Преподобномученику Крониду (Любимову)

Тропарь, глас 1:

Преподо́бному Се́ргию от ю́ности после́дуя,/ о́тче богому́дре Крони́де,/ ве́ру во Святу́ю Тро́ицу стяжа́л еси́/ и да́же в ста́рости масти́те до кро́ве сохрани́л еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти си́лу терпе́ния,/ сла́ва Увенча́вшему тя я́ко му́ченика,// сла́ва Спаса́ющему тобо́ю ду́ши на́ша.

Кондак, глас 2:

Я́ко ве́рный учени́к преподо́бнаго Се́ргия,/ послуша́нием, смире́нием и моли́твою/ ду́шу твою́ очи́стил еси́, Крони́де приснопа́мятне,/ и Бо́жиим промышле́нием во игу́мена оби́тели Тро́ицкия/ досто́йно поста́влен был еси́./ Во дни же гоне́ния лю́таго/ за Христа́ и вве́ренную ти бра́тию/ я́ко му́ченик пострада́л еси́./ Сего́ ра́ди ны́не, предстоя́ Святе́й Тро́ице,/ моли́ е́же Ла́вре Се́ргиевой утвержде́нней бы́ти// и спасти́ся душа́м на́шим.

Величание

Ублажа́ем тя,/ преподобному́чениче Крони́де,/ и чтим святу́ю па́мять твою́,/ наста́вниче мона́хов// и собесе́дниче А́нгелов.