Да исцелит Господь раненых разбойниками и страдающих от испуга. Псалом 84

Псалом 84

Благоволи́л еси́, Го́споди, зе́млю Твою́, возврати́л еси́ пле́н Иа́ковль: оста́вил еси́ беззако́ния люде́й Твои́х, покры́л еси́ вся́ грехи́ и́х. Укроти́л еси́ ве́сь гне́в Тво́й, возврати́лся еси́ от гне́ва я́рости Твоея́. Возврати́ на́с, Бо́же спасе́ний на́ших, и отврати́ я́рость Твою́ от на́с. Еда́ во ве́ки прогне́ваешися на ны́? Или́ простре́ши гне́в Тво́й от ро́да в ро́д? Бо́же, Ты́ обра́щься оживи́ши ны́, и лю́дие Твои́ возвеселя́тся о Тебе́. Яви́ на́м, Го́споди, ми́лость Твою́, и спасе́ние Твое́ да́ждь на́м. Услы́шу, что́ рече́т о мне́ Госпо́дь Бо́г: я́ко рече́т ми́р на лю́ди Своя́, и на преподо́бныя Своя́, и на обраща́ющыя сердца́ к Нему́. Оба́че бли́з боя́щихся Его́ спасе́ние Его́, всели́ти сла́ву в зе́млю на́шу. Ми́лость и и́стина срето́стеся, пра́вда и ми́р облобыза́стася. И́стина от земли́ возсия́, и пра́вда с небесе́ прини́че, и́бо Госпо́дь да́ст бла́гость, и земля́ на́ша да́ст пло́д сво́й. Пра́вда пред Ни́м предъи́дет, и положи́т в пу́ть стопы́ своя́.