Благоверному князю Андрею Смоленскому, Переяславскому

Тропарь, глас 8:

Блаже́нство Ева́нгельское возлюби́в,/ Богому́дре кня́же Андре́е,/ чистоту́ се́рдца де́вством почти́л еси́/ и, суету́ ми́ра сего́ презре́в,/ устреми́лся еси́ зре́ти Бо́га,/ И́же тя просла́ви чудесы́/ во врачева́нии разли́чне стра́ждущих./ Сего́ ра́ди мо́лим тя:/ проси́ нам у Христа́ Го́спода/ вся́ких скорбе́й избавле́ния// и получе́ние Ца́рства Небе́снаго.

Кондак, глас 8:

Насажде́н во дво́рех Госпо́дних,/ свои́ми преподо́бными де́тельми/ в дому́ свята́го Чудотво́рца Никола́я/ кра́сно процве́л еси́,/ ми́ра красоту́ и сла́ву сего́ све́та ни во что вмени́в,/ Еди́наго Христа́ возлюби́л еси́;/ слез твои́х тече́нием напая́ем,/ уязви́лся еси́ жела́нием бу́дущих даро́в./ Те́мже зове́м ти:/ ра́дуйся, свя́те кня́же Андре́е Смоле́нский,/ гра́ду Переясла́влю похвало́// и всей Росси́йстей земли́ вели́кое утвержде́ние.

Величание

Велича́ем тя,/ благове́рный кня́же Андре́е,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Молитва:

О, святы́й благове́рный кня́же Андре́е, пода́ждь нам, раба́м Бо́жиим (имена), ру́ку по́мощи и изба́ви нас от вся́каго наве́та вра́жия: бу́ди нам ми́лостивый защи́титель и от боле́зней на́ших ско́рый цели́тель: свободи́ нас от руки́ чужда́го, и от вся́каго прило́га зла́го. Се бо мно́гими бедами есмы́ обстои́ми, все́ми злы́ми скорбьми́ сокруше́ннии, ко две́рем сме́ртным, от ско́рби снидо́хом и Бо́га грехми́ прогне́вахом и от себе́ Его́ удали́хом. Те́мже бу́ди нам вождь и засту́пник пред Го́сподем на́шим Иису́сом Христо́м, Ему́же сла́ву возсыла́ем со Безнача́льным Его́ Отце́м и Святы́м Ду́хом во ве́ки. Ами́нь.