5 января.
Канон иной преподобному равноапостольному Науму Охридскому, чудотворцу.
![преподобному равноапостольному Науму Охридскому преподобному равноапостольному Науму Охридскому](img_i/013.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Ми́р оста́вил еси́, прилепи́вся Христу́, / пло́ть распя́л еси́, пожи́в Ду́ху, / Нау́ме всеблаже́нне, / потща́лся еси́ апо́стольским подвиза́тися тече́нием / и улови́л еси́ к ве́ре бо́лгарская неисче́тная мно́жества. / Те́мже моли́твами твои́ми / изба́ви на́с от искуше́ний.
Стихи́ра, гла́с 6:
Излия́ся благода́ть во устна́х Твои́х, преподо́бне о́тче, и бы́л еси́ свети́льник Бо́лгарскаго всенасле́дия, уча́ слове́сныя о́вцы ве́ровати в Тро́ицу Единосу́щную, во Еди́ном Божестве́.
Вторы́й кано́н. Гла́с 4.
Пе́снь 1.
Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
Припев: Преподобне отче Науме, моли Бога о нас.
Иже дре́вле бе́здну изсуши́вый лю́дем пешеходя́щим, бе́здну изсуши́ мои́х грехопаде́ний и одожди́ ми́ разуме́ния ка́плю, я́ко да преподо́бнаго Твоего́ пе́сньми восхвалю́, Христе́.
Припев: Преподобне отче Науме, моли Бога о нас.
Ви́дети жела́я сла́ву неизрече́нную, ско́рби претерпе́л еси́, и темни́цы, и му́ки и вся́кое мирско́е безсла́вие, до́бре за ве́ру подвиза́яся.
Припев: Преподобне отче Науме, моли Бога о нас.
Мона́шествуя ду́хом и горя́ ре́вностию ве́ры, Христа́ поне́сл еси́ и́гом духо́вным, и очи́стил еси́ ду́ши неи́стовствствовавшия, и се́мя положи́л еси́ Боже́ственнаго разуме́ния.
Сла́ва Отцу́ и Сы́ну и Свято́му Ду́ху:
Вмени́л еси́, блаже́нне, ве́сь ми́р, я́коже уме́ты, Христа́ же и бли́жняго пра́во возлюби́л еси́, и примири́л еси́ лю́ди удале́нныя все́м Приближа́ющемуся ве́рою.
И ны́не и при́сно и во ве́ки веко́в. Ами́нь.
Богородичен: Ме́ртва мя́ бы́вша от многообра́зных озлобле́ний, я́ко Жи́знь ро́ждшая, оживи́ мя, Влады́чице, и вы́шней жи́зни предста́ви мя́, да просла́влю Тя́ я́ко Жизнода́вицу всегда́.
Пе́снь 3.
Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.
Припев: Преподобне отче Науме, моли Бога о нас.
Бо́лгарскую избра́л еси́ по́зде страну́ после́дних угло́в, преподо́бне, и подвиза́лся еси́ с учи́тельми твои́ми, и апо́стольских нра́вов потща́лся еси́ бы́ти соприча́стник.
Припев: Преподобне отче Науме, моли Бога о нас.
Боже́ственный Нау́м споспе́шник бы́в иера́рха Кли́мента, к бо́лгаром приспе́ и сия́ просвети́ све́том пропове́дания, его́же ра́ди и ны́не спрославля́ется.
Припев: Преподобне отче Науме, моли Бога о нас.
Сы́ны Авраа́му от ка́мений, я́коже глаго́лет Предте́ча, бо́лгарский же ро́д тобо́ю воздви́же Госпо́дь, Нау́ме, и́же и пребыва́я ны́не, прославля́ет тя́ разу́мно.
Сла́ва Отцу́ и Сы́ну и Свято́му Ду́ху:
Лю́дие бо́лгарстии седя́ще во тме́ лю́таго неве́рия, тобо́ю ви́деша све́т ра́зума, те́мже почита́ют па́мять твою́ ра́достными пе́сньми.
И ны́не и при́сно и во ве́ки веко́в. Ами́нь.
Богородичен: Тишины́ мя́ испо́лни, Богоро́дице, ве́дрость ду́ш су́щая, и утоли́ волне́ние всу́е борю́щих мя́, и в глубину́ толку́щих мя́ и в а́дову про́пасть, Влады́чице.
Седа́лен, гла́с 4.
Апо́столов подража́тель, / архиере́ев пра́вило, / преподо́бных добро́та, / сострада́лец страда́льцев, / без кро́ве, я́ко му́ченик, венча́лся еси́, / Нау́ме преподо́бне, / лю́тыми бо скорбьми́ обраща́лся еси́, / нося́ Христа́ Боже́ственное и́мя / и дерзнове́нно всегда́ пропове́дуя Тро́ицы та́инство, / Ейже и моли́тися не преста́й о восхваля́ющих тя́.
Пе́снь 4.
Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.
Припев: Преподобне отче Науме, моли Бога о нас.
Яко сто́лп ве́ры недви́жимый показа́лся еси́, искуше́ньми ника́коже смуща́емь ду́хом и в многообра́зных озлобле́ниих враща́лся еси́, враго́м Ду́ха противустоя́.
Припев: Преподобне отче Науме, моли Бога о нас.
Вети́йствуя вели́чия Бо́жия пред лице́м язы́к и царе́й, ри́торов лю́тое загради́л еси́ блядосло́вие[или́: буесло́вие] простото́ю сло́ва, благоче́стие же и Христо́ву сла́ву уясни́л еси́.
Сла́ва Отцу́ и Сы́ну и Свято́му Ду́ху:
Яко апо́стол печа́ль вся́кую претерпе́л еси́ за благоче́стие. Те́мже вся́кую печа́ль отжени́ от на́с, твою́ па́мять соверша́ющих.
И ны́не и при́сно и во ве́ки веко́в. Ами́нь.
Богородичен: Вжили́ ума́ моего́ движе́ния, Богома́ти, и души́ моея́ чу́вства просвети́, Чи́стая, и си́льна на враги́ мя́ соде́лай, да зову́ Ти́: сла́ва, Де́во, Рождеству́ Твоему́.
Пе́снь 5
Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.
Припев: Преподобне отче Науме, моли Бога о нас.
Слы́шатель при́сный бы́л еси́ прему́дрых уче́ний боже́ственнаго Мефо́дия, Пано́нию поро́ждшаго боже́ственных преда́ньми, его́же нра́ва поревнова́л еси́.
Припев: Преподобне отче Науме, моли Бога о нас.
Кра́сне но́зе твои́ бы́ша, я́сным пропове́данием Боже́ственнаго Ева́нгелия обте́кша страну́ многокру́жную и претыка́ющихся ка́мением в нощи́ неве́рия к све́ту Боже́ственному возводя́ща.
Сла́ва Отцу́ и Сы́ну и Свято́му Ду́ху:
Обнови́вше зе́млю Бо́лгарскую, преподо́бне, объя́сте ю́ ты́ у́бо и Кли́мент же боже́ственный, догма́ты в не́й все́явше, и ны́не прие́млете пло́д боже́ственное разуме́ние и ле́тния пе́сни.
И ны́не и при́сно и во ве́ки веко́в. Ами́нь.
Богородичен: Увенча́й на́с, Влады́чице, я́коже ору́жием благоволе́ния, щедро́тами Твои́ми, помощми́ и заступле́ньми укрепля́ющи, о́крест бо жи́зни на́шея неща́дне ополчи́ся злы́х собо́рище.
Пе́снь 6.
Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.
Припев: Преподобне отче Науме, моли Бога о нас.
Сло́во богодухнове́нное на тебе́ испо́лнися, во всю́ бо зе́млю Бо́лгарскую изы́де веща́ние твое́ и да́же до конце́в твои́ глаго́лы.
Припев: Преподобне отче Науме, моли Бога о нас.
От коне́ц се́вера до коне́ц за́пада в мо́ри хожде́ние поло́жше, блаже́ннии, в Ри́м внидо́сте Но́вый Заве́т возвести́ти.
Сла́ва Отцу́ и Сы́ну и Свято́му Ду́ху:
Хра́м боже́ственный и Бо́жие честно́е жили́ще от ю́ности сы́й богоно́се Нау́ме, и мене́ твои́ми моли́твами прия́телище сотвори́ Ду́ха.
И ны́не и при́сно и во ве́ки веко́в. Ами́нь.
Богородичен: Что́ бу́ду, отвсю́ду всегда́ ра́туемь? Ты́ ми́ коне́ц прибе́жища бу́ди, Богоневе́стная, оби́димых По́моще Необори́мая.
Конда́к, гла́с 3.
Све́тлых по́двиг твои́х / всечестна́я па́мять, / я́коже ве́лие со́лнце / все́м возсия́ющи, ли́ца тя́ воспева́ющих просвеща́ет, / бе́сы же и вся́к неду́г отгоня́ет, / сего́ ра́ди соше́дшеся, / любо́вию сию́ ве́рно восхваля́ем.
Икос:
Оте́ц на́ш Нау́м, велича́йший предста́тель и свети́льник я́сный яви́ся дне́сь. Прииди́те, стеце́мся, болга́р мно́жество, тому́ возра́дуимся: се́й бо все́х на́с просвети́ и тму́ пре́лести разгна́, се́й по стопа́м Христу́ после́дова и же́ртву себе́ благоприя́тну предаде́, се́й и досточу́дную свою́ па́мять же и пра́здник учрежде́ние духо́вное все́м ве́рным ны́не предлага́ет, ю́же любо́вию вси́ ве́рно восхваля́ем.
Пе́снь 7.
Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.
Припев: Преподобне отче Науме, моли Бога о нас.
По́ту по́стническому смеси́л еси́ по́т вои́стину апо́стольский, о́тче, произволе́нием же и му́ченик по́слежде яви́лся еси́ безкро́вный, взыва́я: Бо́же оте́ц на́ших, благослове́н еси́.
Припев: Преподобне отче Науме, моли Бога о нас.
Мертвотво́рная помышле́ний санда́лия, я́коже Моисе́й, с но́г я́ве отложи́л еси́ и Бо́га чи́сте смотре́л еси́, лю́ди же пе́ти увеща́л еси́: Бо́же оте́ц на́ших, благослове́н еси́.
Сла́ва Отцу́ и Сы́ну и Свято́му Ду́ху:
Иже хоте́ния творя́й боя́щихся Его́, проше́ния твоя́ о на́с ника́коже отри́нет, о́тче. Те́мже помина́й всегда́ се́рдцем и душе́ю песносло́вящих: Бо́же оте́ц на́ших, благослове́н еси́.
И ны́не и при́сно и во ве́ки веко́в. Ами́нь.
Богородичен: От плотски́х страсте́й, от душе́вных сокруше́ний, от бе́д лю́тых, от злоде́йства враго́в борю́щих мя́, раба́ Твоего́, исхити́ и держа́вою Твое́ю, Де́во, огради́ мя́.
Пе́снь 8.
Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.
Припев: Преподобне отче Науме, моли Бога о нас.
Сло́во, Еже все́х челове́к восхоте́ безслове́сия изба́вити, о́гненный язы́к тебе́ дарова́, и́мже безслове́сный ро́д Бо́лгарский в ра́зум благослове́сный приве́л еси́, все́х пе́ти научи́в Христа́ во ве́ки.
Припев: Преподобне отче Науме, моли Бога о нас.
Низложи́л еси́ мучи́телей неи́стовство стоя́нием твои́м и сотру́дник твои́х, Нау́ме всепе́тый, я́звы же и ра́ны и темни́цы претерпе́л еси́, боря́ся за происхожде́ние Ду́ха от Сама́го Боже́ственнаго Исто́чника безвино́внаго.
Припев: Преподобне отче Науме, моли Бога о нас.
Отону́дуже отбеже́ боле́знь, уны́ние, печа́ль и воздыха́ние и вся́кое озлобле́ние, иде́же неизрече́нная ра́дость и наслажде́ние перворо́дных, та́мо ны́не жили́ще, Нау́ме, в не́мже всели́ тя́ Христо́с досто́йно, прие́м труды́ твоя́, я́же за Него́.
Сла́ва Отцу́ и Сы́ну и Свято́му Ду́ху:
Наси́льными окружа́еми ну́ждами от вра́г ви́димых же и неви́димых, печа́льми ветша́юще, неду́ги, обстоя́нии, отведе́ньми непра́ведными же и презре́ньми го́рькими, вопие́м в печа́ли се́рдца: спаси́ ны́, Спа́се, моли́твами Твоего́ преподо́бнаго.
И ны́не и при́сно и во ве́ки веко́в. Ами́нь.
Богородичен: Поги́бе бе́гство от мене́ в коне́ц и не́сть по Писа́нию взыска́ющих мя́. Ты́ бу́ди ми́, Влады́чице, покро́в и кре́пость, прибе́жище и утвержде́ние, весе́лие и изве́стнаго спасе́ния моего́ наде́жда, да Тя́ сла́влю во вся́ ве́ки.
Песнь 9
Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.
Припев: Преподобне отче Науме, моли Бога о нас.
Ста́нем, бра́тие, в хра́ме Госпо́дни, во дво́рех до́му Бо́га на́шего и Того́ просла́вим вели́чия и чудеса́, ди́вен бо е́сть во святы́х Свои́х, повину́ющихся Того́ повеле́нием, и́мже сра́дуется Нау́м чу́дный.
Припев: Преподобне отче Науме, моли Бога о нас.
Да тя́, Нау́ме, согла́сно сла́вим торжеству́юще, изба́ви на́с моли́твами твои́ми вся́каго кова́рства, и обстоя́ния, и бе́д, и скорбе́й, и вся́каго ина́го гне́ва, моля́ Показа́вшаго тя́ за́поведей Свои́х исполни́теля.
Припев: Преподобне отче Науме, моли Бога о нас.
Лю́дие, я́же твои́ми труды́ насади́л еси́ и по́ты твои́ми напои́л еси́ и по́двиги твои́ми вкорени́л еси́, плодонося́т ле́тнюю твою́ па́мять и нача́тки пе́ния ти́ прино́сят, и́мже Бо́га уми́лостиви.
Сла́ва Отцу́ и Сы́ну и Свято́му Ду́ху:
Осла́би ми́, Христе́, Еди́не ве́дый не́мощи моя́, я́ко да отра́ду от ни́х улучу́ пре́жде исхо́да моего́, Влады́ко, моли́твами Твоего́ уго́дника, и не да́ждь ми́ бы́ти ра́дование бесо́м ниже́ ны́не, ниже́ в бу́дущем.
И ны́не и при́сно и во ве́ки веко́в. Ами́нь.
Богородичен: Тя́ и́стинную Ма́терь Созда́вшаго вся́ ве́рою мо́лим: сове́ты и мы́сли вражду́ющих на на́с осуети́ я́ко Блага́я и от руки́ вра́жия рабы́ Твоя́ вся́ свободи́, па́стыри и па́ству, Всепе́тая.
Свети́лен, гла́с 3.
Посети́ ны́ Христо́с, / лю́ди преогорчева́ющия, / и от руки́ лука́ваго / и тмы́ неве́рия тобо́ю спасе́, / и земля́ вся́ Бо́лгарская, Нау́ме, / испо́лнися Боже́ственнаго ра́зума.
Стихи́ры преподо́бнаго, гла́с 1.
Прииди́те, празднолю́бцы вси́, / и́же слове́с благода́ти / до́бре наслади́вшиися / и основа́ние прие́мшии Ева́нгелия, / в пе́снех и пе́ниих свяще́нных Нау́ма, / честно́е прия́телище Ду́ха / похваля́юще увенча́им, / прегреше́ний разреше́ния прося́ще.
Сти́х: Честна́ пред Го́сподем / сме́рть преподо́бных Его́.
Сме́рть твоя́ вои́стину / честна́ пред Го́сподем, / Нау́ме сла́вне, / жи́знь бо благоче́стия испо́лнь / и чистоты́ и вся́каго преподо́бия изоби́лующи, / от ни́хже приложи́ся ти́ обоже́ние по прича́стию. / Те́мже моли́ся / дарова́ти душа́м на́шим / ми́р и ве́лию ми́лость.
Сти́х: Блаже́н му́ж, боя́йся Го́спода, / в за́поведех Его́ восхо́щет зело́.
От скорбе́й да́ждь на́м свобожде́ние, / Нау́ме свя́те, / и искуше́ний все́х изба́ви, / су́етна бо по́мощь челове́ческая, / ты́ же вы́ше челове́ка / и Ангелов собесе́дник сы́й, / хода́тайствуеши о на́с, о́крест сла́вящих тя́, / почита́ющих честны́я твоя́ мо́щи.
Сла́ва И ны́не, гла́с 8:
Преподо́бне о́тче Нау́ме, не да́л еси́ сна́ очи́ма твои́ма, ниже́ ве́ждома твои́ма дрема́ния, до́ндеже посе́ял еси́ в бо́лгарех догма́ты благоче́стия. Те́мже Христу́ дерзнове́нно ны́не предстоя́, пло́д боже́ственных твои́х трудо́в утверди́, и соверша́ющих па́мять твою́ назира́й и спаса́й моли́твами твои́ми от бе́д ду́ши на́ша.
Молитва
Тебе, угодниче Бога Живаго, Науме чудотворче, иже исполнил еси закон Бога и Спаса нашего Иисуса Христа и сподобился еси от Него живота вечнаго, покланяемся любовию, и тя благодарим со смирением, за премногия твоя чудодейства, имиже помогаеши немощным людем и прославляеши имя Господа Бога и Спаса своего. Тебе бо, верный служителю Бога и Спаса, дадеся благодать Всесвятаго Духа бесы изгоняти, болящия исцеляти, немощныя укрепляти, страждущия утешати и во всяких скорбех помогати.
Того ради мы, недостойнии, почитаем тя, яко цевницу духовную, еюже изливается сила и небесное утешение коемуждо на потребу, и славословии прославляем Творца, Иже дарова ти таковую божественную силу и достояние. К тебе припадаем, праведниче и друже aнгелов, преподобне отче наш Науме, с покаянием и умилением, не престай молитися за свой род православный пред Престолом Пресвятыя, Единосущныя Троицы, за вся притекающия и кланяющияся пред твоими святыми мощами и всечестною иконою твоею, за болящия, и в вере усопшия, за старцы и младыя, за девы и матери.
Святе отче наш Науме, человече Божий, покрый немощи наша и исцели болезни наша, молитвама твоими, скоро услыши нас и потщися в помощь нам, да никогдаже рекут невернии: где есть Бог их? О преподобне отче Науме, яви силу твою, дарованную ти от Всемогущаго Господа, на нас, грешных рабех твоих, просвети ум наш светом святаго Евангелия, еже в житии твоем проповедал еси, и сохрани ны в целомудрии, здравии душевнем и отжени от нас пакостника диавола.
Укрепи и телеса наша здравием, яко да возможем богоугодно подвизатися и ближним нашим послужити, подаждь же нам покаяние и да в доброделании и Богоугождении поживше, обрящем милость Божию на Страшнем Судищи Христове. Помолися, о преславне Науме чудотворче, за ны, да простятся нам согрешения вольныя и невольныя, и да очистит ны Господь Духом Своим Святым от всякия нечистоты, да достойни явимся Царствия Небеснаго, идеже с тобою прославим Святую Троицу, Яже тя прослави, Отца и Сына и Святаго Духа, ныне и присно и во веки веков. Аминь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![преподобному равноапостольному Науму Охридскому преподобному равноапостольному Науму Охридскому](img_b/013.jpg)