6 января.
Канон преподобномученице Евгении Римской.
![Святой преподобномученице Евгении Римской Святой преподобномученице Евгении Римской](img_i/014.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Написова́шеся иногда́ со ста́рцем Ио́сифом, я́ко от се́мене Дави́дова, в Вифлее́ме Мариа́м, чревонося́щи безсе́менное Рожде́ние. Наста́ же вре́мя рождества́, и ме́сто ни еди́ноже бе́ обита́лищу, но, я́коже кра́сная пала́та, верте́п Цари́це показа́шеся. Христо́с ражда́ется пре́жде па́дший воскреси́ти о́браз.
Кано́н святы́я. Гла́с 2.
Пе́снь 1.
Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.
Припев: Святая преподобномученице Евгение, моли Бога о нас.
Евге́ние, му́ченице Христо́ва, ны́не ликовству́ющи ра́достно со Ангельскими во́инствы, я́ко де́ва непоро́чна и я́ко му́ченица, венцено́сица всебога́тая, благода́ть дарова́ти моли́ся любо́вию воспева́ющим тя́.
Припев: Святая преподобномученице Евгение, моли Бога о нас.
Песнопе́ния, неве́сто Христо́ва, боже́ственнаго послу́шавши, к высо́кому впери́лася еси́ благоро́дию: я́ко бо свет возсия́ в се́рдце твое́, пе́сней Ду́ха богосло́вие, вся́ко безбо́жие отгоня́.
Припев: Святая преподобномученице Евгение, моли Бога о нас.
Же́нское естество́ тво́й у́м забы́в, к му́жеским дея́нием востече́, вмужи́вся благода́тию, и Бо́гу промы́сленне управля́яся, му́ченице Евге́ние, боже́ственнаго благоро́дия тезоимени́тная.
Сла́ва Отцу́ и Сы́ну и Свято́му Ду́ху:
Осия́вшися све́том у́мным, мно́жайшия осия́ния сопричасти́тися соде́лала еси́, богому́драя; его́же ны́не пою́щия тя избавля́ющи греха́, сподо́би твои́ми мольба́ми, му́ченице Евге́ние всеблаже́нная.
И ны́не и при́сно и во ве́ки веко́в. Ами́нь.
Богородичен: Умерщвле́ни бы́вше зна́ния са́дом, дре́вом жи́зни, Чи́стая, к жи́зни, ве́рнии, воззва́хомся, из Тебе́ прозя́бшим па́че смы́сла, Богоро́дице, Христо́м Бо́гом; Ему́же со дерзнове́нием моли́ся спасти́ся душа́м на́шим.
Пе́снь 3.
Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.
Припев: Святая преподобномученице Евгение, моли Бога о нас.
Якоже же́ртва непоро́чна Влады́це принесла́ся еси́ мы́слию соверше́ннейшею и бога́тство тле́емое отри́нула еси́, вопию́щи, всему́драя: Ты́ еси́ Бо́г на́ш, и не́сть свя́т, па́че Тебе́, Го́споди.
Припев: Святая преподобномученице Евгение, моли Бога о нас.
Всечи́стая, позна́ся твоя́ чистота́, просия́ страда́ний Твои́х кре́пость, дея́ние бо восхожде́ние виде́ния соде́лала еси́, вопию́щи: Ты́ еси́ Бо́г на́ш, и не́сть свя́т, па́че Тебе́, Го́споди.
Сла́ва Отцу́ и Сы́ну и Свято́му Ду́ху:
Целому́дрия жела́нием одержа́ся, соблюла́ еси́ хвалу́ чистоты́, была́ еси́ прия́тна прему́дрости, Христу́ вопию́щи: Ты́ еси́ Бо́г на́ш, и не́сть свя́т, па́че Тебе́, Го́споди.
И ны́не и при́сно и во ве́ки веко́в. Ами́нь.
Богородичен: Мари́ю, Пречи́стую Богоро́дицу, воспои́м, я́ко Хода́таицу спасе́ния я́вльшуюся, богому́дрии, и вопие́м: не́сть чи́сты, я́коже Ты́, Пречи́стая, и не́сть непоро́чны, па́че Тебе́, Влады́чице.
Седа́лен, гла́с 8.
Воздержа́вшися в труде́х страда́льческих, просла́вилася еси́ по́двиги му́ченическими, мно́ги приве́дши спасае́мыя Зижди́телю твоему́: боже́ственною бо любо́вию оста́вивши привре́менная, му́жеския по́двиги соверши́ла еси́, сла́вная. Те́мже по кончи́не безконе́чную обрела́ еси́ жи́знь, пребыва́ющи с Женихо́м твои́м всегда́, Евге́ние равноа́нгельная. Моли́ Христа́ Бо́га прегреше́ний оставле́ние дарова́ти чту́щим любо́вию всечестну́ю па́мять твою́.
Сла́ва, и ны́не:
Не́бо мне́ показа́ся дне́сь земля́, на не́й бо ражда́ется Творе́ц и в я́слех восклоня́ется в Вифлее́ме Иуде́йстем. Со Ангелы пою́т па́стырие непреста́нно: в вы́шних сла́ва, ми́р в ми́ре; ви́деша бо звезду́, путеше́ствующу с волхвы́, ско́ро же теку́ще принести́ да́ры, зла́то, сми́рну и лива́н, я́ко всех су́щему Бо́гу, и Царю́ ве́чному, и Зижди́телю вся́ческих, в верте́пе за милосе́рдие ро́ждшемуся.
Пе́снь 4.
Ирмо́с: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.
Припев: Святая преподобномученице Евгение, моли Бога о нас.
Прише́л еси́, воплоти́вся от Де́вы, Вы́шний, Себе́ обручи́в де́в соста́вы, Тебе́ Еди́наго возлю́бльшия, де́вственнаго Жениха́ зна́емаго.
Припев: Святая преподобномученице Евгение, моли Бога о нас.
Рождества́ плотска́го совлекла́ еси́ покрыва́ло: пакирожде́ния же нетле́нную оде́жду, му́ченице всесла́вная, светови́дно облекла́ еси́ креще́нием.
Припев: Святая преподобномученице Евгение, моли Бога о нас.
Возсия́ светоно́сная заря́ се́рдцу твоему́, ле́сти отгоня́щи излия́нный мра́к блиста́нием благода́ти, му́ченице Христо́ва Евге́ние, до́брая де́во.
Сла́ва Отцу́ и Сы́ну и Свято́му Ду́ху:
Удобре́нно твое́ и красно́ житие́ просвети́ла еси́, воздержа́нием пе́рвее плотски́я стра́сти увяди́вши, последи́ же страда́нием пресве́тло, Евге́ние, сия́ющи.
И ны́не и при́сно и во ве́ки веко́в. Ами́нь.
Богородичен: Превы́шшая Ангел была́ еси́, Всепе́тая, Отча ро́ждши сове́та вели́каго Ангела, Челове́ка бы́вша за мно́гое благоутро́бие, Человеколю́бца.
Пе́снь 5
Ирмо́с: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.
Припев: Святая преподобномученице Евгение, моли Бога о нас.
Тече́ние твое́ направля́емо ви́дя ко спасе́нию, зми́й душепа́губный, страстоно́сице, воздвиза́ет искуше́ния тебе́ разли́чная, твою́ кре́пость разсла́бити покуша́яся; сего́ же, богому́драя чи́стая, попра́ла еси́.
Припев: Святая преподобномученице Евгение, моли Бога о нас.
Вся́ добра́ до́брых Да́телю, и Благоде́телю, и Жениху́ ду́ш, Христу́, яви́лася еси́, укра́шена в по́стницех воздержа́нием и му́ченическим страда́нием сия́ющи, му́ченице Евге́ние, Христо́ва до́брая де́во.
Сла́ва Отцу́ и Сы́ну и Свято́му Ду́ху:
Вене́ц твоему́ верху́ наложи́ся дарова́ний: Боже́ственную бо почти́ла еси́ му́дрость, бога́тство и сла́ву оте́ческую презре́вши, и с кре́постию после́довала еси́ возлю́бленному Жениху́ твоему́, всечестна́я.
И ны́не и при́сно и во ве́ки веко́в. Ами́нь.
Богородичен: Из Тебе́ Жизнь, возсия́вши ми́ру, Богороди́тельнице, пре́жде сме́ртию удержа́нныя воззыва́ет к жи́зни присносу́щней причаще́нием, ве́рою вопию́щия: ино́го, ра́зве Тебе́, Бо́га не зна́ем.
Пе́снь 6.
Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.
Припев: Святая преподобномученице Евгение, моли Бога о нас.
Дрема́ния твои́м ве́ждом не дала́ еси́, до́ндеже сладостра́стие все́ угаси́ла еси́ и чи́стую Зижди́телю твоему́ тебе́ саму́ю соверши́ла еси́ оби́тель.
Припев: Святая преподобномученице Евгение, моли Бога о нас.
Еги́птяныни, нра́вом поревнова́вши, очерне́вшая де́лом и и́менем, клевета́ти остри́тся честно́е житие́ твое́, всечестна́я.
Сла́ва Отцу́ и Сы́ну и Свято́му Ду́ху:
Тве́рдую показа́вши све́тлость и врачева́ний благода́тию обогати́вшися бога́тством ве́ры, чернори́зиц составле́нию бы́сть учи́тельница.
И ны́не и при́сно и во ве́ки веко́в. Ами́нь.
Богородичен: Та́инственно уча́хуся несказа́нному вси проро́цы Твоему́, Всечи́стая, Рождеству́, духо́вно образу́юще и предглаго́люще все́м бу́дущая.
Конда́к, гла́с 3.
Де́ва дне́сь Преве́чное Сло́во в верте́пе гряде́т роди́ти неизрече́нно; лику́й, вселе́нная, услы́шавши, просла́ви со Ангелы и па́стырьми хотя́щаго яви́тися Отроча́ Мла́до, Преве́чнаго Бо́га.
Икос:
Свяще́нная проро́ков рече́ния коне́ц прия́ша: се́ бо Де́ва ражда́ет Всесоверше́ннаго в Вифлее́ме гра́де, вну́трь верте́па. Тва́рь вся́, новосотвори́ся, ра́дуйся и лику́й: с рабы́ пожи́ти Влады́ка все́х прии́де, влады́чества чужда́го избавля́я ны́, низведе́нныя тле́ю, и зри́тся я́ко Младе́нец, пелена́ми повива́емь в я́слех, Отроча́ Мла́до, Преве́чный Бог.
Пе́снь 7.
Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.
Припев: Святая преподобномученице Евгение, моли Бога о нас.
Изъясни́ла еси́ все́м богодухнове́нных писа́ний и́стину, же́нское естество́ ому́жествивши, и вся́ удиви́ла еси́ пресла́вно, честна́я, я́же привела́ еси́ све́тлы ве́ровавшия Христу́, всебога́тая.
Припев: Святая преподобномученице Евгение, моли Бога о нас.
Явственно обличи́ла еси́ и́дольское неи́стовство, всехва́льная, боже́ственными твои́ми уче́ньми, и де́в неизче́тное мно́жество обручи́вши все́ми ца́рствующему Христу́ све́тлое му́ченическою кро́вию.
Сла́ва Отцу́ и Сы́ну и Свято́му Ду́ху:
Ви́девши житие́ твое́ светоно́сное, Васи́лла сла́вная, боже́ственне поревнова́вши и Христу́ обручи́ся, оста́вльши плотско́е все́ сладостра́стие, и ны́не му́ченическия ра́дости сподо́бися.
И ны́не и при́сно и во ве́ки веко́в. Ами́нь.
Богородичен: Па́жить исцели́ла еси́ сме́ртную, безсе́менно ро́ждши Жи́знь Ипоста́сную, Де́во Всенепоро́чная, Богороди́тельнице Чи́стая. Те́м же Тя́, ра́дующеся, исто́чник безсме́ртия имену́ем.
Пе́снь 8.
Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.
Припев: Святая преподобномученице Евгение, моли Бога о нас.
В реце́ ю́ношески, во огни́ же терпели́вно искуси́лася еси́: проти́вная бо естества́ кре́пко прешла́ еси́, — Христа́ по́йте, дела́, — зову́щи, — и превозноси́те во вся́ ве́ки.
Припев: Святая преподобномученице Евгение, моли Бога о нас.
Странноле́пно явле́йся Христо́с тебе́, в темни́це держи́мей, препитава́ет бога́тно и Рождество́м Свои́м совокупля́ет го́рним во́инством тя́, славосло́вящую Его́ во ве́ки.
Припев: Святая преподобномученице Евгение, моли Бога о нас.
Твой Жени́х благоле́пно венцы́ тя сугу́быми украша́ет, Евге́ние богому́драя, и тебе́ черто́г све́тел пра́ведно, я́ко пра́ведный, дае́т. Его́же превозно́сим во вся́ ве́ки.
Сла́ва Отцу́ и Сы́ну и Свято́му Ду́ху:
Благода́ть Бо́жия, светови́дно облиста́вши тя́, ны́не озаря́ет во оби́телех небе́сных, Ея́же напо́лнитися твои́ми моли́твами непреста́нно моли́ соверша́ющим твою́ па́мять, богому́драя.
И ны́не и при́сно и во ве́ки веко́в. Ами́нь.
Богородичен: Безсме́ртныя зари́ исто́чник ве́мы Тя́, Богоро́дице, я́ко ро́ждшую Сло́во Безсме́ртнаго Отца́, вся́ сме́рти избавля́ющаго превозноша́ющия Его́ во ве́ки.
Песнь 9
Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.
Припев: Святая преподобномученице Евгение, моли Бога о нас.
Во оби́тели все́льшися небе́сныя, сла́вная, ны́не сла́дости ра́йския сподо́билася еси́ я́вственно с де́вами, я́ко му́ченица всеи́стинна и с му́ченицами де́ва всенепоро́чная, Евге́ние всеблаже́нная.
Припев: Святая преподобномученице Евгение, моли Бога о нас.
Жела́ние получи́ла еси́ па́че ума́ и смы́сла, жела́ний кра́йнейшему предстоя́щи све́тло и светоза́рными луча́ми Нача́льныя Тро́ицы, богому́драя, я́вственно сия́ющи, Евге́ние, до́брая де́во.
Припев: Святая преподобномученице Евгение, моли Бога о нас.
Свещу́ держа́щи де́вства неуга́сну, му́ченическим венце́м украси́лася еси́, и ны́не моля́щи не преста́й благоче́стно тя́ любо́вию почита́ющим спасти́ся моли́твами твои́ми, Евге́ние всесла́вная.
Сла́ва Отцу́ и Сы́ну и Свято́му Ду́ху:
К Боже́ственному ны́не изшла́ еси́ прохлажде́нию, вседо́бляя, ра́н проше́дши о́гнь нестерпи́мый и непостоя́нную во́ду искуше́ний, му́ченице Евге́ние. Христа́ у́бо моли́ спасти́ ду́ши на́ша.
И ны́не и при́сно и во ве́ки веко́в. Ами́нь.
Богородичен: Яко руно́, Всенепоро́чная, до́ждь небе́сный во чре́ве заче́нши, на́м родила́ еси́ безсме́ртие даю́щаго, благоче́стно Того́ воспева́ющим и Тя́, Всенепоро́чную Богоро́дицу, велича́ющим.
Молитва святой преподобномученице Евгении Римской
Де́вственниц похвало́ и му́чениц сла́во, Евге́ние преподо́бная! К тебе́ во умиле́нии серде́ц припа́даем и заступле́ния твоего́ у Го́спода про́сим! Ты́ бо, преподобному́ченице пресла́вная, ве́лие дерзнове́ние ко Влады́це все́х стяжа́ла еси́, я́ко просла́вившая Его́ в чи́стой душе́ твое́й и телеси́ твое́м страда́льчестем, зане́, вся́ прельще́ния врага́ и преще́ния мучи́теля презре́вши, вся́ терпя́щи, вопия́ла еси́: «Христо́с е́сть бога́тство мое́ и похвала́!» Те́мже от того́ бога́тства и на́шей нищете́ духо́вная пода́ждь дарова́ния и от безме́рных прегреше́ний на́с предста́тельством твои́м огради́, дру́г ко дру́гу на́с в послуша́нии и братолю́бии наста́ви и ко Го́споду о́чи серде́ц на́ших всегда́ возводи́, во е́же при́сно сла́вити на́м Отца́ и Сы́на и Свята́го Ду́ха держа́ву и твое́ те́плое предста́тельство во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святой преподобномученице Евгении Римской Святой преподобномученице Евгении Римской](img_b/014.jpg)