Трипеснец в Четверг Страстной седмицы на Повечерии

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кано́н трипе́снец. Гла́с 6.

Пе́снь 4

Ирмо́с: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди.

Припев: Слава Тебе, Боже наш, слава Тебе.

Го́рница по́стланая, прия́т Тя, Созда́теля и стаи́нники, / и та́мо Па́сху сконча́л еси́, / и та́мо соде́лал еси́ та́инства, / та́мо бо двема́ по́сланома ны́не ученико́ма Твои́ма, / Па́сха угото́вася Тебе́.

Припев: Слава Тебе, Боже наш, слава Тебе.

Иди́те ко о́нсице, / вся ве́дый предглаго́лет апо́столом, / и блаже́н есть, и́же мо́жет ве́рно прия́ти Го́спода, / го́рницу у́бо се́рдце предугото́вав, / и ве́черю благоче́стие.

Припев: Слава Тебе, Боже наш, слава Тебе.

Нрав сребролю́бия, и о́браз твой безу́мия испо́лнь несмы́сленный Иу́до, / вве́рен бо быв еди́н то́кмо ковче́жцу, / вся́ко не преклони́лся еси́ к милосе́рдию, / но заключи́л еси́ жесто́каго твоего́ се́рдца утро́бу, / преда́в еди́наго Благоутро́бнаго.

Припев: Слава Тебе, Боже наш, слава Тебе.

Нрав богоуби́йц прода́нию сребролю́бца смеси́выйся: / ов у́бо ко убие́нию вооружи́вся, / ов же к сре́бреннком устремля́шеся, / удавле́нием бо тогда́ предразсуди́в покая́ние зле, / е́же жи́ти лиши́ся.

Припев: Слава Тебе, Боже наш, слава Тебе.

Лобыза́ние испо́лнено льсти, / е́же ра́дуйся, со ору́жием, льсти́вый Иу́до, / язы́ком у́бо провещава́еши я́же к соедине́нию, / нра́вом же помава́еши к разстоя́нию, / преда́ти бо беззако́нником Благоде́теля ле́стне поучи́лся еси́.

Припев: Слава Тебе, Боже наш, слава Тебе.

Лобыза́еши и продае́ши Иу́до, / целу́еши и не стыди́шися, ле́стию притеки́й. / Кто ненави́дя лобыза́ет треокая́нне? / Кто любя́ продае́т на цене́? / Лобыза́ние твоего́ безсту́днаго злосове́тия облича́ет произволе́ние.

Сла́ва, тро́ичен: Неразде́льное Существо́м, несли́тное Ли́цы, / богосло́влю Тя, Тро́ическое еди́но Божество́, / я́ко единоца́рственное и сопресто́льное, / вопию́ Тебе́ песнь вели́кую, / в вы́шних трегу́бо песносло́вимую.

И ныне. Богоро́дичен: Зача́тие па́че сло́ва, / рождество́ Твое́ па́че естества́, Богороди́тельнице, / о́во у́бо от Ду́ха без се́мене, / о́во же зако́нов естества́ тая́щееся, я́ко нетле́нно, / и па́че естества́ вся́каго рожде́ния, / Бог бо ражда́емое.

Седален, глас 4.

Яды́й, Влады́ко, со ученики́ Твои́ми, / та́инственно яви́л еси́ / всесвято́е Твое́ заколе́ние, / и́мже тли изба́вихомся, / честна́я Твоя́ почита́ющии страда́ния.

Пе́снь 8

Ирмо́с: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́те / и превозноси́те во вся ве́ки.

Припев: Слава Тебе, Боже наш, слава Тебе.

Зако́нное сконча́в повеле́ние, / скрижа́ли зако́нныя Написа́вый в Сина́и, / снеде́ у́бо Па́сху дре́внюю и сено́вную, / бысть же Па́сха та́йная и живоже́ртвенная.

Припев: Слава Тебе, Боже наш, слава Тебе.

От ве́ка сокрове́нную, Христе́, прему́дрость тайноводя́, / показа́л еси́ ку́пно всем апо́столом, Спа́се, на ве́чери, / ю́же Це́рквам преда́ша богоно́снии.

Припев: Слава Тебе, Боже наш, слава Тебе.

Еди́н от вас ле́стию преда́ст Мя, / евре́ем прода́в в нощь сию́, / сие́ Христо́с возопи́в смуща́ше дру́ги, / тогда́ еди́н ко еди́ному, недоумева́яся колеба́шеся.

Припев: Слава Тебе, Боже наш, слава Тебе.

Смири́вся нас ра́ди бога́тый, от ве́чери воста́в, / ле́нтий прие́м, сим препоя́сался еси́, / и прекло́нь вы́ю, омы́л еси́ но́ги ученико́в и преда́теля.

Припев: Слава Тебе, Боже наш, слава Тебе.

Па́че ума́, и неизрече́нна ра́зума высоте́ Твое́й, Иису́се, кто не удиви́тся! / Я́ко бре́нию предста́л еси́, Соде́телю вся́ческих, / омыва́я у́бо но́ги, отира́я же и ле́нтием.

Припев: Слава Тебе, Боже наш, слава Тебе.

Учени́к, его́же любля́ше Госпо́дь, / на пе́рси возле́г, рече́ к Нему́: / кто есть предая́й Тя? / Христо́с же ко о́ному: / сей вложи́вый в соли́ло ны́не ру́ку.

Припев: Слава Тебе, Боже наш, слава Тебе.

Учени́к хлеб прие́мый, / по хле́бе отлуча́ется, прода́нию поуча́яйся, / тече́т ко иуде́ем, глаго́лет беззако́нным: / что мне хо́щете да́ти, и аз Его́ вам преда́м.

Слава. Тро́ичен: Единаго Бо́га по Существу́ чту, / три Ипоста́си пою́ определи́тельне, / и́ныя, но не и́наковыя, / поне́же Божество́ еди́но, в трие́х Ли́цех, / и́бо Оте́ц, и Сын, и Боже́ственный Дух.

И ныне. Богоро́дичен: Изба́ви нас, Иису́се Спа́се наш, / от ле́сти лука́ваго, и напа́сти. / Приими́ Богоро́дицу моля́щуюся непреста́нно, / Ма́ти бо есть, и мо́жет Тя умоли́ти.

Пе́снь 9

Ирмо́с: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

Припев: Слава Тебе, Боже наш, слава Тебе.

Вели́кое та́инство Твоего́ вочелове́чения, / на ве́чери совозлежа́щу Тебе́ ученико́м Твои́м, Человеколю́бче, / откры́в рекл еси́: / яди́те Хлеб живо́тный ве́рою, / пи́йте и Кровь излия́нную от Богоре́бреннаго заколе́ния.

Припев: Слава Тебе, Боже наш, слава Тебе.

Сень небе́сная яви́ся го́рница, / иде́же Па́сху Христо́с соверши́. / Ве́черя безкро́вная, и слове́сная слу́жба, / трапе́за же та́мо соверше́нных Таин, мы́сленный же́ртвенник.

Припев: Слава Тебе, Боже наш, слава Тебе.

Па́сха Христо́с есть вели́кая и всечестна́я, / снеде́н быв я́ко хлеб, закла́н же я́ко овча́, / Той бо вознесе́ся о нас Же́ртва. / Того́ Те́ла благоче́стно, и Того́ Кро́ве / вси та́йно причаща́емся.

Припев: Слава Тебе, Боже наш, слава Тебе.

Хлеб благослови́в, Хлеб сый небе́сный, / благодари́в Отцу́ Роди́телю, / прие́мый, и ча́шу ученико́м дава́л еси́: / приими́те, яди́те, вопия́, / сие́ есть Те́ло Мое́ и Кровь нетле́нныя жи́зни.

Припев: Слава Тебе, Боже наш, слава Тебе.

Ами́нь глаго́ля, – рече́ ро́ждиям Лоза́, / апо́столом Христо́с и́стина, / – отсе́ле не и́мам пи́ти от лозы́ питие́, / до́ндеже пию́ е́ но́вое, во сла́ве Отца́ Моего́, / с ва́ми насле́дники Мои́ми.

Припев: Слава Тебе, Боже наш, слава Тебе.

Продае́ши на три́десятих сре́бреницех Го́спода, / и не помышля́еши Иу́до беззако́нный / Ве́чери та́инство, или́ честно́е умове́ние. / О ка́ко попо́лзся паде́нием / в коне́ц све́та прише́л еси́, удавле́ние облобыза́в!

Припев: Слава Тебе, Боже наш, слава Тебе.

Ру́це просте́рл еси́, / и́миже хлеб прия́л еси́ нетле́ния, / прия́ти сре́бреники, / уста́ к целова́нию принося́ льсти́вно, / и́миже Те́ло Христо́во и Кровь прия́л еси́, / но го́ре тебе́, я́коже рече́ Христо́с.

Припев: Слава Тебе, Боже наш, слава Тебе.

Христо́с учреди́ мир, / небе́сный и Боже́ственный хлеб. / Прииди́те у́бо христолю́бцы, / бре́нными устна́ми, чи́стыми же сердцы́, / прии́мем ве́рно жре́мую Па́сху, / в нас священноде́йствуемую.

Сла́ва, тро́ичен: Отца́ просла́вим, Сы́на превознесе́м, Боже́ственному Ду́ху ве́рно поклони́мся, / Тро́ице неразде́льней, еди́нице по Существу́, / я́ко Све́ту и Све́том, Животу́ и Живото́м, / животворя́щему и просвеща́ющему концы́.

И ныне, Богоро́дичен: Черто́г небе́сный, и Неве́ста Присноде́ва, / еди́на яви́лася еси́, Бо́га носи́вши, / ро́ждши же непрело́жно, из Тебе́ воплоще́нна. / Те́мже Тя вси ро́ди, я́ко Богоневе́стную Ма́терь, / правосла́вно велича́ем.

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.