Божией Матери пред Ея иконою «Аз есмь с вами, и никтоже на вы»

Тропарь, глас 4:

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,// Тя бо и Еди́ну наде́жду и́мамы.

Кондак, глас 6.

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,// предста́тельствующи при́сно, Богоро́дице, чту́щих Тя.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния// всем с ве́рою притека́ющим.

Молитва

О, Всеблагая Заступнице рода христианскаго, Мати Держащаго вся десницею Своею Христа Бога нашего! Излей на ны милости и щедроты его. И да не убоимся и не устрашимся враг видимых и невидимых, яко рекла еси уповающим на Тя «Аз есмь с вами, и никтоже на вы». Сохрани истинную Святую православную Церковь и обитель нашу от расколов и ересей. И положи начало покаяния народа нашего. Возврати Святую Русь на дарованный ей Богом путь неповрежденной веры, да наполнится фимиамом молитв и расцветет, аки крин сельный. Да поживем во благочестии и чистоте, всегда храними Тобою от искушения антихристова, нашествия иноплеменных, междоусобныя брани, труса, огня, глада и мора; от напрасныя смерти, пленения и раздоров семейных; монашеское житие укрепи и спаси ны, Пречистая, яко уповаем на Тя по реченному Тобою: «Аз есмь с вами, и никтоже на вы». Молися о нас, Пресвятая Владычице Богородице, ко Господу Богу нашему, милующему и спасающему, да не лишит ны защиты и Царствия Своего присвоения, иже и сам рече верным Своим: «Аз есмь с вами, и никтоже на вы». Емуже слава, держава, честь и поклонение, сила и величие подобает Отцу и Сыну, и Святому Духу, ныне и присно и во веки веков. Аминь.