Четверопеснец в Субботу Четвертой седмицы, Крестопоклонной.

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Четверопе́снец, гла́с 6.

Пе́снь 6

Ирмо́с: Бу́рею грехо́вною погружа́емь, я́ко во чре́ве ки́тове содержи́мь, с проро́ком зову́ Ти: возведи́ от тли́ живо́т мо́й Го́споди, и спаси́ мя.

Припев: Ди́вен Бо́г во святы́х Свои́х, Бог Израилев

Преидо́сте преде́лы плотски́я страда́льцы мно́гим терпе́нием, претерпе́вше му́ки и боле́зни. те́мже вся́кую боле́знь и ско́рбь облегча́ете, ва́с воспева́ющих.

Припев: Ди́вен Бо́г во святы́х Свои́х, Бог Израилев

Тьма́м а́нгел во́инство совокупи́ся святы́х страстоте́рпец, и мо́лит Всеблага́го Бо́га, согреше́ний тьмочи́сленных на́с изба́вити, я́ко христу́ угоди́вшии.

Припев: Ди́вен Бо́г во святы́х Свои́х, Бог Израилев

Умертви́вся и во гро́бе Христе́ усну́в, возста́вил еси́ ме́ртвыя, и в ве́ре уме́ршым дае́ши бла́гости бога́тство Христе́, поко́й я́ со все́ми святы́ми.

Припев: Пресвята́я Богоро́дице, спаси́ на́с.

Богоро́дичен: Бо́жие Бо́г Сло́во, иски́й обожи́ти челове́ка Чи́стая, из Тебе́ воплоща́ется, и зе́млен ви́дится: Его́же непреста́нно моли́, обрести́ на́м ми́лость во вре́мя отве́та.

Припев: Ди́вен Бо́г во святы́х Свои́х, Бог Израилев

Пло́ти и кро́ве святи́и не пощаде́вше, ко вся́кому муче́нию ста́сте небоя́зненни, Христа́ не отмета́ющеся: те́мже с небе́с низпосла́ Христо́с ва́м венцы́.

Припев: Ди́вен Бо́г во святы́х Свои́х, Бог Израилев

Му́ченик торжество́ усря́щим, просвети́вшеся де́тельми, и возопии́м богодухнове́нными пе́сньми: вы́ есте́ вои́стинну денни́цы на земли́, Христо́вы му́ченицы.

Припев: Сла́ва Тебе́ Бо́же на́ш, сла́ва Тебе́.

Усече́ния удо́в ва́ших зря́ще, наслажда́стеся кровьми́ ра́дующеся: но моли́те о на́с приле́жно Го́спода, му́ченицы присносла́внии.

Припев: Ду́шы и́х во благи́х водворя́тся.

От земли́ созда́вый мя́, и оживи́вый мя́, и в зе́млю возврати́тися мне́ па́ки реки́й, я́же прия́л еси́ рабы́ Твоя́ упоко́й, и от тли́ сме́ртныя возведи́ Го́споди.

Сла́ва: Тро́ице Свята́я сла́влю Тя́, Естество́ безнача́льное, еди́наго Бо́га, еди́наго Го́спода, три́ Ли́ца, Отца́, Сы́на и Ду́ха: нерожде́нна, рожде́нна, исхо́дна, Ту́южде и присносу́щну.

И ныне. Богоро́дичен: О блаже́нная Богоневе́сто, ка́ко родила́ еси́ без му́жа, и пребыла́ еси́ я́коже пре́жде? Бо́га бо родила́ еси́, чу́до стра́шное: но моли́ спасти́ся пою́щым Тя́.

Пе́снь 7

Ирмо́с: Глаго́лавый на горе́ с Моисе́ем, и о́браз де́вства явле́й в купине́, благослове́н еси́ Бо́же оте́ц на́ших.

Припев: Ди́вен Бо́г во святы́х Свои́х, Бог Израилев

Обо́лкшеся страда́льцы в нетле́ние боже́ственное, обнаже́нием тле́нныя пло́ти, на́с ра́ди пло́ть от нетле́нныя Прие́мшему Жены́, ны́не предстоите́ све́тлии: сего́ ра́ди мя́ облецы́те во оде́жду свяще́нную обнаже́ннаго зло́бою.

Припев: Ди́вен Бо́г во святы́х Свои́х, Бог Израилев

Воздержа́нием пожи́вый, страда́льческий собо́р, воздержа́ния на́с по́прище укрепи́те тещи́ невозбра́нно, я́ко пропове́давый Христа́ на по́прищи му́жественно, и предстоя́й престо́лу венцено́сный, в наслажде́ние мы́сленно со а́нгелы.

Припев: Ди́вен Бо́г во святы́х Свои́х, Бог Израилев

Моли́твами Бо́же Твои́х святы́х му́ченик, усо́пшыя ве́рно рабы́ Твоя́, рая́ жи́тели покажи́, и све́та мы́сленнаго сподо́би я́, непреста́нно вопию́щыя Тебе́: благослове́н Бо́г отце́в на́ших.

Припев: Пресвята́я Богоро́дице, спаси́ на́с.

Богоро́дичен: Тя́ еди́ну благу́ю мо́лим Де́во, озло́бленныя ны́ ублажи́, и приле́жно Христа́ моли́ естество́м су́ща блага́го, воздержа́ния вре́мя, блага́я де́ющым, испо́лнити на́м пою́щым Его́: благослове́н Бо́г отце́в на́ших.

Припев: Ди́вен Бо́г во святы́х Свои́х, Бог Израилев

Возвели́чивый святы́я Твоя́ вся́, зна́меньми удиви́в я́ в ми́ре: благослове́н еси́ во ве́ки Го́споди Бо́же отце́в на́ших.

Припев: Ди́вен Бо́г во святы́х Свои́х, Бог Израилев

Вся́кий ви́д ра́н проше́дше, и коле́на ваа́лу не поко́ршеся преклони́ти, венцы́ сла́вы взя́сте от Бо́га Христо́вы му́ченицы.

Припев: Сла́ва Тебе́ Бо́же на́ш, сла́ва Тебе́.

Безсме́ртному Царю́ во́инствовавше, и ве́ру к Нему́ показа́вше соверше́нную, кро́вь свою́ му́ченицы за Него́ излия́сте.

Припев: Ду́шы и́х во благи́х водворя́тся.

Иде́же све́т Тво́й жи́зни истека́ет, преложи́ я́же преста́вил еси́ от вре́менных, ве́рныя Твоя́ рабы́, Го́споди Бо́же оте́ц на́ших.

Сла́ва: Во Еди́нице Тро́ице, покланя́емое Существо́, О́тче, Сы́не и Ду́ше, воспева́ющыя Тя́ сохраня́й, Бо́же отце́в на́ших.

И ныне. Богоро́дичен: Де́во Ма́ти Отрокови́це всесве́тлая, еди́на к Бо́гу хода́тайство, не преста́й Влады́чице моли́ти спасти́ся на́м.

Пе́снь 8

Ирмо́с: Земля́, и вся́ я́же на не́й, мо́ре и вси́ исто́чницы, небеса́ небе́с, све́т и тьма́, мра́з и зно́й, сы́нове челове́честии, свяще́нницы благослови́те Го́спода, и превозноси́те Его́ во ве́ки.

Припев: Ди́вен Бо́г во святы́х Свои́х, Бог Израилев

Великоимени́тии Христо́вы страда́льцы, и честни́и в Бо́зе, вся́ воспева́ющыя па́мяти ва́шя, вели́ких согреше́ний, и та́мошних му́к изба́вите ны́, к Нему́ ва́шими вели́кими моли́твами.

Припев: Ди́вен Бо́г во святы́х Свои́х, Бог Израилев

Святоизбра́нное Христа́ Бо́га, и тве́рдое вои́стинну во́инство, му́ченик собо́ры освяти́те на́ш у́м и се́рдце, в сия́ святы́я дни́ по́стныя, ва́шими святы́ми моли́твами.

Припев: Ди́вен Бо́г во святы́х Свои́х, Бог Израилев

Изба́ви че́рвия му́чащаго, и скре́жета зу́бнаго, Го́споди, и вне́шния тьмы́ несвети́мыя, вся́ я́же ве́рою прия́л еси́: и учини́ сия́, иде́же све́т лица́ Твоего́ Христе́, сия́ет во ве́ки.

Припев: Пресвята́я Богоро́дице, спаси́ на́с.

Богоро́дичен: Кре́ст христо́в честны́й, богоро́дице чи́стая, ви́девшыя и от се́рдца поклони́вшыяся ны́, твои́ми ко влады́це сподо́би моли́твами, ви́дети и стра́сти честны́я, страсте́й очище́нных.

Припев: Ди́вен Бо́г во святы́х Свои́х, Бог Израилев

О до́браго измене́ния, и́мже обрето́сте сме́ртию живо́т, священному́ченицы Христо́вы, огня́ и меча́, мра́за и звере́й ника́коже убоя́вшеся, и вопию́ще: по́йте Го́спода, и превозноси́те во вся́ ве́ки.

Припев: Ди́вен Бо́г во святы́х Свои́х, Бог Израилев

Горе́ ли́к а́нгельский, до́ле же мы́ земни́и, хва́лим му́ченицы Христо́вы, стра́нная страда́ния, и по́двиги ва́шего му́жества, благословя́ще, пою́ще Го́спода, и превознося́ще во вся́ ве́ки.

Припев: Сла́ва Тебе́ Бо́же на́ш, сла́ва Тебе́.

По́двиги чу́дныя, му́ченицы, сла́вяще ва́шя, благоде́теля и Бо́га благослови́м и покланя́емся, на по́прище по́двигов ва́с укрепи́вшаго: Его́же превозно́сим во вся́ ве́ки.

Припев: Ду́шы и́х во благи́х водворя́тся.

Ты́ сме́рти и живота́ Госпо́дь сы́й и Бо́г, преста́вльшихся благоче́стно воздвиза́яй, та́мо преложи́ в селе́ниих пра́ведных, благословя́щыя, пою́щыя Тя́ Го́споди, и превознося́щыя во вся́ ве́ки.

Слава: Све́т, Живо́т же и Животы́, почита́ю Тя́ Отца́, и Сы́на, и Ду́ха исхо́дна, Естество́ еди́но, три́ Ипоста́си, Бо́га Еди́наго поя́, благословлю́ Тя, пою́ Тя Го́спода, и превозношу́ тя во вся́ ве́ки.

И ныне. Богоро́дичен: Кто́ не воспое́т Тя́ от земноро́дных, нескве́рная Чи́стая голуби́ца? Ты́ бо родила́ еси́ на́м Све́т вели́кий, жи́зни бога́тство, Иису́са Спа́са: Его́же пое́м хва́ляще я́ко Го́спода, и превозно́сим во вся́ ве́ки.

Пе́снь 9

Ирмо́с: Велича́ем вси́ человеколю́бие Твое́, Христе́ Спа́се на́ш, сла́во ра́б Твои́х, и ве́нче ве́рных, возвели́чивый па́мять Ро́ждшия Тя́.

Припев: Ди́вен Бо́г во святы́х Свои́х, Бог Израилев

Свети́льницы су́ще неле́стнии, Христо́вы страда́льцы, просвети́те на́шя по́мыслы, утверди́те твори́ти светоза́рная и чи́стая Бо́жия хоте́ния.

Припев: Ди́вен Бо́г во святы́х Свои́х, Бог Израилев

Ору́жия зрите́ся закала́ющая враги́, до́блии Христо́вы страда́льцы: но изба́вите на́с от стре́л лука́ваго предста́тельствы ва́шими.

Припев: Ди́вен Бо́г во святы́х Свои́х, Бог Израилев

Поко́й Ще́дре в не́дрех Авраа́мовых рабы́ Твоя́, ве́рою от на́с отше́дшыя, к Тебе́ вся́ческих Зижди́телю и Преблаго́му.

Припев: Пресвята́я Богоро́дице, спаси́ на́с.

Богоро́дичен: Пло́ти моея́ умертви́ движе́ния, Бо́га пло́тию Ро́ждшая па́че ума́, и пода́ждь просвеще́ние мы́сли мое́й, чи́стый о́блак су́щи све́та.

Припев: Ди́вен Бо́г во святы́х Свои́х, Бог Израилев

Воспева́ем вси́ па́мяти ва́шя, му́ченицы прехва́льнии, по́двиги ви́дяще свяще́нных ва́ших страда́ний, и удиви́вшеся Христа́ велича́ем.

Припев: Ди́вен Бо́г во святы́х Свои́х, Бог Израилев

Дру́г ко дру́гу стра́ждуще глаго́лаху страстоте́рпцы: пло́ти не пощади́м, прииди́те, у́мрем о Христе́, да во вся́ ве́ки поживе́м лику́юще непреста́нно.

Припев: Сла́ва Тебе́ Бо́же на́ш, сла́ва Тебе́.

Ли́че святы́х, приими́ мольбу́ мою́: и я́ко сподо́бил мя́ еси́ Кре́ст целова́ти, и спаси́тельней стра́сти поклони́тися мне́, Христа́ моли́те.

Припев: Ду́шы и́х во благи́х водворя́тся.

Осла́би, оста́ви Ще́дре, к Тебе́ Человеколю́бцу преста́вленным, и си́х поко́й в селе́ниих избра́нных: Ты́ бо еси́ Жи́знь и Воскре́сние.

Сла́ва: О Тро́ице во еди́ном Естестве́, Тя́ воспева́ющыя, О́тче нерожде́нный, и рожде́нный Сы́не, и Ду́ше исхо́дный, Твое́ю ми́лостию невреди́мы соблюди́.

И ныне, Богоро́дичен: Ра́дуйся Всечестна́я Чи́стая, де́вства похвало́, ма́терей утвержде́ние, челове́ков по́моще, и ми́ра ра́досте, Мари́е Ма́ти, и Рабо́ Бо́га на́шего.

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.