Чин молебного пения в начале учебного года для учащихся школ (обучение отроков)

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 33:

Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю и вознесе́м и́мя Его́ вку́пе. Взыска́х Го́спода и услы́ша мя, и от всех скорбе́й мои́х изба́ви мя. Приступи́те к Нему́ и просвети́теся, и ли́ца ва́ша не постыдя́тся. Сей ни́щий воззва́, и Госпо́дь услы́ша и́, и от всех скорбе́й eго́ спасе́ и́. Ополчи́тся А́нгел Госпо́день о́крест боя́щихся Его́, и изба́вит их. Вкуси́те и ви́дите, я́ко благ Госпо́дь; блаже́н муж, и́же упова́ет Нань. Бо́йтеся Го́спода, вси святи́и Его́, я́ко несть лише́ния боя́щимся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ вас. Кто́ есть челове́к хотя́й живо́т, любя́й дни ви́дети бла́ги? Удержи́ язы́к твой от зла, и устне́ твои́, е́же не глаго́лати льсти. Уклони́ся от зла, и сотвори́ бла́го. Взыщи́ ми́ра, и пожени́ и́. О́чи Госпо́дни на пра́ведныя, и у́ши Его́ в моли́тву их. Лице́ же Госпо́дне на творя́щия зла́я, е́же потреби́ти от земли́ па́мять их. Воззва́ша пра́веднии, и Госпо́дь услы́ша их, и от всех скорбе́й их изба́ви их. Близ Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от всех их изба́вит я́ Госпо́дь. Храни́т Госпо́дь вся ко́сти их, ни еди́на от них сокруши́тся. Смерть гре́шников люта́, и ненави́дящии пра́веднаго прегре́шат. Изба́вит Госпо́дь ду́шы раб Свои́х, и не прегреша́т вси, упова́ющии на Него́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Посем тропари сия, глас 6:

Я́ко посреде́ ученико́в Твои́х / прише́л еси́, Спа́се, / мир дая́ им, / прииди́ и к нам, и спаси́ нас.

Безкни́жныя ученики́ / Дух Твой Святы́й наказа́тели показа́, Христе Боже, / и многовеща́нным сли́чеством язы́к / пре́лести ума́ли, я́ко всеси́лен.

Слава, тропарь, глас 8: Благослове́н еси́, Христе́ Бо́же наш, / И́же прему́дры ловцы́ явле́й, / низпосла́в им Ду́ха Свята́го, / и те́ми уловле́й вселе́нную, / Человеколю́бче, сла́ва Тебе́.

И ныне, глас 6: Предста́тельство христиа́н непосты́дное, / хода́тайство ко Творцу́ непрело́жное, / не пре́зри гре́шных моле́ний гла́сы, / но предвари́, я́ко Блага́я, на по́мощь нас, / ве́рно зову́щих Ти, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Проки́мен, глас четвертый:

Хвали́те, о́троцы, Го́спода, хвали́те и́мя Госпо́дне

Припев: Хвали́те, о́троцы, Го́спода, хвали́те и́мя Госпо́дне

Стих: Бу́ди и́мя Госпо́дне благослове́но от ны́не и до ве́ка.

Припев: Хвали́те, о́троцы, Го́спода, хвали́те и́мя Госпо́дне

Стих:Хвали́те, о́троцы, Го́спода,

Припев: хвали́те и́мя Госпо́дне

К Ефеся́нам посла́ния свята́го апо́стола Па́вла чте́ние.

Бра́тие, не престаю́ благодаря́ о вас, помина́ние о вас творя́ в моли́твах мои́х. Да Бог Го́спода на́шего Иису́са Христа́, Оте́ц сла́вы даст вам Ду́ха прему́дрости и открове́ния, в позна́ние Его́. Просвеще́нна очеса́ се́рдца ва́шего, я́ко уве́дети вам, ко́е есть упова́ние зва́ния Его́, и ко́е бога́тство сла́вы достоя́ния Его́ во святы́х. И ко́е преспе́ющее вели́чество си́лы Его́ в нас, ве́рующих по де́йству держа́вы кре́пости Его́. Да возмо́жете разуме́ти преспе́ющую ра́зум любо́вь Христо́ву, да испо́лнитеся во вся́ко исполне́ние Бо́жие. Могу́щему же па́че вся твори́ти по преизбы́точествию, и́хже про́сим или́ разуме́ем; по си́ле де́йствуемой в нас. Тому́ сла́ва в Це́ркви о Христе́ Иису́се, во вся ро́ды ве́ка веко́в. Ами́нь.

От Ма́рка свята́го Ева́нгелия чте́ние.

Сла́ва, Тебе́, Го́споди, сла́ва Тебе́.

Во вре́мя о́но, приноша́ху ко Иису́сови де́ти, да ко́снется их: ученицы́ же преща́ху принося́щим. Ви́дев же Иису́с, негодова́, и рече́ им: оста́вите дете́й приходи́ти ко Мне, и не брани́те им, таце́х бо есть Ца́рствие Бо́жие. Ами́нь глаго́лю вам, и́же а́ще не прии́мет Ца́рствия Бо́жия я́ко отроча́, не и́мать вни́ти в не́. И объе́м их, возло́жь ру́це на них, благословля́ше их.

Сла́ва, Тебе́, Го́споди, сла́ва Тебе́.

Го́споди, поми́луй, (трижды).

Молитва

Го́споди, Бо́же и Созда́телю наш, о́бразом Свои́м почты́й нас челове́ки, научи́вый избра́нныя Твоя́, я́ко диви́тися вне́млющым уче́нию Твоему́, откры́вый прему́дрость младе́нцем; и́же Соломо́на и всех взыску́ющих прему́дрости Твое́й научи́вый, отве́рзи сердца́, умы́ и уста́ рабо́в Твои́х сих, во е́же прия́ти си́лу зако́на Твоего́, и со успе́хом позна́ти преподае́мая им поле́зная уче́ния, в сла́ву Пресвята́го и́мене Твоего́, в по́льзу и созида́ние Святе́й Твое́й Це́ркви, и разуме́ти благу́ю и соверше́нную во́лю Твою́. Изба́ви их от вся́каго нало́га вра́жия, соблюди́ их в Правосла́вии и ве́ре, и во вся́ком благоче́стии и чистоте́ во вся дни живота́ их, да преуспе́ют в ра́зуме и во исполне́нии за́поведей Твои́х; да та́ко предугото́вани просла́вят Пресвято́е и́мя Твое́, и бу́дут насле́дницы Ца́рствия Твоего́. Я́ко Ты еси́ Бог си́лен в ми́лости, и благ в кре́пости, и Тебе́ подоба́ет вся́кая сла́ва, честь и поклоне́ние, Отцу́, и Сы́ну, и Свято́му Ду́ху, всегда́, ны́не и при́сно, и во ве́ки веко́в, ами́нь.

Отпуст

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, святы́х сла́вных и всехва́льных Апо́стол, святы́х и пра́ведных богооте́ц Иоаки́ма и А́нны, и всех святы́х, спаси́ и помилуй нас, гре́шных, яко Благ и Человеколюбец.

Раба́м Бо́жиим нача́льствующим, уча́щим и уча́щимся пода́ждь, Го́споди, здра́вие и спасе́ние, и в труда́х их благо́е поспеше́ние, и сохрани их на мно́гая ле́та.

Мно́гая ле́та! трижды.