Тропари, кондаки и величания общие святым

Всемилостивому Спасу

Тропарь, глас 8:

С вы́шних призира́я, убо́гия прие́мля, / посети́ нас, озло́бленныя грехи́, Влады́ко Всеми́лостиве, / моли́твами Богоро́дицы да́руй душа́м на́шим ве́лию ми́лость.

Кондак, глас 6:

Вся́кия скве́рны, Всеми́лостивый Спа́се, аз бых де́латель / и во отча́яния ров впа́дся, / но стеню́ от се́рдца и вопию́ к Тебе́, Сло́ве, / ускори́, Ще́дрый, и потщи́ся на по́мощь на́шу, / я́ко ми́лостив.

В праздники Богородичные

Тропарь, глас 4-й

К Богоро́дице приле́жно ны́не притеце́м, гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́, на ны милосе́рдовавши, потщи́ся, погиба́ем от мно́жества прегреше́ний, не отврати́ Твоя́ рабы́ тщи, Тя бо еди́ну наде́жду и́мамы.

Другой тропарь, глас тот же

Не умолчи́м никогда́, Богоро́дице, си́лы Твоя́ глаго́лати недосто́йнии, а́ще бо Ты не бы предстоя́ла моля́щи, кто бы нас изба́вил от толи́ких бед? Кто же бы сохрани́л доны́не свобо́дны? Не отсту́пим, Влады́чице, от Тебе́, Твоя́ бо рабы́ спаса́еши при́сно от вся́ких лю́тых.

Кондак, глас 6-й

Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щих Ти; ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.

Другой кондак, глас 6-й

Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты нам помози́, на Тебе́ наде́емся и Тобо́ю хва́лимся, Твои́ бо есмы́ рабы́, да не постыди́мся.

Величание

Велича́ем Тя, Пресвята́я Де́во, Богоизбра́нная Отрокови́це, и чтим о́браз Твой святы́й, и́мже то́чиши исцеле́ния всем, с ве́рою притека́ющим.

Небесным силам бесплотным

Тропарь, глас 4-й

Небе́сных во́инств Архистрати́зи, мо́лим вас при́сно мы недосто́йнии, да ва́шими моли́твами оградите́ нас кро́вом крил невеще́ственныя ва́шея сла́вы, сохраня́юще нас, припа́дающих приле́жно и вопию́щих: от бед изба́вите нас, я́ко чинонача́льницы Вы́шних сил.

Кондак, глас 2-й

Архистрати́зи Бо́жии, служи́телие Боже́ственныя сла́вы, А́нгелов нача́льницы и челове́ков наста́вницы, поле́зное нам проси́те и ве́лию ми́лость, я́ко безпло́тных Архистрати́зи.

Величание

Велича́ем вас, Арха́нгели и А́нгели и вся во́инства, Херуви́ми и Серафи́ми, сла́вящия Го́спода.

Пророку

Тропарь, глас 2-й

Проро́ка Твоего́ (имярек) па́мять, Го́споди, пра́зднующе, тем Тя мо́лим, спаси́ ду́ши на́ша.

Кондак, глас 4-й

Просвети́вшееся Ду́хом чи́стое твое́ се́рдце проро́чества бысть светлейшаго прия́телище: зри́ши бо, я́ко настоя́щая, дале́че су́щая; сего́ ра́ди тя почита́ем, проро́че блаже́нне (имярек), сла́вне.

Величание

Велича́ем тя, святы́й проро́че Бо́жий (имярек), и чтим святу́ю па́мять твою́, ты бо мо́лиши за нас Христа́ Бо́га на́шего.

Апостолу

Тропарь, глас 3-й

Апо́столе святы́й (имярек), моли́ ми́лостиваго Бо́га, да прегреше́ний оставле́ние пода́ст душа́м на́шим.

Кондак, глас 4-й

Я́ко звезду́ пресве́тлую Це́рковь всегда́ стяжа́ тя, апо́столе (имярек), чуде́с твои́х многоподава́нием просвеща́ема. Те́мже зове́м Христу́: спаси́ чту́щих ве́рою па́мять Твоего́ апо́стола, Многоми́лостиве.

Величание

Велича́ем тя, апо́столе Христо́в (имярек), и чтим боле́зни и труды́ твоя́, и́миже труди́лся еси́ во благове́стии Христо́ве.

Апостолам

Тропарь, глас 3-й

Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шим.

Кондак, глас 4-й

Ло́зие яви́стеся Христо́ва виногра́да му́дрии, гро́здие принося́ще в доброде́телех, вино́ нам спасе́ния источа́юще: его́же прие́млем, весе́лия исполня́ющеся. Пра́зднуем честну́ю ва́шу па́мять, в ню́же молите дарова́тися нам вели́цей ми́лости и отпуще́нию грехо́в, Госпо́дни апо́столи.

Святителю

Тропарь, глас 4-й

Пра́вило ве́ры и о́браз кро́тости, воздержа́ния учителя, яви тя стаду твоему Яже веще́й истина; сего ради стяжа́л еси́ смирением высо́кая, нищетою бога́тая, о́тче священнонача́льниче (имярек), моли Христа́ Бо́га спастися душа́м на́шим.

Кондак, глас 2-й

Боже́ственный гром, труба́ духо́вная, ве́ры насади́телю и отсека́телю ересе́й, Тро́ицы уго́дниче, вели́кий святи́телю (имярек), со А́нгелы предстоя́ при́сно, моли́ непреста́нно о всех нас.

Величание

Велича́ем тя, святи́телю о́тче (имярек), и чтим святу́ю па́мять твою́, ты бо мо́лиши за нас Христа́ Бо́га на́шего.

Святителям

Тропарь, глас 4-й

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от нас, но моли́твами их в ми́ре упра́ви живо́т наш.

Кондак, глас 8-й

Я́ко доброде́телей учи́телие и иера́рхов украше́ние, Це́рковь, пою́щи, вас сла́вит: моли́твами ва́шими пода́йте чту́щим вас любо́вию доброде́телей исправле́ние и собла́знов избавле́ние, я́ко непобеди́мии.

Мученику

Тропарь, глас 4-й

Му́ченик Твой, Го́споди, (имярек), во страда́нии свое́м вене́ц прия́т нетле́нный от Тебе́, Бо́га на́шего; име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того моли́твами спаси ду́ши на́ша.

Кондак, глас 2-й

Звезда́ све́тлая яви́лся еси́ непреле́стная ми́рови, Со́лнца Христа́ возвеща́я заря́ми твои́ми, страстоте́рпче (имярек), и пре́лесть погаси́л еси́ всю, нам же подае́ши свет, моля́ся непреста́нно о всех нас.

Величание

Велича́ем тя, страстоте́рпче святы́й (имярек), и чтим честна́я страда́ния твоя́, я́же за Христа́ претерпе́л еси́.

Мученице

Тропарь, глас 4-й

А́гница Твоя́, Иису́се, (имярек), зове́т ве́лиим гла́сом: Тебе́, Женише́ мой, люблю́, и Тебе́ и́щущи, страда́льчествую и сраспина́юся и спогреба́юся Креще́нию Твое́му и стражду́ Тебе́ ра́ди, я́ко да ца́рствую в Тебе́ и умира́ю за Тя, да и живу́ с Тобо́ю; но я́ко же́ртву непоро́чную приими́ мя, с любо́вию поже́ршуюся Тебе́. Тоя́ моли́твами, я́ко Ми́лостив, спаси́ ду́ши на́ша.

Кондак, глас 2-й

Храм твой всечестны́й, я́ко цельбу́ душе́вную обре́тше, вси ве́рнии велегла́сно вопие́м ти: де́во му́ченице (имярек) великоимени́тая, Христа́ Бо́га моли́ непреста́нно о всех нас.

Величание

Велича́ем тя, страстоте́рпице Христо́ва (имярек), и чтим честно́е страда́ние твое́, е́же за Христа́ претерпе́ла еси́.

Мученикам

Тропарь, глас 4-й

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: имуще бо кре́пость Твою́, мучи́телей низложи́ша, сокруши́ша и де́монов немощны́я де́рзости; тех моли́твами спаси́ ду́ши на́ша.

Кондак, глас 2-й

Свети́льницы све́тлии я́вльшеся, Боже́ственнии му́ченицы, тварь всю све́тлостию чуде́с озаря́ете, неду́ги разреша́юще и глубо́кую тьму всегда́ отгоня́юще, Христу́ Бо́гу моля́щеся непреста́нно о всех нас.

Священномученику

Тропарь, глас 4-й

И нра́вом прича́стник, и престо́лом наме́стник апо́столом быв, дея́ние обрел еси́, Богодухнове́нне, в виде́ния восхо́д: сего́ ра́ди, сло́во и́стины исправля́я, и ве́ры ра́ди пострада́л еси́ да́же до кро́ве. Священному́чениче (имярек), моли́ Христа́ Бо́га спасти́ся душа́м на́шим.

Кондак, глас тот же

Во святи́телех благоче́стно пожи́в и муче́ния путь проше́д, и́дольския угаси́л еси́ же́ртвы, и побо́рник быв твое́му ста́ду, богом́удре. Те́мже тя почита́юще, та́йно вопие́м ти: от бед изба́ви ны при́сно твои́ми мольба́ми, о́тче наш (имярек).

Священномученикам

Тропарь, глас 4-й

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от нас, но моли́твами их в ми́ре упра́ви живо́т наш.

Кондак, глас 3-й

Я́ко свети́льники незаходи́мыя разу́мнаго Со́лнца, соше́дшеся днесь восхва́лим пе́сньми: возсия́ли бо есте́ су́щим во тьме неразу́мия, всех созыва́юще к высоте́ благоче́стия, священному́ченицы. Тем вопие́м вам: ра́дуйтеся, по́стников всех основа́ние.

Преподобному

Тропарь, глас 4-й

В тебе́, о́тче, изве́стно спасе́ся е́же по о́бразу: прии́м бо крест, после́довал еси́ Христу́, и де́я учи́л еси́ презира́ти у́бо плоть, прехо́дит бо, прилежа́ти же о души́, ве́щи безсме́ртней; те́мже и со А́нгелы сра́дуется, преподо́бне (имярек), дух твой.

Кондак, глас 2-й

Чистото́ю душе́вною боже́ственне вооружи́вся и непреста́нныя моли́твы, я́ко копие́, вручи́в кре́пко, пробо́л еси́ бесо́вская ополче́ния, (имярек) о́тче наш, моли́ непреста́нно о всех нас.

Величание

Ублажа́ем тя, преподо́бне о́тче (имярек), и чтим святу́ю па́мять твою́, наста́вниче мона́хов и собесе́дниче А́нгелов.

Преподобной

Тропарь, глас 4-й

В тебе́, ма́ти, изве́стно спасе́ся е́же по о́бразу: прии́мши бо крест, после́довала еси́ Христу́ и де́ющи учи́ла еси́ презира́ти у́бо плоть, прехо́дит бо, прилежа́ти же о души́, ве́щи безсме́ртней; те́мже и со А́нгелы сра́дуется, преподо́бная (имярек), дух твой.

Кондак, глас 2-й

За любо́вь Госпо́дню, преподо́бная, поко́я жела́ние возненави́дела еси́, поще́нием дух твой просвети́вши: кре́пко бо звери победи́ла еси́; но моли́твами твои́ми проти́вных шата́ние разори́.

Величание

Ублажа́ем тя, преподо́бная ма́ти (имярек), и чтим святу́ю па́мять твою́: ты бо мо́лиши за нас Христа́ Бо́га на́шего.

Преподобным

Тропарь, глас 4-й

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от нас, но моли́твами их в ми́ре упра́ви живо́т наш.

Кондак, глас 2-й

Волне́ний мно́жество невла́жно проходя́ще, безпло́тныя враги́ струя́ми слез ва́ших кре́пко погрузи́ли есте́, богому́дрии и преподо́бнии, и чуде́с дар прии́мше, моли́те непреста́нно о всех нас.

Бессребреникам

Тропарь, глас 8-й

Святии безсре́бреницы и чудотворцы, посети́те не́мощи на́ша: ту́не прия́сте, ту́не дади́те нам.

Кондак, глас 2-й

Благодать прии́мше исцеле́ний, простира́ете здравие су́щим в ну́ждах, вра́чеве, чудотво́рцы пресла́внии; но вашим посеще́нием ра́тников де́рзости низложи́те, мир исцеля́юще чудесы́.

Величание

Величаем вас, чудотворцы сла́внии (имена их), и чтим честная страдания ваша, яже за Христа претерпе́ли есте́.

Христа ради юродивому

Тропарь, глас 1-й

Глас апостола Твоего Павла услы́шав, глаго́лющ: мы юро́ди Христа́ ради, раб Твой, Христе Боже (имярек), юро́д бысть на земли́ Тебе́ ра́ди; темже память его почита́юще, Тебе молим, Господи, спаси души наша.

Кондак, глас 8-й

Вы́шния красоты́ жела́я, и ни́жния сла́сти теле́сныя то́щно оста́вил еси́, нестяжа́нием су́етнаго ми́ра Ангельское житие преходя́, сконча́вся, (имярек) блаже́нне; с ни́миже Христа Бога моли непреста́нно о всех нас.

Величание

Ублажа́ем тя, святы́й пра́ведный (имярек), и чтим святую память твою: ты бо молиши за нас Христа Бога нашего.