Да ниспошлет Господь благоприятную погоду, дабы люди собрали богатый урожай и прославили Его. Псалом 148

Псалом 148

Хвали́те Го́спода с небе́с, хвали́те Его́ в вы́шних. Хвали́те Его́, вси́ А́нгели Его́, хвали́те Его́, вся́ си́лы Его́. Хвали́те Его́, со́лнце и луна́, хвали́те Его́, вся́ зве́зды и све́т. Хвали́те Его́ небеса́ небе́с и вода́, я́же превы́ше небе́с. Да восхва́лят и́мя Госпо́дне: я́ко То́й рече́, и бы́ша, То́й повеле́, и созда́шася. Поста́ви я́ в ве́к и в ве́к ве́ка, повеле́ние положи́, и не ми́мо и́дет. Хвали́те Го́спода от земли́, зми́еве и вся́ бе́здны: о́гнь, гра́д, сне́г, го́лоть, ду́х бу́рен, творя́щая сло́во Его́, го́ры и вси́ хо́лми, древа́ плодоно́сна и вси́ ке́дри, зве́рие и вси́ ско́ти, га́ди и пти́цы перна́ты. Ца́рие зе́мстии и вси́ лю́дие, кня́зи и вси́ судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне, я́ко вознесе́ся и́мя Того́ еди́наго, испове́дание Его́ на земли́ и на небеси́. И вознесе́т ро́г люде́й Свои́х, пе́снь все́м преподо́бным Его́, сыново́м Изра́илевым, лю́дем, приближа́ющымся Ему́.