Шрифт
Каноны Триоди Постной
Трипеснец в Четверг Четвертой седмицы, Крестопоклонной
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 7.
Пе́снь 4
Ирмо́с: Плотско́е прише́ствие Твое́ Христе́ уверя́я проро́к Авваку́м, взыва́ше: сла́ва си́ле Твое́й Го́споди.
Припев: Поми́луй мя, Бо́же, поми́луй мя.
Освяще́ния пода́тельную благода́ть да́руя на́м святы́й Кре́сте, апо́столом утвержде́ние и похвало́, предлежи́ши в поклоне́ние дне́сь все́й вселе́нней, по́стное вре́мя облегча́я на́м.
Припев: Поми́луй мя, Бо́же, поми́луй мя.
Сеннописа́в Кре́ст Моисе́й, распросте́р ру́це, Амали́ка победи́, его́же вообража́юще, ру́це простира́ем, посто́м и мольба́ми, я́ко да полки́ победи́м бесо́вския, борю́щыя на́с всегда́ зави́стно.
Припев: Поми́луй мя, Бо́же, поми́луй мя.
Боже́ственным ра́лом Креста́ изъора́сте зе́млю, боже́ственнии ученицы́, плодоно́сну сию́ показа́вше, прозяба́ющую благоче́стие. Те́мже ва́с гла́сы моли́твенными восхваля́юще, Христа́ при́сно сла́вим.
Припев: Пресвята́я Богоро́дице, спаси́ на́с.
Богоро́дичен: Ма́ти Бо́га блага́го, ублажи́ мою́ ду́шу, ю́же лука́вый обы́чаем злы́м озло́би окая́нно, прельсти́в мя́: да я́ко вину́ спасе́ния, песносло́влю Тя́ при́сно Многопе́тую.
Припев: Поми́луй мя, Бо́же, поми́луй мя.
Предлага́ется дне́сь всесвяты́й Кре́ст, присту́пим, целу́им его́: и́бо е́сть ро́г спасе́ния на́шего.
Припев: Поми́луй мя, Бо́же, поми́луй мя.
Благода́ть твоя́ и образова́ние твои́м прихо́дит, прогоня́ющи бесо́вское мно́жество, Кре́сте Христо́в, ору́жие необори́мое.
Припев: Поми́луй мя, Бо́же, поми́луй мя.
Апо́столи, ми́ра моли́твенницы, моли́те спасти́ся и на́м, содержа́щым ору́жие, Кре́ст Христо́в.
Сла́ва, тро́ичен: Еди́ницу Тя́ по Естеству́ воспева́ю, Тро́ицу же Ипоста́сьми чту́, О́тче, Сы́не, и Ду́ше Пресвяты́й.
И ныне. Богоро́дичен: Родила́ еси́ Отрокови́це безму́жная Бо́га Всенепоро́чная, содержа́щаго го́рстию концы́, и все́х дре́внейшаго.
Пе́снь 8
Ирмо́с: Еди́наго безнача́льнаго Царя́ сла́вы, Его́же благословя́т небе́сныя си́лы, и трепе́щут чи́ни а́нгельстии, по́йте свяще́нницы, лю́дие превозноси́те Его́ во ве́ки.
Припев: Поми́луй мя, Бо́же, поми́луй мя.
Ра́дуйся Кре́сте трича́стный и боже́ственный, на не́мже еди́н от Тро́ицы, пло́ть носи́в водрузи́ся, водруже́нныя ны́ во глубину́ нече́стия избавле́й, превознося́щыя Его́ во ве́ки.
Припев: Поми́луй мя, Бо́же, поми́луй мя.
Си́лу держа́вную Кре́ст стяжа́вше, лю́тою вла́стию лука́ваго порабо́тившыяся свободи́ша Сло́ва ученицы́, воспева́юще: Тя́ превозно́сим во ве́ки.
Припев: Поми́луй мя, Бо́же, поми́луй мя.
Увы́ мне́, что́ стра́шный престо́л о́ный, на не́мже Сло́ве се́д, соде́янная мно́ю та́йная яви́ши Христе́, облича́яй нечу́вствие мое́? Но естество́м сы́й ми́лостив, пощади́ мя тогда́.
Припев: Пресвята́я Богоро́дице, спаси́ на́с.
Богоро́дичен: Не́др не отсту́пль Оте́ческих, в не́дрех возле́г еси́ Де́вы, на призва́ние ро́да челове́ческаго, его́же подо́бие, за милосе́рдие Иису́се носи́л еси́. Те́мже Тя́ пое́м челове́цы во ве́ки.
Припев: Поми́луй мя, Бо́же, поми́луй мя.
Крестоно́сную твою́ седми́цу почита́ем, я́ко поклони́тельную, тебе́ бо Дре́во честно́е, покланя́ющеся вопие́м: по́йте свяще́нницы, лю́дие превозноси́те во вся́ ве́ки.
Припев: Поми́луй мя, Бо́же, поми́луй мя.
Оле чудесе́! Царю́ веко́в, я́ко Дре́во, на не́мже распя́лся еси́, сподо́бил ны́ еси́ Твоя́ рабы́ ви́дети, и поклони́тися. Те́мже Тя́ со стра́хом пое́м во ве́ки.
Припев: Поми́луй мя, Бо́же, поми́луй мя.
Двоенадесятостру́нная цевни́це церко́вная, я́ко пою́щая прему́дрости сло́во, апо́столи ва́с воспева́ющыя, проси́те ви́дети стра́сть Госпо́дню, и пе́ти во ве́ки.
Слава. Тро́ичен: О единосу́щная, о Тро́ице Всесвята́я, О́тче, Сы́не, и Пресвяты́й Ду́ше, Божество́: неразде́льную Твою́ держа́ву сла́влю, и пою́ еди́но Ца́рство во вся́ ве́ки.
И ныне. Богоро́дичен: Созда́вшаго Ада́ма по о́бразу, и от смеше́ния его́ произше́дшаго, и разруши́вшаго дре́внюю кля́тву, по́йте свяще́нницы, лю́дие превозноси́те во вся́ ве́ки.
Пе́снь 9
Ирмо́с: Тя́ Пречи́стую Ма́терь и Де́ву, невмести́мое Сло́во во утро́бу вмести́вшую, и роди́вшую пло́тию, пе́сньми велича́ем.
Припев: Поми́луй мя, Бо́же, поми́луй мя.
Уясни́ся, свети́ся Це́рковь Бо́жия, кре́стными заря́ми, его́же но́сиши предлежа́ща все́м ве́рным в поклоне́ние: ты́ же мно́жество все́ де́монское, тьмы́ испо́лншееся, избе́гни.
Припев: Поми́луй мя, Бо́же, поми́луй мя.
Кре́пость воздержа́ния, боже́ственный е́сть Кре́ст, соде́йственник бдя́щих, по́стников укрепле́ние, борю́щихся побо́рник: сему́ ве́рнии любо́вию приступи́вше, ра́достно поклони́мся.
Припев: Поми́луй мя, Бо́же, поми́луй мя.
Основа́ния боже́ственная Це́ркве Христо́вы, утвержде́нием благоче́стия вся́ соблюди́те, и на ка́мени утверди́те тве́рдем, избра́вшаго ва́с апо́столи сла́внии.
Припев: Пресвята́я Богоро́дице, спаси́ на́с.
Богоро́дичен: Ра́дость прие́мшая арха́нгеловым гла́сом, моего́ ны́не се́рдца печа́ль потреби́ душетле́нную, и пода́ждь Чи́стая радостотво́рный пла́чь, я́ко да обря́щу та́мо Боже́ственное утеше́ние.
Припев: Поми́луй мя, Бо́же, поми́луй мя.
Ты́ вообража́емый, Ме́ррския струи́ дре́вле услажда́еши всечестно́е Дре́во: ты́ мое́ услади́ воздержа́ние, Кре́сте Христо́в, дне́сь покланя́емый.
Припев: Поми́луй мя, Бо́же, поми́луй мя.
Тя́ необори́мое ца́рствия ору́жие, во́инства кре́пость, сигкли́та утвержде́ние, Кре́сте Христо́в, вси́ пе́сньми велича́ем.
Припев: Поми́луй мя, Бо́же, поми́луй мя.
Тебе́ о́гненный зву́к апо́столы, я́ко попали́вшыя вся́кую ве́щь пре́лести, и благоче́стие насади́вшыя в ми́ре, пе́сньми велича́ем.
Сла́ва, тро́ичен: Тя́ безнача́льнаго Отца́ и Влады́ку, и собезнача́льнаго Сло́ва, и Ду́ха Свята́го, благоче́стно ве́рнии вси́ велича́ем.
И ныне, Богоро́дичен: Тя́ сла́вную, и еди́ну Богоро́дицу, невмести́мое Сло́во во чре́ве вмести́вшую и роди́вшую пло́тию, пе́сньми велича́ем.
Поклонение Кресту
Кресту́ Твоему́ покланя́емся, Влады́ко, / и свято́е Воскресе́ние Твое́ сла́вим. (Трижды с земным поклоном)
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
