Мученику Исидору Хиосскому

Тропарь, глас 4:

Му́ченик Твой, Го́споди, Иси́дор/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

Кондак, глас 4:

Упра́витель превели́кий вселе́нней ты яви́лся еси́, свя́те,/ твои́ми к Бо́гу моли́твами,/ те́мже воспева́ем тя днесь,/ му́чениче Богому́дре,/ Иси́доре пресла́вне.

Величание

Велича́ем тя,/ страстоте́рпче святы́й Иси́доре,/ и чтим честна́я страда́ния твоя́,/ я́же за Христа́// претерпе́л еси́.