Шрифт
Каноны Триоди Постной
Трипеснец в Среду Пятой седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 8.
Пе́снь 3
Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.
Припев: Поми́луй мя, Бо́же, поми́луй мя.
Осуди́в вражду́, на Кресте́ просте́рл еси́ Твои́ правосу́де дла́ни: ны́не же осужде́нна мя́ су́ща прегреше́ньми, спаси́ блу́днаго Спа́се, огорчи́вшаго Тя́ долготерпели́ваго.
Припев: Поми́луй мя, Бо́же, поми́луй мя.
Ско́тское возжеле́х страстотво́рное житие́, Твои́х за́поведей удали́хся Спа́се Преблаги́й, стра́нными порабоще́н и нечи́стыми гра́жданы, ны́не же обраща́ющася приими́, и спаси́ мя.
Припев: Поми́луй мя, Бо́же, поми́луй мя.
Гугни́ваго я́коже дре́вле слу́ха отве́рзл еси́, отве́рзи души́ моея́ ушеса́ нра́вом оглуше́нна, и внуши́ти Твое́ спаси́тельное сло́во, Иису́се сподо́би мя́ еди́не Человеколю́бче.
Припев: Пресвята́я Богоро́дице, спаси́ на́с.
Богоро́дичен: Спаси́тельная врата́, к Бо́гу мо́сте, христиа́н предста́тельнице, Пречи́стая Влады́чице, обстои́ма мя́ напа́стьми жития́ и обурева́ема, Отрокови́це окорми́.
Припев: Поми́луй мя, Бо́же, поми́луй мя.
За милосе́рдие щедро́т возшед на Кре́ст, извле́кл еси́ мя из ро́ва страсте́й, и возне́сл еси́ Христе́, в небе́сная.
Припев: Поми́луй мя, Бо́же, поми́луй мя.
Просте́р на Кресте́ дла́ни Твои́ Христе́ язы́ки вся́ удале́нныя от Тебе объя́л еси́, бли́з ста́ти держа́вы Твоея́.
Припев: Поми́луй мя, Бо́же, поми́луй мя.
Возне́слся еси́ на Кресте́, прободе́н бы́л еси́ в ре́бра, же́лчи вкуси́л еси́ мене́ ра́ди, Иису́се, от преступле́ния огорчи́вшаго Тя́.
Сла́ва, тро́ичен: Триипоста́сная Еди́нице, пресу́щная Тро́ице, Божество́ еди́но, О́тче и Сы́не, и Ду́ше пра́вый, спаси́ чту́щыя Тя́.
И ныне. Богоро́дичен: Кто́ хвали́ти Тя́ от земны́х, по достоя́нию возмо́жет Ма́ти де́во? Ты́ бо в жена́х еди́на яви́лася еси́ избра́нная, и всеблаже́нная.
Пе́снь 8
Ирмо́с: Седмери́цею пе́щь, халде́йский мучи́тель, богочестивым неи́стовно разжже, си́лою же лу́чшею, спасе́ны сия видев, Творцу и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся ве́ки.
Припев: Поми́луй мя, Бо́же, поми́луй мя.
Неусы́пным о́ком воззре́в на мя́, уще́дри, уны́ния дрема́нием одержи́ма, и сну́ рабо́тающа, сла́стным на одре́ страсте́м, на Кресте́ главу́ Твою́ преклони́вый, и во́лею усну́вый, и тьму́ разори́вый, Христе́, греха́, све́т сы́й пра́вды.
Припев: Поми́луй мя, Бо́же, поми́луй мя.
Богатотво́рными дарова́нии украси́вся от креще́ния, па́че нищету́ злы́х возлюби́х, и чу́ждь бы́х доброде́телей окая́нный а́з, в страну́ дале́че отше́д зло́бы. те́мже обрати́в приими́ мя Спа́се, Твои́м Кресто́м огражда́я во вся́ ве́ки.
Припев: Поми́луй мя, Бо́же, поми́луй мя.
Пия́нство страсте́й отри́ни, и сле́з взыщи́, чисти́тельное поще́нием душе́, вино́ се́рдце веселя́щее, и сла́сти увяда́ющее, и плотски́я пе́щи испепеля́ющее: и потщи́ся, пригвозди́вшемуся тебе́ ра́ди на Дре́ве Христу́ сраспя́тися, и жи́ти во ве́ки.
Припев: Пресвята́я Богоро́дице, спаси́ на́с.
Богоро́дичен: Богороди́тельнице Всечи́стая, души́ моея́ я́звы, и грехо́вная гное́ния очи́сти, исто́чники омыва́ющи от ре́бр Рождества́ Твоего́, и от ни́х очища́ющи струя́ми: к Тебе́ бо взыва́ю, и к Тебе́ прибега́ю, и Тя́ призыва́ю Благода́тную.
Припев: Поми́луй мя, Бо́же, поми́луй мя.
Распе́ншагося пло́тски, и Божество́м не пострада́вша Иису́са, пою́т А́нгели, и мы́ земноро́днии во вся́ ве́ки.
Припев: Поми́луй мя, Бо́же, поми́луй мя.
В распя́тии Твое́м Христе́, поно́сную сме́рть прие́м прокля́тую, спа́сл ны́ еси́ от тли́ изба́вивый.
Припев: Поми́луй мя, Бо́же, поми́луй мя.
Вся́ претерпе́л еси́ пострада́ти о еди́ном, е́же спасти́ся мне́ Христе́: пою́ Твое́ распя́тие, гво́здия, и заколе́ние во вся́ ве́ки.
Слава. Тро́ичен: Херуви́мски Тя́ о Тро́ице Свя́т, Свя́т Свя́т, пою́ еди́но Божество́, безнача́льное, про́стое и все́ми непости́жное.
И ныне. Богоро́дичен: Похвала́ми Тя́ Чи́стая, све́тло почита́ют вси́ роди́: Зижди́теля бо родила́ еси́. О чу́до стра́шное, и де́ло всеблаже́нное!
Пе́снь 9
Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с: те́м Тя́ Богоро́дицу, ангелов и челове́к чинонача́лия велича́ют.
Припев: Поми́луй мя, Бо́же, поми́луй мя.
Зря́ Тя просте́рта на Кресте́, зари́ сокрыва́ше со́лнце, вся́ же земля́ тре́петом колеба́шеся Всецарю́, во́лею ви́дящи стра́ждуща, естество́м тя́ безстра́стна. Те́мже Тя́ молю́, стра́сти души́ моея́, я́ко вра́чь Христе́ исцели́.
Припев: Поми́луй мя, Бо́же, поми́луй мя.
Пути́ спаси́тельныя оста́вив, во а́д веду́щыя ше́ствовах, тьму́ глубо́кую име́я о́крест сла́сти, и страсте́й поползнове́ния, и бу́рю искуше́ний. те́мже Тя́ молю́: Твои́м Кресто́м спаси́ мя Христе́, я́ко еди́н многоми́лостив.
Припев: Поми́луй мя, Бо́же, поми́луй мя.
Зимо́ю содержи́мь искуше́ний, и страсте́й треволне́нии потопля́емь, и сласте́й бу́рею обурева́емь лю́те, поще́ния пучи́ну достиго́х кро́ткую и ти́хую, в не́йже мя́ окорми́в Твои́м Кресто́м Ще́дре, ко спасе́нию устреми́.
Припев: Пресвята́я Богоро́дице, спаси́ на́с.
Богоро́дичен: Зачала́ еси́ Де́во без се́мене, вся́ческая соде́лавшаго Сло́ва Бо́жия, без хоте́ний плотски́х: без истле́ния же родила́ еси́, без боле́зней ма́терских: те́мже Тя́ Богоро́дицу и язы́ком и се́рдцем испове́дающе, велича́ем.
Припев: Поми́луй мя, Бо́же, поми́луй мя.
Во́лею претерпе́л еси́ распя́тися Спа́се на́ш, да пода́си все́м жи́знь, от сме́рти избавля́я.
Припев: Поми́луй мя, Бо́же, поми́луй мя.
Дре́вом умертви́хся, и кре́стным Дре́вом ожи́х: на не́мже Христо́с мо́й пригвозди́вся, врага́ моего́ умертви́.
Припев: Поми́луй мя, Бо́же, поми́луй мя.
Пою́ копие́ Твое́, воспева́ю и гво́зди Твоя́, гу́бу, тро́сть, Кре́ст, и́миже спа́сл мя́ еси́ Иису́се Бо́же.
Сла́ва, тро́ичен: Я́ко су́щу Сы́ну с Роди́телем, и Ду́ху Свято́му ссу́щу, единому́дренно поклони́мся.
И ныне, Богоро́дичен: Чу́до пресла́вное, и ужа́сное слы́шание, ка́ко и я́ко Ма́ти ражда́еши Чи́стая, и не позна́ла еси́ я́ко Де́ва тле́ния?
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
