Канон Недели, в нюже чтется священное и святое Евангелие, притчи Мытаря и фарисея

Канон Триоди, глас 6:

Песнь 1.

Ирмос: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.

При́тчами вводя́й вся Христо́с, / к жития́ исправле́нию, / мытаря́ возвыша́ет от смире́ния, / показа́в фарисе́я возвыше́нием смиря́ема.

От смире́ния честь высокотворя́щую, / от возноше́ния же паде́ние ви́дя лю́тое, / мытаре́вым ревну́й до́брым, / и фарисе́йскую зло́бу возненави́ждь.

От возноше́ния испражня́ется вся́кое благо́е, / от смире́ния же потребля́ется вся́кое зло́е: / е́же облобыза́им ве́рнии, / гнуша́ющеся я́ве о́браза тщесла́внаго.

Смиренному́дрым бы́ти Свои́м ученико́м хотя́ всех Царь, / наказу́я уча́ше ревнова́ти / мытаре́ву воздыха́нию и смире́нию.

Слава: Я́ко мыта́рь стеню́, и рыда́ньми немо́лчными Го́споди, / ны́не прихожду́ Твоему́ благоутро́бию: / уще́дри и мене́, смире́нием жизнь ны́не препровожда́юща.

И ныне, Богородичен: Ра́зум, сове́т, ча́яние, / те́ло, ду́шу и дух, Влады́чице, возлага́ю к Тебе́: / лю́тых враг и напа́стей, / и бу́дущаго преще́ния изба́ви, и спаси́ мя.

Песнь 3.

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

От гно́ища у́бо страсте́й смире́нный возноша́ется, / от высоты́ же доброде́телей низпа́дает лю́те всяк высокосе́рдый: / его́же о́браза зло́бы убежи́м.

Тщесла́вие оттщетева́ет бога́тство пра́вды, / смире́ние же расточа́ет страсте́й мно́жество: / е́же подража́ющия ны, ча́сти покажи́ мытаре́вы Спа́се.

Я́ко мыта́рь и мы бию́щеся в пе́рси, умиле́нием вопие́м: / очи́сти Бо́же нас, гре́шных, / я́ко да сего́ прии́мем оставле́ние.

К ре́вности прии́дем ве́рнии, исправля́юще кро́ткое, / смире́нию соживу́ще в стена́нии се́рдца, пла́че же и моли́тве, / я́ко да и́мамы от Бо́га проще́ние.

Слава: Отри́нем ве́рнии высокохва́льную горды́ню, / возноше́ние же лю́тое, и дме́ние ме́рзкое, / и зле́йшее фарисе́ево Бо́гу неле́пое свире́пство.

И ныне, Богородичен: В Тебе́ еди́ном прибе́жищи наде́явся, / да не отпаду́ до́браго ча́яния: / но да улучу́ Твою́ по́мощь Чи́стая, / вся́каго вре́да лю́тых избавля́емый.

Седальны, глас 4.

Смире́ние вознесе́ одержи́маго злы́ми, мытаря́ возстена́вша, / и е́же очи́сти, к Зижди́телю воззва́вша: / возноше́ние же низложи́ от пра́вды / окая́ннаго фарисе́я велере́чующа. / Те́мже поревну́им до́брым, злых отступа́юще.

Слава: Смире́ние дре́вле вознесе́ мытаря́, / пла́чем возопи́вша: очи́сти, и оправди́ся. / Того́ подража́им вси, во глубину́ зол впа́дшии, / возопии́м Спа́су из глубины́ се́рдца: / согреши́хом, очи́сти еди́не Человеколю́бче.

И ныне, Богородичен: Ско́ро приими́ Влады́чице, моле́ния на́ша, / и сия́ принеси́ Твоему́ Сы́ну и Бо́гу, Госпоже́ Всенепоро́чная: / разреши́ обстоя́ния к Тебе́ притека́ющих, / сокруши́ ко́зни, и низложи́ де́рзость вооружа́ющихся безбо́жно / на рабы́ Твоя́, Пречи́стая.

Песнь 4.

Ирмос: Христо́с моя́ си́ла, / Бог и Госпо́дь, / честна́я Це́рковь / боголе́пно пое́т, взыва́ющи, / от смы́сла чи́ста, о Го́споде пра́зднующи.

Изря́дный показа́ путь возноше́ния, смире́ние, / Сло́во смири́вшееся да́же и до зра́ка ра́бия: / Его́же подража́я вся́кий, возноша́ется смиря́яся.

Вознесе́ся пра́ведник, и низпаде́ фарисе́й: / во мно́жестве же зол отягча́емый смири́ся, / но вознесе́ся мыта́рь, ненаде́жно оправда́емый.

Нищеты́ хода́тай, от бога́тства доброде́телей, безу́мие яви́ся: / и бога́тство а́бие смире́ние оправда́ния от кра́йния нищеты́, / ю́же стя́жим.

Предре́кл еси́ Влады́ко, велему́дрствующим противоста́ти вся́чески, / и смире́нным благода́ть Твою́ подая́ Спа́се, / смири́вшимся ны́не нам Твою́ благода́ть низпосли́.

Слава: К Боже́ственному возноше́нию при́сно возводя́ нас Спас и Влады́ка, / высокотво́рное показа́ смире́ние: / но́ги бо ученико́м Свои́ма рука́ма обмы́.

И ныне, Богородичен: Я́ко Свет непристу́пный Де́во ро́ждшая, / души́ моея́ тьму свети́тельною заре́ю разжени́, / и к стезя́м спасе́ния житие́ мое́ руково́дствуй.

Песнь 5.

Ирмос: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Фарисе́евы доброде́тели потщи́мся подража́ти, / и поревнова́ти мытаре́ву смире́нию, / во обою́ ненави́дяще безме́стное мне́ние, / и па́губу паде́ний.

Пра́вды тече́ние тще́тное обличи́ся, / сопря́г в нем фарисе́й мне́ние: / а́бие же мыта́рь высокотво́рною доброде́телию / стяжа́ спу́тника, смире́ние.

Колесни́чник в доброде́телех, мня́шеся тещи́ фарисе́й: / но пе́ший, па́че лиди́йския колесни́цы теки́й, мыта́рь до́бре предвари́, / припря́г щедро́те смире́ние.

Мытаре́ву при́тчу вси уразуме́вше умо́м, / прииди́те поревну́им слеза́м, / дух сокруше́нный Бо́гу принося́ще, / грехо́в и́щуще оставле́ния.

Слава: Возносли́вый и зло́бный, гордели́вый же и де́рзый / дале́че отри́нем разу́мнии фарисе́ев нрав, лю́тый велехва́льный, / я́ко да не обнажи́мся Боже́ственныя благода́ти.

И ныне, Богородичен: Жезл си́лы Блага́я, всем низпосли́ нам к Тебе́ прибега́ющим, / облада́ти посреде́ всех враг подаю́щи, / и вся́каго вре́да изыма́ющи.

Песнь 6.

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Жития́ по́прище мыта́рь вку́пе и фарисе́й теча́ста: / но ов у́бо высокоу́мием содержи́мь, сра́мне утону́, / ов же смире́нием спасе́ся.

Жития́ бе́дное премину́юще мы тече́ние, / подража́им мытаре́во у́бо мудрова́ние ревни́тельно: / бежи́м же киче́ния ме́рзкаго фарисе́я, и жи́ви бу́дем.

Нра́вом поревну́им Спа́са Иису́са, и Его́ смире́нию, / жела́юще непреста́нное ра́дости селе́ние получи́ти, / во стране́ живу́щих водворя́ющеся.

Показа́л еси́ Влады́ко, Твои́м ученико́м высокотво́рное смире́ние, / ле́нтием препоя́сан по чре́слом, но́зе умы́л еси́, / и сему́ о́бразу подража́ти повеле́л еси́.

Слава: Житие́ проидо́ста фарисе́й доброде́тельми, и мыта́рь прегреше́ньми. / Но ов у́бо от го́рдости умовре́дныя, отступи́ смире́ния: / ов же возноша́ется, смиренному́др я́влься.

И ныне, Богородичен: На́га простото́ю, нехи́тростною же жи́знию созда́на, / преступле́ния ле́стию оде́я мя враг, и пло́ти дебельство́м: / ны́не же Твои́м хода́тайством Отрокови́це, спаса́юся.

Кондак, глас 4.

Фарисе́ева убежи́м высокоглаго́лания, / и мытаре́ве научи́мся высоте́ глаго́л смире́нных, / покая́нием взыва́юще: / Спа́се ми́ра, / очи́сти рабы́ Твоя́.

Вторый кондак, глас 3.

Воздыха́ния принесе́м мыта́рская Го́сподеви, / и к Нему́ присту́пим гре́шнии я́ко Влады́це: / хо́щет бо спасе́ния всех челове́ков, / оставле́ние подае́т всем ка́ющимся. / Нас бо ра́ди воплоти́ся, / Бог сый Отцу́ собезнача́льный.

Икос:

Са́ми себе́ бра́тие вси смири́м воздыха́ньми, / рыда́ньми побие́м со́весть: / да в суде́ тогда́ ве́чном та́мо яви́мся ве́рнии, / непови́нни, получи́вше оставле́ние. / Та́мо бо есть вои́стинну ослабле́ние, / е́же ви́дети нам ны́не умо́лим: / та́мо боле́знь отбеже́, печа́ль и из глубины́ воздыха́ния, / во Еде́ме ди́внем, его́же Христо́с Зижди́тель, / Бог сый Отцу́ собезнача́льный.

Песнь 7.

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: / благослове́н еси́, Бо́же оте́ц на́ших.

Оправда́ния де́лы возвыша́емый, / сетьми́ тщесла́вия лю́те превознесе́ся фарисе́й, безме́рно хваля́ся: / мыта́рь же ле́гким крило́м смире́ния возне́сся, Бо́гу прибли́жися.

Смире́ния а́ки ле́ствицею употреби́вся о́бразом мыта́рь, / к небе́сней высоте́ возвы́сися: / горды́нею же гнило́ю и безу́мием окая́нный возне́сся фарисе́й, / сни́де до а́да преиспо́дняго.

Пра́ведных ловя́ у́бо лука́вый, / образми́ тщесла́вия кра́дет: / гре́шных же сетьми́ отча́яния связу́ет. / Но у́бо от обои́х зол мытаря́ ревни́телие, изба́витися потщи́мся.

Моли́твою Бо́гу на́шему припаде́м, / слеза́ми и те́плыми воздыха́нии, / подража́юще мытаре́во высокотво́рное смире́ние, пою́ще ве́рнии: / благослове́н еси́ Бо́же оте́ц на́ших.

Слава: Наказу́яй ученики́ предглаго́лал еси́ Влады́ко, не му́дрствовати высо́кая, / совводи́тися же смире́нным уча́ Спа́се. / Те́мже зове́м Тебе́ ве́рнии: / благослове́н еси́ Бо́же оте́ц на́ших.

И ныне, Богородичен: Иа́ковлю Тя добро́ту, и Боже́ственную ле́ствицу, / от до́лу ю́же ви́де пе́рвее, просте́ртую к высоте́, / ве́мы Чи́стая, низводя́щую свы́ше Бо́га воплоще́нна, / и земны́я па́ки возводя́щую.

Песнь 8.

Ирмос: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Смиренному́дренным нра́вом / ми́лостива Го́спода мыта́рь воздохну́в обре́те, и спасе́н бысть: / о́бразом же лю́тым язы́ка велере́чиваго, / пра́вды отпаде́ фарисе́й.

Фарисе́ева киче́ния произволе́ния, / и именова́ния чистоты́, бежи́м ве́рнии: / ревну́юще мытаре́ву до́бре / поми́лованному смире́нию и нра́ву.

Гла́сы мытаре́вы ве́рнии веща́им в це́ркви святе́й: / Бо́же очи́сти, да с ним улучи́м проще́ние, / па́губы велехва́льнаго изба́вльшеся фарисе́я.

Воздыха́нию мытаре́ву вси поревну́им, / и Бо́гу бесе́дующе, те́плыми сле́зами возопии́м Ему́: / Человеколю́бче, согреши́хом, / благоутро́бне Ще́дрый, очи́сти и спаси́.

Благослови́м Отца́ и Сы́на и Свята́го Ду́ха, Го́спода.

Стена́нием мытаре́вым Бог преклони́ся, оправди́в же сего́, / всем показа́ преклоня́тися при́сно, воздыха́ньми же и слеза́ми, / прегреше́ний прося́ще разреше́ние.

И ны́не и при́сно и во ве́ки веко́в, ами́нь.

Богородичен: Не вем па́че Тебе́ ино́го заступле́ния, / Тя предлага́ю моли́твенницу, Чи́стая Всенепоро́чная. / Тя ко из Тебе́ рожде́нному хода́таицу дви́жу: / всех оскорбля́ющих мя свобо́дна покажи́.

Песнь 9.

Ирмос: Бо́га / челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю бо, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и Тя ублажа́ем.

Путь возноше́ния смире́ние, / от Христа́ взе́мше спасе́ния о́браз, / мытаре́ву обы́чаю поревну́им, / киче́ние возноше́ния дале́че отмета́юще, / нра́вом же смиренному́дрия Бо́га умоля́юще.

Душе́вную горды́ню отве́ржим, / нрав пра́вый смиренному́дрия стя́жим, / себе́ оправда́ти не тщи́мся, / тщесла́вия киче́ние возненави́дим, / и с мытаре́м Бо́га умо́лим.

Моли́твы Соде́телю ми́лости принесе́м мыта́рския, / фарисе́йских отвраща́ющеся неблагода́рных моли́тв, и велехва́льных гласо́в, / и́же на бли́жняго суд возво́дят, / да Бо́га ми́лостива и свет привлече́м.

Мно́гим прегреше́ний собра́нием отягче́н, / изоби́лием зло́бы мытаря́ преидо́х, / и фарисе́ево велехва́льное киче́ние притяжа́х, / отвсю́ду пуст всех быв благи́х: / Го́споди, пощади́ мя.

Твоего́ сподо́би блаже́нства, / Тебе́ ра́ди ду́хом ни́щих су́щих: / уче́нием бо Твоего́ повеле́ния, / дух сокруше́нный Тебе́ прино́сим, Спа́се, / прие́м, спаси́ Тебе́ служа́щия.

Слава: Бо́гу мыта́рь не́когда помоли́выйся, / в це́рковь ве́рне вшед, оправда́ся: / воздыха́ньми бо и слеза́ми прише́д, сокруше́нием же се́рдца: / все отложи́ грехо́в бре́мя очище́ньми.

И ныне, Богородичен: Пе́ти, сла́вити, и блажи́ти Тя дава́й нам, / досто́йно чту́щим Тя Пречи́стая, / и Рождество́ Твое́ велича́ющим, еди́на благослове́нная: / Ты бо еси́ похвала́ христиа́ном, / и к Бо́гу моли́твенница благоприя́тная.

Ексапостиларий Триоди, глас 1.

Высокоре́чия убежи́м фарисе́ева зле́йшаго, / смире́нию же навы́кнем мытаре́ву изря́днейшему, / да вознесе́мся вопию́ще к Бо́гу со о́нем: / очи́сти рабы́ Твоя́, / роди́выйся от Де́вы Христе́ Спа́се во́лею, / и Крест претерпе́вый, / совоздви́гнувый мир Твои́м Боже́ственным могу́тством.

Слава: И ныне, Богородичен: Творе́ц созда́ния, и Бог всех, / плоть челове́ческую прия́т из непоро́чныя утро́бы Твоея́, / Всепе́тая Богоро́дице: / и тле́нное мое́ естество́ все обнови́, / па́ки я́коже пре́жде рождества́ оста́вль по рождестве́. / Отону́дуже Тя ве́рою вси восхваля́юще зове́м: / ра́дуйся ми́ру сла́во.