во свяще́нницех/ и сла́внаго в му́ченицех Нико́лае,/ Правосла́вия побо́рника и благоче́стия ревни́теля,/ земли́ Ру́сския кра́сное прозябе́ние,/ и́же страда́нием Небе́с дости́же/ и та́мо те́пле мо́лит Христа́ Бо́га// спасти́ся душа́м на́шим.

Священномученику Михаилу Рыбину (житие / история праздника)

Тропарь, глас 4:

Днесь радуется земля Московская,/ восхваляющи священномученика пресвитера Михаила,/ во дни гонений небоязненно Христа исповедавшаго/ и многия люди в Православней вере укрепившаго./ Мы же, страдания того почитающе,/ с верою и любовию вопием:/ о, пастырю верный и мучениче,/ молися о нас ко Господу,// да помилует и спасет нас по велицей Своей милости.

Кондак, глас 2:

Яко верный служитель Божественных Таин,/ Михаиле мучениче добропобедный,/ ты усердно людем послужил еси/ и, Христа Воскресшаго исповедуя,/ даже до крове пострадал еси./ Ныне же, в селениих Небесных пребывая,/ моли Человеколюбца Бога,// спастися душам нашим.

Молитва священномученику Михаилу:

О, святый священномучениче Христов, отче наш Михаиле! Ты, от юности Бога возлюбив, служитель ревностный Того явился еси и, яко пастырь добрый, душу свою за словесныя овцы полагая, венец нетленный от Господа приял еси. Ныне же мы, недостойнии, прославляюще тя со всеми новомученики и исповедники Церкве Русския, яко предстателя и молитвенника нашего, просим: просвети умы и сердца наша светом Божественнаго учения, укрепи нас во истинней вере, научи нас всегда творити волю Божию, благую и совершенную, и хранити заповеди евангельския, подаждь ревность о умножении братския любве, болящыя и немощныя уврачуй, печальныя утеши, гонимыя защити, юныя настави, всем же благосердый отец и теплый молитвенник явися. О, святче Божий! Моли Господа Бога, да соблюдается в вере Православней Отечество наше и в нем достойно и праведно прославляется имя Пресвятыя Троицы, Отца и Сына и Святаго Духа во веки веков. Аминь.

Священномученикам Александру Сахарову и Иоанну Тихомирову (житие / история праздника)

Тропарь, глас 3:

Пресла́вную му́ченик дво́ицу,/ служи́телей Та́ин Боже́ственных,/ хвалу́ Це́ркве и же́ртву свяще́нную,/ дне́сь любо́вию восхва́лим, ве́рнии,/ Алекса́ндра и Иоа́нна па́стырей на́ших,/ и́же по́двиги ве́ры и благоче́стия/ па́ству во еди́нстве соблюдо́ша/ и да́же до сме́рти за Христа́ пострада́ша,// Его́же приле́жно мо́лят спасти́ души́ на́ша.

Кондак, глас 2:

Ве́рою несумне́нною, я́ко брачною оде́ждею, обле́кшеся,/ к све́тлому черто́гу Небе́сному устреми́стеся,/ священному́ченицы Алекса́ндре и Иоа́нне,/ еди́наго же Христа́ все́м се́рдцем возлюби́вше,/ страда́ния мно́гая и сме́рть претерпе́сте./ Ны́не нетле́нныя трапе́зы наслажда́етеся// и моли́теся спасти́ся душа́м на́шим.

Преподобномученице Екатерине Симбирской (житие / история праздника)

Тропарь, глас 1:

От юности Христа Бога возлюбивши, / в смирении и милосердии Тому угодила еси, / Христа со дерзновением проповедающи, / твердостию веры безбожных посрамила еси, / землю Симбирскую кровию своею освятивши, / Царства Небеснаго достигла еси. / Темже по долгу восваляем тя, / богомудрая преподобномученице Екатерино, / моли Человеколюбца Христа, // Спастися душам нашим.

Кондак, глас 2:

Новоявленная веры звезда, / возсиявает днесь в Симбирстей земли: / восхвалим ныне преподобномученицу Екатерину достославную. / Та бо во дни гонений на Церковь Русскую, / Христа исповедати не убояся, / образ людем верным являющи, / и мученический крест на рамена своя восприимши: / кровьми же яко багряницею украсившися, / в небесныя чертоги вселися. / Темже со дерзнивением вопием ей: // молитвами твоими спаси души наша.