Трипеснец в Пятницу Пятой седмицы

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кано́н трипе́снец. Гла́с 1.

Пе́снь 5

Ирмо́с: Просвети́вый сия́нием прише́ствия Твоего́ Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Припев: Поми́луй мя, Бо́же, поми́луй мя.

Простры́й не́бо я́ко ко́жу, просте́рл еси́ дла́ни на Кресте́ Иису́се преблаги́й: те́мже молю́ Тя, просте́рта мя́ вра́жиими искуше́нии, уще́дри.

Припев: Поми́луй мя, Бо́же, поми́луй мя.

Усну́л еси́ на Кресте́ Иису́се преблаги́й, бо́дрость спасе́ния на́м подая́ лежа́щым Го́споди, в до́льнейшей поги́бели: те́мже Тя́ ве́рою сла́вим.

Припев: Поми́луй мя, Бо́же, поми́луй мя.

Стра́сти Твоея́ ви́дети де́нь, сподо́би рабы́ Твоя́ просвеще́нны се́рдца све́тлостию, и живоно́сное Твое́ Спа́се Воскре́сние, пою́щыя держа́ву Ца́рствия Твоего́.

Припев: Пресвята́я Богоро́дице, спаси́ на́с.

Богоро́дичен: Зря́щи Тя́ воздви́жена на Кресте́ Всечи́стая восклица́ше уязвля́ема утро́бою, и глаго́лаше: за милосе́рдие Го́споди Твои́х щедро́т, страда́ти претерпе́л еси́, все́м подая́й безстра́стие.

Припев: Поми́луй мя, Бо́же, поми́луй мя.

На Кресте́ ру́це Твои́ Человеколю́бче распросте́рл еси́, и гвоздьми́ пригвозди́ша, и ре́бра копие́м прободо́ша иуде́е, и терпи́ши вся́ Христе́, да мы́ спасе́мся.

Припев: Поми́луй мя, Бо́же, поми́луй мя.

Дре́ва сне́дию у́мре иногда́ Ада́м, па́ки же обре́те Дре́вом кре́стным жи́знь, и́мже щедро́т наслажда́ется пи́щи вну́трь рая́.

Припев: Поми́луй мя, Бо́же, поми́луй мя.

Кре́ст, копие́, и гво́здия Твоя́ почита́ем Влады́ко: те́ми бо от тли́ на́с изба́вил еси́, Твое́ю стра́стию Христе́, обезсме́ртствовавшихся.

Сла́ва, тро́ичен: Еди́ну естество́м Тя́ Тро́ице воспева́ю, безнача́льную, несозда́нную, нача́льственную, ца́рственную, пресоверше́нную Еди́ницу, Бо́га, и Све́т, и Жи́знь, Зижди́теля ми́ру.

И ныне. Богоро́дичен: В преесте́ственном Твое́м рождестве́ Чи́стая, зако́ны естества́ Тобо́ю разреша́ются я́ве: и́бо безсе́менно ражда́еши преве́чнаго Бо́га, от Отца́ рожде́ннаго.

Пе́снь 8

Ирмо́с: Чу́да преесте́ственнаго росода́тельная изобрази́ пе́щь о́браз: не бо́ я́же прия́т пали́т ю́ныя, я́ко ниже́ о́гнь Божества́ Девы, в ню́же вни́де утробу́. Те́м воспева́юще воспое́м: да благослови́т тва́рь вся́ Го́спода, и превозно́сит во вся́ ве́ки.

Припев: Поми́луй мя, Бо́же, поми́луй мя.

Притупи́л еси́ лука́ваго Спа́се, жа́ла, пригвожде́н гвоздьми́ на Дре́ве, терно́вным венце́м оде́ялся еси́ укори́зны, искореня́я преступле́ния те́рние. Те́мже воспева́юще тебе́ зове́м: да благослови́т тва́рь вся́ Го́спода, и превозно́сит во вся́ ве́ки.

Припев: Поми́луй мя, Бо́же, поми́луй мя.

Просте́рл еси́ на Кресте́ Христе́ дла́ни, челове́чество собира́я к твоему́ позна́нию, и копие́м Твои́м ре́бром пробости́ся претерпе́л еси́, источи́в на́м исто́чник спасе́ния, воспева́ющым: да благослови́т тва́рь вся́ Го́спода, и превозно́сит во вся́ ве́ки.

Припев: Поми́луй мя, Бо́же, поми́луй мя.

Струя́ми благоутро́бия Твоего́ Христе́ Ще́дре, очи́сти мое́ се́рдце, грехо́вным угрызе́нием оскверни́вшееся, и ре́ки умиле́ния источи́ти сподо́би мя́ Христе́ Иису́се, да зову́ Тебе́: да благослови́т тва́рь вся́ Го́спода, и превозно́сит во вся́ ве́ки.

Припев: Пресвята́я Богоро́дице, спаси́ на́с.

Богоро́дичен: Ста́мну Тя́ Боже́ственную, ма́нну иму́щую Божества́, позна́хом Отрокови́це, ковче́г и трапе́зу и све́щник престо́л Бо́жий и пала́ту, и мо́ст, преводя́щий к Боже́ственной жи́зни, пою́щыя: да благослови́т тва́рь вся́ Го́спода, и превозно́сит во вся́ ве́ки.

Припев: Поми́луй мя, Бо́же, поми́луй мя.

Распина́ется Христо́с, и оживля́емь а́з пою́ со о́троки: благослови́те дела́ Госпо́дня Го́спода и превозноси́те Его́ во ве́ки.

Припев: Поми́луй мя, Бо́же, поми́луй мя.

Ми́р от тли́ распя́тием Твои́м изба́вивыйся, пое́т со о́троки: благослови́те дела́ Госпо́дня Го́спода и превозноси́те Его́ во ве́ки.

Припев: Поми́луй мя, Бо́же, поми́луй мя.

Пою́ Тво́й Кре́ст, и́мже спа́сл мя́ еси́ Христе́, поя́ со о́троки: благослови́те дела́ Госпо́дня Го́спода, и превозноси́те Его́ во ве́ки.

Слава. Тро́ичен: Тро́ице равносла́вимая, пресу́щная Еди́нице, О́тче, и Сы́не, и Ду́ше, спаси́ ве́рою пою́щыя Тя́.

И ныне. Богоро́дичен: Рождеству́ Чи́стыя Богоро́дицы покланя́юся, поя́ со о́троки: благослови́те дела́ Госпо́дня Го́спода, и превозноси́те Его́ во ве́ки.

Пе́снь 9

Ирмо́с: О́браз чи́стаго рождества́ Твоего́, огнепали́мая купина́ показа́ неопа́льная, и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

Припев: Поми́луй мя, Бо́же, поми́луй мя.

Ви́де Илиа́ Го́спода в то́нце ве́тре, истончи́в пе́рвее пло́ть моли́твами и посто́м: ему́же поревнова́вши душе́ моя́, отве́ржи сла́дости дебельства́, я́ко да у́зриши жела́емаго.

Припев: Поми́луй мя, Бо́же, поми́луй мя.

На дре́во возне́с пе́рвее Моисе́й зми́я Спа́се, вообража́ше Твое́ воздви́жение, е́же на Кресте́ Преблаги́й: и́мже ядови́тыя зло́бы зми́евы, изба́вил еси́ вся́ язы́ки покланя́ющыяся Тебе́.

Припев: Поми́луй мя, Бо́же, поми́луй мя.

Во гро́бе уны́ния лежа́, отягча́ющий име́я ка́мень недоуме́ния: присноживо́тнаго не разуме́я, Спа́се сло́ва Твоего́, и стра́ха Твоего́ не чу́вствуя, уще́дри мя́ и спаси́ Твое́ю бла́гостию, Многоми́лостиве.

Припев: Пресвята́я Богоро́дице, спаси́ на́с.

Богоро́дичен: Все́х превы́шшая Влады́чице, страсте́й мя́ зло́бы вы́шша покажи́, сла́вяща Тя́ всеи́стинную Богоро́дицу, и пою́ща Рождество́ Твое́ Чи́стая, непостиже́нием, Богора́дованная, почита́емое.

Припев: Поми́луй мя, Бо́же, поми́луй мя.

Распина́ешися, и спаса́еши мя́: умира́еши, и оживля́еши мя́. О благоутро́бия, о человеколю́бия Твоего́! кто́ ви́де, кто́ слы́ша, Влады́ку за раба́ прие́млюща сме́рть поно́сную? Но сла́ва неизрече́нней бла́гости Твое́й Го́споди.

Припев: Поми́луй мя, Бо́же, поми́луй мя.

Со́лнце я́ко ви́де Тя́ распина́ема, за́йде: ка́ко бо сия́ло бы, укори́зну ви́дя Зижди́теля своего́? я́ко и тва́рь вся́ преклоня́ема, распина́телем вопия́ше молча́щи: я́ко Ты́ Бог еси́ все́х, а́ще и пло́тию стра́стен.

Припев: Поми́луй мя, Бо́же, поми́луй мя.

На́с ра́ди подъя́т Тво́й ки́йждо у́д стра́сть: ударе́ние, глава́: лани́ты, зауше́ние: ру́це, пригвожде́ние, и ре́бра копие́: изря́днее же кре́ст. Но сла́ва неизрече́нному благоутро́бию Твоему́ Спа́се на́ш.

Сла́ва, тро́ичен: Еди́наго единороди́телю, единоро́днаго Сы́на О́тче: и еди́не еди́наго све́те, све́та сия́ние: и еди́ный еди́не еди́наго Бо́га, Святы́й Ду́ше, Го́спода Госпо́дь, вои́стинну сы́й: о Тро́ице Еди́нице Свята́я, спаси́ мя богосло́вяща Тя́.

И ныне, Богоро́дичен: Чу́до рождества́ Твоего́ удивля́ет мя́ Всенепоро́чная, ка́ко зачина́еши безсе́менно необъиме́ннаго? рцы́, ка́ко де́вствуеши, ро́ждши я́ко Ма́ти? Е́же па́че естества́ ве́рою прие́мь, Рожде́нному поклони́ся: ели́ка хо́щет бо, и мо́жет.

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)

Таже малых 12, глаголюще на кийждо поклон: Бо́же, очи́сти мя гре́шнаго.

И паки последи молитву всю:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.