Преподобному Герасиму, Болдинскому

Тропарь, глас 4:

Боже́ственною любо́вию от ю́ности своея́ распаля́емь, преподо́бне, ми́р и вся́ я́же в ми́ре оста́вил еси́, в пусты́ню всели́лся еди́н. И в не́й собра́л еси́ учени́к мно́жество на Бо́жие славосло́вие, в моли́твах и в посте́ и в труда́х свои́х оби́телях до́бре подвиза́лся во вре́менней жи́зни. И ны́не не оста́ви посеща́я ча́д свои́х, о́тче Гера́симе, моли́ Христа́ Бо́га спасти́ся душа́м на́шим.

Кондак, глас 2:

Я́ко преоби́дев тле́нная и до́лу влеку́щее мудрова́ние, ве́сь Христо́в бы́в и Того́ честны́й кре́ст на ра́мо взе́м, после́довал Ему́ невозвра́тно, в моли́твах и посте́х бы́х, де́лех же и злострада́ниях, о́браз бы́в свои́м ученико́м: но я́ко име́я дерзнове́ние ко Святе́й Тро́ице, моли́ся, блаже́нне, я́ко да свято́е успе́ние твое́ пра́зднующе вопие́м: ра́дуйся преподо́бне Гера́симе, о́тче на́ш.

Величание

Ублажа́ем тя,/ преподо́бне о́тче Гера́симе,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Молитва преподобному Герасиму, Болдинскому:

О, до́бре на́ш па́стырю и Богому́дрый нача́льниче, преподо́бне о́тче Гера́симе, услы́ши на́с моля́щихся тебе́ и призыва́ющих в по́мощь ско́рое предста́тельство твое́. Ви́ждь на́с гре́шных в толи́цех обстоя́ниих су́щих, ви́ждь на́с немощны́х отвсю́ду уловля́емых, вся́каго бла́га лише́нных, и умо́м от малоду́шия помраче́нных; потщи́ся уго́дниче Бо́жий, не оста́вити на́с в грехо́вном плену́ бы́ти, да не бу́дем в ра́дость враго́м на́шим и не у́мрем в лука́вых дея́ниих на́ших. Моли́ о на́с, недосто́йных, Спа́са Го́спода, Ему́же ты́ со безпло́тными ли́ки предстои́ши: ми́лостива к на́м сотвори́ Соде́теля на́шего в ны́нешнем ве́це и в бу́дущем, да не возда́ст на́м по де́лом на́шим и по нечистоте́ серде́ц на́ших, но по Свое́й бла́гости возда́ст на́м: на твое́ бо хода́тайство упова́я и твои́м предста́тельством хва́лимся, твое́ заступле́ние на по́мощь призыва́ем и к цельбоно́сным моща́м твои́м припа́дая недосто́йнии, исцеле́ния про́сим: изба́ви на́с уго́дниче Христо́в от злы́х находя́щих на на́с, и укроти́ во́лны страсте́й и бе́д, восстаю́щих на на́с, да ра́ди святы́х твои́х моли́тв не обы́мет на́с напа́сть и не погря́знем в пучи́не грехо́вней, и в ти́не страсте́й на́ших. Моли́ преподо́бне о́тче Гера́симе Христа́ Бо́га на́шего, да пода́ст на́м ми́рное жи́тельство, оставле́ние грехо́в, а душа́м на́шим спасе́ние и ве́лию ми́лость.