Шрифт
Из книги молебных пений
Последование молебнаго пения от наводнения
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, (трижды). Сла́ва, и ны́не:
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Таже, Го́споди, поми́луй, (12), Сла́ва, и ны́не:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 142:
Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.
Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. (Трижды).
Тропа́рь, Гла́с 6:
Поми́луй нас, Го́споди, поми́луй нас; / вся́каго бо отве́та недоуме́юще, / сию́ Ти моли́тву я́ко Влады́це, гре́шнии прино́сим: / поми́луй нас.
Слава: Го́споди, поми́луй нас, / на Тя бо упова́хом; / не прогне́вайся на ны зело́, / ниже́ помяни́ беззако́ний на́ших, / но при́зри и ны́не я́ко благоутро́бен, и изба́ви ны от враг на́ших; / Ты бо еси́ Бог наш, и мы лю́дие Твои́, / вси дела́ руку́ Твое́ю, и и́мя Твое́ призыва́ем.
И ныне: Милосе́рдия две́ри отве́рзи нам, / благослове́нная Богоро́дице, / наде́ющиися на Тя да не поги́бнем, / но да изба́вимся Тобо́ю от бед: / Ты бо еси́ спасе́ние ро́да христиа́нскаго.
Го́споди, поми́луй, (трижды).
Псалом 6
Господи, да не я́ростию Твое́ю обличи́ши мене́, ниже́ гне́вом Твои́м нака́жеши мене́.
Припев: Благоутро́бне, долготерпели́ве и Всеще́дрый Го́споди, низпосли́ ми́лость Твою́ на лю́ди Твоя.
Поми́луй мя, Го́споди, я́ко не́мощен есмь, исцели́ мя, Господи, я́ко смято́шася ко́сти моя.
Припев: Благоутро́бне, долготерпели́ве и Всеще́дрый Го́споди, низпосли́ ми́лость Твою́ на лю́ди Твоя.
И душа́ моя смяте́ся зело́: и Ты, Господи, доко́ле?
Припев: Благоутро́бне, долготерпели́ве и Всеще́дрый Го́споди, низпосли́ ми́лость Твою́ на лю́ди Твоя.
Обрати́ся, Господи, изба́ви ду́шу мою: спаси́ мя ра́ди ми́лости Твоея́.
Припев: Благоутро́бне, долготерпели́ве и Всеще́дрый Го́споди, низпосли́ ми́лость Твою́ на лю́ди Твоя.
Яко не́сть в сме́рти помина́яй Тебе: во а́де же кто испове́стся Тебе?
Припев: Благоутро́бне, долготерпели́ве и Всеще́дрый Го́споди, низпосли́ ми́лость Твою́ на лю́ди Твоя.
Утруди́хся воздыха́нием моим, измы́ю на вся́ку нощь ло́же мое, слеза́ми мои́ми посте́лю мою омочу́.
Припев: Благоутро́бне, долготерпели́ве и Всеще́дрый Го́споди, низпосли́ ми́лость Твою́ на лю́ди Твоя.
Смяте́ся от я́рости о́ко мое, обетша́х во всех вразе́х моих.
Припев: Благоутро́бне, долготерпели́ве и Всеще́дрый Го́споди, низпосли́ ми́лость Твою́ на лю́ди Твоя.
Отступи́те от мене́, вси де́лающии беззако́ние, я́ко услы́ша Господь глас пла́ча моего́:
Припев: Благоутро́бне, долготерпели́ве и Всеще́дрый Го́споди, низпосли́ ми́лость Твою́ на лю́ди Твоя.
услы́ша Господь моле́ние мое, Господь моли́тву мою прия́т.
Припев: Благоутро́бне, долготерпели́ве и Всеще́дрый Го́споди, низпосли́ ми́лость Твою́ на лю́ди Твоя.
Да постыдя́тся и смяту́тся вси врази́ мои, да возвратя́тся и устыдя́тся зело́ вско́ре.
Припев: Благоутро́бне, долготерпели́ве и Всеще́дрый Го́споди, низпосли́ ми́лость Твою́ на лю́ди Твоя.
Слава: Яко Ще́дрый, Го́споди, умилосе́рдися на люди Твоя, и яко долготерпели́в пре́зри прегреше́ния на́ша, и поми́луй ны.
И ныне: Пресвята́я Владычице, Всепе́тая, Благослове́нная, яко Благолюби́вая заступи́, и поми́луй ны.
Го́споди, поми́луй, (трижды).
Псалом 101
Припев: Милостиве, помилуй, помилуй, помилуй нас, Господи.
Господи, услы́ши моли́тву мою, и вопль мой к Тебе́ да прии́дет.
Припев: Милостиве, помилуй, помилуй, помилуй нас, Господи.
Не отврати́ лица́ Твоего от мене́: во́ньже а́ще день скорблю́, приклони́ ко мне у́хо Твое: во́ньже а́ще день призову́ Тя, ско́ро услы́ши мя.
Припев: Милостиве, помилуй, помилуй, помилуй нас, Господи.
Яко исчезо́ша яко дым дни́е мои, и ко́сти моя яко суши́ло сосхо́шася.
Припев: Милостиве, помилуй, помилуй, помилуй нас, Господи.
Уя́звен бых яко трава́, и и́зсше се́рдце мое, яко забы́х сне́сти хлеб мой.
Припев: Милостиве, помилуй, помилуй, помилуй нас, Господи.
От гла́са воздыха́ния моего прильпе́ кость моя пло́ти моей.
Припев: Милостиве, помилуй, помилуй, помилуй нас, Господи.
Уподо́бихся нея́сыти пусты́нней, бых яко нощны́й вран на ны́рищи.
Припев: Милостиве, помилуй, помилуй, помилуй нас, Господи.
Бдех и бых яко пти́ца осо́бящаяся на зде.
Припев: Милостиве, помилуй, помилуй, помилуй нас, Господи.
Весь день поноша́ху ми врази́ мои, и хва́лящии мя мною кленя́хуся.
Припев: Милостиве, помилуй, помилуй, помилуй нас, Господи.
Зане́ пе́пел яко хлеб ядя́х, и питие́ мое с пла́чем растворя́х.
Припев: Милостиве, помилуй, помилуй, помилуй нас, Господи.
От лица́ гне́ва Твоего и я́рости Твоея́: яко возне́с низве́ргл мя еси́.
Припев: Милостиве, помилуй, помилуй, помилуй нас, Господи.
Дни́е мои яко сень уклони́шася, и аз яко сено изсхо́х.
Припев: Милостиве, помилуй, помилуй, помилуй нас, Господи.
Ты же, Господи, во век пребыва́еши, и па́мять Твоя в род и род.
Припев: Милостиве, помилуй, помилуй, помилуй нас, Господи.
Ты воскре́с уще́дриши Сио́на, яко вре́мя уще́дрити его, яко прии́де время.
Припев: Милостиве, помилуй, помилуй, помилуй нас, Господи.
Яко благоволи́ша раби́ Твои ка́мение его, и персть его уще́дрят.
Припев: Милостиве, помилуй, помилуй, помилуй нас, Господи.
И убоя́тся язы́цы и́мене Господня, и вси ца́рие зе́мстии славы Твоея́.
Припев: Милостиве, помилуй, помилуй, помилуй нас, Господи.
Яко сози́ждет Господь Сио́на, и яви́тся во сла́ве Своей.
Припев: Милостиве, помилуй, помилуй, помилуй нас, Господи.
Призре́ на моли́тву смире́нных, и не уничижи́ моле́ния их.
Припев: Милостиве, помилуй, помилуй, помилуй нас, Господи.
Да напи́шется сие в род ин, и лю́дие зи́ждемии восхва́лят Господа.
Припев: Милостиве, помилуй, помилуй, помилуй нас, Господи.
Яко прини́че с высоты́ святы́я Своея́, Господь с Небесе́ на зе́млю призре́,
Припев: Милостиве, помилуй, помилуй, помилуй нас, Господи.
услы́шати воздыха́ние окова́нных, разреши́ти сы́ны умерщвле́нных,
Припев: Милостиве, помилуй, помилуй, помилуй нас, Господи.
возвести́ти в Сио́не имя Господне, и хвалу́ Его во Иерусали́ме.
Припев: Милостиве, помилуй, помилуй, помилуй нас, Господи.
Внегда́ собра́тися лю́дем вку́пе и царе́м, еже рабо́тати Господеви.
Припев: Милостиве, помилуй, помилуй, помилуй нас, Господи.
Отвеща́ Ему на пути́ кре́пости Его: умале́ние дней моих возвести́ ми.
Припев: Милостиве, помилуй, помилуй, помилуй нас, Господи.
Не возведи́ мене́ во преполове́ние дней мои́х: в ро́де родо́в ле́та Твоя.
Припев: Милостиве, помилуй, помилуй, помилуй нас, Господи.
В нача́лех Ты, Господи, зе́млю основа́л еси́, и дела́ руку́ Твоею суть небеса́.
Припев: Милостиве, помилуй, помилуй, помилуй нас, Господи.
Та поги́бнут, Ты же пребыва́еши, и вся яко ри́за обетша́ют, и я́ко оде́жду свие́ши я́, и изменя́тся.
Припев: Милостиве, помилуй, помилуй, помилуй нас, Господи.
Ты же тойжде еси́, и ле́та Твоя не оскуде́ют.
Припев: Милостиве, помилуй, помилуй, помилуй нас, Господи.
Сы́нове раб Твоих вселя́тся, и се́мя их во век испра́вится.
Припев: Милостиве, помилуй, помилуй, помилуй нас, Господи.
Слава: Яко Ще́дрый, Го́споди, умилосе́рдися на люди Твоя, и яко долготерпели́в пре́зри прегреше́ния на́ша, и поми́луй ны.
И ныне: Пресвята́я Владычице, Всепе́тая, Благослове́нная, яко Благолюби́вая заступи́, и поми́луй ны.
Го́споди, поми́луй, (трижды).
Псалом 129
Из глубины́ воззва́х к Тебе, Господи, Господи, услы́ши глас мой.
Припев: Яко Ще́дрый, Го́споди, умилосе́рдися на люди Твоя, и яко долготерпели́в пре́зри прегреше́ния на́ша, и поми́луй ны.
Да бу́дут у́ши Твои вне́млюще гла́су моле́ния моего́.
Припев: Яко Ще́дрый, Го́споди, умилосе́рдися на люди Твоя, и яко долготерпели́в пре́зри прегреше́ния на́ша, и поми́луй ны.
Аще беззако́ния на́зриши, Господи, Господи, кто постои́т? Яко у Тебе очище́ние есть.
Припев: Яко Ще́дрый, Го́споди, умилосе́рдися на люди Твоя, и яко долготерпели́в пре́зри прегреше́ния на́ша, и поми́луй ны.
Имене ра́ди Твоего потерпе́х Тя, Господи, потерпе́ душа́ моя в сло́во Твое, упова́ душа́ моя на Господа.
Припев: Яко Ще́дрый, Го́споди, умилосе́рдися на люди Твоя, и яко долготерпели́в пре́зри прегреше́ния на́ша, и поми́луй ны.
От стра́жи у́тренния до но́щи, от стра́жи у́тренния да упова́ет Изра́иль на Господа.
Припев: Яко Ще́дрый, Го́споди, умилосе́рдися на люди Твоя, и яко долготерпели́в пре́зри прегреше́ния на́ша, и поми́луй ны.
Яко у Господа ми́лость, и мно́гое у Него избавле́ние, и Той изба́вит Изра́иля от всех беззако́ний его.
Припев: Яко Ще́дрый, Го́споди, умилосе́рдися на люди Твоя, и яко долготерпели́в пре́зри прегреше́ния на́ша, и поми́луй ны.
Слава: Яко Ще́дрый, Го́споди, умилосе́рдися на люди Твоя, и яко долготерпели́в пре́зри прегреше́ния на́ша, и поми́луй ны.
И ныне: Пресвята́я Владычице, Всепе́тая, Благослове́нная, яко Благолюби́вая заступи́, и поми́луй ны.
Го́споди, поми́луй, (трижды).
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Канон покаянный ко Господу нашему Иисусу Христу. Глас 6:
Пе́снь 1.
Ирмо́с: Помощник и покровитель бысть мне во спасение, сей мой Бог, и прославлю Его: Бог отца моего, и вознесу Его: славно бо прославися.
Сти́х: Поми́луй мя, Бо́же, поми́луй мя.
Изба́вителю мо́й Иису́се, я́коже изба́вил еси́ мно́гих прегреше́ний блудни́цу, иногда́ пока́явшуюся до́бре: молю́ся Ти́, и мене́ изба́ви безчи́сленных зо́л мои́х я́ко ми́лостив.
Сти́х: Поми́луй мя, Бо́же, поми́луй мя.
Пла́вая в су́етнем помышле́нии жития́, Иису́се, лю́тую сию́ пучи́ну, во истопле́ния впадо́х мно́гая, от ни́хже изба́вив спаси́ мя.
Сла́ва: Разреши́ мя, Сло́ве, от соу́з безчи́сленных мои́х зо́л, да ше́ствую в покая́нии пра́ведныя стези́ Твоя́, в Боже́ственное наставля́ющыя поко́ище ве́чных красо́т.
И ны́не, богоро́дичен: Покая́ния ми́, Де́во, покажи́ пути́, и от водя́щия мя́ ко греху́ возврати́ стези́: да Тя́ пою́ многопе́тую Бо́жию роди́тельницу.
Пе́снь 3.
Ирмо́с: Утверди́, Го́споди, на ка́мени за́поведей Твои́х, подви́гшееся се́рдце мое́, я́ко Еди́н Свя́т еси́ и Госпо́дь.
Сти́х: Поми́луй мя, Бо́же, поми́луй мя.
Ми́лостивным Твои́м о́ком при́зри на мя́, егда́ хощу́ пред Тобо́ю предста́ти, и суди́тися, Еди́не Благопремени́телю Го́споди.
Сти́х: Поми́луй мя, Бо́же, поми́луй мя.
Воздыха́юща мя́ приими́, я́коже мытаря́ из глубины́ душе́вныя, и покая́ние ми́ да́руй, Спа́се, греха́ вся́каго мя́ избавля́ющее.
Сла́ва: Скве́рны зло́бныя отмы́в моего́ се́рдца, и яви́тися ми́ непоро́чну пред Тобо́ю в де́нь стра́шный сподо́би, Христе́ мо́й, я́ко Преблаги́й.
И ны́не: Низпа́дшым исправле́ние, Богоро́дице, па́дшаго мя́ воздви́гни из ро́ва зо́л мои́х: и утверди́, Влады́чице, на ка́мени за́поведей Бо́жиих.
Катавасия: Изба́ви от бед рабы Твоя, Ми́лостиве, яко мы усе́рдно к Тебе́ прибега́ем, к ми́лостивому Изба́вителю, всех Владыце Го́споду Иисусу.
Пе́снь 4.
Ирмо́с: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися, и челове́ком яви́тися, и глаго́лаше: услы́шах слу́х Тво́й и убоя́хся: сла́ва си́ле Твое́й, Го́споди.
Сти́х: Поми́луй мя, Бо́же, поми́луй мя.
То́ки сле́з да́ждь ми́ изсуша́ющыя страсте́й мои́х исто́чники, и греха́ вся́каго тиме́ния отмыва́ющыя, Ще́дре, многоми́лостиве, и угаша́ющыя огня́ гее́нскаго ве́чнующий пла́мень неугаси́мый.
Сти́х: Поми́луй мя, Бо́же, поми́луй мя.
Непреста́нно чешу́ стру́пы души́ моея́ сластолю́бием, и пребыва́ю неисце́лен, в чу́вство са́м приити́ не хотя́, кто́ бу́ду? и что́ сотворю́? Христе́ Ще́дрый, исцели́в спаси́ мя.
Сла́ва: Прельсти́ мя́ вкуше́нием грехо́вным вра́г льсте́ц, и от Тебе́, Бла́же, дале́че удали́, и зубо́м свои́м сне́дь соде́ла мя́: еди́не Спа́се, потщи́ся изъя́ти мя́.
И ны́не: Всепе́тая Влады́чице, велегла́сно воспева́ющаго Ти́, испо́лни вся́кия ра́дости мою́ мы́сль, подаю́щи ми́ пла́чь бла́г, и покая́ния вины́, и ра́зум спасе́ния.
Пе́снь 5.
Ирмо́с: От но́щи у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́, и научи́ мя Спа́се, твори́ти во́лю Твою́.
Сти́х: Поми́луй мя, Бо́же, поми́луй мя.
Се́ и́же тала́нт Тво́й сокры́вый, Христе́, лени́вый ра́б Тво́й, и упраздни́выйся лука́выми страсте́й дея́нии, а́з е́смь: те́мже не посли́ мене́ во о́гнь.
Сти́х: Поми́луй мя, Бо́же, поми́луй мя.
Тво́й сы́н бы́в благода́тию, благоутро́бне Христе́, порабо́тихся врагу́, и от Тебе́ удали́хся жи́в блу́дно. Те́мже обрати́в мя́ спаси́.
Сла́ва: И́же блудни́цу очи́стивый, и прокаже́нныя, Твои́м повеле́нием, Соде́телю вся́ческих, скве́рнаго греха́ смире́нную ду́шу мою́ очи́сти, и оде́ждами блиста́ющими красну́ соде́лай, Влады́ко, молю́ся.
И ны́не: Врата́ непроходи́мая, отве́рзи ми́ врата́, молю́ся, покая́ния и́стиннаго: и покажи́ ми стезю́ покая́ния, Чи́стая, все́х наста́внице.
Пе́снь 6.
Ирмо́с: Возопи́х все́м се́рдцем мои́м к ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.
Сти́х: Поми́луй мя, Бо́же, поми́луй мя.
Не покажи́ мене́ бесо́м обра́дование в де́нь стра́шный, Христе́ Иису́се: да не услы́шу тогда́ гла́са отсыла́ющаго во о́гнь гее́нский.
Сти́х: Поми́луй мя, Бо́же, поми́луй мя.
Погрузи́ мя во глубине́ прегреше́ний, и́же пра́ведных вра́г: и к щедро́т Твои́х притека́ю пучи́не, Иису́се, к приста́нищу жи́зни ны́не напра́ви мя́.
Сла́ва: Я́ко мыта́рь воздыха́ю, я́коже блудни́ца слезю́, я́ко Пе́тр вопию́, мно́гими погружа́емь прегреше́нии, Христе́: по́мощи ми́ ру́ку да́ждь, и спаси́ мя.
И ны́не: Свята́я Богоро́дице, Я́же Свято́е Сло́во ро́ждшая пло́тию, Еди́наго почива́ющаго на все́х святы́х, освяти́ мо́й у́м в лука́вых де́лех при́сно пребыва́ющий.
Катавасия: Изба́ви от бед рабы Твоя, Ми́лостиве, яко мы усе́рдно к Тебе́ прибега́ем, к ми́лостивому Изба́вителю, всех Владыце Го́споду Иисусу.
Прокимен, глас 8:
Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.
Припев: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.
Стих: Не отврати́ лица́ Твоего́ от о́трока Твоего́
Припев: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.
Го́споди, да не я́ростию Твое́ю обличи́ши мене́.
Припев: Ниже́ гне́вом Твои́м нака́жеши мене́.
Ко Евреем послания святаго Апостола Павла чтение. (зача́ло 331, от полу):
Бра́тие, его́же лю́бит Госпо́дь, наказу́ет: бие́т же вся́каго сы́на, его́же прие́млет. А́ще наказа́ние терпите́, я́коже сыново́м обрета́ется вам Бог. Кото́рый бо есть сын, его́же не наказу́ет оте́ц? А́ще же без наказа́ния есте́, ему́же прича́стницы бы́ша вси, у́бо прелюбоде́йчищи есте́, а не сы́нове. К сим, пло́ти на́шей отца́ име́хом наказа́теля, и срамля́хомся: не мно́го ли па́че повине́мся Отцу́ духово́м, и жи́ви бу́дем? Они́ бо в ма́ло дней, я́коже го́де им бе, нака́зоваху нас, а Сей на по́льзу, да причасти́мся святы́ни Его́. Вся́кое бо наказа́ние в настоя́щее вре́мя не мни́тся ра́дость бы́ти, но печа́ль: последи́ же плод ми́рен науче́ным тем воздае́т пра́вды. Те́мже осла́бленныя ру́ки и осла́бленная коле́на испра́вите. И стези́ пра́вы сотвори́те нога́ми ва́шими, да не хро́мое соврати́тся, но па́че да исцеле́ет.
Аллилуиа, глас 6:
Аллилу́иа, аллилу́иа, аллилу́иа.
Припев: Аллилу́иа, аллилу́иа, аллилу́иа.
Стих: Бо́же, отри́нул ны еси́ и низложи́л еси́ нас.
Припев: Аллилу́иа, аллилу́иа, аллилу́иа.
Разгне́вался еси́, и уще́дрил еси́ нас
Припев: Аллилу́иа, аллилу́иа, аллилу́иа.
От Матфе́я Свята́го Ева́нгелия чте́ние.
Припев: Сла́ва Тебе́, Го́споди, сла́ва Тебе́.
Во вре́мя о́но, вле́зшу Иису́су в кора́бль, по Нем идо́ша ученицы́ Его́. И се трус вели́к бысть в мо́ри, я́коже кораблю́ покрыва́тися волна́ми, То́йже же спа́ше. И прише́дше ученицы́ Его́ возбуди́ша Его́, глаго́люще: Го́споди, спаси́ ны, погиба́ем. И глаго́ла им: что страшли́ви есте́, малове́ри? Тогда́ воста́в запрети́ ве́тром и мо́рю, и бысть тишина́ ве́лия. Челове́цы же чуди́шася, глаго́люще: кто есть Сей, я́ко и ве́три и мо́ре послу́шают Его́?
Припев: Сла́ва Тебе́, Го́споди, сла́ва Тебе́.
Пе́снь 7.
Ирмо́с: Согреши́хом, беззако́нновахом, непра́вдовахом пред тобо́ю, ниже́ соблюдо́хом, ниже́ сотвори́хом, я́коже запове́дал еси́ на́м: но не преда́ждь на́с до конца́, отце́в Бо́же.
Сти́х: Поми́луй мя, Бо́же, поми́луй мя.
Взира́ю на ми́лость Твою́ безме́рную, безме́рно согреши́вый, ве́м Твое́ милосе́рдие, ве́м долготерпе́ние и незло́бие: покая́ния ми́ да́руй плоды́, ще́дрый Христе́, и спаси́ мя.
Сти́х: Поми́луй мя, Бо́же, поми́луй мя.
Уврачу́й, Ще́дре, се́рдца моего́ неисце́льныя стра́сти, да́руй отсече́ние долго́в мои́х, тя́жкое бре́мя облегчи́: да во умиле́нии Тя́ сла́влю при́сно отце́в Бо́га.
Сла́ва: Я́ко в беззако́ниих зача́т и роди́хся, Ще́дре, согреши́х па́че все́х челове́к: обраще́ния ми́ пода́ждь вре́мя оправда́ющее мя́.
И ны́не: Ему́же предстоят с тре́петом небе́снии чи́ни, Того́ родила еси́, Чи́стая, примири́вшагося челове́ком за бла́гость: егоже приле́жно моли́ уще́дрити рабы Твоя.
Пе́снь 8.
Ирмо́с: Его́же во́инства небе́сная сла́вят, и трепе́щут Херуви́ми и Серафи́ми, вся́ко дыха́ние и тва́рь, по́йте, благослови́те, и превозноси́те во вся́ ве́ки.
Сти́х: Поми́луй мя, Бо́же, поми́луй мя.
Взира́ю на вели́кую ми́лость щедро́т Твои́х, Христе́, я́коже Дави́д, согреши́в па́че о́наго, и зову́ со о́нем: Еди́не Ми́лостиве, поми́луй мя́ вско́ре.
Сти́х: Поми́луй мя, Бо́же, поми́луй мя.
Коне́ц бла́г бы́ти ми́ молю́ся, положи́ти же лука́вым дея́нием когда́ коне́ц, не усе́рдствую, ожесточе́нное име́я мое́ се́рдце: уще́дри мя́, Бо́жий Сло́ве.
Сла́ва: Ру́це вся́кими оскверни́ла еси́ злодея́ньми, душе́ моя́: и ка́ко те́х воздева́еши на высоту́ бесе́дующи Бо́гу? Но́зе непотре́бны сотвори́ла еси́, на дела́ ходя́щи сту́дная: потщи́ся ходи́ти покая́нием в пути́ спаси́тельныя.
И ны́не: Волну́ема мя́ бу́рею грехо́вною, вопию́ Ти, Влады́чице Чи́стая, Твои́м хода́тайством напра́ви мя́ ко спаси́тельному покая́нию, и ко всеути́шному приста́нищу: я́ко да уви́жу све́т спасе́ния, омрача́емый при́сно ле́ностию.
Пе́снь 9.
Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди я́ко Богоневе́стную Ма́терь, правосла́вно велича́ем.
Сти́х: Поми́луй мя, Бо́же, поми́луй мя.
Иису́се Человеколю́бче, еди́не не́мощь на́шу ве́дый: в сию́ бо обле́клся еси́ милосе́рдия ра́ди, хотя́ сию́ очи́стити: те́мже скве́рны лука́выя и гное́ния зо́л мои́х очи́сти, и спаси́ мя.
Сти́х: Поми́луй мя, Бо́же, поми́луй мя.
Я́ко блудни́ца сле́зы приношу́ Ти, Человеколю́бче: я́ко мыта́рь стеня́ взыва́ю Ти́: очи́сти, и спаси́ мя. Я́коже ханане́а вопию́: поми́луй мя́, я́коже Петра́ пока́явшася, проще́ния сподо́би.
Сла́ва: Да и а́з спаса́емь благода́рственно Тебе́, Христе́, велича́ю, при́зри на мя́ мно́ги ра́ны на плещу́ прие́мшаго, и исцели́, вино́ на ни́х и еле́й возлива́я, Твоего́, Спа́се, благоутро́бия позна́ние.
И ны́не: Просвети́тельными мо́лниями, Всенепоро́чная, из Твоея́ проше́дшаго утро́бы, Сы́на Бо́жия, ве́рою пою́щыя Тя́ просвети́: и тьмы́ на́с несвети́мыя, и ве́чныя му́ки изми́ Твои́м предста́тельством.
Посем глаголем: Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Трисвятое.
Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, (трижды). Сла́ва, и ны́не:
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Тропарь Богородице, глас 4:
Засту́пнице усе́рдная,/ Ма́ти Го́спода Вы́шняго,/ за всех мо́лиши Сы́на Твоего́ Христа́ Бо́га на́шего,/ и всем твори́ши спасти́ся,/ в держа́вный Твой покро́в прибега́ющим./ Всех нас заступи́, о Госпоже́ Цари́це и Влады́чице,/ и́же в напа́стех и в ско́рбех, и в боле́знех обремене́нных грехи́ мно́гими,/ предстоя́щих и моля́щихся Тебе́ умиле́нною душе́ю/ и сокруше́нным се́рдцем,/ пред пречи́стым Твои́м о́бразом со слеза́ми,/ и невозвра́тно наде́жду иму́щих на Тя,/ избавле́ния всех зол,/ всем поле́зная да́руй,/ и вся спаси́, Богоро́дице Де́во:// Ты бо еси́ Боже́ственный покро́в рабо́м Твои́м.
Молитва
Го́споди, еди́не в ми́лости бога́тый, и утро́бами бла́гости преклоня́яйся к моле́нием на́с гре́шных и недосто́йных ра́б Твои́х, вся́ на́ша поле́зно стро́яй и правля́яй, прему́дрым Твои́м про́мыслом житие́ на́ше провожда́яй, и вся́ким о́бразом спасе́ния на́шего жела́яй, естество́м долготерпели́в сы́й и многоми́лостив, наказу́яй, и па́ки исцеля́яй, и наказа́ние простира́яй бла́гостне же и человеколю́бне, не во е́же погуби́ти созда́ние ру́к Твои́х, но па́че е́же к нача́льной добро́те па́ки привести́, и к пе́рвому о́ному благоро́дию, его́же погуби́хом простото́ю ума́, и сове́том окая́ннейшаго, па́ки возвести́ хотя́, и все́ми о́бразы смотря́яй, е́же па́ки спасти́ оскуде́вшее от паде́жа о́наго. Са́м Влады́ко Вседержи́телю, при́зри на ны́, и вонми́ моле́нием на́с гре́шных, мно́жество бо беззако́ний на́ших недерзнове́нны на́с сотвори́, и ниже́ сме́ти отню́д проси́ти проще́ния о прегреше́нии. Но ве́дуще Твое́ человеколю́бие, благоутро́бие, мно́гую ми́лость, долготерпе́ние, беззло́бие и премно́гую бла́гость, дерза́юще на глубину́ си́х, и на пучи́ну бла́гости Твоея́, возде́ем ру́це и приле́жно вопие́м Ти́: согреши́хом, беззако́нновахом, нече́ствовахом, я́ко забы́хом за́поведи Твоя́, и в сле́д мы́сли на́шея лука́выя ходи́хом, и я́ко недосто́йно зва́нию и ева́нгелию Христа́ Твоего́ жи́тельствовахом, и святы́м Его́ страсте́м, и е́же о на́с истоща́нию, я́ко бы́хом поноше́ние возлю́бленному Евоему́. Свяще́нницы и лю́дие Твои́ изступи́хом, вку́пе вси́ уклони́хомся, непотре́бни бы́хом: не́сть творя́й су́д и пра́вду, не́сть до еди́наго, затвори́хом щедро́ты Твоя́, и человеколю́бие Твое́, и утро́бы ми́лости Бо́га на́шего, зло́бы ра́ди на́шея и лука́вства начина́ний, с ни́миже пожи́хом. Ты́ бла́г еси́, но мы́ беззако́нновахом, Ты́ долготерпели́в, но мы́ я́зв досто́йни. Ве́мы Твою́ бла́гость, а́ще и неразу́миви есмы́, ма́ло, о ни́хже согреши́хом, бие́ни бы́хом. Ты́ стра́шен еси́, и кто́ противоста́нет ти́? Тре́пет прии́мут от Тебе́ го́ры, и вели́честву мы́шцы Твоея́ кто́ противорече́т? А́ще заключи́ши не́бо, кто́ отве́рзет? И а́ще заключи́ши хля́би Твоя́, кто́ постои́т? Легко́ е́сть пред очи́ма Твои́ма и оубо́жити и обогати́ти, оживи́ти и умертви́ти, порази́ти и исцели́ти, е́же хоте́ти Тебе́, дея́ние е́сть соверше́нно. Ты́ разгне́вался еси́, мы́ же согреши́хом, глаго́лет не́кто от дре́вних испове́даяся. На́м же и сопроти́в вре́мя е́сть рещи́: мы́ согреши́хом, Ты́ же разгне́вался еси́, сего́ ра́ди бы́хом поноше́ние сосе́дом на́шим, отврати́л еси́ лице́ Твое́, и нече́стия испо́лнихомся. Но преста́ни Го́споди от гне́ва, осла́би Го́споди, уми́лостивися Го́споди, и не преда́ждь на́с до конца́ беззако́ний ра́ди на́ших, ниже́ на́шими ра́нами да нака́жеши ины́х. Да́ждь на́м муче́нием ины́х уцелому́дритися, ки́их си́х? Язы́ков неве́дающих Тя́ и ца́рств не повину́вшихся держа́ве Твое́й, мы́ же лю́дие Твои́, и же́зл насле́дия Твоего́. Сего́ ра́ди накажи́ ны́, оба́че в бла́гости, а не с я́ростию Твое́ю, да не ума́леных на́с сотвори́ши, и па́че все́х живу́щих на земли́ во уничиже́ние бу́дем, ми́лость бо Твоя́ неизрече́нна, и человеколю́бие Твое́ непобеди́мо, и бога́тство бла́гости Твоея́ неизсле́димо, на ня́же и дерза́юще мо́лимся, и ми́ли ся де́ем прекланя́юще коле́на серде́ц на́ших, преста́ни от се́чи гне́ва Твоего́, мо́лим приле́жно, я́коже при Дави́де дре́вле о и́же на лю́дех Твои́х, а́ще и не подо́бное покая́ние показу́ем, но я́ко преблаги́й уста́ви гне́в Тво́й, укроти́ я́рость Твою́ пра́ведную, и да́ждь стра́ждущым здра́вие, немощству́ющым кре́пость, здра́выя же соблюди́, вся́к неду́г, и вся́кую я́зю отжени́ от люде́й Твои́х, все́х от сего́ ча́яния свободи́, соблюда́яй безнаве́тны по бы́вшей боле́зни и сохраня́яй вседержи́тельною Твое́ю руко́ю неприкоснове́нны от лю́таго сего́ озлобле́ния, и губи́тельнаго сокруше́ния, вои́стинну бо поколеба́ все́х, и смути́ я́рость гне́ва Тоего́. А́ще у́бо и не обраща́емся вся́ко от лука́вств на́ших, но Ты́ са́м изба́ви от лука́выя со́вести все́х на́с, и да́ждь во вся́ком благодея́нии благоугоди́ти Тебе́, моли́твами неискусому́жно Тебе́ ро́ждшия, Чи́стыя Богома́тере, Присноде́вы Мари́и, предста́тельствы святы́х и богови́дных а́нгел, и все́х святы́х я́ко Ты́ еси́ ми́лости исто́чник, и благоутро́бия неизсле́димая пучи́на, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.
Го́споди поми́луй, трижды. Сла́ва, и ны́не:
Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь.
