Шрифт

Тропарион / Общие

Тропарион. Тропари, кондаки, величания и молитвы

Общие на праздники и дни памяти святых:

Священноисповеднику Российскому xx века

Тропарь, глас 2:

Священноиспове́дниче о́тче (имярек), / во дни гоне́ний безбо́жных на Це́рковь Ру́скую / поноше́ния, заточе́ние, изгна́ние и го́рькия рабо́ты / Христа́ ра́ди претерпе́л еси́, / и ничто́же разлучи́ тя от любве́ Бо́жия. / Та́же благоче́стно в ми́ре пожи́в, / свиде́тельствовал еси́ Го́спода Иису́са Христа́, // Его́же моли́ спасти́ся душа́м на́шим.

Кондак, глас 2:

Я́ко звезда́ но́вая Це́ркве Ру́сския яви́лся еси́, / терпеливоду́шне (имярек) священноиспове́дниче, / Христа́ Бо́га прасловля́я / и в нощи́ безбо́жия путь ве́рным указу́я; / те́мже мо́лим тя: / моли́ нам, сро́дником твои́м, / в ве́ре Правосла́вней утверди́тися // и спасти́ся душа́м на́шим.

Величание

Велича́ем тя, / священноиспове́дниче (имярек), / и чтим святу́ю па́мять твою́: / ты бо мо́лиши за нас // Христа́ Бо́га на́шего.

Молитва

О пресла́вный и добропобе́дный священноиспове́дниче Христо́в (имярек), па́стырю до́брый, Це́ркве Ру́сския украше́ние, земли́ на́шея до́брое прозябе́ние, сро́дников твои́х похвало́ и о́бразе! Ты не убоя́вся мучи́телева преще́ния, ве́ру Правосла́вную небоя́зненно испове́дал еси́, и боле́зни и страда́ния с любо́вию ко Христу́ претерпе́в, врата́ми пра́вды в Небе́сное Ца́рство вшел еси́. Те́мже мо́лим тя: вознеси́ ны́не те́плую моли́тву твою́ ко Го́споду о Оте́честве на́шем, да утверди́т его́ в ве́ре Правосла́вней до сконча́ния ве́ка, нас же, чту́щих па́мять твою́, да укрепи́т спаси́тельныя за́поведи Его́ соблюда́ти: да изба́вльшеся от греха́ и ве́чныя му́ки, вку́пе с тобо́ю сподо́бимся воспева́ти достопоклоня́емое и́мя Отца́, и Сы́на, и Свята́го Ду́ха, во ве́ки веко́в. Ами́нь.