Библейские Песни. Песнь Священного писания Шестая

Песнь 6

Моли́тва Ио́ны проро́ка. От зве́ря воззва́ Ио́на, глаго́ля:

Я́ко проро́ка Ио́ну спаси́ нас, Го́споди.

Возопи́х в ско́рби мое́й ко Го́споду Бо́гу моему́, и услы́ша мя.

Из чре́ва а́дова вопль мой, услы́шал еси́ глас мой.

Отве́ргл мя еси́ во глубины́ се́рдца морска́го, и ре́ки обыдо́ша мя.

Вся высоты́ Твоя́, и во́лны Твоя́ на мне преидо́ша.

И аз рех: отри́нухся от о́чию Твое́ю, еда́ приложу́ призре́ти ми ко хра́му свято́му Твоему́;

Возлия́ся вода́ до души́ моея́, бе́здна обы́де мя после́дняя.

на 8: Понре́ глава́ моя́ в разсе́ли гор, снидо́х в зе́млю, ея́же вереи́ ея́ закле́пи ве́чнии.

И да взы́дет из истле́ния живо́т мой к Тебе́, Го́споди, Бо́же мой.

на 6: Внегда́ скончава́тися от мене́ души́ мое́й, Го́спода помяну́х.

И да прии́дет к Тебе́ моли́тва моя́ ко хра́му свято́му Твоему́.

на 4: Храня́щии су́етная и ло́жная, ми́лость свою́ оста́виша.

Аз же со гла́сом хвале́ния и испове́дания пожру́ Тебе́, ели́ка обеща́х, возда́м Тебе́ во спасе́ние мое́ Го́сподеви.

Сла́ва, и ны́не: