Преподобному Варлааму Серпуховскому

Тропарь, глас 3:

От святи́теля Алекси́я богоугожде́нию науче́н,/ доброде́тельми украси́л еси́ ду́шу свою́,/ сего́ ра́ди Ма́тери Бо́жией избра́нник яви́лся еси́,/ и оби́тель Тоя́ Введе́нию воздви́гл еси́/ на спасе́ние мно́гим душа́м челове́ческим./ Мона́шествующим до́брый наста́вниче,/ те́плый о на́с к Бо́гу моли́твенниче,/ преподо́бне Варлаа́ме, о́тче на́ш,// моли́ спасти́ся душа́м на́шим.

Кондак, глас 8:

А́ще и под спу́дом сокры́ты е́сть честны́я твоя́ мо́щи,/ преподо́бне о́тче на́ш Варлаа́ме,/ оба́че же лучи́ чуде́с и исцеле́ний испуща́ют све́тло,/ все́м, притека́ющим ве́рою и моля́щим ти́ ся́ усе́рдно,/ вои́стину яви́лся бо еси́ уго́дник Бо́жий,// и хода́тай при́сный о чту́щих любо́вию святу́ю па́мять твою́.

Величание

Ублажа́ем тя,/ преподо́бне о́тче Варлаа́ме,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Молитва преподобному Варлааму Серпуховскому:

О, преподо́бне и Богоно́сне о́тче на́ш Варлаа́ме, оби́тели Пресвяты́я Влады́чице Богоро́дицы устрои́телю, земли́ Серпуховския украше́ние, ми́лостивый и те́плый о на́с к Бо́гу хода́таю и чудотво́рче пресла́вный! Приклони́ у́хо твое́ на моле́ния на́ша, бу́ди на́м благи́х пода́тель и в житии́ се́м многоско́рбнем уте́шитель и наста́вник. Научи́ ны́, су́етными попече́ниями обурева́емыя, пе́рвее Ца́рствия Небе́снаго иска́ти, и в послуша́нии и смире́нии серде́чнем во́лю Бо́жию исполня́ти. Я́ко ру́це, на по́мощь на́м немощны́м простира́емыя, да бу́дут твоя́ святы́я к Бо́гу за ны́ моли́твы. Пода́ждь же исцеле́ния душа́м и телесе́м на́шим, да в ра́дости духо́вней благода́рственныя и хвале́бныя пе́ния не преста́нем возсыла́ти, и та́ко твои́м заступле́нием храни́ми, дости́гнем в ти́хое и безмяте́жное приста́нище, иде́же ты́ со А́нгелы и все́ми святы́ми при́сно сла́виши Пречестно́е и Великоле́пое И́мя Отца́ и Сы́на и Свята́го Ду́ха, ами́нь.