Последование молебнаго пения ко Господу Богу нашему Иисусу Христу, певаемаго во время безведрия, егда дождь многий безгодно идет

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 68:

Спаси́, мя, Бо́же, я́ко внидо́ша во́ды до души́ моея́. Углебо́х в тиме́нии глубины́, и не́сть постоя́ния. Приидо́х во глубины́ морски́я, и бу́ря потопи́ мя. Утруди́хся зовы́й, измолче́ горта́нь мо́й, исчезо́сте о́чи мои́, от е́же упова́ти ми́ на Бо́га моего́. Умно́жишася па́че вла́с главы́ моея́ ненави́дящии мя́ ту́не, укрепи́шася врази́ мои́, изгоня́щии мя́ непра́ведно: я́же не восхища́х, тогда́ воздая́х. Бо́же, Ты́ уве́дел еси́ безу́мие мое́, и прегреше́ния моя́ от Тебе́ не утаи́шася. Да не постыдя́тся о мне́ терпя́щии Тебе́, Го́споди, Го́споди Си́л, ниже́ да посра́мятся о мне́ и́щущии Тебе́, Бо́же Изра́илев. Я́ко Тебе́ ра́ди претерпе́х поноше́ние, покры́ срамота́ лице́ мое́. Чу́ждь бы́х бра́тии мое́й, и стра́нен сыново́м ма́тере моея́. Я́ко ре́вность до́му Твоего́ снеде́ мя, и поноше́ния понося́щих Ти́ нападо́ша на мя́. И покры́х посто́м ду́шу мою́, и бы́сть в поноше́ние мне́, и положи́х одея́ние мое́ вре́тище, и бы́х и́м в при́тчу. О мне́ глумля́хуся седя́щии во врате́х, и о мне́ поя́ху пию́щии вино́. А́з же моли́твою мое́ю к Тебе́, Бо́же, вре́мя благоволе́ния, Бо́же, во мно́жестве ми́лости Твоея́ услы́ши мя́, во и́стине спасе́ния Твоего́. Спаси́ мя от бре́ния, да не угле́бну, да изба́влюся от ненави́дящих мя́ и от глубо́ких во́д. Да не потопи́т мене́ бу́ря водна́я, ниже́ да пожре́т мене́ глубина́, ниже́ сведе́т о мне́ рове́нник у́ст свои́х. Услы́ши мя́, Го́споди, я́ко бла́га ми́лость Твоя́, по мно́жеству щедро́т Твои́х при́зри на мя́. Не отврати́ лица́ Твоего́ от о́трока Твоего́, я́ко скорблю́, ско́ро услы́ши мя́. Вонми́ души́ мое́й, и изба́ви ю́, вра́г мои́х ра́ди изба́ви мя́. Ты́ бо ве́си поноше́ние мое́ и сту́д мо́й, и срамоту́ мою́: пред Тобо́ю вси́ оскорбля́ющии мя́. Поноше́ние ча́яше душа́ моя́, и стра́сть и жда́х соскорбя́щаго, и не бе́, и утеша́ющих, и не обрето́х. И да́ша в сне́дь мою́ же́лчь, и в жа́жду мою́ напои́ша мя́ о́цта. Да бу́дет трапе́за и́х пред ни́ми в се́ть, и в воздая́ние, и в собла́зн. Да помрача́тся о́чи и́х, е́же не ви́дети, и хребе́т и́х вы́ну сляцы́. Проле́й на ня́ гне́в Тво́й, и я́рость гне́ва Твоего́ да пости́гнет и́х. Да бу́дет дво́р и́х пу́ст, и в жили́щах и́х да не бу́дет живы́й. Зане́ его́же Ты́ порази́л еси́, ти́и погна́ша, и к боле́зни я́зв мои́х приложи́ша. Приложи́ беззако́ние к беззако́нию и́х, и да не вни́дут в пра́вду Твою́. Да потребя́тся от кни́ги живы́х и с пра́ведными да не напи́шутся. Ни́щ и боля́й е́смь а́з: спасе́ние Твое́, Бо́же, да прии́мет мя́. Восхвалю́ и́мя Бо́га моего́ с пе́снию, возвели́чу Его́ во хвале́нии: и уго́дно бу́дет Бо́гу па́че тельца́ ю́на, ро́ги износя́ща и па́знокти. Да у́зрят ни́щии и возвеселя́тся: взыщи́те Бо́га, и жива́ бу́дет душа́ ва́ша. Я́ко услы́ша убо́гия Госпо́дь и окова́нныя Своя́ не уничижи́. Да восхва́лят Его́ небеса́ и земля́, мо́ре и вся́ живу́щая в не́м. Я́ко Бо́г спасе́т Сио́на, и сози́ждутся гра́ди Иуде́йстии, и вселя́тся та́мо, и насле́дят и́, и се́мя рабо́в Твои́х удержи́т и́, и лю́бящии и́мя Твое́ вселя́тся в не́м.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. (Трижды).

Тропарь, глас 2:

При́зри ми́лостивно, Бо́же, на лю́ди согре́шшия,/ и не пре́зри в покая́нии к Тебе припа́дающих,/ но я́ко Благ поми́луй,/ и вско́ре пра́веднаго Твоего́ изба́ви преще́ния,// моли́твами Богоро́дицы, Еди́не Человеколю́бче.

Кондак, глас 2:

Слава: Не отри́ни до конца́ согре́шшия лю́ди Твоя́, Влады́ко,/ ниже́ отста́ви ми́лости и щедро́ты Твоя́ от нас,/ но я́ко бе́здна сый щедро́т, и милосе́рдия пучи́на,/ приими́ мольбы́ на́ша,/ и изба́ви нас от належа́щия беды́ и ну́жды,// Еди́н бо еси́ Благоуве́тлив.

И ныне: Ско́рая миру Помо́щнице, Де́во Богоро́дице, Твоего́ предста́тельства и кре́пкаго заступле́ния то́щно про́сим: умилосе́рдися на скорбя́щыя люди, и умоли́ Ми́лостиваго Сына Твоего́ и Бо́га, от належа́щия нас изба́вити беды́ и пра́веднаго Своего преще́ния, Еди́на в жена́х Благослове́нная.

Таже, Псалом 50:

Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя́. Я́ко беззако́ние мое́ а́з зна́ю и гре́х мо́й предо мно́ю е́сть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти́. Се́ бо в беззако́ниих зача́т е́смь, и во гресе́х роди́ мя ма́ти моя́. Се́ бо и́стину возлюби́л еси́, безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся, омы́еши мя́, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от гре́х мои́х, и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми́ ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́, возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо, всесожже́ния не благоволи́ши. Же́ртва Бо́гу ду́х сокруше́н, се́рдце сокруше́нно и смире́нно Бо́г не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Тво́й тельцы́.

Канон Господу, глас 6:

Песнь 1

Ирмо́с: Я́ко по су́ху пешеше́ствовав Изра́иль, / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь / пои́м, вопия́ше.

Поми́луй ны, Го́споди, люди согре́шшия.

Приидите, вернии, песнь нову воспоим Владыце Богу, глаголюще: умилосердися яко щедр, и помилуй безмерно согрешшия.

Слава: Приими молитвы и слезы, Христе Боже, молящихся Тебе ныне нас рабов Твоих, и подаждь времена ведренна к плодоношению земли.

И ныне, Богородичен: Ускори, Владычице Марие, пречистеи Свои руце милостивно воздети к Сыну Твоему и Богу, еже подати ведро, и пищу верным рабом Своим.

Катавасия по каждой песни: Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 3

Ирмо́с: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Поми́луй ны, Го́споди, люди согре́шшия.

Не яростию Твоею обличи нас, Господи, якоже пророк вопиет, ни гневом Твоим накажи нас, но молитвами Пречистыя Твоея Матере, излей на ны обильно милости Твоя.

Слава: Новозванный язык со слезами вопиет Ти, Владыко: умилосердися яко щедр, и подаждь нам ведро и воздухи благорастворны, обилие же и велию милость.

И ныне, Богороцичен: Не презри слез наших, Богородице Владычице, и не мерзко Ти буди воздыхание наше, но моли Сына Твоего прилежно, подати ведро земли, и людем Твоим велию милость.

Катавасия по каждой песни: Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Седален, глас 5:

К Тебе, Спасе наш Иисусе Превечный Боже, прибегаем грешнии раби Твои, и со слезами в покаянии припадающе, вопием Ти: пощади, пощади, Щедре, люди безответныя, и не растли нас безгодным дождевным лиянием и злорастворением воздушным, но подаждь ведро, и умножи плоды земныя, яко Человеколюбец.

Слава, и ныне, Богородичен:

Святейшую Херувимов и вышшую небес, Препетая Богородице, Тя воистинну исповедующе, имамы грешнии Заступницу, и обретаем во время спасения: тем не престай за ны молящи, Державо и Прибежице душам нашим.

Песнь 4

Ирмо́с: Христо́с моя́ си́ла, / Бог и Госпо́дь, честна́я Це́рковь / боголе́пно пое́т, взыва́ющи / от смы́сла чи́ста, о Го́споде пра́зднующи.

Поми́луй ны, Го́споди, люди согре́шшия.

В руку Твоею, Владыко Христе, содержиши превышше небесныя и поднебесныя воды и теплоту солнечную. Темже молим Тя: обое по мере требования даруй на пользу рабом Твоим.

Слава: Исповедающим Твое владычество, Строителю всея твари Христе, содержай скипетро небесное и окормляяй всю тварь, подаждь благорастворныя воздухи и обилие земли, молитвами Пречистыя Твоея Матере.

И ныне, Богородичен: Великое дерзновение имаши к Рождшемуся из Тебе, яко никтоже ин: тем, Владычице, молися о рабех Твоих, избавитися нам от глада и от нашествия иноплеменник.

Катавасия: Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 5

Ирмо́с: Бо́жиим / све́том Твои́м, Бла́же, / у́тренюющих Ти ду́ши / любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Поми́луй ны, Го́споди, люди согре́шшия.

Плавающих пристанище и надеждо ненадежных, Христе, князей утверждение, и всех христиан в бедах скорый Послушателю: услыши и нас ныне, и подаждь ведро к плодоношению земли.

Слава: Врачу болящих и скорбящих Утешителю, небесный Царю Христе, призри с высоты святаго Твоего жилища, и услыши плачь и стенание рабов Твоих, и яко Щедр подаждь ведро к плодоношению земли.

И ныне, Богородичен: Скоро приими, Госпоже, молитву рабов Твоих, не поминающи наша безчисленная злая: и испроси нам, Дево, ведро на пользу, к плодоношению земли.

Катавасия: Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 6

Ирмо́с: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Поми́луй ны, Го́споди, люди согре́шшия.

Молением пророка Твоего, Господи, затворил еси небеса три лета и месяцей шесть, к познанию и покаянию противных, егоже ныне о нас, Господи, не истязуй, но милостию Твоею ущедри ны.

Слава: Приимый разбойничо покаяние, Христе, и того единем часом спасый вопиюща: помяни мя, Спасе, во Царствии. И нас, ныне в покаянии Ти припадающих, пощади и помилуй.

И ныне, Богородичен: Помолися о нас, Владычице, к Сыну Твоему и Богу, да не якоже при Нои лиянием водным, грех ради наших растлит нас, но якоже ниневитяны покаявшияся помилует.

Катавасия: Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Кондак, глас 2:

Не отри́ни до конца согре́шшия лю́ди Твоя́, Влады́ко,/ ниже́ отста́ви ми́лости и щедро́ты Твоя́ от нас,/ но я́ко бе́здна сый щедро́т, и милосе́рдия пучи́на,/ приими́ мольбы́ на́ша,/ и изба́ви нас от належа́щия беды́ и ну́жды,// Еди́н бо еси́ Благоуве́тлив.

Прокимен, глас 4:

Спаси́, мя, Бо́же, я́ко внидо́ша во́ды до души́ моея́.

Припев: Спаси́, мя, Бо́же, я́ко внидо́ша во́ды до души́ моея́.

Стих: Углебо́х в тиме́нии глубины́, и не́сть постоя́ния.

Припев: Спаси́, мя, Бо́же, я́ко внидо́ша во́ды до души́ моея́.

Спаси́, мя, Бо́же.

Припев: Яко внидо́ша во́ды до души́ моея́.

От Матфе́я Свята́го Ева́нгелия чте́ние.

Припев: Сла́ва Тебе́, Го́споди, сла́ва Тебе́.

Рече́ Госпо́дь: проси́те и да́стся вам, ищи́те и обря́щете, толцы́те и отве́рзется вам. Всяк бо прося́й прие́млет, и ищя́й обрета́ет, и толку́щему отве́рзется. Или́ кто есть от вас челове́к, его́же а́ще воспро́сит сын его́ хле́ба, еда́ ка́мень пода́ст ему́? Или́ а́ще ры́бы про́сит, еда́ змию́ пода́ст ему́? А́ще у́бо вы, лука́ви су́ще, уме́ете дая́ния бла́га дая́ти ча́дом ва́шым, ко́льми па́че Оте́ц ваш Небе́сный даст бла́га прося́щым у Него́.

Припев: Сла́ва Тебе́, Го́споди, сла́ва Тебе́.

Сла́ва: Отче, Сло́ве и Душе, Тро́ице Свята́я, очи́сти мно́жество грехо́в на́ших.

И ныне: Моли́твами Богоро́дицы, Ми́лостиве, очи́сти мно́жество согреше́ний на́ших.

Поми́луй мя, Боже, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.

Стихи́ра, глас 6:

Стра́шен еси́, Го́споди, и кто стерпи́т пра́ведный Твой гнев; или́ кто Тебе́ умоли́т, Благи́й, о людех согре́шших, и отча́явшихся; то́кмо небе́снии Ангели, нача́ла и вла́сти, престо́ли и госпо́дьствия, Херуви́ми и Серафи́ми, непреста́нно Тебе́ вопиющии: Свят, Свят, Свят еси́, Го́споди, тем, Пресвятый Владыко, дела́ руку Твоею не пре́зри, но за милосе́рдие, Твоея ми́лости, спаси́ люди Твоя и град погиба́ющий.

Сла́ва, и ныне, Богоро́дичен:

Никто́же притека́яй к Тебе́ посра́млен от Тебе́ исхо́дит, Чи́стая Де́во Богоро́дице, но про́сит благода́ти, и прие́млет дарова́ния, на по́льзу проше́нием.

Песнь 7

Ирмо́с: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие, / мучи́теля увеща́ вопи́ти: / благослове́н еси́, Бо́же оте́ц на́ших.

Поми́луй ны, Го́споди, люди согре́шшия.

Никогдаже отлучайся нас, Спасе Щедрый, яко пастырь овец Своих, но присно с нами неотступно пребывая, от всяких бед свободи верно Ти от сердца вопиющих: благословен еси, Боже, и препрославленный.

Слава: Ты, Боже Всесильный и Царю Пресвятый, прострый небо, ябо кожу, и море песком оградивый, посли нам теплоту солнечную и благорастворенны воздухи, верно Ти вопиющим: благословен еси, Боже, и препрославленный.

И ныне, Богородичен: Научи, Владычице, язык мой глаголати полезная, надежде всем концем земли, и молися Сыну Своему и Богу, подати ведро на земли, и ущедрити Христу вопиющих: благословен еси, Боже, и препрославленный.

Катавасия: Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 8

Ирмо́с: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Поми́луй ны, Го́споди, люди согре́шшия.

Чии раби и создание есмы; не Твои ли, Превечный Боже, услыши убо наша молитвы худыя, и испусти ведро на земли, и росу полезную, да Тя превозносим во вся веки.

Слава: Рекл еси, милостивый Владыко, наказуя нас к покаянию: ищите, и обрящете: толцыте, и отверзется вам: просите, и приимете. Темже к Тебе припадаем и прилежно молим: пощади нас, Милостиве, превозносящих Тя во вся веки.

И ныне, Богородичен: Чистая Владычице Богородице, избави молитвами Своими люди Своя от страсти и брани всякия, подающи обильныя милости и плоды на пищу чтущим Тя, и превозносящим во вся веки.

Катавасия: Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 9

Ирмо́с: Бо́га / челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во Воплоще́нно, / Его́же велича́юще, / с небе́сными во́и Тя ублажа́ем.

Поми́луй ны, Го́споди, люди согре́шшия.

Павел покаявся от гонительства, сосуд избранен бысть Тебе Владыце и Богу всех: и мы грешнии, надеющеся Твоему милосердию, в покаянии Тебе вопием: прости вся согрешения наша, и посли ведро земли, и росу благую и полезную, молитвами Пречистыя Твоея Матере.

Слава: Верховный ученик Твой Петр трижды отвергся Тебе, плачем горьким обрете у Тебе, Милосерде Христе, прощение. И мы того ревнующе покаянию, Тебе во умилении со слезами вопием: согрешихом, прости, Милосерде, и избави нас от всякаго зла, молитвами Пречистыя Твоея Матери.

И ныне, Богородичен: Избави ны, Пречистая, от всякаго злаго обстояния, и от безгоднаго лияния дождевнаго, нашедшаго ныне на ны, и испроси свыше у Сына Твоего и Бога, подати благовременное ведро рабом Своим, и изобильный плод земный на пищу людем, да Тя непрестанно величаем.

Катавасия по каждой песни: Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропари, глас 6:

Поми́луй нас, Го́споди, поми́луй нас; / вся́каго бо отве́та недоуме́юще, / сию́ Ти моли́тву я́ко Влады́це, гре́шнии прино́сим: / поми́луй нас.

Слава: Го́споди, поми́луй нас, / на Тя бо упова́хом; / не прогне́вайся на ны зело́, / ниже́ помяни́ беззако́ний на́ших, / но при́зри и ны́не я́ко благоутро́бен, и изба́ви ны от враг на́ших; / Ты бо еси́ Бог наш, и мы лю́дие Твои́, / вси дела́ руку́ Твое́ю, и и́мя Твое́ призыва́ем.

И ныне: Милосе́рдия две́ри отве́рзи нам, / благослове́нная Богоро́дице, / наде́ющиися на Тя да не поги́бнем, / но да изба́вимся Тобо́ю от бед: / Ты бо еси́ спасе́ние ро́да христиа́нскаго.

Моли́тва:

Влады́ко Го́споди Бо́же наш, дре́вле ревни́теля Илию́ про́рока твоего́ мольбу́ послу́шавый, и е́же на вре́мя дождь удержа́ти изво́ливый: и ны́не человеколюби́вый Тво́рче, и ми́лостивый Го́споди, при́зри и на нас смире́нных и недосто́йных рабо́в Твои́х смире́нныя мольбы́, и я́ко щедр пре́зри на́ша прегреше́ния, и умоле́н быв от сама́го Твоего́ человеколю́бия, пода́ждь ве́дро достоя́нию Твоему́, и со́лнце просвети́ на тре́бующыя и прося́щыя от Тебе́ ми́лости: возвесели́ лице́ земли́ ни́щих ра́ди люде́й Твои́х, младе́нец же и скот и ины́х всех живо́тных, и́хже насыща́еши Твои́м благоволе́нием, и дае́ши пи́щу им во бла́го вре́мя. Ей, Го́споди Бо́же наш, не отри́ни вотще́ мольбу́ на́шу, ниже́ посрами́ нас от ча́яния на́шего, но пощади́ нас по ми́лости Твое́й, и посети́ щедро́тами Твои́ми: исчеза́ют бо всу́е дни́е на́ши, и оскудева́ет в боле́зни живо́т наш: не погуби́ у́бо нас беззако́ний ра́ди на́ших, и́миже негодова́ние в я́рость Твою́ на себе́ привлеко́хом: но сотвори́ с на́ми по ти́хости Твое́й, и по мно́жеству ми́лости Твоея́ се бо душе́ю сокруше́нною, и ду́хом смире́нным пред Тобо́ю припа́даем, и я́ко раби́ непотре́бни, па́че же бо́льшия ка́зни досто́йни, в покая́нии умиле́нно Тебе́ вопие́м: согреши́хом и беззако́новахом, и прегреши́хом во всем, за́поведи Твоя́ преступа́юще, и сего́ ра́ди вся, я́же наво́диши на ны, и́стиною и судо́м наво́диши: но не до конца́ тле́нию, гла́ду же и поги́бели преда́ждь нас, ниже́ да потопи́т нас бу́ря водна́я: но во гне́ве ми́лости помяни́, и ту́не щедро́т Твои́х ра́ди уми́лостивися, и твое́ созда́ние и де́ло рук Твои́х я́ко благ поми́луй, и от вся́каго зла ско́ро изба́ви.Твое́ бо есть, е́же ми́ловати и спаса́ти нас Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Го́споди поми́луй, трижды. Сла́ва, и ны́не:

Господи Иисусе Христе, Сыне Божий, молитвами Пречистыя Твоея Матере, святаго пророка Божия Илии, преподобных и богоносных отец наших и всех святых помилуй и спаси нас, яко Благ и Человеколюбец. Аминь.

Го́споди, поми́луй, (трижды).