Чин молебного пения о даровании супружества

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя́ в пра́вде Твое́й и не вни́ди в су́д с рабо́м Твои́м, я́ко не оправди́тся пред Тобо́ю вся́к живы́й. Я́ко погна́ вра́г ду́шу мою́, смири́л е́сть в зе́млю живо́т мо́й, посади́л мя́ е́сть в те́мных, я́ко ме́ртвыя ве́ка. И уны́ во мне́ ду́х мо́й, во мне́ смяте́ся се́рдце мое́. Помяну́х дни́ дре́вния, поучи́хся во все́х де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя́, Го́споди, исчезе́ ду́х мо́й, не отврати́ лица́ Твоего́ от мене́, и уподо́блюся низходя́щим в ро́в. Слы́шану сотвори́ мне́ зау́тра ми́лость Твою́, я́ко на Тя́ упова́х. Скажи́ мне́, Го́споди, пу́ть во́ньже пойду́, я́ко к Тебе́ взя́х ду́шу мою́. Изми́ мя от вра́г мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты́ еси́ Бо́г мо́й. Ду́х Тво́й благи́й наста́вит мя́ на зе́млю пра́ву. И́мене Твоего́ ра́ди, Го́споди, живи́ши мя́, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся́ стужа́ющия души́ мое́й, я́ко а́з ра́б Тво́й е́смь.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. (Трижды).

Тропарь, глас 3:

Тво́рче и Сердцеве́дче, Бо́же наш,/ пути на́ша любо́вию Отчею устроя́яй,/ пода́ждь рабу́ Твоему́ (рабе́ Твое́й) супру́гу (супру́га) по се́рдцу его́ (ея́),/ и испо́лни во благих жела́ния их,/ всячески ко спасе́нию приводя́,/ да в ве́ре и целому́дрии сла́вят Тя,/ Едине Челове́колюбче.

Кондак, глас 8:

Слава: Оком благоутро́бным, Го́споди,/ виждь мое смире́ние:/ я́ко по ма́ле жизнь моя иждива́ется,/ и от дел несть мне спасе́ния./ Сего́ ра́ди молюся:/ Многоми́лостиве Го́споди, спаси́ мя.

Богородичен, глас 3:

И ныне: Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших.

Прокимен, глас 1:

Стих: Бу́ди, Го́споди, ми́лость Твоя́ на нас, / я́коже упова́хом на Тя.

Припев: Бу́ди, Го́споди, ми́лость Твоя́ на нас, / я́коже упова́хом на Тя.

Стих: Ра́дуйтеся, пра́веднии, о Го́споде, пра́вым подоба́ет похвала́.

Припев: Бу́ди, Го́споди, ми́лость Твоя́ на нас, / я́коже упова́хом на Тя.

Стих: Бу́ди, Го́споди, ми́лость Твоя́ на нас

Припев: Якоже упова́хом на Тя.

К Тимофею послания святаго апостола Павла чтение(зача́ло 282):

Ча́до Тимофе́е, хощу́ у́бо, да моли́твы творя́т му́жие на вся́ком ме́сте, возде́юще преподо́бныя ру́ки без гне́ва и размышле́ния. Та́кожде и жены́ во украше́нии ле́потном, со стыде́нием и целому́дрием да украша́ют себе́ не в плете́ниих, ни зла́том, или́ би́сером, или́ ри́зами многоце́нными, но е́же подоба́ет жена́м обещава́ющымся благоче́стию, делесы́ благи́ми. Жена́ в безмо́лвии да учи́тся со вся́ким покоре́нием. Жене́ же учи́ти не повелева́ю, ни владе́ти му́жем, но бы́ти в безмо́лвии. Ада́м бо пре́жде со́здан бысть, пото́м же Е́ва. И Ада́м не прельсти́ся, жена́ же прельсти́вшися, в преступле́нии бысть. Спасе́тся же чадоро́дия ра́ди, а́ще пребу́дет в ве́ре и любви́, и во святы́ни с целому́дрием.

Аллилyиа, глaс 3:

Стих: Аллилу́ия, аллилу́ия, аллилу́ия.

Припев: Аллилу́ия, аллилу́ия, аллилу́ия.

Стих: На Тя, Го́споди, упова́х, да не постыжу́ся в век

Припев: Аллилу́ия, аллилу́ия, аллилу́ия.

Стих: Бу́ди ми в Бо́га Защи́тителя и в ме́сто кре́пко спасти́ мя

Припев: Аллилу́ия, аллилу́ия, аллилу́ия.

От Матфеа Свята́го Ева́нглиа чте́ние. (зача́ло 20 от полу):

Сла́ва, Тебе́, Го́споди, сла́ва Тебе́.

Рече́ Госпо́дь: проси́те и да́стся вам, ищи́те и обря́щете, толцы́те и отве́рзется вам. Всяк бо прося́й прие́млет, и ищя́й обрета́ет, и толку́щему отве́рзется. Или́ кто есть от вас челове́к, его́же а́ще воспро́сит сын его́ хле́ба, еда́ ка́мень пода́ст ему́? Или́ а́ще ры́бы про́сит, еда́ змию́ пода́ст ему́? А́ще у́бо вы, лука́ви су́ще, уме́ете дая́ния бла́га дая́ти ча́дом ва́шым, ко́льми па́че Оте́ц ваш Небе́сный даст бла́га прося́щым у Него́.

Сла́ва, Тебе́, Го́споди, сла́ва Тебе́.

Го́споди, поми́луй, (трижды)

Моли́тва:

Владыко, Го́споди Боже наш, Исто́чниче жизни и безсме́ртия, всея тва́ри ви́димыя и неви́димыя Соде́телю, управляяй всяческая прему́дрым и всеблаги́м Твоим Про́мыслом! При́зри ми́лостивно на нас, недостойных рабо́в Твои́х, и не помяни́ беззако́ний на́ших, но по безме́рному благосе́рдию Твоему́ прости́ нам прегреше́ния на́ша.

Всеси́льне Тво́рче и Созда́телю всех! Ты рекл еси́, яко не добро́ быти челове́ку единому, сего́ ра́ди пра́отцу на́шему Ада́му сотвори́л еси помо́щницу подо́бную ему́. Ты о́троку патриа́рха Авраа́ма сше́ствовал еси в Средоре́чии, посыла́я уневе́стити господи́ну его́ Исаа́ку жену́, и хода́тайством водоноше́ния обручи́ти Реве́кку открыл еси́. Ты и Тови́ю му́дро наста́вил еси́, иже, обре́т жену́, благода́рно помолися Тебе́, е́же поми́ловану ему́ быти и с не́ю состаре́тися. Ты и усты Премудраго Соломо́на рекл еси́: иже обре́те жену до́бру, обре́те благода́ть.

Пречи́стый Спа́се наш, от Приснодевы Марии воплоти́выйся и роди́выйся во спасе́ние рода челове́ческаго! Ты за неизрече́нный Твой дар и мно́гую бла́гость прише́л еси в Ка́ну Галиле́йскую и та́мошний брак благослови́л еси, да вси уве́дят, яко Твоя во́ля есть зако́нное супру́жество и е́же из него́ чадотворе́ние.

Услыши, Го́споди, моли́тву на́шу и пода́ждь рабу́ Твоему́ сему́ (рабе́ Твое́й сей) (имяре́к) супру́жество по се́рдцу его (ея) в по́мощь и восприятие рода челове́ча, да, в единоду́шии пребывающе, в ве́ре, любви́ и во святыни с целому́дрием в ве́це сем поживе́т и Оби́телей Небе́сных дости́гнет, иде́же вси святи́и благода́рно славосло́вят Имя Твое́ Пресвятое, Отца́ и Сына и Свята́го Духа. Аминь.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Го́споди поми́луй, трижды. Сла́ва, и ны́не:

Господи Иисусе Христе, Сыне Божий, молитвами Пречистыя Твоея Матере, святых славных и всехвальных Апостол, святых благоверных князя Петра и княгини Февронии, святых праведных богоотец Иоакима и Анны и всех святых помилуй и спаси нас, яко Благ и Человеколюбец. Аминь.

Го́споди, поми́луй, (трижды).