Молебное пение о заблуждших чадех

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. (Трижды).

Тропарь, глас 3:

Иже во́льною нището́ю обнищав,/ милосе́рдия ра́ди мно́гаго,/ сшел еси́ на зе́млю, Христе́ Бо́же,/ е́же спасти́ челове́ка,/ те́мже и ча́да на́ша, ве́рою и любо́вию обнища́вшая,/ изба́ви от сме́рти духо́вныя,/ яко Благ и Челове́колюбец.

Слава:

Оте́ческия сла́вы Твоея удали́хся безу́мно,/ в злых расточи́в, е́же ми пре́дал еси́, бога́тство./ Те́мже Ти блу́днаго глас приношу́:/ согреши́х пред Тобо́ю, О́тче Ще́дрый,/ приими́ мя, ка́ющася,/ и сотвори́ мя яко еди́наго от нае́мник Твои́х.

Богородичен, глас 4:

И ныне: Взыщи́ нас, погиба́ющих, Пресвята́я Де́во,/ не по грехо́м бо на́шим наказу́еши нас,/ но по человеколюбию ми́луеши,/ изба́ви нас от а́да, боле́зни и ну́жды/ и спаси́ нас.

Прокимен, глас 6:

Стих: Блаже́ни, и́хже оста́вишася беззако́ния и и́хже прикры́шася греси́.

Припев: Блаже́ни, и́хже оста́вишася беззако́ния и и́хже прикры́шася греси́.

Стих: Ты́ еси́ прибе́жище мое́ от ско́рби обдержа́щия мя́.

Припев: Блаже́ни, и́хже оста́вишася беззако́ния и и́хже прикры́шася греси́.

Стих: Блаже́ни, и́хже оста́вишася беззако́ния.

Припев: И и́хже прикры́шася греси́

К Колоссаем послания святаго апостола Павла чтение:

Бра́тие, все е́же а́ще что твори́те сло́вом или́ делом, вся во и́мя Го́спода Иису́са Христа́, благодаря́ще Бо́га и Отца́ Тем. Жены́, повину́йтеся свои́м муже́м, я́коже подоба́ет о Го́споде. Му́жие, люби́те жены́ ва́ша, и не огорча́йтеся к ним. Ча́да, послу́шайте роди́телей свои́х во всем, сие́ бо уго́дно есть Го́сподеви. Отцы́, не раздража́йте чад ва́ших, да не уныва́ют. И вся́ко, е́же а́ще что творите́, от души́ де́лайте, я́коже Го́споду, а не челове́ком, ве́дяще, я́ко от Го́спода прии́мете воздая́ние достоя́ния, Го́споду бо Христу́ рабо́таете. И в моли́тве терпи́те, бо́дрствующе в ней со благодаре́нием.

Аллилyиа, глaс 8:

Стих: Аллилу́ия, аллилу́ия, аллилу́ия.

Припев: Аллилу́ия, аллилу́ия, аллилу́ия.

Стих: Бо́же, уще́дри ны́ и благослови́ ны.

Припев: Аллилу́ия, аллилу́ия, аллилу́ия.

Стих: Просвети́ лице́ Твое́ на ны́ и поми́луй ны́.

Припев: Аллилу́ия, аллилу́ия, аллилу́ия.

От Луки Свята́го Ева́нгелия чте́ние:

Сла́ва, Тебе́, Го́споди, сла́ва Тебе́.

Рече́ Госпо́дь при́тчу сию́: челове́к не́кий име́ два сы́на. И рече́ юне́йший ею́ отцу́: о́тче, даждь ми досто́йную часть име́ния. И раздели́ и́ма име́ние. И не по мно́зех днех собра́в все мний сын, оты́де на страну́ дале́че, и ту расточи́ име́ние свое́, живы́й блу́дно. Изжи́вшу же ему́ все бысть глад кре́пок на стране́ той, и той нача́т лиша́тися. И шед прилепи́ся еди́ному от жи́тель тоя́ страны́, и посла́ его́ на се́ла своя́ пасти́ свиния́. И жела́ше насы́тити чре́во свое́ от роже́ц, я́же ядя́ху свиния́, и никто́же дая́ше ему́. В себе́ же прише́д, рече́: коли́ко нае́мником отца́ моего́ избыва́ют хле́бы, аз же гла́дом ги́блю? Воста́в иду́ ко отцу́ моему́, и реку́ ему́: о́тче, согреши́х на не́бо и пред тобо́ю, и уже́ несмь досто́ин нарещи́ся сын твой, сотвори́ мя я́ко еди́наго от нае́мник твои́х. И воста́в и́де ко отцу́ своему́. Еще́ же ему́ дале́че су́щу, узре́ его́ оте́ц его́, и мил ему́ бысть, и тек нападе́ на вы́ю его́, и облобыза́ его́. Рече́ же ему́ сын: о́тче, согреши́х на не́бо и пред тобо́ю, и уже́ несмь досто́ин нарещи́ся сын твой. Рече́ же оте́ц к рабо́м свои́м: изнеси́те оде́жду пе́рвую и облецы́те его́, и дади́те пе́рстень на ру́ку его́ и сапоги́ на но́зе, и приве́дше теле́ц упите́нный заколи́те, и я́дше весели́мся. Я́ко сын мой сей мертв бе, и оживе́, и изги́бл бе, и обре́теся. И нача́ша весели́тися. Бе же сын его́ ста́рей на селе́, и я́ко гряды́й прибли́жися к до́му, слы́ша пе́ние и ли́ки. И призва́в еди́наго от о́трок, вопроша́ше: что у́бо сия́ суть? Он же рече́ ему́, я́ко брат твой прии́де, и закла́ оте́ц твой теле́ц упите́нный, я́ко здра́ва его́ прия́т. Разгне́вався же, и не хотя́ше вни́ти. Оте́ц же его́ изше́д моля́ше его́. Он же отвеща́в рече́ отцу́: се толи́ко лет рабо́таю тебе́ и николи́же за́поведи твоя́ преступи́х, и мне николи́же дал еси́ козля́те, да со дру́ги свои́ми возвесели́лся бых. Егда́ же сын твой сей, изъеды́й твое́ име́ние с любоде́йцами, прии́де, закла́ ему́ теле́ц пито́мый. Он же рече́ ему́: ча́до, ты всегда́ со мно́ю еси́, и вся моя́ твоя́ суть. Возвесели́ти же ся и возра́довати подоба́ше, я́ко брат твой сей мертв бе, и оживе́, и изги́бл бе, и обре́теся.

Сла́ва, Тебе́, Го́споди, сла́ва Тебе́.

Го́споди, поми́луй, (трижды)

Моли́тва:

Го́споди, Иису́се Христе́, Сыне Единоро́дный Безнача́льнаго Твоего́ Отца́, в мир прише́дый поги́бшее овча́ взыска́ти, гре́шныя к покая́нию обрати́ти, па́дшия воздви́гнути, во тьме седя́щия просвети́ти, малоду́шныя укрепи́ти и вся на путь спасе́ния наста́вити!

При́зри и ныне на моле́ние нас, недосто́йных рабо́в Твои́х, о заблу́ждших ча́дех на́ших приноси́мое, я́же от собла́знов ми́ра сего́, или́ от неве́жества, или́ от на́гльства и уныния, или́ от недоста́тка любве́ на́шея на страну́ дале́че отше́дших и роди́телей свои́х презре́вших, наипа́че же дом Отца́ своего́ Небе́снаго, оста́вивших.

Ей, Владыко Всеми́лостиве! Виждь скорбь на́шу и не даждь поги́бнути ча́дом на́шим, но обрати́ их от пути́ греховнаго и наста́ви на путь и́стины и благоче́стия, да, мирски́я сла́сти оста́вивше, сла́дость любве́ Твоея позна́ют и в покая́ние прииду́т. Мы же, возвраще́ние их ра́достне восприи́мше, ку́пно с ни́ми просла́вим Тя, Спаси́теля на́шего Иису́са Христа́, со Безнача́льным Твои́м Отце́м и Пресвятым и Благи́м и Животворя́щим Твои́м Ду́хом ныне, и при́сно, и во ве́ки веко́в. Ами́нь.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Го́споди поми́луй, трижды. Сла́ва, и ны́не:

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, и всех святы́х, спаси́ и помилуй нас, гре́шных, яко Благ и Человеколюбец. Аминь.

Го́споди, поми́луй, (трижды).