6 января

Канон предпразднству Рождества Христова на 6 января.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Написова́шеся иногда́ со ста́рцем Ио́сифом,/ я́ко от се́мене Дави́дова, в Вифлее́ме Мариа́м,/ чревонося́щи безсе́менное Рожде́ние./ Наста́ же вре́мя рождества́,/ и ме́сто ни еди́ноже бе обита́лищу,/ но, я́коже кра́сная пала́та,/ верте́п Цари́це показа́шеся./ Христо́с ражда́ется пре́жде па́дший воскреси́ти о́браз.

Кано́н предпра́зднства, глас 2.

Пе́снь 1.

Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Припев: Слава Тебе, Боже наш, слава Тебе.

Написа́лся еси́ ке́саревым повеле́нием,/ хотя́ написа́ти в кни́зе жи́зни, Всецарю́, челове́ка;/ стра́нно во Своя́ прише́л еси́,/ лю́те устра́ньшагося от ра́я на Не́бо призыва́я.

Припев: Слава Тебе, Боже наш, слава Тебе.

Вифлее́ме, приими́ Христа́,/ к тебе́ бо Воплоти́выйся прихо́дит, Еде́м отверза́я мне;/ угото́вися, верте́пе, Невмести́маго узри́ши, вмеща́ющася в тебе́ пресла́вно,/ бога́тством благоутро́бия ны́не обнища́вши.

Сла́ва Отцу́ и Сы́ну и Свято́му Ду́ху:

Роди́тися гряде́т Христо́с,/ стра́нное возрожде́ние су́щим из Ада́ма я́ко Бог да́руя./ Возвесели́ся, пусты́не неражда́ющая, земны́х естество́ все:/ прии́де бо Влады́ка тя многоча́дну соде́яти.

И ны́не и при́сно и во ве́ки веко́в. Ами́нь.

Богородичен: Умерщвле́ни бы́вше зна́ния са́дом,/ дре́вом жи́зни, Чи́стая, к жи́зни, ве́рнии, воззва́хомся,/ из Тебе́ прозя́бшим па́че смы́сла, Богоро́дице, Христо́м Бо́гом;/ ему́же со дерзнове́нием моли́ся/ спасти́ся душа́м на́шим.

Пе́снь 3.

Ирмос: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Припев: Слава Тебе, Боже наш, слава Тебе.

Уз избавля́я мя злых, Го́споди,/ пови́тися пелена́ми, я́коже младе́нец, прихо́диши, Человеколю́бче./ Покланя́юся Боже́ственному Твоему́ низхожде́нию.

Припев: Слава Тебе, Боже наш, слава Тебе.

В ле́то бы́вша Тя, безле́тно возсия́вша из Отца́, предгряде́т Де́ва роди́ти,/ ле́тныя разреша́юща стра́сти душ на́ших.

Сла́ва Отцу́ и Сы́ну и Свято́му Ду́ху:

Иски́й мя, заблу́ждшаго преступлени́ем,/ верте́п, я́коже не́бо, оби́тель сотвори́л еси́,/ оби́тели ми благоуготовля́я та́мошния,/ Ще́дре Многоми́лостиве.

И ны́не и при́сно и во ве́ки веко́в. Ами́нь.

Богородичен: Мари́ю, Пречи́стую Богоро́дицу, воспои́м,/ я́ко Хода́таицу спасе́ния я́вльшуюся, Богому́дрии, и вопие́м:/ несть чи́сты, я́коже Ты, Пречи́стая,/ и несть непоро́чны, па́че Тебе́, Влады́чице.

Седа́лен, гла́с 8:

Не́бо мне показа́ся днесь земля́,/ на ней бо ражда́ется Творе́ц/ и в я́слех восклония́ется в Вифлее́ме Иуде́йстем./ Со А́нгелы пою́т па́стырие непреста́нно:/ в Вы́шних сла́ва, ми́р в ми́ре;/ ви́деша бо звезду́, путеше́ствующу с волхвы́,/ ско́ро же теку́ще принести́ да́ры, зла́то, смирну и лива́н,/ я́ко всех су́щему Бо́гу, и Царю́ ве́чному, и Зижди́телю вся́ческих,/ в верте́пе за милосе́рдие ро́ждшемуся.

Пе́снь 4.

Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Припев: Слава Тебе, Боже наш, слава Тебе.

Тварь ны́не обветша́ние все отве́ржи,/ Зижди́теля, зи́ждема и обновля́юща тя, ви́дящи, младе́нца бы́вша,/ и к пе́рвой тя добро́те возводя́ща.

Припев: Слава Тебе, Боже наш, слава Тебе.

Дивя́щеся пресла́вному Рождеству́, стоя́ху волсви́,/ путеводи́мы Боже́ственною звездо́ю,/ и ви́деша Со́лнце, восходя́щее из де́вственнаго о́блака,/ да́ры тому́ принесо́ша.

Сла́ва Отцу́ и Сы́ну и Свято́му Ду́ху:

Се прихо́дит Де́ва, я́ко ю́ница,/ нося́щи юнца́ во чре́ве упита́ннаго, отъе́млющаго ми́ра грехи́,/ да ра́дуется тварь, пра́зднующи.

И ны́не и при́сно и во ве́ки веко́в. Ами́нь.

Богородичен: Про́поведи проро́ков, Христо́во возъявле́ние возвеща́ющия,/ прия́ша днесь коне́ц спаси́тельный:/ прии́де бо просвети́ти пло́тию во тьме бе́дствующия.

Пе́снь 5

Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́/ от но́щи неве́дения/ приведе́ние и́мамы.

Припев: Слава Тебе, Боже наш, слава Тебе.

Лю́дие, иногда́ во тьме седя́щии,/ да ви́дят Свет возсия́вший Невече́рний:/ его́же звезда́ дре́вле возвести́ огнь почита́ющим от Перси́ды царе́м.

Припев: Слава Тебе, Боже наш, слава Тебе.

В ма́лый вни́ти Царь вели́кий тщи́тся верте́п,/ ума́ленна мя я́ко да возвели́чит/ и обища́вша безме́рным бога́тством обогати́т, Пребоже́ственный.

Сла́ва Отцу́ и Сы́ну и Свято́му Ду́ху:

Ны́не из Иа́кова, я́коже Валаа́м рече́, ражда́ется Христо́с:/ язы́ки же огоспо́дствует, и возвы́сится благода́тию Ца́рство его́,/ пребыва́ющее непрее́мно.

И ны́не и при́сно и во ве́ки веко́в. Ами́нь.

Богородичен: Из Тебе́ Жи́знь, возсия́вши ми́ру, Богороди́тельнице,/ пре́жде сме́ртию удержа́нныя воззывает к жи́зни присносу́щней причаще́нием, ве́рою вопию́щия:/ ино́го, ра́зве Тебе́, Бо́га не зна́ем.

Пе́снь 6.

Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну;/ от тли, Бо́же, мя возведи́.

Припев: Слава Тебе, Боже наш, слава Тебе.

Страннообра́зне Христо́с во Своя́ прихо́дит,/ устрани́м себе́ грехо́в и сего́ прии́мем,/ в кро́тких душа́х обита́ющаго.

Припев: Слава Тебе, Боже наш, слава Тебе.

Ника́коже мале́йший во граде́х, Вифлее́ме, бу́деши:/ в тебе́ бо ражда́ется Царь и Госпо́дь,/ па́ствити лю́ди бога́тныя.

Сла́ва Отцу́ и Сы́ну и Свято́му Ду́ху:

Ка́ко ма́лый Тя прии́мет верте́п, ми́ру невмести́маго, Недомы́сленне?/ Ка́ко у́зри́шися, Младе́нец, Отцу́ соу́мственный, Безнача́льный?

И ны́не и при́сно и во ве́ки веко́в. Ами́нь.

Богородичен: Та́инственно уча́хуся несказа́нному вси проро́цы Твоему́, Всечи́стая, Рождеству́,/ духо́вно образу́юще и предглаго́люще всем бу́дущая.

Конда́к, гла́с 3:

Де́ва днесь Преве́чное Сло́во/ в верте́пе гряде́т роди́ти неизрече́нно;/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.

Икос:

Свяще́нная проро́ков рече́ния коне́ц прия́ша: се бо Де́ва ражда́ет Всесоверше́ннаго в Вифлее́ме гра́де, внутрь верте́па./ Тварь вся, новосотвори́ся, ра́дуйся и лику́й: с рабы́ пожи́ти Влады́ка всех прии́де,/ Влады́чества чужда́го избавля́я ны, низведе́нныя тле́ю,/ и зри́тся я́ко Младе́нец, пелена́ми повива́емь в я́слех,/ Отроча́ мла́до, Преве́чный Бог.

Пе́снь 7.

Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Припев: Слава Тебе, Боже наш, слава Тебе.

Да кропя́т свы́ше во́ду ́облацы,/ о́блаки полага́яй Себе́ че́стне на восхожде́ние о́блаком, носи́мь Де́вою,/ гряде́т возсия́ти Свет Невече́рний су́щим пре́жде помраче́нным и бе́дствующим.

Припев: Слава Тебе, Боже наш, слава Тебе.

Во́инство благоугото́вися Боже́ственных А́нгел/ воспе́ти неизрече́нное Госпо́дне низхожде́ние,/ волсви́, пости́гните, па́стырие, потщи́теся:/ прии́де, Ему́же належа́ше, Христо́с,/ ожида́ние язы́ков и избавле́ние.

Сла́ва Отцу́ и Сы́ну и Свято́му Ду́ху:

Что сие́ стра́нное и велича́йшее чу́до?/ Ка́ко понесу́ Тя, нося́щаго глаго́лом вся́ческая?/ Неизглаго́ланное Рождество́, Сы́не Мой Безнача́льне,/ глаго́лаше Всечи́стая,/ Христа́ на дла́нех ужа́сно держа́щи.

И ны́не и при́сно и во ве́ки веко́в. Ами́нь.

Богородичен: Па́жить исцели́ла еси́ сме́ртную,/ безсе́менно ро́ждши Жи́знь ипоста́сную, Де́во Всенепоро́чная, Богороди́тельнице Чи́стая./ Тем же Тя, ра́дующеся, исто́чник безсме́ртия имену́ем.

Пе́снь 8.

Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Припев: Слава Тебе, Боже наш, слава Тебе.

Высоту́ вои́стинну неизрече́ннаго та́инства, Небеса ́ра́зумом покры́вшему,/ Непоро́чная зря́щи, дивля́шеся и глаго́лаше:/ Престо́л Небе́сный пла́менствуется, Тебе́ держа́й,/ и ка́ко, Сы́не Мой, понесу́ Тя?

Припев: Слава Тебе, Боже наш, слава Тебе.

Но́сиши Оте́ческое подо́бие, Сы́не Мой,/ и ка́ко раба́ подо́бие, обнища́в, восприя́л еси́?/ Ка́ко в я́слех восклоню́ Тя безслове́сных,/ избавля́ющаго вся от безслове́сия?/ Песносло́влю Твое́ благоутро́бие.

Сла́ва Отцу́ и Сы́ну и Свято́му Ду́ху:

Ра́дуйся, вся земле́,/ се́ Христо́с приближа́ется, в Вифлее́ме ражда́яйся;/ мо́ре, возвесели́ся, проро́ческий сонм, взыгра́й, сбытие́ зря днесь Твои́х слове́с,/ и вси, ра́дуйтеся, пра́веднии.

И ны́не и при́сно и во ве́ки веко́в. Ами́нь.

Богородичен: Безсме́ртныя зари́ исто́чник ве́мы Тя, Богоро́дице,/ я́ко ро́ждшую Сло́во Безсме́ртнаго Отца́,/ вся сме́рти избавля́ющаго превозноша́ющия его́ во ве́ки.

Песнь 9

Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем всепе́тую Богоро́дицу велича́ем.

Припев: Слава Тебе, Боже наш, слава Тебе.

Да пою́т, ра́дующеся, ца́рствия вся земна́я,/ оте́чествия же язы́ков да веселя́тся;/ го́ры, и удо́лия, и хо́лми, ре́ки, мо́ре/ и вся тварь Го́спода, ны́не ро́ждшагося, велича́ет.

Припев: Слава Тебе, Боже наш, слава Тебе.

Ви́делся еси́, я́ко мо́щно бе проро́ком Тя ви́дети;/ в после́дняя же вре́мена Челове́к быв,/ всем яви́лся еси́ челове́ком, в Вифлее́ме, гра́де Иуде́йстем,/ звезда́ показу́ющи Тя звездо́словцем, Несказа́нне.

Сла́ва Отцу́ и Сы́ну и Свято́му Ду́ху:

О Ча́до Сладча́йшее, ка́ко пита́ю Тя, пита́ющаго?/ ка́ко держу Тя, держа́щаго вся ма́нием?/ ка́ко же пелена́ми повию́ повива́ющаго всю зе́млю мглою?/ – вопия́ше Всечи́стая Влады́чица,/ ю́же непреста́нно велича́ем.

И ны́не и при́сно и во ве́ки веко́в. Ами́нь.

Богородичен: Яко руно́, Всенепоро́чная, дождь Небе́сный во чре́ве заче́нши,/ нам родила́ еси́ безсме́ртие даю́щаго,/ благоче́стно того́ воспева́ющим/ и Тя, Всенепоро́чную Богоро́дицу, велича́ющим.

Свети́лен:

И́же во све́те живы́й непристу́пнем и содержа́й вся́ческая/ за благоутро́бие неизрече́нное от Де́вы ражда́ется/ и пелена́ми повива́ется, я́ко Младе́нец,/ в верте́пе и в я́слех безслове́сных восклоня́ется,/ потщи́мся спе́шно приити́ в Вифлее́м на поклоне́ние его́ с волхвы́,/ плоды́ изря́днейших дея́ний нося́ще я́ко да́ры.

Сла́ва, и ны́не:

Пе́ние, ве́рнии, принесе́м Де́ве Мари́и:/ се бо ны́не предгряде́т во гра́де Вифлее́ме роди́ти Христа́ Спа́са,/ те́мже, волсви́, с да́ры со звездо́ю тецы́те с на́ми поклони́тися,/ па́стырие же, возопи́ти потщи́теся со А́нгелы ражда́емому:/ сла́ва Тебе́, в верте́пе и я́слех лежа́щему.

Молитва ко Господу:

Влады́ко Христе́ Бо́же, И́же страстьми́ Свои́ми стра́сти моя́ исцели́вый и я́звами Свои́ми я́звы моя́ уврачева́вый, да́руй мне, мно́го Тебе́ прегреши́вшему, сле́зы умиле́ния; сраствори́ моему́ те́лу от обоня́ния Животворя́щего Те́ла Твоего́, и наслади́ ду́шу мою́ Твое́ю Честно́ю Кро́вию от го́рести, е́юже мя сопроти́вник напои́; возвы́си мой ум к Тебе́, до́лу пони́кший, и возведи́ от про́пасти поги́бели: я́ко не и́мам покая́ния, не и́мам умиле́ния, не и́мам слезы́ уте́шительныя, возводя́щия ча́да ко своему́ насле́дию. Омрачи́хся умо́м в жите́йских страсте́х, не могу́ воззре́ти к Тебе́ в боле́зни, не могу́ согре́тися слеза́ми, я́же к Тебе́ любве́. Но, Влады́ко Го́споди Иису́се Христе́, сокро́вище благи́х, да́руй мне покая́ние всеце́лое и се́рдце люботру́дное во взыска́ние Твое́, да́руй мне благода́ть Твою́ и обнови́ во мне зра́ки Твоего́ о́браза. Оста́вих Тя, не оста́ви мене́; изы́ди на взыска́ние мое́, возведи́ к па́жити Твое́й и сопричти́ мя овца́м избра́ннаго Твоего́ ста́да, воспита́й мя с ни́ми от зла́ка Боже́ственных Твои́х Та́инств, моли́твами Пречи́стыя Твоея́ Ма́тере и всех святы́х Твои́х. Ами́нь.