5 января

Канон предпразднству Рождества Христова на 5 января.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Гото́вися, Вифлее́ме,/ отве́рзися всем, Еде́ме,/ красу́йся, Евфра́фо,/ я́ко дре́во живота́ в верте́пе процвете́ от Де́вы:/ рай бо О́ноя чре́во яви́ся мы́сленный,/ в не́мже Боже́ственный сад,/ от него́же я́дше, жи́ви бу́дем,/ не я́коже Ада́м у́мрем./ Христо́с ражда́ется пре́жде па́дший возста́вити о́браз.

Кано́н предпра́зднства, глас 6.

Пе́снь 1.

Ирмос: Волно́ю морско́ю/ Скры́вшаго дре́вле гони́теля, мучи́теля,/ в я́слех Сокрыва́емаго уби́ти и́щет И́род;/ но мы с волхвы́ пои́м:/ Го́сподеви воспои́м,/ сла́вно бо просла́вися.

Припев: Слава Тебе, Боже наш, слава Тебе.

Князь из Иу́ды оскуде́ уже́,/ ему́же бо завеща́ся, я́коже предписа́ся,/ язы́ков ча́яние – Иису́с Христо́с прии́де/ и в верте́пе ражда́ется кра́йния ра́ди бла́гости.

Припев: Слава Тебе, Боже наш, слава Тебе.

Вифлее́ме, весели́ся ра́достию:/ в тебе́ бо ражда́ется Христо́с Госпо́дь./ Вселе́нная да игра́ет, прие́млющи избавле́ние,/ да лику́ет вся тварь, пра́зднующи.

Сла́ва Отцу́ и Сы́ну и Свято́му Ду́ху:

Род челове́ческий хотя́ спасти́, Преблаги́й/ во утро́бу всели́ся Неискусобра́чныя Де́вы/ и се роди́тися гряде́т./ Тому́ поклони́мся: сла́вно бо просла́вися.

И ны́не и при́сно и во ве́ки веко́в. Ами́нь.

Богородичен: Род челове́ческий хвалу́ Тебе́ предпра́зднственную прино́сит, Богоневе́стная,/ я́ко о́бщия ра́дости Хода́тая и Вино́вника сла́вит ро́ждшагося из Тебе́/ Человеколю́бца.

Пе́снь 3.

Ирмос: Тебе́, на вода́х/ пове́сившаго всю зе́млю неодержи́мо,/ тварь, ви́девши в верте́пе ражда́ющася,/ ужа́сно содрога́шеся:/ несть свят, па́че Тебе́,/ Го́споди, зову́щи.

Припев: Слава Тебе, Боже наш, слава Тебе.

В ра́бий облещи́ся о́браз восхоте́л еси́,/ я́ко да рабо́ты мя лука́ваго изба́виши,/ песносло́влю Твое́ благоутро́бие, Сло́ве, Отцу́ Собезнача́льне и Соприсносу́щне./ Сла́ва смотре́нию Твоему́.

Припев: Слава Тебе, Боже наш, слава Тебе.

Гряде́т Де́ва Го́спода роди́ти в верте́пе,/ предвари́те, волсви́; па́стырие, ны́не прииди́те; песнь с высоты́, А́нгели, возопи́йте:/ яви́ся челове́ком избавле́ние.

Сла́ва Отцу́ и Сы́ну и Свято́му Ду́ху:

Ища́й мя, заблу́ждшаго, Человеколю́бче,/ и верте́п я́вльшася разбо́йнический де́лы непло́дными,/ в верте́п ны́не прише́л еси́ от Де́вы днесь роди́тися, Влады́ко:/ сла́ва, Сло́ве, прише́ствию Твоему́.

И ны́не и при́сно и во ве́ки веко́в. Ами́нь.

Богородичен: Разреши́хомся уз осужде́ния, Зижди́телю, пелена́ми пови́вшуся,/ и оде́ждею облеко́хомся, Богоро́дице, пе́рвыя красоты́.

Седа́лен, гла́с 1:

Ра́дуйся, Сио́не, Вифлее́ме, украси́ся,/ всех Содержи́тель, звезду́ предпосла́в, возвести́ Свое́ безме́рное схожде́ние:/ его́же бо трепе́щут Небе́сныя си́лы,/ Сей ражда́ется от Де́вы непревра́щно,/ еди́ный Бог наш.

Пе́снь 4.

Ирмос: От Де́вы прише́ствие Твое́ прови́дя, Авваку́м,/ у́жасся, вопия́ше:/ Ты от ю́га, воплоща́яся, прише́л еси́, Изба́вителю,/ Ада́ма отринове́ннаго воззвати.

Припев: Слава Тебе, Боже наш, слава Тебе.

Светоза́рный о́блак гряде́т/ возсия́ти Христа́ из Ма́терних ложе́сн, Пра́вды Со́лнце,/ всю зе́млю луча́ми Боже́ственными просвеща́ющаго.

Припев: Слава Тебе, Боже наш, слава Тебе.

Бог челове́ком яви́ся подо́бен, и обнищава́ет пло́тию,/ да нас обогати́т, и в верте́пе ражда́ется:/ сего́, ве́рнии, чи́стым се́рдцем подъи́мем.

Сла́ва Отцу́ и Сы́ну и Свято́му Ду́ху:

Се Христо́с во гра́де ражда́ется Вифлее́ме,/ я́ко да Еде́м нам отве́рзет,/ преслуша́нием пе́рвее зми́я окраде́ния заключе́нный,/ Боже́ственно торжеству́им.

И ны́не и при́сно и во ве́ки веко́в. Ами́нь.

Богородичен: Я́ко о́бщую ра́дость, о Богоро́дице!/ вся тварь пе́сньми Тя почита́ет, предпра́зднствующи.

Пе́снь 5

Ирмос: К Тебе́ у́тренюю,/ благоутро́бия ра́ди Себе́ истощи́вшему непрело́жно/ и зрак раба́ от Де́вы носи́вшему,/ Сло́ве Бо́жий./ ми́р пода́ждь ми, па́дшему,/ Человеколю́бче.

Припев: Слава Тебе, Боже наш, слава Тебе.

Се́рдце вся́кое земноро́дных да игра́ет, да весели́тся тварь:/ Госпо́дь ражда́ется из Отрокови́цы Чи́стыя в верте́пе Вифлее́мстем,/ и волсви́ тому́ прино́сят да́ры досто́йныя.

Припев: Слава Тебе, Боже наш, слава Тебе.

Лю́дие, дре́вле в се́ни сме́ртней седя́щии,/ у́зрите Свет, вам возсия́вший от Де́вы,/ и мно́гаго душесла́достия испо́лнитеся,/ обнища́вшаго Сло́ва велича́юще при́сно.

Сла́ва Отцу́ и Сы́ну и Свято́му Ду́ху:

В ма́лем верте́пе гряде́ши вмести́тися, Невме́стный естество́м,/ я́ко да мя, ума́лившагося преступле́нием, возвели́чиши за ми́лость безме́рную./ Покланя́юся Твоему́ благоутро́бию, Долготерпели́ве.

И ны́не и при́сно и во ве́ки веко́в. Ами́нь.

Богородичен: Изба́вльшеся́ пре́лести, Чи́стая, и́дольския,/ Тебе́ ра́ди позна́хом Творца́ и Еди́наго Спа́са./ Тем в того́ рождестве́ Тя любо́вию почита́ем, Пречи́стая.

Пе́снь 6.

Ирмос: Бе́здна после́дняя грехо́в обы́де мя/ и, волне́ния не ктому́ терпя́,/ я́ко Ио́на Влады́це вопию́ Ти:/ от тли мя возведи́.

Припев: Слава Тебе, Боже наш, слава Тебе.

Зако́нов Тя Де́ва плотски́х кроме́, Го́споди, прихо́дит роди́ти в верте́пе/ и во я́слех пло́тию восклони́ти, я́ко Младе́нца.

Припев: Слава Тебе, Боже наш, слава Тебе.

Стра́нна мя бы́вша от Бо́га преступле́ньми,/ Пребоже́ственный, рожде́йся от Отрокови́цы Неискусобра́чныя ми́лости ра́ди,/ граждани́на Небе́снаго я́вля́ет.

Сла́ва Отцу́ и Сы́ну и Свято́му Ду́ху:

Го́ры же, и хо́лми, и удо́лия, возвесели́теся:/ Госпо́дь бо пло́тию ражда́ется, обновля́яй тварь,/ истле́вшую лука́выми преступле́ньми.

И ны́не и при́сно и во ве́ки веко́в. Ами́нь.

Богородичен: Ро́ждшагося из Тебе́,/ Богоневе́сто,/ во пло́ти Христа́ Бо́га па́че смы́сла,/ Боже́ственнаго возрожде́ния, земноро́днии, и че́сти сподо́бихомся.

Конда́к, гла́с 3:

Де́ва днесь Преве́чное Сло́во/ в верте́пе гряде́т роди́ти неизрече́нно;/ лику́й, вселе́нная, услы́шавши,/ просла́ви со А́нгелы и па́стырьми хотя́щаго яви́тися/ Отроча́ мла́до, Преве́чнаго Бо́га.

Икос:

О, ужа́снаго вои́стинну и па́че сло́ва чудесе́!/ Е́же бы́ти дая́й всем ра́ди бла́гости/ во чре́во Святы́я Де́вы вни́де,/ и в верте́пе роди́тися гряде́т, и в я́слех положи́тися./ Звезда́ же сего́ пропове́дует свы́ше волхво́м,/ иду́щим на поклоне́ние его́ с да́ры, издале́ча привлача́щи,/ со тща́нием после́дующия Валаа́ма прорече́нию, ре́кшаго:/ звезда́ хо́щет провозвести́ти Отроча́ мла́до, Преве́чнаго Бо́га.

Пе́снь 7.

Ирмос: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди, Бо́же оте́ц на́ших.

Припев: Слава Тебе, Боже наш, слава Тебе.

Ка́ко Тя мале́йший, Сло́ве, подъи́мет верте́п,/ нището́ю мно́гою нищету́ Ада́мову отъе́мшаго/ и бога́тством Боже́ственныя благода́ти челове́ки обогати́вшаго?

Припев: Слава Тебе, Боже наш, слава Тебе.

Глаго́лы стра́нныя па́стырие слы́шавше,/ потща́шася Вифлее́м ви́дети/ и в я́слех безслове́сных разреша́ющего безслове́сия вся челове́ки Возлежа́щаго.

Сла́ва Отцу́ и Сы́ну и Свято́му Ду́ху:

Усты́ же и се́рдцем пло́тию приходя́щаго роди́тися Христа́ в верте́пе от Де́вы Отрокови́цы,/ песносло́вити потщи́мся и ве́рно поклони́мся.

И ны́не и при́сно и во ве́ки веко́в. Ами́нь.

Богородичен: Ви́дети чи́стыми мы́сли очесы́ разумева́емую,/ в верте́пе из Тебе́, Всечи́стая, пло́тию ро́ждшагося Бо́га на́шего,/ сла́ву и све́тлость Боже́ственную, Твое́ю сподо́би ны моли́твою,/ ве́рно песносло́вящия Тя.

Пе́снь 8.

Ирмос: За зако́ны оте́ческия/ блаже́ннии в Вавило́не ю́ноши предбе́дствующе,/ царю́ющаго оплева́ша повеле́ние безу́мное/ и, совоку́плены, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,/ и превозноси́те во вся ве́ки.

Припев: Слава Тебе, Боже наш, слава Тебе.

Па́че сло́ва Еди́наго Го́спода воплоще́ннаго, Отрокови́це,/ и обложе́ннаго челове́ческим подо́бием,/ держа́щи рука́ми, и покланя́ющися, и лобыза́ющи ма́терски,/ Ча́до, – глаго́лала еси́, – Сладча́йшее,/ ка́ко Тя си́це держу, держа́щаго руко́ю всю тварь/ и от руки́ рабо́ты сию́ свобожда́ющаго?

Припев: Слава Тебе, Боже наш, слава Тебе.

Песносло́вити, Боже́ственнии А́нгели, на земли́ ро́ждшагося угото́витеся;/ волсви́, да́ры, путеводи́ми звездо́ю, принеси́те;/ па́стырие, сего́ потщи́теся ви́дети на ма́терних, я́коже Младе́нца, седя́ща объя́тиих, вопию́ще:/ Го́спода по́йте, дела́, и превозноси́те во вся ве́ки

Сла́ва Отцу́ и Сы́ну и Свято́му Ду́ху:

Све́та о́блаче, Неискусобра́чная,/ ка́ко пелена́ми повива́еши/ о́блаки одева́ющаго Небеса ́неизглаго́ланным ма́нием?/ Ка́ко в безслове́сных я́слех воскланя́еши/ безслове́сия челове́ки за безме́рную ми́лость избавля́ющаго Влады́ку?/ ему́же вся покланя́ется стра́хом тварь,/ песносло́вящи во вся ве́ки.

И ны́не и при́сно и во ве́ки веко́в. Ами́нь.

Богородичен: И́же в не́дрех О́тчих,/ на дла́нех ма́терних Твои́х, Богоро́дице, рожде́йся в верте́пе почи́/ и всем, ве́рно пою́щим Тя,/ на Небесе́х отверза́ет Ца́рство.

Песнь 9

Ирмос: Не диви́ся ны́не, о Ма́ти,/ ви́дящи я́ко Младе́нца,/ его́же из чре́ва пре́жде денни́цы роди́ Оте́ц,/ возста́вити бо и сопросла́вити/ челове́ческое па́дшее естество́ приидо́х я́вственно,/ ве́рою и любо́вию Тя велича́ющее.

Припев: Слава Тебе, Боже наш, слава Тебе.

Ра́дуйся, прия́телище, Пречи́стая, ра́дости неизглаго́ланныя:/ се бо гряде́ши роди́ти в верте́пе неизрече́нно Влады́ку,/ хотя́щаго тварь всю, истле́вшую преступле́нием пе́рвее, обнови́ти вои́стинну,/ сего́ песносло́вяще ве́рою, Тя велича́ем.

Припев: Слава Тебе, Боже наш, слава Тебе.

Ду́ши пра́ведных вси и подзе́мная, ку́пно ра́дуйтеся:/ се бо избавле́ние всех яви́ся, во гра́де Вифлее́ме ражда́ющееся;/ звезда́ же сего́ возвеща́ет волхво́м, и́щущим благоче́стно,/ его́же и ви́девше в верте́пе, у́жаса испо́лнишася.

Сла́ва Отцу́ и Сы́ну и Свято́му Ду́ху:

Я́ко Не́бо Тя иное воспева́ем, Де́во,/ Пра́вды Со́лнце нам из ложе́сн Пречи́стых хотя́щую возсия́ти у́треннее,/ просвеща́ющее во тьме су́щия сме́рти и тли./ Те́мже до́лжно хвала́ми Тя велича́ем.

И ны́не и при́сно и во ве́ки веко́в. Ами́нь.

Богородичен: Излия́ся благода́ть, Богоро́дице Де́во, во всех роде́х земноро́дных,/ и чуде́с Твои́х бога́тство истека́ет оби́льно во све́тлей Рождества́ Твоего́ ра́дости/ и богати́т ве́рою и любо́вию Тя сла́вящия.

Свети́лен:

Та́инство сокрове́нное, А́нгелом несказа́нное,/ Отца́ благоволе́нием и Ду́ха соде́йством хо́щет соверши́тися, потщи́мся:/ Сло́во бо Безнача́льное, нача́ло прие́мь,/ я́ко Челове́к от Де́вы ражда́ется на спасе́ние ми́ра.

Молитва ко Господу:

Влады́ко Христе́ Бо́же, И́же страстьми́ Свои́ми стра́сти моя́ исцели́вый и я́звами Свои́ми я́звы моя́ уврачева́вый, да́руй мне, мно́го Тебе́ прегреши́вшему, сле́зы умиле́ния; сраствори́ моему́ те́лу от обоня́ния Животворя́щего Те́ла Твоего́, и наслади́ ду́шу мою́ Твое́ю Честно́ю Кро́вию от го́рести, е́юже мя сопроти́вник напои́; возвы́си мой ум к Тебе́, до́лу пони́кший, и возведи́ от про́пасти поги́бели: я́ко не и́мам покая́ния, не и́мам умиле́ния, не и́мам слезы́ уте́шительныя, возводя́щия ча́да ко своему́ насле́дию. Омрачи́хся умо́м в жите́йских страсте́х, не могу́ воззре́ти к Тебе́ в боле́зни, не могу́ согре́тися слеза́ми, я́же к Тебе́ любве́. Но, Влады́ко Го́споди Иису́се Христе́, сокро́вище благи́х, да́руй мне покая́ние всеце́лое и се́рдце люботру́дное во взыска́ние Твое́, да́руй мне благода́ть Твою́ и обнови́ во мне зра́ки Твоего́ о́браза. Оста́вих Тя, не оста́ви мене́; изы́ди на взыска́ние мое́, возведи́ к па́жити Твое́й и сопричти́ мя овца́м избра́ннаго Твоего́ ста́да, воспита́й мя с ни́ми от зла́ка Боже́ственных Твои́х Та́инств, моли́твами Пречи́стыя Твоея́ Ма́тере и всех святы́х Твои́х. Ами́нь.