9 января.

Канон апостолу, первомученику и архидиакону Стефану.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь свята́го, гла́с 4:

По́двигом до́брым подвиза́лся еси́, первому́чениче Христо́в, и апо́столе, и мучи́телей обличи́л еси́ нече́стие: ка́мением бо побие́н от ру́к беззако́нных, вене́ц от я́же свы́ше десни́цы прия́л еси́ и к Бо́гу взыва́л еси́, вопия́: Го́споди, не поста́ви и́м греха́ сего́.

Тропа́рь свята́го, гла́с 4:

Ца́рским венце́м венча́ся тво́й ве́рх от страда́ний, я́же претерпе́л еси́ по Христе́ Бо́зе, му́чеников первострада́льче Стефа́не: ты́ бо иуде́йское обличи́в неи́стовство, ви́дел еси́ твоего́ Спа́са одесну́ю Отца́, Того́ у́бо моли́ о душа́х на́ших.

Велича́ние:

Велича́ем тя́, святы́й первому́чениче и архидиа́коне Стефа́не, и чте́м честна́я страда́ния твоя́, я́же за Христа́ претерпе́л еси́.

Стихи́ра, гла́с 6:

Пе́рвый в му́ченицех показа́лся еси́ и в диа́конех, Стефа́не апо́столе, страда́льцев удобре́ние, ве́рных утвержде́ние, сла́ва пра́ведных. Честну́ю твою́ па́мять пра́зднующим проси́, я́ко предстоя́ престо́лу Христа́ Всецаря́, прегреше́ний очище́ния и Ца́рствия небе́снаго сподо́битися.

Кано́н апо́стола, гла́с 5.

Пе́снь 1.

Ирмос: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Припев: Святый первомучениче и архидиаконе Стефане, моли Бога о нас.

Гряди́те, венцы́ пе́сней первому́ченика Христо́ва Це́ркви сла́вно венча́им и, Боже́ственною венча́еми Стефа́новою благода́тию, побе́дную пе́снь воспои́м.

Припев: Святый первомучениче и архидиаконе Стефане, моли Бога о нас.

Нося́ Учи́телев кро́ткий смы́сл и е́же от любве́ боготво́рное смире́ние, досто́йно, Стефа́не, диа́конов старе́йшина и предста́тель вдови́цам бы́л еси́.

Сла́ва Отцу́ и Сы́ну и Свято́му Ду́ху:

Ты́ на по́мощь апо́столов Христо́вых досто́йно призва́лся еси́ и я́ко ве́рен диа́кон, тезоимени́те Стефа́не, бы́л еси́, иде́же Христо́с, кро́вию преше́л еси́.

И ны́не и при́сно и во ве́ки веко́в. Ами́нь.

Богородичен: Ты́ у́бо за челове́ки, Христе́, челове́ка от Де́вы поне́с я́ко Младе́нец пови́тся, Тво́й же посы́пан первому́ченик ка́меней мета́нии, челове́ка совлачи́тся.

Пе́снь 3.

Ирмос: Водрузи́вый на ничесо́мже зе́млю повеле́нием Твои́м, и пове́сивши неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Припев: Святый первомучениче и архидиаконе Стефане, моли Бога о нас.

Зако́нно, я́ко Христо́в во́ин, Стефа́н, к богоуби́йцам ополчи́вся, в непобеди́мую Его́ си́лу оде́ян, пребеззако́нных обличи́ все́ лука́вное противле́ние.

Припев: Святый первомучениче и архидиаконе Стефане, моли Бога о нас.

Ре́вностию Христо́вы разже́гся любве́ и к подвиго́м совле́кся, ве́ры и Ду́ха испо́лнився Боже́ственнаго, первому́ченик, ры́барей извести́л еси́ все́м богосу́дную про́поведь.

Сла́ва Отцу́ и Сы́ну и Свято́му Ду́ху:

Яко пропове́дник сокрове́нныя вои́стинну и боже́ственныя жи́зни, настоя́щую я́коже забы́в, де́лом показа́ я́ве все́м первому́ченик победоно́сную и́стину, Влады́ко, произво́лив сме́рть.

И ны́не и при́сно и во ве́ки веко́в. Ами́нь.

Богородичен: В жите́йский на́с ра́ди Влады́ка верте́п вни́де о́бразом низхожде́ния; му́чеников же нача́льник Стефа́н от тя́жести челове́ческия исхо́дит, любо́вию Влады́чнею побежда́емь.

Седа́лен апо́стола, гла́с 1.

Апо́столе Христо́в, диа́конов пе́рвый, первому́чениче му́дре, му́чеников ве́рх, ми́ра концы́ освяти́в страда́нии твои́ми, и чудесы́ ду́ши челове́ков просвети́л еси́. Чту́щия тя́ изба́ви вся́ческих бе́д, всехва́льне Стефа́не.

Сла́ва, и ны́не, гла́с 3:

Рождество́ безсе́менное смотря́ющи, Всенепоро́чная, дивя́щися, из Нея́ Рожде́нному веща́ше: а́ще и зра́ком челове́ческим обложи́лся еси́, но Бо́га Тя́ пропове́дуют ве́щи, Ча́до Безнача́льное Безнача́льнаго Отца́, Собезнача́льне, все́м подая́й ве́лию ми́лость.

Пе́снь 4.

Ирмос: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Припев: Святый первомучениче и архидиаконе Стефане, моли Бога о нас.

Поревнова́в Ангельскому усе́рдию и зра́ком Ангельским све́тло украси́вся, зри́ши сла́ву Боже́ственную и сея́ озаре́ние.

Припев: Святый первомучениче и архидиаконе Стефане, моли Бога о нас.

Клеветни́к, судия́ же и мучи́тель, человекоуби́йца и оте́ц лжи́ явля́ется, Стефа́не, но себе́ побежда́ет, се́ти на ся́ простира́я.

Сла́ва Отцу́ и Сы́ну и Свято́му Ду́ху:

Яко пе́рвый му́чеников Стефа́н, путесотвори́в же на́м муче́ния вхо́д, венцено́сец лику́ет, венце́м му́ченическим венча́емь.

И ны́не и при́сно и во ве́ки веко́в. Ами́нь.

Богородичен: Просия́в от Де́вы, я́ко со́лнце, совозсия́вшу, Христе́, я́ко денни́цу, сла́вную первому́ченика па́мять Свое́ю украша́еши све́тлостию.

Пе́снь 5

Ирмос: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Припев: Святый первомучениче и архидиаконе Стефане, моли Бога о нас.

Облиста́, я́ко Ангел, первому́ченик Тво́й, небе́сных круго́в, Христе́, бы́в превы́шше и сла́вы неизглаго́ланныя Твоея́ насы́щся, Человеколю́бче.

Припев: Святый первомучениче и архидиаконе Стефане, моли Бога о нас.

Богоглаго́ливых у́ст одожде́нии низложи́ скверноуби́йцы первому́ченик, от ни́хже безчи́сленными ка́меней одожде́ньми я́ко победи́тель венча́ся.

Сла́ва Отцу́ и Сы́ну и Свято́му Ду́ху:

Яко непобеди́мо первому́ченика боже́ственныя ре́вности дерзнове́ние, и́бо да́же до кро́ве к богоуби́йцам му́жески ополчи́ся.

И ны́не и при́сно и во ве́ки веко́в. Ами́нь.

Богородичен: Прише́дшаго от Неискусому́жныя Ма́тере, первому́ченик, в недви́жимем Отца́ Божестве́ и сла́ве, стоя́ща на небесе́х, ви́де.

Пе́снь 6.

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя, я́ко Благоутро́бен.

Припев: Святый первомучениче и архидиаконе Стефане, моли Бога о нас.

Сла́вный чинонача́льник му́чеников Стефа́н, ве́рнии зако́ны естества́ благода́тию преше́д, Боже́ственною сла́вою озаря́ется.

Припев: Святый первомучениче и архидиаконе Стефане, моли Бога о нас.

Подо́бник всеизря́днейший бы́в, Влады́ко Христе́, честны́я стра́сти Твоея́, Стефа́н уби́йцам благослове́нием отмща́ет.

Сла́ва Отцу́ и Сы́ну и Свято́му Ду́ху:

Скверноуби́йственнаго дея́ния неприча́стны сохрани́, Христе́, и первому́ченика сподо́би Твоя́ певцы́ насле́дия, я́ко Благоутро́бен.

И ны́не и при́сно и во ве́ки веко́в. Ами́нь.

Богородичен: Всеми́рнаго бы́сть спасе́ния, Влады́ко Христе́, нача́ло рождество́ Твое́ и му́чеником боголе́пнаго испове́дания основа́ние.

Конда́к апо́стола, гла́с 3.

Влады́ка вчера́ на́м пло́тию прихожда́ше, и ра́б дне́сь от пло́ти исхожда́ше. Вчера́ Ца́рствуяй пло́тию роди́ся, дне́сь ра́б ка́мением побива́ется; Того́ ра́ди и скончава́ется первому́ченик и боже́ственный Стефа́н.

Икос:

Яко звезда́ све́тлая, дне́сь совозсия́ Рождеству́ Христо́ву первому́ченик Стефа́н, облиста́яй, просвеща́яй земны́я концы́, иуде́йское то́кмо омрачи́ все́ злоче́стие. Му́дростию сло́ва си́х изобличи́в, от Писа́ний бесе́дуяй, и увещава́я сия́, ро́ждшагося от Де́вы Иису́са, Сы́на Бо́жия бы́ти и Бо́га. И посрами́ си́х нечести́вое злоде́йство первому́ченик и боже́ственный Стефа́н.

Пе́снь 7.

Ирмос: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Припев: Святый первомучениче и архидиаконе Стефане, моли Бога о нас.

Зубы́ скреже́щуще уби́йственне, беззако́ннии, я́ко зве́рие восхи́тивше, убива́ху Стефа́на, боже́ственне пою́ща: Бо́же, благослове́н еси́.

Припев: Святый первомучениче и архидиаконе Стефане, моли Бога о нас.

Яко пе́стрыми цве́ты и кра́сными, Стефа́не, ка́мением украша́емь, тебе́ сама́го приве́л еси́ Христу́ Жизнода́вцу, поя́: Бо́же, благослове́н еси́.

Припев: Святый первомучениче и архидиаконе Стефане, моли Бога о нас.

Яко непобеди́мо Па́влово противле́ние, гоня́ща пе́рвое Бо́жия уго́дники, приводя́ща же язы́ки ны́не ко Христу́ во ве́ки.

Сла́ва Отцу́ и Сы́ну и Свято́му Ду́ху:

Взя́т бы́в Ду́хом Святы́м, Стефа́не, неизрече́нно ви́дел еси́ Сы́на со Роди́телем, зовы́й Тро́ице: Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Тебе́, возсия́вшему от Де́вы боже́ственныя Чи́стыя, принесе́ся одушевле́нный я́ко Царю́ вене́ц, боже́ственне песнопоя́ Тебе́: Бо́же, благослове́н еси́.

Пе́снь 8.

Ирмос: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Припев: Святый первомучениче и архидиаконе Стефане, моли Бога о нас.

Прииди́те, мы́сленно Стефа́новою сла́вою облиста́еми, воспои́м вопло́щшемуся Бо́гу: дела́ вся́кая, Го́спода по́йте и превозноси́те во вся́ ве́ки.

Припев: Святый первомучениче и архидиаконе Стефане, моли Бога о нас.

Тебе́, я́ко победи́телю пребезза́конныя ле́сти, страда́ний вене́ц исплете́ся, Стефа́не. Те́м вопия́л еси́: Го́спода по́йте и превозноси́те во вся́ ве́ки.

Припев: Святый первомучениче и архидиаконе Стефане, моли Бога о нас.

Яви́ся тебе́ Христо́с во Отчей сла́ве, страда́ний возвеща́я тебе́ я́ве возме́здия; те́мже вопия́л еси́: Го́спода по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Исплете́ на́м Влады́чнее Рождество́ ли́к и па́мять первому́ченика; те́м непреста́нно Го́спода пое́м и превозно́сим во вся́ ве́ки.

И ны́не и при́сно и во ве́ки веко́в. Ами́нь.

Богородичен: Тебе́, па́че ума́ богому́жно сло́вом ро́ждшую Го́спода и де́вствующую, вся́ дела́, Де́во, благослови́м и превозно́сим во вся́ ве́ки.

Песнь 9

Ирмос: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Припев: Святый первомучениче и архидиаконе Стефане, моли Бога о нас.

Похва́л, Стефа́не, преше́л еси́ вся́к чи́н и но́сиши по коему́ждо сло́ву нело́жно ты́ победи́тельная: изнемога́ет бо челове́ческий у́м соплести́ вене́ц похва́л тебе́ досто́йный.

Припев: Святый первомучениче и архидиаконе Стефане, моли Бога о нас.

О, блаже́ннаго твоего́, его́же провеща́л еси́, Стефа́не, гла́са! Не поста́ви уби́йцам, Влады́ко, — вопия́, — Христе́, беззако́ния, но, я́ко Бо́г и Соде́тель, приими́ ду́х мо́й, я́коже же́ртву благово́ннейшу.

Сла́ва Отцу́ и Сы́ну и Свято́му Ду́ху:

Ты́ боле́зней воздая́ние прия́л еси́, победи́тельный от Вседержи́тельныя вене́ц десни́цы, и ны́не, всеблаже́нне, предстоя́ Всецарю́, сла́вою и благода́тию пою́щия Тя́ увенча́й.

И ны́не и при́сно и во ве́ки веко́в. Ами́нь.

Богородичен: Вре́меннаго бытия́ от Де́вы прия́т нача́ло пло́тию от Отца́ безле́тный Сы́н; Его́же ра́ди убива́емь подо́бник Христо́в Стефа́н, ны́не насле́дова от нача́ла ве́чную жи́знь.

Свети́лен.

Одесну́ю стоя́ща Отца́, ви́дел еси́ Сло́ва Пребезнача́льнаго, и Све́та неизглаго́ланнаго лице́ испо́лнил еси́, апо́столов похвало́ и му́чеников сла́во; украси́лся же еси́ венце́м ка́мений мета́ньми и кончи́ну прия́л еси́ боже́ственную.

Молитва первомученику и архидиакону Стефану

Пе́рвый во диа́конех, пе́рвый и в му́ченицех показа́лся еси́, святы́й Стефа́не, апо́столе, испо́лнь бо ве́ры и си́лы во уче́нии и в зна́мениих вели́к яви́лся еси́, и никто́же возмо́же противуста́ти прему́дрости и ду́ху, и́миже глаго́лал еси́, лице́ же твое́ на со́нмищи ви́дено бысть, я́ко лице́ а́нгела. Те́мже, испо́лнен Свята́го Ду́ха быв, ви́дел еси́ отве́рстое не́бо и сла́ву Бо́жию и Сы́на челове́ча, Го́спода на́шего Иису́са Христа́, одесну́ю стоя́ща Бо́га Отца́. Та́же и от жестоковы́йных и уби́йц иуде́ев ка́мением пред лице́м Преблагослове́нныя и моля́щияся о тебе́ Де́вы, Ма́тере Его́, побива́емь, прекло́нь коле́на, возопи́л еси́ гла́сом ве́лиим: Го́споди, не поста́ви им греха́ сего́! И та́ко дух твой Го́споду Иису́су ра́достно пре́дал еси́. Сего́ ра́ди моли́твенника и предста́теля тя стяжа́хом, коле́на души́ и се́рдца на́шего прекло́ньше, тя мо́лим: воздежи́ ру́це твои́ ко Го́споду, и сподви́жи всему́ ро́ду челове́ческому Предста́тельницу и Хода́таицу к Сы́ну Своему́, Пресвяту́ю Ма́терь Де́ву, и о нас, при́сно прогневля́ющих грехо́м и ле́ностию, моли́ Блага́го Спа́са на́шего, да пода́ст нам благода́ть во благовре́менную по́мощь к покая́нию и твои́м предста́тельством и заступле́нием Пресвяты́я Ма́тере Своея́ в день он, стра́шный и пра́ведный, да не поста́вит пред на́ми грехи́ на́ша, но по щедро́там Свои́м, тобо́ю умоле́н быв, да рече́т души́ на́шей: спасе́ние ва́ше есмь Аз во ве́ки веко́в. Ами́нь.