Богослужебные чтения 18 января 2026 года

Утр. – Ев. 10-е, Ин., 66 зач., XXI, 1–14. Лит. – Недели пред Богоявлением: 2 Тим., 298 зач., IV, 5–8. Мк., 1 зач., I, 1–8. На вечерне (совершается отдельно от литургии): 1 Кор., 143 зач. (от полу'), X, 1–4. Лк., 9 зач., III, 1–18. На освящении воды: 1 Кор., 143 зач. (от полу'), X, 1–4. Мк., 2 зач., I, 9–11.

Евангелие от Иоанна, зачало 66

Во вре́мя о́но, яви́ся Иису́с ученико́м Свои́м, воста́в от ме́ртвых, на мо́ри Тивериа́дстем. Яви́ся же си́це: бя́ху вку́пе Си́мон Петр, и Фома́ нарица́емыи Близне́ц, и Нафана́ил, и́же бе от Ка́ны Галиле́йския, и сы́на Зеведе́ова, и и́на от учени́к Его́ два. Глаго́ла им Си́мон Петр: иду́ ры́бы лови́ти. Глаго́лаша ему́: и́дем и мы с тобо́ю. Изыдо́ша же и вседо́ша а́бие в кора́бль, и в ту нощь не я́ша ничесо́же. У́тру же бы́вшу, ста Иису́с при бре́зе, не позна́ша же ученицы́, я́ко Иису́с есть. Глаго́ла же им Иису́с: де́ти, еда́ что сне́дно и́мате? Отвеща́ша Ему́: ни. Он же рече́ им: вве́рзите мре́жу одесну́ю страну́ корабля́ и обря́щете. Вверго́ша же и ктому́ не можа́ху привлещи́ ея́ от мно́жества рыб. Глаго́ла же учени́к той, его́же любля́ше Иису́с, Петро́ви: Госпо́дь есть. Си́мон же Петр слы́шав, я́ко Госпо́дь есть, епенди́том препоя́сася, бе бо наг, и вве́ржеся в мо́ре, а друзи́и ученицы́ кораблеце́м приидо́ша, не бе́ша бо дале́че от земли́, но я́ко две сте лакте́й, влеку́ще мре́жу рыб. Я́коже излезо́ша на зе́млю, ви́деша огнь лежа́щь и ры́бу на нем лежа́щу и хлеб. И глаго́ла им Иису́с: принеси́те от рыб, я́же я́сте ны́не. Влез же Си́мон Петр, извлече́ мре́жу на зе́млю, по́лну вели́ких рыб сто и пятьдеся́т и три, и толи́ку су́щу, не прото́ржеся мре́жа. Глаго́ла им Иису́с: прииди́те, обе́дуйте. Ни еди́н же сме́яше от учени́к истяза́ти Его́: Ты кто еси́? Ве́дяще, я́ко Госпо́дь есть. Прии́де же Иису́с, и прия́т хлеб и даде́ им, и ры́бу та́кожде. Се уже́ тре́тие яви́ся Иису́с ученико́м Свои́м, воста́в от ме́ртвых.

Послание к Тимофею второе, зачало 298

Ча́до Тимофе́е, трезви́ся о всем, злопостражди́, де́ло сотвори́ благове́стника, служе́ние твое́ изве́стно сотвори́. Аз бо уже́ жрен быва́ю, и вре́мя моего́ отше́ствия наста́. По́двигом до́брым подвиза́хся, тече́ние сконча́х, ве́ру соблюдо́х, про́чее у́бо соблюда́ется ми вене́ц пра́вды, его́же возда́ст ми Госпо́дь в день он, пра́ведный Судия́, не то́кмо же мне, но и всем возлю́бльшым явле́ние Его́.

Евангелие от Марка, зачало 1

Зача́ло Ева́нгелия Иису́са Христа́, Сы́на Бо́жия, я́коже есть пи́сано во проро́цех: се Аз посыла́ю А́нгела Моего́ пред лице́м Твои́м, и́же угото́вит путь Твой пред Тобо́ю. Глас вопию́щаго в пусты́ни: угото́вайте путь Госпо́день, пра́вы твори́те стези́ Его́. Бысть Иоа́нн, крестя́й в пусты́ни, и пропове́дая креще́ние покая́ния во отпуще́ние грехо́в. И исхожда́ше к нему́ вся Иуде́йская страна́ и иерусали́мляне, и креща́хуся вси во Иорда́не реце́ от него́, испове́дающе грехи́ своя́. Бе же Иоа́нн оболче́н власы́ вельблу́жди, и по́яс усме́н о чресле́х его́, и яды́й акри́ды, и мед ди́вий. И пропове́даше, глаго́ля: гряде́т Кре́плий мене́, во след мене́, Ему́же несмь досто́ин, прекло́нься, разреши́ти реме́нь сапо́г Его́. Аз у́бо крести́х вы в воде́, Той же крести́т вы Ду́хом Святы́м.

Послание к коринфяном первое, зачало 143В

Бра́тие, не хощу́ вас не ве́дети, я́ко отцы́ на́ши вси под о́блаком бы́ша и вси сквозе́ мо́ре проидо́ша. И вси в Моисе́я крести́шася во о́блаце и в мо́ри. И вси то́жде бра́шно духо́вное ядо́ша. И вси то́жде пи́во духо́вное пи́ша, пия́ху бо от духо́внаго после́дующаго ка́мене, ка́мень же бе Христо́с.

Евангелие от Луки, зачало 9

В пя́тое на́десяте ле́то влады́чества Тиве́рия ке́саря, облада́ющу Понти́йскому Пила́ту Иуде́ею, и четвертовла́ствующу Галиле́ею И́роду, Фили́ппу же, бра́ту его́ четвертовла́ствующу Тири́ею и Трахони́тскою страно́ю, и Лиса́нию Авилини́ею четвертовла́ствующу, при архиере́и А́нне и Каиа́фе, бысть глаго́л Бо́жий ко Иоа́нну, Заха́риину сы́ну, в пусты́ни. И прии́де во всю страну́ Иорда́нскую, пропове́дая креще́ние покая́ния во оставле́ние грехо́в. Я́коже есть пи́сано в кни́зе слове́с Иса́ии проро́ка, глаго́люща: глас вопию́щаго в пусты́ни, угото́вайте путь Госпо́день, пра́вы твори́те стези́ Его́. Вся́ка дебрь испо́лнится, и вся́ка гора́ и холм смири́тся, и бу́дут стропо́тная в пра́вая и о́стрии в пути́ гла́дки. И у́зрит вся́ка плоть спасе́ние Бо́жие. Глаго́лаше же исходя́щим наро́дом крести́тися от него́: порожде́ния ехи́днова, кто сказа́ вам бежа́ти от гряду́щаго гне́ва? Сотвори́те у́бо плоды́ досто́йны покая́ния, и не начина́йте глаго́лати в себе́: отца́ и́мамы Авраа́ма. Глаго́лю бо вам, я́ко мо́жет Бог от ка́мения сего́ воздви́гнути ча́да Авраа́му. Уже́ бо и секи́ра при ко́рени дре́ва лежи́т: вся́ко у́бо дре́во, не творя́щее плода́ добра́, посека́ется и во огнь вмета́ется. И вопроша́ху его́ наро́ди, глаго́люще: что у́бо сотвори́м? Отвеща́в же глаго́ла им: име́яй две ри́зе, да пода́ст неиму́щему, и име́яй бра́шна, та́кожде да твори́т. Приидо́ша же и мытари́ крести́тися от него́, и ре́ша к нему́: учи́телю, что сотвори́м? Он же рече́ к ним: ничто́же бо́ле от повеле́ннаго вам твори́те. Вопроша́ху же его́ и во́ини, глаго́люще: и мы что сотвори́м? И рече́ к ним: никого́же оби́дите, ни оклеветава́йте, и дово́льни бу́дите обро́ки ва́шими. Ча́ющим же лю́дем, и помышля́ющим всем в сердца́х свои́х о Иоа́нне, еда́ той есть Христо́с, отвещава́ше Иоа́нн всем глаго́ля: аз у́бо водо́ю креща́ю вы: гряде́т же Кре́плий мене́, Ему́же несмь досто́ин отреши́ти реме́нь сапогу́ Его́. Той вы крести́т Ду́хом Святы́м и огне́м. Ему́же лопа́та в руку́ Его́, и потреби́т гумно́ Свое́, и собере́т пщени́цу в жи́тницу Свою́, пле́вы же сожже́т огне́м негаса́ющим. Мно́га же у́бо и и́на, утеша́я благовествова́ше лю́дем.

На Великом Водоосвящении

1. Проро́чества Иса́иина чте́ние.

Та́ко глаго́лет Госпо́дь: да возвесели́тся пусты́ня жа́ждущая, да возра́дуется пусты́ня и процвете́т, я́ко крин, и да прозя́бнет, и вся возвеселя́тся. И возра́дуются пусты́нная Иорда́нова, и сла́ва Лива́нова дана́ бысть ей и честь Карми́лова, и лю́дие Мои́ у́зрят сла́ву Госпо́дню и высоту́ Бо́жию. Укрепи́теся, ру́ки осла́бленныя, и, коле́на разсла́бленная, уте́шитеся, и рцы́те малоду́шным мы́слию: укрепи́теся и не бо́йтеся, се Бог наш суд воздае́т, Той прии́дет и спасе́т нас. Тогда́ отве́рзутся очеса́ слепы́х, и ушеса́ глухи́х услы́шат, тогда́ ско́чит хро́мый, я́ко еле́нь, и я́сен бу́дет язы́к гугни́вых, я́ко прорази́ся в пусты́ни вода́ и дебрь в земли́ жа́ждущей. И бу́дет безво́дная в бла́та, и в жа́ждущей земли́ исто́чник воды́ бу́дет. Та́мо бу́дет весе́лие птиц, водворе́ние си́ринов, и тро́стий, и бла́та. Та́мо бу́дет путь чист, и путь свят нарече́тся. И не мимои́дет та́мо нечи́ст, ниже́ бу́дет та́мо путь нечи́стый, разсе́яннии же по́йдут по нему́ и не заблу́дят. И не бу́дет та́мо льва, ниже́ от звере́й лю́тых взы́дет нань, ниже́ обря́щется та́мо, но по́йдут по нему́ изба́вленнии и со́браннии от Го́спода, и обратя́тся, и прии́дут в Сио́н с весе́лием и ра́достию, и весе́лие ве́чное над главо́ю их. Хвала́, и ра́дование, и весе́лие пости́гнет их, отбеже́ боле́знь, печа́ль и воздыха́ние.

Ис 35:1–10

2. Проро́чества Иса́иина чте́ние.

Та́ко глаго́лет Госпо́дь: жа́ждущии, на во́ду иди́те, и, ели́цы не и́мате сребра́, ше́дше, купи́те, и яди́те и пи́йте без сребра́ и цены́ вино́ и тук. Вску́ю цените́ сребро́ не в хле́бы и труд ваш не в сы́тость? Послу́шайте Мене́ и сне́сте блага́я, и наслади́тся во благи́х душа́ ва́ша. Внима́йте уши́ма ва́шима и после́дуйте путе́м Мои́м, услы́шите Мене́, и жива́ бу́дет во благи́х душа́ ва́ша. И завеща́ю вам заве́т ве́чен, преподо́бная Дави́дова ве́рная. Се свиде́тельство во язы́цех, дах Его́ Кня́зя и Повели́теля во язы́цех. Се язы́цы, и́же не ве́дяху Тя, призову́т Тя, и лю́дие, и́же не позна́ша Тя, к Тебе́ прибе́гнут, ра́ди Го́спода Твоего́ и Свята́го Изра́илева, я́ко просла́вих Тя. Взыщи́те Бо́га, и внегда́ вам обрести́ Его́, призови́те. Егда́ же а́ще прибли́жится вам, да оста́вит нечести́вый пути́ своя́ и муж беззако́нный сове́ты своя́. И обрати́теся ко Го́споду Бо́гу ва́шему и поми́ловани бу́дете, я́ко помно́гу оста́вит грехи́ ва́ша. Не суть бо сове́ти Мои́, я́коже сове́ти ва́ши, ниже́ я́коже путие́ ва́ши, путие́ Мои́, – глаго́лет Госпо́дь. Но я́коже отстои́т Не́бо от земли́, та́ко отстои́т путь Мой от путе́й ва́ших, и размышле́ния ва́ша от мы́сли Моея́. Я́коже бо а́ще сни́дет дождь или́ снег с Небесе́ и не возврати́тся отту́ду, до́ндеже упои́т зе́млю, и роди́т, и прозя́бнет, и даст се́мя се́ющему и хлеб в снедь, та́ко бу́дет глаго́л Мой, и́же а́ще изы́дет из уст Мои́х и не обрати́тся ко Мне тощь, до́ндеже а́ще сконча́ет вся, ели́ка восхоте́х, и поспешу́ пути́ Моя́ и повеле́ния Моя́. Весе́лием бо изы́дете и ра́достию научи́теся, го́ры бо и хо́лми ско́чат, жду́ще вас в ра́дости, и вся древеса́ се́льная воспле́щут ве́твьми. И вме́сто дра́чия взы́дет кипари́с, вме́сто же кропи́вы взы́дет мирси́на. И бу́дет Госпо́дь во и́мя и в зна́мение ве́чное и не оскуде́ет.

Ис 55:1–13

3. Проро́чества Иса́иина чте́ние.

Та́ко глаго́лет Госпо́дь: почерпи́те во́ду с весе́лием от исто́чник спасе́ния. И рече́ши в день он: испове́дайтеся Го́сподеви и призови́те И́мя Его́, возвести́те во язы́цех сла́ву Его́. Помяни́те, я́ко вознесе́ся И́мя Его́. По́йте И́мя Госпо́дне, я́ко высо́кая сотвори́. Возвести́те сия́ по всей земли́, ра́дуйтеся и весели́теся, живу́щии в Сио́не, я́ко вознесе́ся Святы́й Изра́илев посреде́ его́.

Ис 12:3–6

Послание к коринфяном первое, зачало 143В

Бра́тие, не хощу́ вас не ве́дети, я́ко отцы́ на́ши вси под о́блаком бы́ша и вси сквозе́ мо́ре проидо́ша. И вси в Моисе́я крести́шася во о́блаце и в мо́ри. И вси то́жде бра́шно духо́вное ядо́ша. И вси то́жде пи́во духо́вное пи́ша, пия́ху бо от духо́внаго после́дующаго ка́мене, ка́мень же бе Христо́с.

Евангелие от Марка, зачало 2Б

Во вре́мя о́но, прии́де Иису́с от Назаре́та Галиле́йскаго и крести́ся от Иоа́нна во Иорда́не. И а́бие восходя́ от воды́, ви́де разводя́щася Небеса́ и Дух, я́ко го́лубь, сходя́щ Нань. И глас бысть с Небесе́: Ты еси́ Сын Мой возлю́бленный, о Не́мже благоволи́х.

Паримии на Вечерне Навечерия Богоявления

Бытия́ чте́ние. [Глава́ 1.]

В нача́ле сотвори́ Бог не́бо и зе́млю. Земля́ же бе́ неви́дима и неустро́ена, и тма́ верху́ бе́здны, и Ду́х Бо́жий ноша́шеся верху́ воды́. И рече́ Бо́г: да бу́дет све́т. И бы́сть све́т. И ви́де Бо́г све́т, я́ко добро́; и разлучи́ Бо́г между́ све́том и между́ тмо́ю. И нарече́ Бо́г све́т де́нь, и тму́ нарече́ но́щь. И бы́сть ве́чер, и бы́сть у́тро, де́нь еди́н. И рече́ Бо́г: да бу́дет тве́рдь посреде́ воды́, и да бу́дет разлуча́ющи посреде́ воды́ и воды́. И бы́сть та́ко. И сотвори́ Бо́г тве́рдь; и разлучи́ Бо́г между́ водо́ю, я́же бе́ под тве́рдию, и между́ водо́ю, я́же бе́ над тве́рдию. И нарече́ Бо́г тве́рдь не́бо; и ви́де Бо́г, я́ко добро́. И бы́сть ве́чер, и бы́сть у́тро, де́нь вторы́й. И рече́ Бо́г: да собере́тся вода́, я́же под небесе́м, в собра́ние еди́но, и да яви́тся су́ша. И бы́сть та́ко. И собра́ся вода́, я́же под небесе́м, в собра́ния своя́, и яви́ся су́ша. И нарече́ Бо́г су́шу зе́млю, и собра́ния во́д нарече́ моря́. И ви́де Бо́г, я́ко добро́. И рече́ Бо́г: да прорасти́т земля́ бы́лие травно́е, се́ющее се́мя по ро́ду и по подо́бию, и дре́во плодови́тое, творя́щее пло́д, ему́же се́мя его́ в не́м, по ро́ду на земли́. И бы́сть та́ко. И изнесе́ земля́ бы́лие травно́е, се́ющее се́мя по ро́ду и по подо́бию, и дре́во плодови́тое, творя́щее пло́д, ему́же се́мя его́ в не́м по ро́ду на земли́. И ви́де Бо́г, я́ко добро́. И бы́сть ве́чер, и бы́сть у́тро, де́нь тре́тий.

Исхо́да чте́ние. [Глава́ 14.]

Рече́ Госпо́дь к Моисе́ю: что́ вопие́ши ко Мне́? Глаго́ли сыново́м Изра́илевым, и да путеше́ствуют. И ты́ возми́ же́зл тво́й, и простри́ ру́ку твою́ на мо́ре, и расто́ргни е́, и да вни́дут сы́нове Изра́илевы посреде́ мо́ря по су́ху. И се́ Аз ожесточу́ се́рдце фарао́ново, и слу́г его́, и еги́птян все́х, и вни́дут в сле́д и́х, и просла́влюся в фарао́не, и во все́м во́инстве его́, и в колесни́цах, и в ко́нех его́. И уразуме́ют вси́ еги́птяне, я́ко Аз Госпо́дь, прославля́ющу Ми ся в фарао́не, и в колесни́цах, и в ко́нех его́. Простре́ же Моисе́й ру́ку на мо́ре, и возгна́ Госпо́дь мо́ре ве́тром ю́жным си́льным всю́ но́щь, и сотвори́ мо́ре су́хо, и разступи́ся вода́. И внидо́ша сы́нове Изра́илевы в посре́д мо́ря по су́ху, и вода́ и́м бы́сть стена́ одесну́ю и стена́ ошу́юю. Погна́ша же еги́птяне и внидо́ша созади́ и́х вся́к ко́нь фарао́нов, и колесни́цы, и вса́дницы посреде́ мо́ря. Простре́ же Моисе́й ру́ку на мо́ре, и устро́ися вода́ ко дню́ на ме́сто, еги́птяне же бежа́ша под водо́ю, и истрясе́ Госпо́дь еги́птяны посреде́ мо́ря. И, обрати́вшися, вода́ покры́ колесни́цы, и вса́дники, и триста́ты, и всю́ си́лу фарао́нову, вше́дших в сле́д и́х в мо́ре, и не оста́ от них ни еди́н. Сы́нове же Изра́илевы проидо́ша по су́ху посреде́ мо́ря.

Исхо́да чте́ние. [Главы́ 15 и 16.]

Поя́т Моисе́й сы́ны Изра́илевы от мо́ря Чермна́го и веде́ и́х в пусты́ню Сур. И идя́ху три́ дни́ в пусты́ни, и не обрета́ху воды́, да бы́ша пи́ли. Приидо́ша же в Ме́рру, и не можа́ху пи́ти воды́ из Ме́рры, горька́ бо бе́. Сего́ ра́ди нарече́ся и́мя ме́сту тому́: Го́ресть. И ропта́ху лю́дие на Моисе́я, глаго́люще: что́ пие́м? Возопи́ же Моисе́й ко Го́споду, и показа́ ему́ Госпо́дь дре́во. И вложи́ е́ в во́ду, и сладка́ бысть вода́. Та́мо положи́ ему́ Бо́г оправда́ния и суды́ и та́мо искуша́ше его́. И рече́: а́ще слу́хом услы́шиши гла́с Го́спода, Бо́га твоего́, и уго́дная пред Ни́м сотвори́ши, и внуши́ши за́поведи Его́, и сохрани́ши вся́ оправда́ния Его́, вся́ку боле́знь, ю́же наведо́х на еги́птяны, не наведу́ на тя́. Аз бо е́смь Госпо́дь, исцеля́яй тя́. И приидо́ша во Ели́м, и бя́ху та́мо двана́десять исто́чников во́д и се́дмьдесят сте́бль фи́ников, и ополчи́шася та́мо при вода́х. И воздви́гшеся от Ели́ма, и прии́де ве́сь со́нм сыно́в Изра́илевых в пусты́ню Си́н, я́же е́сть между́ Ели́мом и между́ Си́ною.

Тропа́рь, гла́с 5:

Яви́лся еси́ в ми́ре, / Иже ми́р Сотвори́вый, / да просвети́ши во тме́ седя́щия, / Человеколю́бче, сла́ва Тебе́.

Сти́х 1: Бо́же, уще́дри ны́ и благослови́ ны, / просвети́ лице́ Твое́ на ны́ и поми́луй ны́. / Позна́ти на земли́ пу́ть Тво́й, / во все́х язы́цех спасе́ние Твое́.

[И пое́м коне́ц:] Да просвети́ши во тме́ седя́щия, / Человеколю́бче, сла́ва Тебе́.

Сти́х 2: Да испове́дятся Тебе́ лю́дие, Бо́же, / да испове́дятся Тебе́ лю́дие вси́. / Да возвеселя́тся и да возра́дуются язы́цы, / я́ко су́диши лю́дем правото́ю / и язы́ки на земли́ наста́виши.

[И па́ки:] Да просвети́ши во тме́ седя́щия, / Человеколю́бче, сла́ва Тебе́.

Сти́х 3: Да испове́дятся Тебе́ лю́дие, Бо́же, / да испове́дятся Тебе́ лю́дие вси́. / Земля́ даде́ пло́д сво́й, / благослови́ ны, Бо́же, Бо́же на́ш. / Благослови́ ны, Бо́же, и да убоя́тся Его́ вси́ концы́ земли́.

[И па́ки:] Да просвети́ши во тме́ седя́щия, / Человеколю́бче, сла́ва Тебе́.

Сла́ва, и ны́не:

[И па́ки:] Да просвети́ши во тме́ седя́щия, / Человеколю́бче, сла́ва Тебе́.

Яви́лся еси́ в ми́ре, / Иже ми́р Сотвори́вый, / да просвети́ши во тме́ седя́щия, / Человеколю́бче, сла́ва Тебе́.

Иису́са Нави́на чте́ние. [Глава́ 3.]

Рече́ Госпо́дь ко Иису́су: в де́нь се́й начина́ю вознести́ тя́ пред все́ми сы́нами Изра́илевыми, да разуме́ют, зане́ я́коже бе́х с Моисе́ом, та́ко бу́ду и с тобо́ю. И ны́не запове́ждь свяще́нником, взима́ющим ковче́г заве́та, глаго́ля: да я́ко вни́дите в ча́сть воды́ Иорда́нския и ста́нете при Иорда́не. Якоже идя́ху свяще́нницы, взе́мшии ковче́г заве́та Госпо́дня, во Иорда́н, и но́ги свяще́нников, нося́щих ковче́г, омочи́шася в ча́сти воды́ Иорда́нския. Иорда́н же исполня́шеся во все́м ло́жи свое́м, я́коже во дни жа́твы пшени́цы. И ста́ша во́ды низходя́щия свы́ше в со́нм еди́н, отстоя́щия дале́че зело́ от Адама́ гра́да, да́же до страны́ Кариафиари́ма. Низходя́щая же сни́де на мо́ре Арави́тское, да́же до мо́ря Соли́щнаго, до́ндеже вконе́ц оскуде́, и лю́дие стоя́ху пря́мо Иерихо́на. И ста́ша свяще́нницы, взе́мшии ковче́г заве́та Госпо́дня, на су́се, посреде́ Иорда́на, гото́вы. И вси́ сы́нове Изра́илевы преидо́ша по су́ху, до́ндеже сконча́ша вси́ лю́дие, преходя́ще Иорда́н.

Ца́рств четве́ртых чте́ние. [Глава́ 2.]

Рече́ Илия́ к Елиссе́ю: седи́ у́бо зде́, я́ко Госпо́дь посла́ мя до Иорда́на. И рече́ Елиссе́й: жи́в Госпо́дь, и жива́ душа́ твоя́, а́ще оста́влю тя́. И поидо́ста о́ба, и пя́тдесят муже́й от сыно́в проро́ческих приидо́ша и ста́ша пря́мо издале́ча, о́ба же ста́ста при Иорда́не. И прия́т Илия́ ми́лоть свою́, и сви́т ю́, и порази́ е́ю во́ды, и раздели́ся вода́ сю́ду и сю́ду, и преидо́ста о́ба по су́ху. И бы́сть, я́ко преидо́ста, и рече́ Илия́ Елиссе́ю: проси́, что́ сотворю́ тебе́, пре́жде да́же не взя́т бу́ду от тебе́? И рече́ Елиссе́й: да бу́дет у́бо Ду́х, Иже в тебе́, сугу́б во мне́. И рече́ Илия́: ожесточи́л еси́ проси́ти, оба́че а́ще уви́диши мя́ взе́млема от тебе́, бу́дет ти́ та́ко; а́ще ли же не уви́диши, не бу́дет. И бы́сть иду́щим и́м и глаго́лющим, и се́ колесни́ца о́гненна, и ко́ни о́гненни, и раздели́ между́ обе́ма. И взя́тся Илия́ тру́сом, я́ко на не́бо. И Елиссе́й зря́ше, и то́й вопия́ше: о́тче, о́тче, колесни́ца Изра́илева, и ко́ни его́! И не ви́де его́ ктому́. И я́тся Елиссе́й за ри́зы своя́, и раздра́ я́ на дво́е, и взя́т ми́лоть Илиину́, па́дшую верху́ его́. И обрати́ся Елиссе́й, и ста́ на бре́зе Иорда́на. И прия́т Елиссе́й ми́лоть Илиину́, па́дшую верху́ его́, и уда́ри во́ды, и не раздели́шася. И рече́ Елиссе́й: где́ у́бо есть Бо́г Илии́н апфо́? И уда́ри Елиссе́й во́ды второ́е, и раздели́шася во́ды, и пре́йде по су́ху.

Ца́рств четве́ртых чте́ние. [Глава́ 5.]

Прии́де Неема́н, кня́зь царя́ Ассири́йскаго, с колесни́цами и ко́ньми свои́ми и ста́ при две́рех хра́ма Елиссе́ева. И посла́ Елиссе́й к нему́ ве́стника, глаго́ля: ше́д, измы́йся во Иорда́не седми́жды, и обрати́тся пло́ть твоя́ к тебе́, и очи́стишися. И разгне́вася Неема́н, и оты́де, и рече́: се́ ре́х, да изы́дет ко мне́, и призове́т о и́мени Го́спода Бо́га своего́, и положи́т ру́ку свою́ на прока́зу, и оты́мет ю́ от пло́ти моея́. Не добре́йши ли су́ть Арвана́ и Фарфа́, реце́ Дама́скове, па́че Иорда́на и все́х во́д Изра́илевых? Не ше́д ли, измы́юся в ни́х и очи́щуся? И возврати́ся, и оты́де с гне́вом. И приступи́ша о́троцы его́ и ре́ша к нему́: го́споди, а́ще бы ве́лие сло́во глаго́лал к тебе́ проро́к, не бы́ ли сотвори́л, я́коже рече́ к тебе́: измы́йся и очи́стишися? И сни́де Неема́н, и погрузи́ся во Иорда́не седми́жды, по глаго́лу челове́ка Бо́жия, и обрати́ся пло́ть его́ к нему́, я́ко отроча́те ма́ла, и очи́стися.

Тропа́рь, гла́с 6:

Гре́шником и мытаре́м / за мно́жество ми́лости Твоея́ / яви́лся еси́, Спа́се на́ш. / Где́ бо име́л бы све́т Тво́й возсия́ти, / то́кмо на седя́щия во тме́? / Сла́ва Тебе́.

Сти́х 1: Госпо́дь воцари́ся, в ле́поту облече́ся, / облече́ся Госпо́дь в си́лу и препоя́сася, / и́бо утверди́ вселе́нную, я́же не подви́жится. / Гото́в престо́л Тво́й отто́ле, / от ве́ка Ты́ еси́.

[Та́же, па́ки:] Где́ бо име́л бы све́т Тво́й возсия́ти, / то́кмо на седя́щия во тме́? / Сла́ва Тебе́.

Сти́х 2: Воздвиго́ша ре́ки, Го́споди, воздвиго́ша ре́ки гла́сы своя́. / Во́змут ре́ки сотре́ния своя́ от гласо́в во́д мно́гих.

[Та́же, па́ки:] Где́ бо име́л бы све́т Тво́й возсия́ти, / то́кмо на седя́щия во тме́? / Сла́ва Тебе́.

Сти́х 3: Ди́вны высоты́ морски́я, ди́вен в высо́ких Госпо́дь. / Свиде́ния Твоя́ уве́ришася зело́. / До́му Твоему́ подоба́ет святы́ня, Го́споди, в долготу́ дни́й.

[Та́же, па́ки:] Где́ бо име́л бы све́т Тво́й возсия́ти, / то́кмо на седя́щия во тме́? / Сла́ва Тебе́.

Сла́ва, и ны́не:

[Та́же, па́ки:] Где́ бо име́л бы све́т Тво́й возсия́ти, / то́кмо на седя́щия во тме́? / Сла́ва Тебе́.

Гре́шником и мытаре́м / за мно́жество ми́лости Твоея́ / яви́лся еси́, Спа́се на́ш. / Где́ бо име́л бы све́т Тво́й возсия́ти, / то́кмо на седя́щия во тме́? / Сла́ва Тебе́.

Проро́чества Иса́иина чте́ние. [Глава́ 1.]

Та́ко глаго́лет Госпо́дь: измы́йтеся и чи́сти бу́дете, отыми́те лука́вствия от ду́ш ва́ших пред очи́ма Мои́ма, преста́ните от лука́вствий ва́ших. Научи́теся до́брое твори́ти, изыщи́те суда́, изба́вите оби́дима, суди́те си́ру и оправди́те вдови́цу. И прииди́те, и истя́жимся, — глаго́лет Госпо́дь, — и а́ще бу́дут греси́ ва́ши, я́ко багря́ное, я́ко сне́г, убелю́; а́ще же бу́дут, я́ко червле́ное, я́ко во́лну, убелю́. И а́ще хо́щете и послу́шаете Мене́, блага́я земли́ сне́сте. Аще ли же не хо́щете, ниже́ послу́шаете Мене́, ме́чь ва́с поя́ст, — уста́ бо Госпо́дня глаго́лаша сия́.

Бытия́ чте́ние. [Глава́ 32.]

Воззре́в Иа́ков и ви́де по́лк Бо́жий ополчи́вшийся, и срето́ша его́ Ангели Бо́жии. Рече́ же Иа́ков, егда́ ви́де и́х: по́лк Бо́жий се́й. И нарече́ и́мя ме́сту тому́: Полки́. Посла́ же Иа́ков ве́стники пред собо́ю ко Иса́ву, бра́ту своему́, в зе́млю Сии́р, во страну́ Едо́мскую. И запове́да и́м, глаго́ля: си́це рцы́те господи́ну моему́ Иса́ву: та́ко глаго́лет о́трок тво́й Иа́ков: с Лава́ном пожи́х и укосне́х до ны́не, и бы́ша ми́ о́вцы, и воло́ве, и осля́та, и рабы́, и рабы́ни. И посла́х возвести́ти го́сподеви моему́ Иса́вови, да обря́щет благода́ть о́трок тво́й пред тобо́ю. И возврати́шася ве́стницы ко Иа́кову, глаго́люще: идо́хом ко Иса́ву, бра́ту твоему́, и се́ са́м гряде́т в сре́тение твое́ и четы́ре ста́ муже́й с ни́м. Убоя́ся же Иа́ков зело́, и недоумева́шеся, и раздели́ лю́ди, и́же с ни́м, и волы́, и о́вцы на два́ полка́. И рече́ Иа́ков: а́ще прии́дет Иса́в на по́лк еди́н и посече́т и́, бу́дет по́лк вторы́й во спасе́ние. И рече́ Иа́ков: Бог отца́ моего́ Авраа́ма и Бог отца́ моего́ Исаа́ка, Го́споди, реки́й ми́: отбежи́ в зе́млю бытия́ твоего́, и добро́ ти сотворю́. Дово́льно ми́ да бу́дет от вся́кия пра́вды и от вся́кия и́стины, ю́же сотвори́л еси́ о́троку Твоему́, с жезло́м бо мои́м си́м преидо́х Иорда́н.

Исхо́да чте́ние. [Глава́ 2.]

Сни́де дщи́ фарао́нова измы́тися на реку́, и рабы́ни ея́ прехожда́ху при реце́, и ви́девши краби́йцу в лучи́це, посла́вши рабы́ню взя́т ю́. Отве́рзши же, ви́дит отроча́, пла́чущееся в краби́йце, и пощади́ е́ дщи́ фарао́нова, и рече́: от дете́й евре́йских сие́. И рече́ сестра́ его́ дще́ри фарао́нове: хо́щеши ли призову́ ти жену́ пита́тельницу от евре́й, и воздои́т ти́ отроча́? И рече́ е́й дщи́ фарао́нова: иди́. Ше́дши же, отрокови́ца призва́ ма́терь отроча́те. Рече́ же к не́й дщи́ фарао́нова: соблюди́ ми отроча́ сие́ и воздо́й ми́ е́, а́з же да́м ти́ мзду́. Прие́мше же жена́ отроча́ и доя́ше е́. Устраби́вшуся же отроча́ти, введе́ е́ ко дще́ри фарао́нове, и бы́сть е́й в сы́на. Именова́ же и́мя ему́ Моисе́й, глаго́лющи: от воды́ взя́х его́.

Суде́й чте́ние. [Глава́ 6.]

Рече́ Гедео́н к Бо́гу: а́ще спаса́еши руко́ю мое́ю Изра́иля, и́мже о́бразом ре́кл еси́: Се́ а́з положу́ руно́ о́вчее на гумне́ и, а́ще бу́дет роса́ на руне́ то́кмо, по все́й же земли́ су́ша, разуме́ю, я́ко спасе́ши руко́ю мое́ю Изра́иля, и́мже о́бразом ре́кл еси́. И бы́сть та́ко. И ура́нив Гедео́н нау́трие, и исцеди́ руно́, и истече́ роса́ от руна́, испо́лнен окри́н воды́. И рече́ Гедео́н к Бо́гу: да не прогне́вается у́бо я́рость Твоя́ на мя́, и возглаго́лю еще́ еди́ною, и искушу́ еще́ еди́ною руно́м: да бу́дет у́бо су́ша на руне́ то́кмо, по все́й же земли́ роса́. И сотвори́ Бо́г та́ко в нощи́ то́й, и бы́сть су́ша на руне́ то́кмо, по все́й же земли́ бы́сть роса́.

Ца́рств тре́тиих чте́ние. [Глава́ 18.]

Рече́ Илия́ к лю́дем: приступи́те ко мне́. И приступи́ша вси́ лю́дие к нему́. И взя́т Илия́ двана́десять ка́мений, по числу́ двана́десяти коле́н сыно́в Изра́илевых, я́коже глаго́ла Госпо́дь к нему́, глаго́ляй: Изра́иль бу́дет и́мя твое́. И созда́ ка́мение, и исцели́ олта́рь Госпо́день раско́панный, и сотвори́ ро́в, вмеща́ющ по две́ ме́ры се́мени, о́крест олтаря́. И положи́ поле́на на олтари́, его́же сотвори́. И раздроби́ всесожже́ния, и положи́ на поле́на, и обы́де олта́рь. И рече́ Илия́: приими́те ми́ четы́ре водоно́сы воды́, и да пролию́тся на олта́рь, на всесожже́ние же и на поле́на. И рече́: удво́йте. И удво́иша. И рече́: утро́йте. И утро́иша. И идя́ше вода́ о́крест олтаря́, и ро́в испо́лнися воды́. И возопи́ Илия́ на не́бо, и рече́: Го́споди Бо́же Авраа́мов, и Исаа́ков, и Иа́ковль, услы́ши мене́ днесь огне́м, и разуме́ют вси́ лю́дие си́и, я́ко Ты́ еси́ Еди́н Госпо́дь Бо́г Изра́илев, и а́з ра́б Тво́й и Тебе́ ра́ди сотвори́х сия́ вся́, и Ты́ обрати́ сердца́ люде́й си́х в сле́д Тебе́. И паде́ о́гнь от Го́спода с небесе́ и пояде́ всесожже́ния, и поле́на, и во́ду, я́же на ни́х, и во́ду, я́же в ро́ве, и ка́мение, и пе́рсть полиза́ о́гнь. И падо́ша вси́ лю́дие на лице́ свое́м и ре́ша: вои́стину Госпо́дь Бо́г, То́й е́сть Бо́г.

Ца́рств четве́ртых чте́ние. [Глава́ 2.]

Реко́ша му́жие гра́да Иерихо́нска ко Елиссе́ю: се́ жили́ще гра́да сего́ добро́, я́коже ты́, го́споди, ви́диши, и во́ды злы́ и безча́дны. И рече́ Елиссе́й: приими́те ми́ водоно́с но́в и всы́плите ту́ со́ль; и прия́ша и́. И изы́де на исхожде́ние во́д, и вве́рже та́мо со́ль, и рече́: та́ко глаго́лет Госпо́дь, исцели́х во́ды сия́, и не ктому́ бу́дет отню́д умира́я, ниже́ безча́дствующая си́ми. И исцеле́ша во́ды до дне́ сего́, по глаго́лу, и́же глаго́ла Елиссе́й.

Проро́чества Иса́иина чте́ние. [Глава́ 49.]

Та́ко глаго́лет Госпо́дь: во вре́мя прия́тное послу́шах тя́ и в де́нь спасе́ния помого́х тебе́. И созда́х тя́ и да́х тя́ в заве́т язы́ков, е́же устро́ити зе́млю и насле́дити насле́дие пусты́ни. Глаго́люща су́щим во у́зах: изыди́те! И су́щим во тме́: откры́йтеся! На все́х путе́х пасти́ся бу́дут, и на все́х стезя́х па́жить и́х. Не вза́лчут, ниже́ вжа́ждут, ниже́ порази́т и́х зно́й, ниже́ со́лнце, но Ми́луяй и́х уте́шит я́ и сквозе́ исто́чники во́д проведе́т я́. И положу́ вся́кую го́ру в пу́ть и вся́кую стезю́ в па́ству и́х. Се́ си́и издале́ча прии́дут, си́и от се́вера и мо́ря, ини́и же от земли́ Пе́рсския. Да веселя́тся небеса́, и ра́дуется земля́, да отры́гнут го́ры весе́лие и хо́лми пра́вду, я́ко поми́лова Бо́г лю́ди Своя́ и смире́нныя люде́й уте́ши. Рече́ же Сио́н: оста́ви мя́ Госпо́дь, и Бо́г забы́ мя. Еда́ забу́дет жена́ отроча́ свое́? Или́ не поми́лует изча́дия чре́ва своего́? Аще ли же и си́х забу́дет жена́, но Аз не забу́ду тебе́, — глаго́лет Госпо́дь.