9 января.
Канон преподобному исповеднику Феодору Начертанному, брату Феофана творца канонов
![Преподобному исповеднику Феодору Начертанному Преподобному исповеднику Феодору Начертанному](img_i/021.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 8:
Правосла́вия наста́вниче, благоче́стия учи́телю и чистоты́, вселе́нныя свети́льниче, мона́шествующих богодохнове́нное удобре́ние, Фео́доре прему́дре, уче́ньми твои́ми вся́ просвети́л еси́, цевни́це духо́вная; моли́ Христа́ Бо́га спасти́ся душа́м на́шим.
Кано́н, преподо́бнаго. Гла́с 4.
Пе́снь 1.
Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.
Припев: Преподобне отче Феодоре, моли Бога о нас.
Ти́тлу твоего́ честна́го лица́ ви́девше, херуви́ми отступа́ют от дре́ва жи́зни; пла́менное же ору́жие всеблагогове́йно плещи́ тебе́ дае́т, всему́дре Фео́доре.
Припев: Преподобне отче Феодоре, моли Бога о нас.
Ти́тла над главо́ю лежа́ше Царя́ Христа́, напи́сана на Дре́ве Кре́стнем; твоя́ же ти́тла, всему́дре, на лице́ твое́м начерта́ся, напи́сана благоле́пне.
Припев: Преподобне отче Феодоре, моли Бога о нас.
Возвы́сися у́бо на Кре́ст Госпо́дь и прободе́н бы́сть в ре́бра; ты́ же, протяже́н на скамии́, терпели́вно боде́ния претерпе́л еси́, я́коже ове́н наро́чит, священнотаи́нниче, назна́менаемь.
Сла́ва Отцу́ и Сы́ну и Свято́му Ду́ху:
Му́дростию вся́кою украша́емь, о́тче Фео́доре, предста́теля обличи́л еси́ я́ве злы́я е́реси, терпе́нием же де́л, сего́ мудрова́ния ужаси́л еси́.
И ны́не и при́сно и во ве́ки веко́в. Ами́нь.
Богородичен: Му́дрости прему́дростныя была́ еси́ прия́телище, Пречи́стая Богороди́тельнице, Еди́на ве́рных спасе́ние и пе́ние: Ты́ бо на́м родила́ еси́ дне́сь Боже́ственное избавле́ние.
Пе́снь 3.
Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.
Припев: Преподобне отче Феодоре, моли Бога о нас.
Не име́я что́ твои́м уче́нием противорещи́, преподо́бне, на ра́ны обраща́ется, е́ллинскаго неи́стовства испо́лненный.
Припев: Преподобне отче Феодоре, моли Бога о нас.
Подъя́л еси́ терпели́вно е́же на ра́мех и на пе́рсех ра́ны Христа́ ра́ди, богодохнове́нне, и по главе́ ударе́ния.
Сла́ва Отцу́ и Сы́ну и Свято́му Ду́ху:
Му́дростию духо́вною и усе́рдием по́мысла посрами́л еси́ злочести́ваго и беззако́ннаго свяще́ннейшими твои́ми догма́ты.
И ны́не и при́сно и во ве́ки веко́в. Ами́нь.
Богородичен: Дави́д, я́коже ковче́г, в Вифлее́ме проро́ческими очесы́, Ма́ти Бо́жия, ви́дит Тя́, Младе́нца Пребоже́ственнаго нося́щу.
Пе́снь 4.
Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Припев: Преподобне отче Феодоре, моли Бога о нас.
Просте́рт на дсце́, начерта́н бы́сть, я́ко покланя́ющся, Фео́доре, Христо́ве ико́не и Богома́тере, на́глостию свире́пства и ва́рварским суровство́м.
Припев: Преподобне отче Феодоре, моли Бога о нас.
Служи́в от ю́ности Влады́це и к Нему́ непреста́нно жела́ние име́я, блаже́нне, воздержа́нием, му́ченическою кро́вию а́бие украси́лся еси́ светле́йше.
Сла́ва Отцу́ и Сы́ну и Свято́му Ду́ху:
Све́тел, я́ко со́лнце, богоно́се, от восто́ка устреми́лся еси́, зари́ испуща́я испове́дания твоего́ и велему́дреннаго и до́блественнейшаго противле́ния.
И ны́не и при́сно и во ве́ки веко́в. Ами́нь.
Богородичен: Благослове́н гряды́й Бо́г Сло́во в Вифлее́м, я́ко Благоутро́бен, от неискусобра́чнаго, Пречи́стая, чре́ва Твоего́. Его́же ны́не моли́ спасти́ к Тебе́ прибега́ющия.
Пе́снь 5
Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Припев: Преподобне отче Феодоре, моли Бога о нас.
На земли́ стра́нней обита́яй, стра́нничество, озлобле́ние, ра́ны, заточе́ния и темни́цы люте́йшия подъя́л еси́ терпели́вно.
Припев: Преподобне отче Феодоре, моли Бога о нас.
Ны́не ра́дуешися вои́стинну, победоно́сное венча́ние прие́м в де́нь све́тлый и светоно́сный боже́ственнаго первому́ченика.
Сла́ва Отцу́ и Сы́ну и Свято́му Ду́ху:
Еже име́л еси́ от де́вства благоче́стия обеща́ние, соблю́л еси́ да́же до конца́, не превраще́н пребы́в, непобеди́ме Фео́доре.
И ны́не и при́сно и во ве́ки веко́в. Ами́нь.
Богородичен: Тя́ ору́жие непобеди́мое на враги́ предлага́ем, Тя́ по́мощь и наде́жду на́шего спасе́ния, Богоневе́сто, стяжа́хом.
Пе́снь 6.
Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Припев: Преподобне отче Феодоре, моли Бога о нас.
По́том подвиго́в еще́ ка́пая, Подвигополо́жнику предста́л еси́, пра́ведным судо́м всю́ тва́рь пра́вящему, богоно́се всеблаже́нне Фео́доре.
Припев: Преподобне отче Феодоре, моли Бога о нас.
Ничто́же тя́ Христо́вы любве́ отлучи́, ни уране́ние те́ла, ни сме́ртнаго осужде́ния преще́ние, ни тщета́ прису́щих, всеблаже́нне Фео́доре.
Сла́ва Отцу́ и Сы́ну и Свято́му Ду́ху:
Сы́н сы́й и све́та и дне́ пресве́тлый, по́лн све́та, преста́вился еси́, к Боже́ственному сия́нию возраста́емь, дне́м и но́щию неоскудева́емь, богоприя́тне.
И ны́не и при́сно и во ве́ки веко́в. Ами́нь.
Богородичен: Тя́ еди́ну посреди́ те́рния обре́т, я́ко честне́йший кри́н и удо́льный цве́т, о Богома́ти, Жени́х мы́сленный в Тя́ всели́ся.
Седа́лен гла́с 3.
Уста́ бы́л еси́ де́рзости, горды́ню мучи́телеву велему́дренно посрами́в терпе́нием страда́ний твои́х, уязвля́емь бо бы́в в лице́, Фео́доре, за Христо́ву ико́ну всечестну́ю, извести́л же еси́ чти́ти и сла́вити вся́, прося́ на́м ве́лию ми́лость.
Пе́снь 7.
Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Припев: Преподобне отче Феодоре, моли Бога о нас.
Распаля́емь правосла́вною ре́вностию, всему́дре, снеде́ние скве́рныя е́реси и лю́тыя де́рзостне отри́нул еси́, — благослове́н еси́, Бо́же мо́й, — зовя́, — и Го́споди.
Припев: Преподобне отче Феодоре, моли Бога о нас.
Сло́во му́дрости, сло́во догма́тов, сло́во зна́ния, сло́во уче́ний, о́тче, всеблагочести́вых Бо́г Сло́во тебе́ дарова́, — благослове́н еси́, Бо́же мо́й, — зову́щу, — и Го́споди.
Сла́ва Отцу́ и Сы́ну и Свято́му Ду́ху:
Возсия́в от восто́ка, я́коже со́лнце, зарю́ благоче́стия се́ял еси́ на земли́, ико́ны поклоне́ние Христо́вы, просвеща́ющую и уча́щую, о́тче Фео́доре.
И ны́не и при́сно и во ве́ки веко́в. Ами́нь.
Богородичен: Укра́шена, препросла́влена, пресия́ющая све́том де́вства яви́лася еси́, Ма́ти, Бо́га те́лом ро́ждшая и пелена́ми пови́вшая, вся́ я́ве повива́ющаго.
Пе́снь 8.
Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.
Припев: Преподобне отче Феодоре, моли Бога о нас.
Яко ле́в, всеблаже́нне, упова́в души́ тве́рдостию, не устраши́лся еси́ ерети́ческаго стремле́ния, неи́стовства тезоимени́таго, его́же оплева́в, лю́дем, ра́дуяся, вопия́л еси́: благослови́те, вся́ дела́ Госпо́дня, Го́спода.
Припев: Преподобне отче Феодоре, моли Бога о нас.
Украси́в му́жеством ду́шу, целому́дрием же, блаже́нне, жела́ние, у́м, ра́зума испо́лнен, стяжа́в, соверши́л еси́, пра́вдою же твоя́ смы́слы упра́вил еси́ и вопие́ши: благослови́те, вся́ дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху:
Стремли́во теку́щий то́к е́реси, о́тче, изсуши́л еси́, твои́ми наказа́нии, преподо́бне, и всему́дрыми указа́ньми хи́трости злочести́вых разоря́я и зовя́: благослови́те, вся́ дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Богородичен: Созда́вый естество́ в нача́тцех челове́ческое, Бо́г в сие́ облачи́тся от пречи́стаго Твоего́, Всечи́стая, и свята́го чре́ва, дне́сь в Вифлее́ме проро́чески ражда́яся; те́м Тя́ вси́ благослови́м, Мари́е Богоневе́сто.
Песнь 9
Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.
Припев: Преподобне отче Феодоре, моли Бога о нас.
Боже́ственным побежда́емь жела́нием, гоне́ний ополче́ния удо́бо претерпе́л еси́, богому́дре, и, гони́теля свире́пство низложи́в, восприя́л еси́ подвиго́в, о́тче, вене́ц.
Припев: Преподобне отче Феодоре, моли Бога о нас.
Бога́тство небе́сное обре́л еси́ и пребыва́ющую хра́мину вме́сто го́рькаго заточе́ния, и стра́нничества, и прехожде́ния, и ны́не пита́ешися, прие́мля ве́чное наслажде́ние.
Сла́ва Отцу́ и Сы́ну и Свято́му Ду́ху:
Пе́ние Влады́це принося́, о́тче, и мольбы́, не преста́й о мое́й не́мощи, и сообита́нии, и бра́тстве, я́ко да, вку́пе пожи́вше, улучи́м вку́пе обоже́ние.
И ны́не и при́сно и во ве́ки веко́в. Ами́нь.
Богородичен: Тя́, па́че ума́ же и сло́ва в Вифлее́ме Бо́га Сло́ва дне́сь ро́ждшую, Де́во, и в пелена́х Сего́ пови́вшую, я́ко вои́стинну Богоотрокови́цу и Богоро́дицу велича́ем.
Молитва:
О священная главо, преподобне отче, преблаженне авво Феодоре, не забуди убогих твоих до конца, но поминай нас всегда во святых и благоприятных молитвах к Богу: помяни стадо твое, еже сам упасл еси, и не забуди посещати чад твоих моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя: поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши, не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у престола Вседержителева предстоящи, достойно веселится, ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно, и во веки веков. Аминь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному исповеднику Феодору Начертанному Преподобному исповеднику Феодору Начертанному](img_b/021.jpg)