Богослужебные чтения 21 января 2025 года

Послание ко евреем, зачало 333А

Бра́тие, блюди́те да не отрече́теся Глаго́лющаго. А́ще бо не избежа́ша они́ отре́кшиися проро́чествующаго на земли́, мно́жае па́че мы отрица́ющиися небе́снаго, Его́же глас зе́млю тогда́ поколеба́, ны́не же обетова́, глаго́ля: еще́ еди́ною Аз потрясу́ не то́кмо земле́ю, но и не́бом. Молю́ же вы, бра́тие, приими́те сло́во утеше́ния, и́бо вма́ле написа́в посла́х вам. Зна́йте бра́та на́шего отпуще́на Тимофе́а, с ни́мже, а́ще скоре́е прии́дет, узрю́ вас. Целу́йте вся наста́вники ва́ша и вся святы́я. Целу́ют вы и́же от Итали́и су́щии. Благода́ть со все́ми ва́ми. Ами́нь.

Евангелие от Марка, зачало 43

Во вре́мя о́но, присту́пльше фарисе́е вопроси́ша Иису́са: а́ще досто́ит му́жу жену́ пусти́ти? Искуша́юще Его́. Он же отвеща́в рече́ им: что вам запове́да Моисе́й? Они́ же ре́ша: Моисе́й повеле́ кни́гу распу́стную написа́ти, и пусти́ти. И отвеща́в Иису́с рече́ им: по жестосе́рдию ва́шему написа́ вам за́поведь сию́. От зача́ла же созда́ния, му́жа и жену́ сотвори́л я́ есть Бог. Сего́ ра́ди оста́вит челове́к отца́ своего́ и ма́терь и прилепи́тся к жене́ свое́й, и бу́дета о́ба в плоть еди́ну. Те́мже уже́ не́ста два, но плоть еди́на. Е́же у́бо Бог сочета́, челове́к да не разлуча́ет. И в дому́ па́ки ученицы́ Его́ о сем вопроси́ша Его́. И глаго́ла им: и́же а́ще пу́стит жену́ свою́ и оже́нится ино́ю, прелюбы́ твори́т на ню. И а́ще жена́ пу́стит му́жа своего́ и пося́гнет за ино́го, прелюбы́ твори́т.