Шрифт

Каноны Триоди Постной

Трипеснец в Среду Второй седмицы

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кано́н трипе́снец. Гла́с 3.

Пе́снь 3

Ирмо́с: Утверди́ Го́споди сердца́ на́ша, и просвети́ к Твоему́ песносло́вию, е́же сла́вити Тя́ Спа́се во ве́к ве́ка.

Припев: Поми́луй мя, Бо́же, поми́луй мя.

На Кресте́ дла́ни распросте́рл еси́, просте́ртыя дре́вле руки́ Ада́мовы к разу́мному са́ду, оте́мля гре́х, за милосе́рдие щедро́т, Сло́ве Бо́жий преблаги́й.

Припев: Поми́луй мя, Бо́же, поми́луй мя.

Утверди́ мое́ помышле́ние, коле́блемое за́вистию зми́я: страсте́й наведе́ния, Твое́ю стра́стию отжени́ пострада́вый, и безстра́стие ве́рным дарова́вый.

Припев: Поми́луй мя, Бо́же, поми́луй мя.

По́стная благода́ть возсия́, невоздержа́ния тьму́ отгоня́щая: се́ благоприя́тное вре́мя, и де́нь спаси́тельный, покая́ния пока́жем плоды́, и жи́ви бу́дем.

Припев: Пресвята́я Богоро́дице, спаси́ на́с.

Богоро́дичен: Па́дающих исправле́ние, сласте́й стремни́ною па́дша мя́, и грехи́ лю́тыми впа́дша в про́пасти, воздви́гни Чи́стая, и к жи́зни наста́ви.

Припев: Поми́луй мя, Бо́же, поми́луй мя.

Утверди́ Го́споди сердца́ на́ша Твои́м Кресто́м, не уклоня́тися от Тебе в словеса́ лука́вая, и в дея́ния скве́рная.

Припев: Поми́луй мя, Бо́же, поми́луй мя.

Стра́сть Твою́ Влады́ко, не́бо и земля́ чу́вствующе, изменя́хуся я́ве, Царя́ все́х Тя́ показу́юще вои́стинну.

Припев: Поми́луй мя, Бо́же, поми́луй мя.

Багря́ней ри́зе Твое́й, гво́здию и Кресту́, гу́бе же и копию́ Иису́се покланя́юся, и воспева́ю оживи́вшаго вся́.

Сла́ва, тро́ичен: Равноче́стная, безнача́льная Всесвята́я Тро́ице, животворя́щая и началосве́тлая Еди́нице, О́тче, и Сы́не, и Ду́ше, спаси́ мя́.

И ныне. Богоро́дичен: Богома́ти безму́жная, ражда́еши еди́на Бо́га, не истли́вши де́вства чистоту́, но пребыва́еши Чи́стая, я́коже была́ еси́ пре́жде рождества́.

Пе́снь 8

Ирмо́с: В пла́мень ко отроко́м евре́йским снизше́дшаго, Бо́жиею си́лою, и я́вльшагося Го́спода, свяще́нницы благослови́те и превозноси́те во вся́ ве́ки.

Припев: Поми́луй мя, Бо́же, поми́луй мя.

Со беззако́нными вмени́тися, за мно́жество ми́лости изво́ливый, моя́ грехи́ загла́ди, я́ко да ве́рою Тя́ сла́влю во вся́ ве́ки.

Припев: Поми́луй мя, Бо́же, поми́луй мя.

Грехо́в мои́х рукописа́ние Твои́м раздери́ копие́м, и се́рдца моего́ боле́зни уврачу́й Го́споди, уя́звленнаго стрела́ми зло́бы лука́вых де́монов.

Припев: Поми́луй мя, Бо́же, поми́луй мя.

Омраче́нное се́рдце мое́ грехо́м, избавле́нием Твои́м омы́й, исте́кшею из ре́бр кро́вию Христе́ мо́й, да Тя́ сла́влю во вся́ ве́ки.

Припев: Пресвята́я Богоро́дице, спаси́ на́с.

Богоро́дичен: Невозде́ланно прозя́бшая небе́сный кла́с, пита́ющаго Боже́ственною си́лою вся́ческая Де́во, насы́ти а́лчущую смире́нную ду́шу мою́.

Припев: Поми́луй мя, Бо́же, поми́луй мя.

Ра́дуйся Кре́сте, и́мже позна́ся еди́ным мгнове́нием разбо́йник богосло́вец, взыва́яй: помяни́ мя́ Го́споди, во Ца́рствии Твое́м, его́же ча́сти о́бщники на́с покажи́.

Припев: Поми́луй мя, Бо́же, поми́луй мя.

Ты́ прободе́н пла́менное ору́жие отвраща́еши Христе́, и челове́ком отверза́еши па́ки ра́й: во́ньже входя́ще, Твоея́ безсме́ртныя жи́зни при́сно наслажда́емся.

Припев: Поми́луй мя, Бо́же, поми́луй мя.

Кре́сте Христо́в упова́ние конце́в, преити́ на́м твои́м окормле́нием ти́хо, пучи́ну до́браго поста́ сподо́би, спаса́я от треволне́ния прегреше́ний.

Слава. Тро́ичен: Со Отце́м Сы́ну поклони́мся, и Ду́ху Свято́му во еди́ном Существе́, немо́лчно зову́ще бре́нными усты́: сла́ва в вы́шних Бо́гу в Тро́ице.

И ныне. Богоро́дичен: Отрокоражда́еши де́вствующи, еди́на Богоблагода́тная, та́инство вели́кое, стра́шное чу́до: Бо́га бо родила́ еси́ воплоще́нна, Спа́са ми́ра.

Пе́снь 9

Ирмо́с: На Сина́йстей горе́ ви́де Тя́ в купине́ Моисе́й, неопа́льно о́гнь Божества́ заче́ншую во чре́ве, Дании́л же Тя́ ви́де го́ру несеко́мую, же́зл прозя́бший, Иса́иа взыва́ше, от ко́рене Дави́дова.

Припев: Поми́луй мя, Бо́же, поми́луй мя.

Пости́вся Елисе́й воскреси́ уме́рша о́трочища, я́коже е́сть пи́сано: и мы́ постя́щеся, плотска́я мудрова́ния умертви́ти ве́рнии потщи́мся, да жи́знь та́мо получи́м.

Припев: Поми́луй мя, Бо́же, поми́луй мя.

Увы́ мне́ душе́, стра́шное суди́лище, и Судиино́ стра́шное изрече́ние! потщи́ся пока́йся, Христу́ примири́ся, тебе́ ра́ди на Кресте́ пове́шенному, и изба́вльшему ве́рныя осужде́ния.

Припев: Поми́луй мя, Бо́же, поми́луй мя.

Покая́ния ми́ две́ри отве́рзи, страсте́й мои́х вхо́ды затвори́, разбо́йнику вхо́д ра́йский благовхо́ден показа́вый Христе́, Твои́м распя́тием, да сла́влю Твою́ бла́гость.

Припев: Пресвята́я Богоро́дице, спаси́ на́с.

Богоро́дичен: Я́ко во глубину́ зло́бы отве́ржен е́смь, и помышле́ньми сопроти́вными обурева́юся, де́моном повину́яся, сластьми́ порабоще́н сы́й: помози́ ми́ Чи́стая Де́во Ма́ти, ко спасе́ния пути́ наставля́ющи мя́.

Припев: Поми́луй мя, Бо́же, поми́луй мя.

Преда́лся еси́ во́лею, и приве́л еси́ Себе́ уби́йцам, суди́лищу предста́л еси́ бие́мь, от ру́к я́же созда́л еси́: ра́спят бы́л еси́ и пору́ган, прободе́н бы́л еси́ Го́споди, пострада́л еси́ пло́тию, вся́ претерпе́в ми́лостивно, да спасе́ши ны́.

Припев: Поми́луй мя, Бо́же, поми́луй мя.

А́нгельстии собо́ри вострепета́ша, ви́дяще Тя́ на Кресте́, свети́ла све́т скры́ша, и тряса́шеся земля́, колеба́хуся вся́ досажде́нием Твои́м Го́споди, Боже́ственными Твои́ми страстьми́ соде́лал еси́ на́м Бо́же спасе́ние.

Припев: Поми́луй мя, Бо́же, поми́луй мя.

Твое́ю я́звою вси́ исцели́хомся от страсте́й грехо́в: на Кресте́ бо взя́т бы́в, острупи́л еси́ началозло́бника врага́: но неосужде́нны на́с сподо́би, и Воскре́сние дости́гнути, соверши́вшыя по́стное вре́мя.

Сла́ва, тро́ичен: Существо́м Еди́ница е́сть несеко́ма, Пребоже́ственная Тро́ице, соединя́ема Естество́м, дели́тся Ли́цы сво́йственно: несеко́ма бо сече́тся, еди́но су́щи трои́тся: Сия́ Оте́ц е́сть, Сы́н, и Ду́х Живы́й, соблюда́ющая все́.

И ныне, Богоро́дичен: Деторо́дную де́ву кто́ слы́ша, и ма́терь без му́жа; Мари́е соверша́еши чу́до: но скажи́ ми, ка́ко; не испыту́й глуби́н деторо́дия: сие́ всеи́стинно, па́че челове́ческаго ума́ постиже́ние.

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)

Таже малых 12, глаголюще на кийждо поклон: Бо́же, очи́сти мя гре́шнаго.

И паки последи молитву всю:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.

Песнопения Великого Поста, каноны трипеснцы