Собору Новгородских святых

Тропарь, глас 8:

Я́ко всесве́тлии свети́льницы,/ яви́стеся во стране́ сей,/ святи́телие Новгоро́дстии, преподо́бнии, и Христа́ ра́ди юро́дивии, и вси пра́веднии,/ посто́м насажде́ннии воздержа́нием напая́еми,/ сего́ ра́ди и сподо́бистеся бы́ти прия́телище Бо́жия Ду́ха/ и чудеса́ де́йствовати,/ моли́те Христа́ Бо́га за вся лю́ди,// спасти́ся душа́м на́шим.

Кондак, глас 5:

Преподо́бнии отцы́ и чудотво́рцы,/ уго́дницы Христо́вы,/ Новогра́дстии свети́льницы,/ и́же а́нгельским житие́м просия́вше,/ Боже́ственных сподо́бистеся даро́в,/ Спа́су служа́ще со А́нгелы непреста́нно,/ моли́те изба́витися нам от вся́каго прегреше́ния// и душа́м на́шим дарова́ти ве́лию ми́лость.

Величание

Велича́ем вас,/ преподо́бнии и богоно́снии отцы́ на́ши Новгоро́дстии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Молитва

О, преподо́бнии и богоно́снии отцы́ на́ши и вси пра́ведницы, Новгоро́дская свети́ла вели́кая земна́я, в Росси́йстей земли́ сла́вно просия́вшии и сию́ мно́гими светоза́рными ангелора́внаго ва́шего жития́ зве́здами украси́вшии, всю же вселе́нную высо́ких доброде́телей светлостьми́ и чуде́с Боже́ственных блиста́нии удиви́вшии, и ны́не, к сме́ртному за́паду пло́тски во гроб заше́дшии, ду́шами со Христо́м, Со́лнцем пра́вды, су́щии пра́ведницы, просвеща́етеся, я́ко сном во Ца́рствии Небе́снем, иде́же ны́не моли́твы ва́ша к Бо́гу Све́ту, лучи́, о оте́честве свое́м, простира́юще, не забу́дите и нас, в нощи́ страсте́й и скорбе́й пребыва́ющих, всегда́шнии на́ши моли́твениицы, свы́ше бога́тыми призира́ти осия́нии, я́ко да во све́те доброде́тельнаго ва́шего жития́ пра́во ходя́ще, сподо́бимся зре́ти Свет непристу́пный Сла́вы Бо́жия, хва́ляще Его́ ку́пно с ва́ми в несконча́емыя ве́ки. Ами́нь.