Богослужебные чтения 20 января 2026 года

Соборное послание Иаковле, зачало 54

Бра́тие, не мно́зи учи́тели быва́йте, ве́дяще, я́ко бо́льшее осужде́ние прии́мем, мно́го бо согреша́ем вси. А́ще кто в сло́ве не согреша́ет, сей соверше́н муж, си́лен обузда́ти и все те́ло. Се бо и ко́нем узды́ во уста́ влага́ем, да повину́ются нам, и все те́ло их обраща́ем. Се и корабли́ вели́цы су́ще и от жесто́ких ве́тров заточа́еми, обраща́ются ма́лым корми́льцем, а́може стремле́ние пра́вящаго хо́щет. Та́кожде же и язы́к мал уд есть, и вельми́ хва́лится. Се мал огнь, и коль вели́ки ве́щи сожига́ет. И язы́к огнь, ле́пота непра́вды: си́це и язы́к водворя́ется во у́дех на́ших, скверня́ все те́ло, и паля́ ко́ло рожде́ния на́шего, и опаля́яся от гее́нны. Вся́ко бо естество́ звере́й же и птиц, гад же и рыб, укроча́ется и укроти́тся естество́м челове́ческим, язы́ка же никто́же мо́жет от челове́к укроти́ти, не удержи́мо бо зло, испо́лнь я́да смертоно́сна. Тем благословля́ем Бо́га и Отца́, и тем клене́м челове́ки бы́вшыя по подо́бию Бо́жию, от тех же уст исхо́дит благослове́ние и кля́тва. Не подоба́ет, бра́тие моя́ возлю́бленная, сим та́ко быва́ти.

Евангелие от Марка, зачало 50

Во вре́мя о́но, вни́де Иису́с во Иерусали́м и в це́рковь, и согля́дав вся, по́зде уже́ су́щу часу́, изы́де в Вифа́нию со обемана́десяте. И нау́трия изше́дшым им от Вифа́нии, взалка́. И ви́дев смоко́вницу издале́ча, иму́щу ли́ствие, прии́де, а́ще у́бо что обря́щет на ней, и прише́д к ней, ничесо́же обре́те, то́кмо ли́ствие, не у бо бе вре́мя смо́квам. И отвеща́в Иису́с рече́ ей: да не ктому́ от тебе́ во ве́ки никто́же плода́ снесть. И слы́шаху ученицы́ Его́. И приидо́ша па́ки во Иерусали́м. И вшед Иису́с в це́рковь, нача́т изгони́ти продаю́щыя и купу́ющыя в це́ркви, и трапе́зы торжнико́м и седа́лища продаю́щих го́луби испрове́рже. И не дая́ше, да кто мимонесе́т сосу́д сквозе́ це́рковь. И уча́ше, глаго́ля им: несть ли пи́сано, я́ко храм Мой храм моли́твы нарече́тся всем язы́ком? Вы же сотвори́сте его́ верте́п разбо́йником. И слы́шаша кни́жницы и архиере́е, и иска́ху, ка́ко Его́ погубя́т, боя́ху бо ся Его́, я́ко весь наро́д дивля́шеся о уче́нии Его́. И я́ко по́зде бысть, исхожда́ше вон из гра́да. И у́тро мимоходя́ще, ви́деша смоко́вницу изсо́хшу из коре́ния. И воспомяну́в Петр глаго́ла Ему́: Равви́, виждь, смоко́вницу, ю́же прокля́т, у́сше. И отвеща́в Иису́с глаго́ла им: име́йте ве́ру Бо́жию. Ами́нь бо глаго́лю вам, я́ко, и́же а́ще рече́т горе́ сей: дви́гнися и ве́рзися в мо́ре, и не размы́слит в се́рдце свое́м, но ве́ру и́мет, я́ко е́же глаго́лет, быва́ет, бу́дет ему́, е́же а́ще рече́т.

Деяния святых Апостол, зачало 42

Во дни о́ны, бысть внегда́ бы́ти Аполло́су в Кори́нфе, Па́влу же, проше́дшу вы́шния страны́, приити́ во Ефе́с, и обре́т не́кия ученики́, рече́ к ним: а́ще у́бо Дух Свят прия́ли есте́, ве́ровавше? Они́ же ре́ша к нему́: но ниже́, а́ще Дух Святы́й есть, слы́шахом. Рече́ же к ним: во что у́бо крести́стеся? Они́ же реко́ша: во Иоа́нново креще́ние. Рече́ же Па́вел: Иоа́нн у́бо крести́ креще́нием покая́ния, лю́дем глаго́ля: во Гряду́щаго по нем да ве́руют, си́речь во Христа́ Иису́са. Слы́шавше же, крести́шася во И́мя Го́спода Иису́са. И возло́жшу Па́влу на ня ру́це, прии́де Дух Святы́й на ня: глаго́лаху же язы́ки и проро́чествоваху. Бя́ше же всех муже́й я́ко двана́десять. Вшед же в со́нмище, дерза́ше, не обину́яся, три ме́сяцы бесе́дуя и уверя́я я́же о Ца́рствии Бо́жии.

Евангелие от Иоанна, зачало 3

Во вре́мя о́но, ви́де Иоа́нн Иису́са гряду́ща к себе́ и глаго́ла: се А́гнец Бо́жий, взе́мляй грехи́ ми́ра. Сей есть, о Не́мже аз рех: по мне гряде́т Муж, И́же пре́до мно́ю бысть, я́ко пе́рвее мене́ бе. И аз не ве́дех Его́, но да яви́тся Изра́илеви, сего́ ра́ди приидо́х аз в воде́ крестя́. И свиде́тельствова Иоа́нн, глаго́ля, я́ко ви́дех Ду́ха сходя́щ я́ко го́лубь с небесе́, и пребы́сть на Нем. И аз не ве́дех Его́, но Посла́вый мя крести́ти водо́ю, Той мне рече́: над Него́же у́зриши Ду́ха сходя́щ и пребыва́ющ на Нем, Той есть крестя́й Ду́хом Святы́м, и аз ви́дех и свиде́тельствовах, я́ко Сей есть Сын Бо́жий.