3 января

Канон предпразднству Рождества Христова на 3 января.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Гото́вися, Вифлее́ме,/ отве́рзися всем, Еде́ме,/ красу́йся, Евфра́фо,/ я́ко дре́во живота́ в верте́пе процвете́ от Де́вы:/ рай бо О́ноя чре́во яви́ся мы́сленный,/ в не́мже Боже́ственный сад,/ от него́же я́дше, жи́ви бу́дем,/ не я́коже Ада́м у́мрем./ Христо́с ражда́ется пре́жде па́дший возста́вити о́браз.

Кано́н предпра́зднства, глас 4.

Пе́снь 1.

Ирмос: Триста́ты кре́пкия,/ рожде́йся от Де́вы,/ безстра́стия во глубине́/ души́ трича́стное потопи́, молю́ся:/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Припев: Слава Тебе, Боже наш, слава Тебе.

Ра́дуйся, не́бо, и земле́, весели́ся:/ Бог бо наш, быв пло́тию от Де́вы Отрокови́цы, ражда́ется и пелена́ми повива́ется,/ плени́цы же разреша́ет мои́х прегреше́ний, я́ко благоутро́бен.

Припев: Слава Тебе, Боже наш, слава Тебе.

Цари́ца Чи́стая Царя́ всех ражда́ет па́че ума́,/ вы́шнее ве́рным Ца́рство отверза́ющаго/ и и́же в нас окая́нно ца́рствующий всегда́ грех/ коне́чно отъемлющаго.

Сла́ва Отцу́ и Сы́ну и Свято́му Ду́ху:

Писа́ния проро́ческая коне́ц прие́млют:/ се бо, его́же провозвести́ша Христа́,/ во гра́де Вифлее́ме явля́ется воплоща́емь./ Сего́ ны́не предпра́здновати Рождество́ потщи́мся пра́востию мы́сли днесь.

И ны́не и при́сно и во ве́ки веко́в. Ами́нь.

Богородичен: Де́ва Созда́теля естества́ роди́ти и́дет в верте́пе,/ плоть из Ней по ипоста́си несказа́нно преесте́ственне поне́сшаго,/ я́ко да обожи́т челове́чество.

Пе́снь 3.

Ирмос: Я́ко непло́ды́ ро́ди от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди.

Припев: Слава Тебе, Боже наш, слава Тебе.

Дании́л Тя, от горы́ де́вственныя ка́мень, Сло́ве, отсе́чен зрит/ и истнева́ющь хра́мы и́дольския держа́вою Твое́ю;/ сего́ ра́ди Тя стра́хом сла́вим.

Припев: Слава Тебе, Боже наш, слава Тебе.

От восто́ка волсви́ Тебе́, Царю́ всех,/ наста́влени бы́вше звездо́ю, да́ры прино́сят, Христе́,/ сми́рну, зла́то и лива́н, уди́вльшеся Твоему́ снисхожде́нию.

Сла́ва Отцу́ и Сы́ну и Свято́му Ду́ху:

Живоно́сный клас ни́ва неора́нная но́сит,/ роди́ти во гра́де Вифлее́ме Мариа́м/ всех ду́ши пита́ющаго, зову́щих:/ Свят еси́, Го́споди.

И ны́не и при́сно и во ве́ки веко́в. Ами́нь.

Богородичен: Избавля́яй челове́ки Изба́витель/ от Чи́стыя ражда́ется в Вифлее́ме,/ пелены́ я́коже Младе́нец прие́м.

Седа́лен, гла́с 3:

Ра́дости испо́лнитеся, вся концы́:/ Богоро́дица бо роди́ти приближа́ется Царя́ вся́ческих./ О, чудесе́ неизрече́ннаго!/ Безнача́льный начина́ется, и Безпло́тный воплоща́ется;/ верте́п прие́млет содержа́щаго вся́ческая./ Вифлее́ме, ра́дуйся, и лику́й, тварь, день предпра́зднственный.

Пе́снь 4.

Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Припев: Слава Тебе, Боже наш, слава Тебе.

Свята́я мирополо́жница честна́го свяще́ния/ в Вифлее́ме гра́де сие́ излия́ти прихо́дит,/ свяще́ние нам всем подаю́щаго, вопию́щим:/ сла́ва, Христе́, си́ле Твое́й.

Припев: Слава Тебе, Боже наш, слава Тебе.

Богоглаго́ливе Иса́ие,/ честна́я твоя́ пропове́дания бы́вшая ви́дя вещми́, ра́дуйся и лику́й:/ Де́ва бо безсе́менно роди́ в верте́пе пло́тию Вифлее́мстем Невмести́маго.

Припев: Слава Тебе, Боже наш, слава Тебе.

Сла́ва Отцу́ и Сы́ну и Свято́му Ду́ху:

Иису́с пло́тию ражда́ется,/ и в ле́те безле́тный ви́димь есть Младе́нец,/ разреша́я моя́ ле́тная прегреше́ния,/ и неизрече́нною нището́ю ны́не обогаща́ет мя,/ обнища́вшаго тлетво́рными преступле́ньми.

И ны́не и при́сно и во ве́ки веко́в. Ами́нь.

Богородичен: Де́вство по Рождестве́ запеча́тано, Богоро́дице, ви́дящи,/ у́жасом одержи́ма бы́вши./ Ча́до, взыва́ше, ка́ко ны́не повию́ Тя,/ песко́м повива́ющаго мо́ре?

Пе́снь 5

Ирмос: Нече́стивии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче.

Припев: Слава Тебе, Боже наш, слава Тебе.

От Де́вы ражда́ется Бог Емману́ил и, в я́слех возле́г,/ на́ше воззва́ние во́лею соде́ловает,/ сего́ Рождество́ благоче́стно предпра́зднуим.

Припев: Слава Тебе, Боже наш, слава Тебе.

Сло́во сый Пребезнача́льное О́тчее и соесте́ственное,/ в я́слех возле́г безслове́сных,/ разреши́л еси́ безслове́сия ны,/ предпра́зднствующия благоче́стно Твое́ Рождество́.

Сла́ва Отцу́ и Сы́ну и Свято́му Ду́ху:

Блаже́н бысть ко́рень Иессе́ев,/ прозя́бый Чи́стую, цвет Боже́ственный, нося́щую Христа́ Го́спода./ его́же предпра́зднуим Рождество́, ра́дующеся.

И ны́не и при́сно и во ве́ки веко́в. Ами́нь.

Богородичен: Чу́до новоле́пно:/ Де́ва и́дет Пречи́стая в верте́п Вифлее́мский роди́ти Бо́га вочелове́чшася.

Пе́снь 6.

Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве.

Припев: Слава Тебе, Боже наш, слава Тебе.

Нов на земли́ нам О́трочищ ро́ждся,/ и́же пре́жде веко́в от Отца́ неизрече́нно возсия́в,/ дре́вняго вся свободи́ преступле́ния, я́ко благоутро́бен.

Припев: Слава Тебе, Боже наш, слава Тебе.

Стра́нна и пресла́вна слы́шана бы́ша в Вифлее́ме гра́де/ роди́вшуся Тебе́, Безнача́льне Сло́ве:/ па́стырие бо со А́нгелы песнь Тебе́ я́ко Влады́це приноша́ху.

Сла́ва Отцу́ и Сы́ну и Свято́му Ду́ху:

Звезда́ пра́вды возвеща́ет волхвом неизрече́нно Со́лнца ро́ждшася:/ его́же честно́е ны́не предпра́зднуим, ра́дующеся, Рождество́.

И ны́не и при́сно и во ве́ки веко́в. Ами́нь.

Богородичен: Мо́ре пови́вый мглою,/ во́лею ражда́ется Зижди́тель из Де́вы Отрокови́цы/ и пелены́ я́ко Младе́нец прие́млет, ми́р избавля́яй.

Конда́к, гла́с 2:

В Вифлее́ме зря́ще пелена́ми повива́емаго,/ всю зе́млю держа́ща руко́ю Свое́ю,/ предпра́зднственныя пе́сни Ро́ждшей сего́ прино́сим:/ ма́терски бо весели́тся, держа́щи в не́дрех Сы́на Бо́жия.

Икос:

Сы́на Бо́жия Де́ва держа́щи во объя́тиях,/ ма́терекими облобыза́ньми целу́ющи, веща́ше:/ се́мене не позна́х в зача́тии и тле́ния не подъя́х в рожде́нии,/ ны́не же чи́ста есмь, я́коже пре́жде, ку́пно и по Рождестве́./ Тем Твое́ пропове́дую, Ча́до, мно́гое благоутро́бие/ и непостижи́мое вели́чество, е́же показа́л еси́ на Мне;/ отону́дуже и ра́дуюся, держа́щи в не́дрех Сы́на Бо́жия.

Пе́снь 7.

Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших.

Припев: Слава Тебе, Боже наш, слава Тебе.

Ка́ко Тя верте́п вмести́т, гряду́ща нас ра́ди роди́тися, Невмести́маго?/ Ка́ко Тя воздои́т Де́ва, Пита́теля всех,/ Благоутро́бне Иису́се, су́ща.

Припев: Слава Тебе, Боже наш, слава Тебе.

Глаго́лом после́дующе волхва́ Валаа́ма,/ волсви́ тща́тся Христу́ поклони́тися с да́ры,/ разу́меюще сего́, вся́ким дыха́нием ца́рствующа.

Сла́ва Отцу́ и Сы́ну и Свято́му Ду́ху:

Непло́дствующее челове́ческое естество́ вся́кия доброде́тели, ра́дуйся и лику́й:/ гряде́т бо Христо́с от Де́вы пло́тию роди́тися,/ я́ко да пока́жет Тя до́брым благоча́дно.

И ны́не и при́сно и во ве́ки веко́в. Ами́нь.

Богородичен: Ра́дуйся, село Невмести́маго, Ма́ти Де́во:/ сего́ бо Плотоно́сца хотя́щи нас ра́ди в верте́пе роди́ти, Пречи́стая,/ исправля́юща Свои́х рук созда́ние.

Пе́снь 8.

Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Припев: Слава Тебе, Боже наш, слава Тебе.

Мно́гими мя, Христе́, преступле́ньми разбо́йников бы́вшаго верте́п,/ за благоутро́бие неизрече́нное спаса́я,/ роди́тися в верте́пе от Де́вы Чи́стыя изво́лил еси́.

Припев: Слава Тебе, Боже наш, слава Тебе.

Подпису́я соверше́нное мне оставле́ние,/ написа́лся еси́ ке́саревым повеле́нием Творе́ц тва́ри с рабы́:/ пою́ Твоего́ благоутро́бия безме́рную, Влады́ко, пучи́ну.

Сла́ва Отцу́ и Сы́ну и Свято́му Ду́ху:

Све́тлая Влады́чня пала́то,/ ка́ко возшла еси́ в мале́йший верте́п,/ Царя́ Го́спода, нас ра́ди вопло́щшася, роди́ти,/ Всесвята́я Де́во Богоневе́сто?

И ны́не и при́сно и во ве́ки веко́в. Ами́нь.

Богородичен: О́блаки восхожде́ние свое́ полага́я,/ Госпо́дь о́блаком нам Де́вою роди́тися гряде́т,/ я́ко да разори́т душ на́ших греха́ мра́чный о́блак, вопию́щих ему́:/ благослови́те, вся дела́ Госпо́дня, Го́спода.

Песнь 9

Ирмос: Е́ва у́бо неду́гом прослушания/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Припев: Слава Тебе, Боже наш, слава Тебе.

Ли́ку им, вси ве́рнии,/ взыгра́им и согла́сно воскли́кнем:/ гряде́т всех Спасе́ние, приближа́ется роди́тися Госпо́дь, спасти́ его́ Рождество́ Богому́дренно пра́зднующия.

Припев: Слава Тебе, Боже наш, слава Тебе.

Псалти́рь, святы́й Дави́де, восприими́ и гу́сли и песновоспо́й:/ до́ме Евфра́фов, весели́ся:/ Оте́ц бо, из чре́ва Его́же роди́, в Тебе́ пресве́тло ражда́ется,/ от Де́вы воплоща́лся.

Сла́ва Отцу́ и Сы́ну и Свято́му Ду́ху:

Я́ко ту́ча, я́ко вели́кий дождь, во утро́бу твою́ Влады́ка сни́де,/ и мра́чная безбо́жия земли́ олядене́вшая напои́/ и пре́лести мо́ря изсуши́, Богороди́тельнице Ма́ти Де́во.

И ны́не и при́сно и во ве́ки веко́в. Ами́нь.

Богородичен: Нося́щи нося́щаго вся, к Вифлее́му гряде́т Де́ва/ того́ и роди́ти, и во я́слех восклони́ти я́ко Младе́нца,/ челове́ков воззва́ние изря́дно соде́ловающаго.

Свети́лен:

Предпра́зднственныя, ве́рнии, Рождества́ пе́сни прииди́те, принесе́м вси:/ гряде́т уже́ Христо́с в Вифлее́м роди́тися,/ спасти́ Вселе́нную, я́ко еди́н Человеколю́бец.

Молитва ко Господу:

Влады́ко Христе́ Бо́же, И́же страстьми́ Свои́ми стра́сти моя́ исцели́вый и я́звами Свои́ми я́звы моя́ уврачева́вый, да́руй мне, мно́го Тебе́ прегреши́вшему, сле́зы умиле́ния; сраствори́ моему́ те́лу от обоня́ния Животворя́щего Те́ла Твоего́, и наслади́ ду́шу мою́ Твое́ю Честно́ю Кро́вию от го́рести, е́юже мя сопроти́вник напои́; возвы́си мой ум к Тебе́, до́лу пони́кший, и возведи́ от про́пасти поги́бели: я́ко не и́мам покая́ния, не и́мам умиле́ния, не и́мам слезы́ уте́шительныя, возводя́щия ча́да ко своему́ насле́дию. Омрачи́хся умо́м в жите́йских страсте́х, не могу́ воззре́ти к Тебе́ в боле́зни, не могу́ согре́тися слеза́ми, я́же к Тебе́ любве́. Но, Влады́ко Го́споди Иису́се Христе́, сокро́вище благи́х, да́руй мне покая́ние всеце́лое и се́рдце люботру́дное во взыска́ние Твое́, да́руй мне благода́ть Твою́ и обнови́ во мне зра́ки Твоего́ о́браза. Оста́вих Тя, не оста́ви мене́; изы́ди на взыска́ние мое́, возведи́ к па́жити Твое́й и сопричти́ мя овца́м избра́ннаго Твоего́ ста́да, воспита́й мя с ни́ми от зла́ка Боже́ственных Твои́х Та́инств, моли́твами Пречи́стыя Твоея́ Ма́тере и всех святы́х Твои́х. Ами́нь.