5 января.
Канон молебный преподобному равноапостольному Науму Охридскому, чудотворцу.
![преподобному равноапостольному Науму Охридскому преподобному равноапостольному Науму Охридскому](img_i/011.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Ми́р оста́вил еси́, прилепи́вся Христу́, пло́ть распя́л еси́, пожи́в Ду́ху, Нау́ме всеблаже́нне, потща́лся еси́ апо́стольским подвиза́тися тече́нием и улови́л еси́ к ве́ре бо́лгарская неисче́тная мно́жества. Те́мже моли́твами твои́ми изба́ви на́с от искуше́ний.
Кано́н, гла́с 1.
Пе́снь 1.
Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.
Припев: Преподобне отче Науме, моли Бога о нас.
Воспе́ти твою́ честну́ю па́мять усе́рдствующу мне́ благомо́щную сло́ва благода́ть с небесе́ испроси́ и усе́рдие в де́ло, блаже́нне, произведи́.
Припев: Преподобне отче Науме, моли Бога о нас.
Ми́ра за благоутро́бие щедро́т на зе́млю истощи́вшемуся, Нау́ме приснопа́мятне, Христу́ Бо́гу на́шему, обоня́л еси́ от младе́нства изря́дне благово́ния Того́, о́тче, и после́довал еси́.
Припев: Преподобне отче Науме, моли Бога о нас.
Млады́й проявле́н во́зраст теле́сный, о́тче, [име́я], ста́ростию же ра́зума престаре́лую и тве́рдую стезю́ стяжа́л еси́, и́мже ху́дшее, Нау́ме, премени́л еси́ на лу́чшее.
Сла́ва Отцу́ и Сы́ну и Свято́му Ду́ху:
Яко во цве́тнице свяще́нном доброде́телей рая́ вше́л еси́, от все́х цвето́в собра́в, испле́л еси́ неувяда́емый вене́ц, его́же на версе́ твое́м ны́не но́сиши, Нау́ме всече́стне.
И ны́не и при́сно и во ве́ки веко́в. Ами́нь.
Богородичен: Тебе́, Невмести́маго Бо́га в Твое́м чре́ве прие́мшую, Пречи́стая, пе́ти жела́юще и велича́ти любе́зне хотя́ще, сло́во недоуме́ем: вы́ше бо е́сть сло́ва Рождество́ Твое́.
Пе́снь 3.
Ирмос: Еди́не Ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.
Припев: Преподобне отче Науме, моли Бога о нас.
Возненави́дел еси́ от ю́ности вся́кое сладостра́стие и, кре́ст на ра́мена взе́м, Распя́тому, Нау́ме, после́довал еси́, те́мже, изря́дно Тому́ подо́бяся, и досто́ин похва́л [яви́лся еси́, и́хже] ны́не получи́л еси́.
Припев: Преподобне отче Науме, моли Бога о нас.
Да́р тя́ Свята́го Ду́ха, Нау́ме му́дре, спротяже́нно пое́м, я́ко мо́щна тя́ ны́не благода́тию, моли́твами твои́ми тя́ сла́вящия искуше́ний и бе́д изба́ви, преподо́бне, и жи́зни неконча́емей сподо́би.
Припев: Преподобне отче Науме, моли Бога о нас.
Ангельское житие́ на земли́ усе́рдно подража́л еси́ и, отступи́в земны́х, всесла́вне, со Ангелы ны́не весели́шися: си́х бо житию́ на земли́ поревнова́л еси́, с ни́миже и водворе́ние получи́л еси́.
Сла́ва Отцу́ и Сы́ну и Свято́му Ду́ху:
Ви́дя, не я́коже пре́жде, лице́ Бо́жие в зерца́ле гада́ний и в се́ни, свя́те, ны́не невозбра́нно в [Не́] взира́я, хва́лящим тя́, Нау́ме приснопа́мятне, испроси́ прегреше́ний оставле́ние.
И ны́не и при́сно и во ве́ки веко́в. Ами́нь.
Богородичен: Превосхо́дит, Отрокови́це, Твоего́ стра́шнаго Рождества́ чу́до вся́каго сло́ва и ра́зума и недоуме́нием покрыва́ется. Ка́ко Ма́ти была́ еси́, и Де́ва пребыла́ еси́, и Созда́теля, созда́ние, родила́ еси́?
Седа́лен, гла́с 8.
Яко му́др и разу́мен, от ю́наго во́зраста подклони́л еси́, о́тче, себе́ под и́го ле́гкое Влады́ки Твоего́ и, бла́гости испо́лнився, боже́ственнаго же Кли́мента спомо́щника прия́л еси́, земледе́лал еси́ с ни́м сердца́ неве́рных и се́ял еси́ в ни́х правове́рия се́мя. Те́мже к неболе́зненным преше́л еси́ страна́м, трудо́в воздая́ние всегда́ пожина́я, преблаже́нне Нау́ме, моли́ Христа́ Бо́га согреше́ний оставле́ние дарова́ти пра́зднующим любо́вию святу́ю па́мять твою́.
Сла́ва, и ны́не, Богородичен:
Яко Всенепоро́чная Неве́ста Творцу́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й и вы́шняго прича́стия сподо́би и Све́та невече́рняго моли́твами Твои́ми.
Пе́снь 4.
Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.
Припев: Преподобне отче Науме, моли Бога о нас.
Славе́нския ро́ды и за́падныя ва́с восхваля́ют, Нау́ме чу́дне с Кли́ментом па́стырем, ва́с бо ра́ди спасе́ние обрето́ша и и́дольскаго изба́вльшеся помраче́ния.
Припев: Преподобне отче Науме, моли Бога о нас.
Честна́ сме́рть твоя́ бы́сть, преподо́бне, пред Созда́телем и Содержи́телем вся́ческих, Нау́ме приснопа́мятне, живя́ бо, Тому́ угоди́л еси́, и по сме́рти то́чиши чудеса́.
Припев: Преподобне отче Науме, моли Бога о нас.
Ве́сь от ю́ности Бо́гу возложе́н, ве́сь прия́телище доброде́телей и де́латель Того́ повеле́ний бы́л еси́, Нау́ме блаже́нне, ве́сь и Свята́го Ду́ха испо́лнь яви́лся еси́ и свиде́тель Того́ чуде́с.
Сла́ва Отцу́ и Сы́ну и Свято́му Ду́ху:
Исто́чник боля́щим и злостра́ждущим тво́й гро́б, о́тче Нау́ме, точа́щ[ий] все́м бога́тно разли́чная исцеле́ния, неистощи́мый бо исто́чник показа́ся Боже́ственных чуде́с все́м, приходя́щим с ве́рою.
И ны́не и при́сно и во ве́ки веко́в. Ами́нь.
Богородичен: Сло́во Отчее па́че сло́ва сло́вом вмести́ла еси́ боголе́пно и Сего́ родила́ еси́ на́м, безслове́сия все́х, и́же от Ада́ма, избавля́ющаго, Его́же уми́лостиви, Де́во, рабо́м Твои́м.
Пе́снь 5
Ирмос: Просвети́вый сия́нием прише́ствия Твоего́, Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия правосла́вно пою́щих Тя́.
Припев: Преподобне отче Науме, моли Бога о нас.
Обре́л еси́ вои́стинну, я́коже возлюби́л еси́, Нау́ме приснопа́мятне, я́же о́ко землено́е ника́коже ви́де, ниже́ у́хо услы́ша, ниже́ в сердца́ сластолюби́вых челове́к взыдо́ша когда́.
Припев: Преподобне отче Науме, моли Бога о нас.
Гора́ яви́лся еси́, доброде́тельми Боже́ственным вся́ присе́нная, в не́йже, о́тче, Бо́г жи́ти изво́ли и всели́ся в коне́ц в тя́, Нау́ме богоно́се, спаса́й все́х, к тебе́ притека́ющих.
Сла́ва Отцу́ и Сы́ну и Свято́му Ду́ху:
Спасе́ние дае́тся все́м, во хра́м тво́й прибега́ющим, Нау́ме боже́ственне, и ве́рно прося́щим по́мощь: Спа́су бо все́х досто́ин служи́тель яви́лся еси́, подража́я твоего́ учи́теля.
И ны́не и при́сно и во ве́ки веко́в. Ами́нь.
Богородичен: Глубины́ стра́шнаго Твоего́ Рождества́, Богома́ти, и Ангелов изрещи́ вои́стинну не мо́гут чи́ни, ка́ко от ни́х Носи́маго на объя́тиих но́сиши, я́ко Младе́нца? Па́че бо ума́ е́сть и слы́шания.
Пе́снь 6.
Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.
Припев: Преподобне отче Науме, моли Бога о нас.
Яко Влады́ка все́х, все́м промышля́яй, и все́м покая́ние ища́ и спасе́ние, я́ко Бо́г, но́выя апо́столи, ва́с посла́ к за́падным лю́дем, богоблаже́ннии.
Припев: Преподобне отче Науме, моли Бога о нас.
Хва́лят ва́шу па́мять, богодухнове́ннии, и любо́вию ублажа́ют бо́лгарския лю́ди, Кли́менте и Нау́ме всеблаже́ннии, и моще́й ва́ших ра́ку почита́ют, и своя́ спаси́тели ва́с пропове́дают.
Сла́ва Отцу́ и Сы́ну и Свято́му Ду́ху:
Служи́ти Бо́гу все́х святы́х бо́лгаров научи́сте и и́дольскаго служе́ния отврати́сте благода́тию слове́с ва́ших, боже́ственне Нау́ме со всечестны́м па́стырем Кли́ментом.
И ны́не и при́сно и во ве́ки веко́в. Ами́нь.
Богородичен: Слу́жат Рождеству́ Твоему́, Отрокови́це Всечи́стая, Ангелов во́инства и челове́ков мно́жество, я́ко Бо́га, Челове́ка непрело́жна бы́вша, [родила́ еси́,] Тебе́ же ублажа́ют, я́ко же прорекла́ еси́.
Конда́к свято́му, гла́с 3.
Све́тлых по́двиг твои́х всечестна́я па́мять, я́коже ве́лие со́лнце все́м возсия́ющи, ли́ца тя́ воспева́ющих просвеща́ет, бе́сы же и вся́к неду́г отгоня́ет, сего́ ра́ди соше́дшеся, любо́вию сию́ ве́рно восхваля́ем.
Пе́снь 7.
Ирмос: Тебе́, у́мную, Богоро́дице, пе́щь разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.
Припев: Преподобне отче Науме, моли Бога о нас.
Страда́ний твои́х и трудо́в по́честь, о́тче Нау́ме му́дре, прия́л еси́ чуде́с Боже́ственное де́йствие, и́миже притека́ющии ко гро́бу твоему́ пою́т: хва́льный отце́в Бо́г и препросла́вленный.
Припев: Преподобне отче Науме, моли Бога о нас.
Кре́постию Бо́жиею благомо́щно укрепля́емь, полки́ отврати́л еси́ неви́димых враго́в, Нау́ме, кре́пко побе́ду поста́вил еси́ над ни́ми, приснопа́мятне, и побе́ды вене́ц прия́л еси́ и со Христо́м ца́рствовати при́сно, о́тче, сподо́бился еси́.
Припев: Преподобне отче Науме, моли Бога о нас.
Упра́вил еси́ тво́й пу́ть до́бре к стезя́м Боже́ственных повеле́ний, и́же свети́льник бы́ша, све́т же стезя́м твои́м, и возведо́ша, иде́же Све́т Невече́рний, иде́же сла́дость неконча́емая, Нау́ме преподо́бне.
Сла́ва Отцу́ и Сы́ну и Свято́му Ду́ху:
Свы́ше назира́еши твоя́ певцы́, Нау́ме свя́те, си́м подае́ши всегда́ неду́гов исцеле́ния, и страсте́й уставле́ние, и искуше́ний вся́ческих избавле́ние моли́твами твои́ми, я́ко да пою́т Бо́га препросла́вленнаго.
И ны́не и при́сно и во ве́ки веко́в. Ами́нь.
Богородичен: Киво́т Моисе́й Тя́ прописа́ и трапе́зу, Хле́б Живо́тный нося́щую, и све́щник святоу́мный, Богоро́дице, и ста́мну, иму́щую Сла́дость всея́ тва́ри, я́же мы́, я́вственно в Тебе́ исполня́ему, Отрокови́це, взира́ем.
Пе́снь 8.
Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.
Припев: Преподобне отче Науме, моли Бога о нас.
Земледе́лав до́бре твою́ ни́ву серде́чную, Ева́нгельское се́мя посе́яв бога́тно, и кла́с пожа́л еси́ тмори́чный тобо́ю спасе́нным лю́дем и сла́вящим Христа́ во ве́ки.
Припев: Преподобне отче Науме, моли Бога о нас.
Крепча́йшую всю́ вра́жию пре́лесть, я́ко ке́дри Лива́нския возвы́шенную, преврати́л еси́ кре́пкими твои́ми по́двиги, сла́вне, и вопия́л еси́: вся́ дела́ Госпо́дня, Го́спода по́йте и превозноси́те во вся́ ве́ки.
Сла́ва Отцу́ и Сы́ну и Свято́му Ду́ху:
Гро́б тво́й предлежи́т славе́нским наро́дом, лю́бящим тя́, я́ко исто́чник сла́дкий, от него́же вси́ пию́ще питие́ Боже́ственныя воды́, вопию́т: вся́ дела́ Госпо́дня, Го́спода по́йте и превозноси́те во вся́ ве́ки.
И ны́не и при́сно и во ве́ки веко́в. Ами́нь.
Богородичен: Гаврии́лов, Отрокови́це, гла́с Тебе́, Благослове́нней, возглаша́ем, досто́йнейше же сего́ наипа́че ничто́же иму́щи рещи́, и два́жды Тебе́ взыва́ем: ра́дуйся, ра́дуйся, Де́во, мно́гажды и мно́жицею ра́дуйся, Благода́тная, ра́дуйся, ми́ру Ра́досте.
Песнь 9
Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.
Припев: Преподобне отче Науме, моли Бога о нас.
Ве́сь просвеще́ния испо́лнен бы́в, и ко Све́ту и́стинному Христа́, Бо́га же и Челове́ка, наста́вил еси́ во тме́ неве́дения спя́щия славе́нския наро́ды, и пре́лести и́дольския изба́вил еси́.
Припев: Преподобне отче Науме, моли Бога о нас.
Здра́вие разсла́бленным, преподо́бне, хромы́м тече́ние и глухи́м слы́шание, все́м вся́ прося́щим подае́ши моли́твами твои́ми, всесла́вне Нау́ме, Сло́ва пропове́дниче, на земли́ я́вльшемуся благода́тию.
Припев: Преподобне отче Науме, моли Бога о нас.
Ви́ждь мою́ премно́гую к тебе́ любо́вь, о́тче, ви́ждь и жела́ние, принося́щему ти́ сие́ убо́гое тебе́ пе́ние, грехо́в мои́х испроси́ разреше́ние и ве́чныя жи́зни наслажде́ние.
Сла́ва Отцу́ и Сы́ну и Свято́му Ду́ху:
Всего́ порабоще́на мя́ страсте́м, всего́, богому́дре, оскверне́на мя́ прегреше́ньми, очи́сти моли́твами твои́ми, Нау́ме преподо́бне, и огня́ гее́нскаго изба́ви, на сие́ спомо́щника име́я боже́ственнаго Кли́мента, с ни́мже тя́ велича́ем.
И ны́не и при́сно и во ве́ки веко́в. Ами́нь.
Богородичен: Ты́ па́че ума́ и смы́сла, неизрече́нно и неизглаго́ланно, Пречи́стая, во утро́бе Твое́й зачала́ и родила́ еси́ Бо́жие Бо́г Сло́во. Те́мже Тя́ сла́вим, я́коже мо́щно челове́ком, по достоя́нию бо а́ще мо́гут Ангели.
Молитва
Тебе, угодниче Бога Живаго, Науме чудотворче, иже исполнил еси закон Бога и Спаса нашего Иисуса Христа и сподобился еси от Него живота вечнаго, покланяемся любовию, и тя благодарим со смирением, за премногия твоя чудодейства, имиже помогаеши немощным людем и прославляеши имя Господа Бога и Спаса своего. Тебе бо, верный служителю Бога и Спаса, дадеся благодать Всесвятаго Духа бесы изгоняти, болящия исцеляти, немощныя укрепляти, страждущия утешати и во всяких скорбех помогати.
Того ради мы, недостойнии, почитаем тя, яко цевницу духовную, еюже изливается сила и небесное утешение коемуждо на потребу, и славословии прославляем Творца, Иже дарова ти таковую божественную силу и достояние. К тебе припадаем, праведниче и друже aнгелов, преподобне отче наш Науме, с покаянием и умилением, не престай молитися за свой род православный пред Престолом Пресвятыя, Единосущныя Троицы, за вся притекающия и кланяющияся пред твоими святыми мощами и всечестною иконою твоею, за болящия, и в вере усопшия, за старцы и младыя, за девы и матери.
Святе отче наш Науме, человече Божий, покрый немощи наша и исцели болезни наша, молитвама твоими, скоро услыши нас и потщися в помощь нам, да никогдаже рекут невернии: где есть Бог их? О преподобне отче Науме, яви силу твою, дарованную ти от Всемогущаго Господа, на нас, грешных рабех твоих, просвети ум наш светом святаго Евангелия, еже в житии твоем проповедал еси, и сохрани ны в целомудрии, здравии душевнем и отжени от нас пакостника диавола.
Укрепи и телеса наша здравием, яко да возможем богоугодно подвизатися и ближним нашим послужити, подаждь же нам покаяние и да в доброделании и Богоугождении поживше, обрящем милость Божию на Страшнем Судищи Христове. Помолися, о преславне Науме чудотворче, за ны, да простятся нам согрешения вольныя и невольныя, и да очистит ны Господь Духом Своим Святым от всякия нечистоты, да достойни явимся Царствия Небеснаго, идеже с тобою прославим Святую Троицу, Яже тя прослави, Отца и Сына и Святаго Духа, ныне и присно и во веки веков. Аминь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![преподобному равноапостольному Науму Охридскому преподобному равноапостольному Науму Охридскому](img_b/011.jpg)