Трипеснец в Неделю Ваий Вечера.

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Канон трипеснец господина Андреа Критскаго, глас 8-й

Песнь 1.

Ирмос: Сокруши́вшему бра́ни мы́шцею Свое́ю / и прове́дшему Изра́иля сквозе́ Чермно́е мо́ре / пои́м Ему́, я́ко Изба́вителю на́шему Бо́гу, / я́ко просла́вися.

Припев: Поми́луй мя, Бо́же, поми́луй мя.

Ио́сифово целому́дрие подража́им, ве́рнии, / разуме́им Поче́тшаго челове́ческое слове́сное существо́, / вся́цем хране́нием пожи́вше доброде́телию действи́тельною.

Припев: Поми́луй мя, Бо́же, поми́луй мя.

До́брых неде́лание уподо́бися смоко́внице, / сего́ у́бо уклони́мся, да не и́зсхнем я́коже она́ тогда́, / собо́рище ли́ствием покрыва́ющееся преднапису́ющая.

Припев: Поми́луй мя, Бо́же, поми́луй мя.

О́браз Влады́чень подпису́я Ио́сиф, в ров вве́ржен быва́ет, / продае́тся от сро́дник, вся терпи́т приснопа́мятный, / во о́браз пои́стинне Христо́в.

Припев: Поми́луй мя, Бо́же, поми́луй мя.

Смоко́вницы безпло́дствия убежа́вше, бра́тие, разуме́им о́браз, / да не и́зсхнем я́коже она́ тогда́, / егда́ возвраща́яся Человеколю́бец прии́де к ней а́лча.

Припев: Поми́луй мя, Бо́же, поми́луй мя.

Иису́с за мир тща́ся пострада́ти во́лею, / и́дет со ученики́ Свои́ми во град Иерусали́м к во́льней стра́сти, / ю́же прии́де пострада́ти.

Припев: Поми́луй мя, Бо́же, поми́луй мя.

Прилепи́вшеся Го́сподеви вся тща́щемуся пострада́ти, / гото́ви бу́дем на оплева́ние, на поруга́ния, и на уничиже́ния, / я́ко да пречи́стыми Его́ страстьми́ спросла́вимся ве́рнии.

Припев: Поми́луй мя, Бо́же, поми́луй мя.

Страстьми́ стра́сти исцеля́ет, Пострада́вый о нас, / хотя́ бо произво́дит, на на́ше существо́ челове́ческое, / животво́рная Своя́ страда́ния, да мы спасе́мся..

Слава: Три безнача́льна прославля́ю, три Свя́та пою́, / три соприсносу́щна во еди́ном Существе́ пропове́даю: / Еди́н бо во Отце́, Сы́не и Ду́се славосло́вится Бог.

И ныне, Богородичен: Жезл у́бо Моисе́ов, и жезл Ааро́нов, стра́нное претворе́ние, / и па́че ума́ смотре́ние име́ша. / Твое́ же чре́во Богороди́тельнице, / рождество́ обновля́ет но́вое.

Седален, глас 4.

Смоко́вницы осужде́ние да не предвари́т тя, / но благи́я плоды́ потщи́ся / се́рдца брозда́ми душе́ творцу́ Твоему́, Христу́, возвести́, / в покая́нии Ему́ принося́щи.

Песнь 8.

Ирмос: На горе́ святе́й просла́вльшася, / и в купине́ огне́м Присноде́вы Моисе́ови та́йну я́вльшаго, / Го́спода по́йте / и превозноси́те во вся ве́ки.

Припев: Поми́луй мя, Бо́же, поми́луй мя.

Целому́дрием украси́вше житие́, / и му́дростию сохрани́вше ве́ру, / пра́вды нра́вы взы́щем, / да в му́жестве спосле́дующе, / Христо́ви сраспне́мся.

Припев: Поми́луй мя, Бо́же, поми́луй мя.

Другу́ю Е́ву обре́т еги́птяныню, / не победи́ся к неподо́бному дея́нию патриа́рх Ио́сиф, / но ста я́коже не́кий адама́нт, / от страсте́й не ят грехо́вных.

Припев: Поми́луй мя, Бо́же, поми́луй мя.

Преходя́ жите́йская ше́ствия, Спа́се мой, / взалка́л еси́ во́лею, спасе́ния всех жела́я, / сего́ бо взалка́л еси́, обраще́ния от Тебе́ удале́нных.

Припев: Поми́луй мя, Бо́же, поми́луй мя.

Пра́отец вкуш от дре́ва, я́ко позна́ся наг и посра́млен, / ли́ствие смоко́вное взем препоя́сася, / собо́рище бо обнаже́нное Христа́ прообража́шеся.

Припев: Поми́луй мя, Бо́же, поми́луй мя.

Гото́вися, душе́, пре́жде исхо́да, / устро́й себе́ ко о́ному житию́, / и Христу́ тебе́ ра́ди пострада́ти тща́щемуся, да тя просла́вит, / потщи́ся спострада́ти, и сраспя́тися, и умре́ти.

Припев: Поми́луй мя, Бо́же, поми́луй мя.

Ка́ко не ужа́снется смерть, Спа́се мой? / Ка́ко не убои́тся ад среты́й Тя, / по благоизволе́нию к стра́сти тща́щагося, / и о непра́ведных пра́ведна Тя зря пострада́ти прише́дша?

Припев: Поми́луй мя, Бо́же, поми́луй мя.

Ла́зарево воста́ние ви́девше иуде́и, свяще́нницы и леви́ти / кля́твенное согла́сие за́вистию угото́вльше, ле́стию преда́тельства, / Христа́ преда́ша на смерть Пила́ту.

Припев: Поми́луй мя, Бо́же, поми́луй мя.

А́гница Твоя́ и Раба́ и Де́ва, / к стра́сти Тя устремля́ющася ви́дящи, / и ду́шу о нас полага́юща, до́браго Па́стыря, / утро́бою Ма́тернею по Тебе́ рыда́ше.

Слава: Я́ко Еди́ницу Существо́м пою́ Тя, / я́ко Тро́ицу Ли́цы Тя чту, / О́тче, и Сы́не, и Ду́ше Пресвяты́й, / безнача́льную держа́ву Твоего́ Ца́рствия сла́влю во ве́ки.

И ныне, Богородичен: Мо́лит Тя, Христе́, Богоро́дица, / мо́лит учени́к Твои́х собо́р: / Твой мир да́руй ми́рови Твоему́, / и щедро́ты Твоя́ пода́ждь нам бога́тно во ве́ки.

Песнь 9.

Ирмос: Чу́жде ма́терем де́вство, / и стра́нно де́вам деторожде́ние; / на Тебе́, Богоро́дице, / обоя́ устро́ишася. / Тем Тя, вся племена́ земна́я, / непреста́нно велича́ем.

Припев: Поми́луй мя, Бо́же, поми́луй мя.

Чу́жде есть нечести́вым целому́дрие, / и стра́нно пра́ведником законопреступле́ние, / Ио́сиф же вели́кий уклони́ся греха́, / и целому́дрия бысть о́браз, / и подо́бие вои́стинну Христо́во.

Припев: Поми́луй мя, Бо́же, поми́луй мя.

Чу́жде есть беззако́нником благозако́ние, / и стра́нно неве́рным Богоразу́мие, / иуде́е же сия́ отри́нуша за беззако́ние. / Те́мже и еди́ни са́ми насле́доваша, я́коже смоко́вница, кля́тву.

Припев: Поми́луй мя, Бо́же, поми́луй мя.

Взалка́ челове́ческаго спасе́ния, / хлеб сый жи́зни, Христо́с и Бог мой. / Те́мже смоко́вницу предвари́в, безпло́дное собо́рище, / ли́ствием обра́стшую зако́нно, я́ко ви́де, прокля́т.

Припев: Поми́луй мя, Бо́же, поми́луй мя.

Зако́нное непло́дие прокля́л еси́, / я́ко ли́ствие процвета́ющее писменосе́нный ра́зум, / плодо́в же дел не иму́щее за беззако́ние. / Нас же всех благода́ти сыно́в, Спа́се, благослови́.

Припев: Поми́луй мя, Бо́же, поми́луй мя.

Жезл у́бо Моисе́ов дре́вле в змию́, / Ааро́нов же жезл в зе́лено преложи́ся и процвете́ ли́ствие; / непло́дное же изсо́хшее собо́рище законопресту́пное, / в непло́дную преложи́ся смоко́вницу.

Припев: Поми́луй мя, Бо́же, поми́луй мя.

Гото́ви Иуде́е свяще́нники твоя́ и устро́й ру́це к богоуби́йству, / се бо прии́де кро́ткий и молчали́вый на страсть, / А́гнец сый и Па́стырь наш, Христо́с Царь Изра́илев.

Припев: Поми́луй мя, Бо́же, поми́луй мя.

Приими́ Иуде́е Царя́, / се бо на страсть прихо́дит во́лею, да постра́ждет, / и спасе́т зову́щия непреста́нно: / благослове́н Гряды́й спасти́ Кресто́м вся́ческая.

Припев: Поми́луй мя, Бо́же, поми́луй мя.

Обрати́л есть Иуде́е, пра́здники твоя́ в плачь, Влады́ка, по проро́честву, / богоуби́йца бо показа́лася еси́ обра́щшаго дре́вле ка́мень, / и несеко́мый во исто́чники водны́я и езе́ра, я́коже пое́т Дави́д.

Слава: Чу́жде есть беззако́нным, / е́же Тя сла́вити безнача́льное Существо́, / Отца́, и Сы́на, и Свята́го Ду́ха, несозда́нное вседержи́тельство, / И́мже весь мир соде́лася, ма́нием Боже́ственныя держа́вы Твоея́.

И ныне, Богородичен: Приво́дим в моли́тву Богоро́дицу, / Тоя́ моли́твами и апо́стол Твои́х, / о́бщники ны сотвори́, Влады́ко, благи́х Твои́х, / и све́тлости сподо́би, Спа́се, Воскресе́ния Твоего́.

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)

Таже малых 12, глаголюще на кийждо поклон: Бо́же, очи́сти мя гре́шнаго.

И паки последи молитву всю:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.