Преподобному Иннокентию Комельскому, Вологодскому

Тропарь, глас 4:

От ю́ности своея́ весь Бо́гу поработи́лся еси́, блаже́нне,/ Того́ ра́ди любве́ оте́чество и род оста́вил еси́,/ и, в пусты́ню всели́вся,/ в ней жесто́кое житие́ показа́л еси́,/ и чуде́с дарова́ния от Го́спода прия́л еси́,/ преподо́бне Инноке́нтие,// моли́ Христа́ Бо́га спасти́ся душа́м на́шим.

Кондак, глас 8:

Ми́ра и сро́дник удали́вся,/ в пусты́ни неуста́нною моли́твою Бо́гу угоди́л еси́/ и в по́двизе жития́, о́тче, просия́л еси́,/ помина́й нас, чту́щих усе́рдно па́мять твою́, да зове́м ти:// ра́дуйся, Инноке́нтие преподо́бне.

Величание

Ублажа́ем тя,/ преподо́бне о́тче Инноке́нтие,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Молитва

О священная главо, преподобне отче, преблаженне авво Инноке́нтие, не забуди убогих твоих до конца, но поминай нас всегда во святых и благоприятных молитвах к Богу: помяни стадо твое, еже сам упасл еси, и не забуди посещати чад твоих моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя: поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши, не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у престола Вседержителева предстоящи, достойно веселится, ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно, и во веки веков. Аминь.