3 января.

Канон иной на преставление святителя Петра, митрополита Московского и всея России.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Яже пре́жде безпло́дная, земле́, ны́не весели́ся: се́ бо Христо́с свети́льника в тебе́ показа́, я́ве сия́юща в ми́ре и исцелева́юща неду́ги и боле́зни на́ша. Сего́ ра́ди лику́й и весели́ся со дерзнове́нием: святи́тель бо е́сть Вы́шняго, сия́ соде́ловаяй.

Ин тропа́рь, гла́с 8:

Лику́й све́тло, благосла́внейший гра́де Москва́, име́яй в себе́ архиере́я Петра́, я́ко зарю́ со́лнца, всю́ Росси́ю чудодея́нии озаря́юща: то́й бо не́мощи врачу́ет и неду́ги, я́ко тму́, прого́нит от вопию́щих ему́: ра́дуйся, иера́рше Бо́га Вы́шняго, тобо́ю сия́ па́стве твое́й соде́ловающаго.

Велича́ние:

Велича́ем тя́, святи́телю о́тче Пе́тре, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Стихи́ра, гла́с 6:

Егда́ преставле́ние честна́го твоего́ те́ла, о́тче, приспе́, тогда́ мно́жество ве́рных, обступи́вше о́др, уми́льно провожда́ху тя́. И о́в бо зря́ тя, благословля́юща лю́ди, удивля́шеся, кня́зь же Иоа́нн со слеза́ми вопия́ше: о влады́ко, что́ ти возда́м проти́ву твоего́ благодея́ния, е́же на́м дарова́л еси́, прие́м от Бо́га благода́ть? Те́мже, святи́телю Пе́тре, моли́ся приле́жно Христу́ Бо́гу на́шему спасти́ся невоева́ну гра́ду твоему́.

Други́й кано́н чудотво́рца Петра́, гла́с 1.

Пе́снь 1.

Ирмос: Христо́с ражда́ется — сла́вите! Христо́с с небе́с — сря́щите! Христо́с на земли́ — возноси́теся! По́йте Го́сподеви, вся́ земля́, и весе́лием воспо́йте, лю́дие, я́ко просла́вися.

Припев: Святителю отче Петре, моли Бога о нас.

Благода́ть Ду́ха прие́м, о́тче, во твое́ се́рдце, Христо́в святи́телю, уясни́ язы́к и се́рдце просвети́ твои́х певе́ц, е́же твою́ па́мять воспе́ти све́тло, Пе́тре преподо́бне.

Припев: Святителю отче Петре, моли Бога о нас.

Вели́кий ны́не Пе́тр, па́стырь Це́ркве держа́вный, па́стыря вку́пе и пасо́мыя и всю́ Це́рковь в па́мять свою́ призыва́ет: те́мже, собра́вшеся, я́ко о́бщему отцу́ све́тло торжеству́ем.

Сла́ва Отцу́ и Сы́ну и Свято́му Ду́ху:

Аще и побежда́ют твоя́ исправле́ния словеса́ на́ша и помышле́ния, о́тче Пе́тре, оба́че душе́вное на́ше предложе́ние, по си́ле приноси́мое тебе́, приими́ с любо́вию, досточу́дне: е́же бо по досто́инству пе́сни тебе́ соплести́ не возмо́жно е́сть и все́м на́м.

И ны́не и при́сно и во ве́ки веко́в. Ами́нь.

Богородичен: Све́тлое прихо́дит со́лнце, от вра́т заключе́нных явля́ющееся: но́щь бо явле́нне упраздни́ся, де́нь же прибли́жися. Те́мже, естество́ на́ше тле́нное, прие́мли Влады́ку от Де́вы, Тебе́ ра́ди тле́нна быва́ема.

Пе́снь 3.

Ирмос: Пре́жде ве́к от Отца́ рожде́нному нетле́нно Сы́ну и в после́дняя от Де́вы воплоще́нному безсе́менно, Христу́ Бо́гу возопии́м: вознесы́й ро́г на́ш, Свя́т еси́, Го́споди.

Припев: Святителю отче Петре, моли Бога о нас.

Позна́ тя́, богоно́се, Всеве́дец Бо́г пре́жде, е́же зача́тися тебе́ во утро́бе, и, роди́вшася, освяща́ет тя́ и па́стыря ове́ц Свои́х вели́ка устроя́ет: я́ко бо апо́столу Петру́, вверя́ет тебе́ Своя́ а́гнцы.

Припев: Святителю отче Петре, моли Бога о нас.

Жезло́м воздержа́ния страсте́й мо́ре раздели́в, блаже́нне, я́ко Моисе́й, на безстра́стия го́ру возше́л еси́ и, прие́м мы́сленныя скрижа́ли, па́ству твою́ научи́л еси́ Христо́ву зако́ну.

Сла́ва Отцу́ и Сы́ну и Свято́му Ду́ху:

Смире́н яви́лся еси́, кро́ток же и ти́х, Пе́тре, отону́дуже Ду́ха благода́ть, оби́льне излия́вшеся на тя́, вели́ка показа́ тя́, чуде́с луча́ми зе́млю на́шу осиява́юща.

И ны́не и при́сно и во ве́ки веко́в. Ами́нь.

Богородичен: Кре́пкий, держа́вный, воплоти́выйся ны́не Бо́г яви́ся су́щим во тме́ се́ни сме́ртныя. Све́т уви́дите, ве́рнии, вели́к — Христа́ в пеще́ре, иму́ща от Де́вы роди́тися стра́шно, Юже ве́рно воспои́м.

Седа́лен, гла́с 4.

Свети́льник светосия́нен яви́лся еси́ ми́ру, просвеща́яй блиста́ньми Боже́ственных твои́х слове́с ве́рных помышле́ния, святи́телю о́тче Пе́тре. Те́мже вси́ свяще́нную твою́ и Боже́ственную па́мять дне́сь ра́достно соверша́ем.

Пе́снь 4.

Ирмос: Же́зл из ко́рене Иессе́ева и цве́т от него́, Христе́, от Де́вы прозя́бл еси́, из горы́, Хва́льный, приосене́нныя ча́щи прише́л еси́, вопло́щся от Неискусому́жныя, Невеще́ственный и Бо́же, сла́ва си́ле Твое́й, Го́споди.

Припев: Святителю отче Петре, моли Бога о нас.

Зако́ном от сосе́ц ма́терних подклони́вся духо́вным, зако́ны плотски́я превше́л еси́, преподо́бне, я́же в жи́зни твое́й умертви́л еси́ воздержа́нием кре́пким. Его́же ра́ди да́н еси́ ве́рным чудотво́рец вели́к, Пе́тре блаже́нне.

Припев: Святителю отче Петре, моли Бога о нас.

Сна́ очесе́м твои́м и дрема́ния ве́ждом не да́л еси́, до́ндеже обре́те ме́сто поко́йно все́х Соде́тель, о́тче, се́рдце твое́, е́же очи́стившееся досто́йне показа́ Свое́ жили́ще сла́вы Ца́рь и Бо́г ве́чный.

Сла́ва Отцу́ и Сы́ну и Свято́му Ду́ху:

Умертви́ мудрова́ние, прему́дре, пло́ти моея́ неисце́льное, и к Боже́ственным стезя́м наста́ви мя́, я́ко кре́пок и си́лен, и зако́ном благи́м мя́ повини́, блаже́нне, и раба́ покажи́ мя́ Христо́ва, порабоще́ннаго страстьми́ лю́тыми.

И ны́не и при́сно и во ве́ки веко́в. Ами́нь.

Богородичен: Избавле́ние посла́ Госпо́дь, я́коже пи́сано е́сть, лю́дем, и племене́м, и язы́ком ны́не. Лю́ди бо Себе́ вся́ содева́ет, еди́ному ве́рою покланя́ющияся воплоще́нию Сыно́вню и Тебе́, Богоро́дицу, испове́дающия.

Пе́снь 5

Ирмос: Бо́г Сы́й ми́ра, Оте́ц щедро́т, вели́каго Сове́та Твоего́ Ангела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче.

Припев: Святителю отче Петре, моли Бога о нас.

Яко вели́кое бога́тство твои́х щедро́т яви́ся в земли́ на́шей, безчи́сленное проли́тие ми́лости твоея́, слуго́ Христо́в: ты́ бо прося́щим су́щая подае́ши и ты́я насы́тити тщи́шися твои́м предложе́нием, блаже́нне.

Припев: Святителю отче Петре, моли Бога о нас.

Кро́ток яви́лся еси́, ку́пно и смире́н де́лом и сло́вом, и си́м вся́ к себе́ привле́кл еси́. Любо́вию и до́брыми де́лы вся́ укроти́л еси́ и сердца́ возвесели́л еси́ укрепля́емых твои́ми чудесы́.

Сла́ва Отцу́ и Сы́ну и Свято́му Ду́ху:

Вели́кий па́стырь все́х Христо́с ове́ц тя́, блаже́нне, показа́ Свои́х па́стыря и учи́теля слове́сных. Те́мже заблужда́ющаго мя́ на гора́х поги́бели, я́ко па́стырь сострада́телен, твое́ ны́не овча́ взыщи́.

И ны́не и при́сно и во ве́ки веко́в. Ами́нь.

Богородичен: Вели́кий челове́ков Па́стырь и Святи́тель от Де́вы я́ко Челове́к прихо́дит пучи́ною неизрече́нных щедро́т; Вифлее́ме, угото́вися, па́стырие, воспева́йте, о́бщее возведе́ние возвеща́юще конце́м.

Пе́снь 6.

Ирмос: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну.

Припев: Святителю отче Петре, моли Бога о нас.

Ты́ сиро́т вои́стинну бы́л еси́ оте́ц и вдо́в засту́пник, сла́вне, печа́льных же и су́щих в ско́рбех сла́дкое утеше́ние, вра́чь душе́вных страсте́й, ку́пно и теле́сных. Те́мже вси́ призыва́ем тя́, е́же бы́ти тебе́ на́м предста́телю во обстоя́ниих на́ших.

Припев: Святителю отче Петре, моли Бога о нас.

Му́жие свяще́ннии, ра́достно с наро́дом дне́сь, твою́, о́тче, па́мять пра́зднующе, торжеству́ют, и́мже согла́сно и́стиннии безмо́лвницы и прости́и вси́ о́бще тя́ воспева́ют, предста́теля же вку́пе и учи́теля.

Сла́ва Отцу́ и Сы́ну и Свято́му Ду́ху:

Ча́до поро́чное а́з еди́н бы́х, о́тче, страстьми́ скве́рными и того́ ра́ди недосто́ин до́браго твоего́, сла́вне, и кра́снаго пра́зднования; но ты́, очи́стив мою́ скве́рну, преподо́бне, душе́вную и теле́сную, покажи́ мя торжества́ твоего́ бы́ти досто́йна.

И ны́не и при́сно и во ве́ки веко́в. Ами́нь.

Богородичен: Чу́до настоя́щее, чу́до превосходя́щее и сло́ва и ума́ всего́ вы́шше, и́бо Де́ва та́яжде и Ма́ти познава́ется, и ро́ждшееся ку́пно Бо́г и Челове́к. Сего́ све́тлое рожде́ние предпра́зднующе, воспева́ем ра́достная.

Конда́к, гла́с 8.

Взбра́нному и ди́вному на́шея земли́ чудотво́рцу, дне́сь любо́вию тебе́ притека́ем, пе́снь, богоно́се, плету́ще, я́ко, име́я дерзнове́ние ко Го́споду, многообра́зных изба́ви на́с обстоя́ний, да зове́м ти́: ра́дуйся, утвержде́ние гра́ду на́шему.

Икос:

Но́вый чудотво́рец яви́лся еси́, исцеле́ния подава́я все́м, усе́рдно от души́ приходя́щим: и Христо́вы лю́ди, богоно́се, неви́димо посеща́я, зе́млю на́шу просвеща́еши, я́ко да согла́сно зове́м ти́ си́це: ра́дуйся, све́та безстра́стнаго до́ме; ра́дуйся, страсте́й те́мных прогони́телю; ра́дуйся, де́монския разруши́вый ко́зни; ра́дуйся, Ангельския возвесели́вый чи́ны; ра́дуйся, высото́ боговиде́ния чи́стаго; ра́дуйся, глубино́ смире́ния, боле́зни омыва́ющая; ра́дуйся, я́ко бы́л еси́ зри́тель неви́димых; ра́дуйся, я́ко сообщи́лся еси́ лико́м святи́телей; ра́дуйся, земли́ Росси́йския па́стырю и учи́телю; ра́дуйся, святи́телем изря́дная похвало́; ра́дуйся, его́же ра́ди показа́ Бо́г чудоде́йствия ве́лия; ра́дуйся, его́же ра́ди Бо́г сла́вится; ра́дуйся, утвержде́ние гра́ду на́шему.

Пе́снь 7.

Ирмос: Отроцы, благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но, посреди́ пла́мене стоя́ще, поя́ху: отце́в Бо́же, благослове́н еси́.

Припев: Святителю отче Петре, моли Бога о нас.

Земля́ на́ша и страны́ согла́сно, о́тче, чудеса́ твоя́ возвеща́ют, я́же повсю́ду уча́ще пе́ти Христу́ прера́достно: отце́в на́ших Бо́же, благослове́н еси́.

Припев: Святителю отче Петре, моли Бога о нас.

Жени́х, кра́сный добро́тою па́че все́х сыно́в челове́ческих, я́коже пи́сано е́сть, неве́сте, блаже́нне, свое́й, Це́ркви, красне́йша тя́ показа́ жениха́, Того́ нося́ща о́бразы подо́бия.

Сла́ва Отцу́ и Сы́ну и Свято́му Ду́ху:

Украси́в твое́ житие́ милостынею, и кро́тостию, и любо́вию и́стинною, подража́тель показа́лся еси́ изря́дный Па́стыря до́браго, избра́в Того́ доброде́тели до́бре.

И ны́не и при́сно и во ве́ки веко́в. Ами́нь.

Богородичен: Прихо́дит Влады́ка в верте́п роди́тися я́ко Челове́к; предусря́щим, ве́рнии, Де́ву Чи́стую, воспева́юще Ей ра́достно: ра́дуйся, ми́ра Ра́досте, ра́дуйся, Де́во, Ма́ти Христо́ва.

Пе́снь 8.

Ирмос: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки.

Припев: Святителю отче Петре, моли Бога о нас.

Окорми́ моли́твою твое́ю па́ству сию́ многочелове́чную твою́, и бу́ри ве́тр проти́вных, чу́вственных и мы́сленных уста́ви твои́ми моли́твами, и изба́ви вся́ких искуше́ний и смуще́ний, и да́же до конца́ неврежде́ну соблюда́й.

Припев: Святителю отче Петре, моли Бога о нас.

Падо́ша востаю́щии на ны́, о́тче, твои́ми моли́твами побежда́еми ага́рины вну́цы, хотя́щии насле́дие твое́ озло́бити, и сме́х бы́ша и поруга́ние, паде́ния своего́ пла́чуще; мы́ же воспева́ем ра́достно твою́ свяще́нную па́мять.

Сла́ва Отцу́ и Сы́ну и Свято́му Ду́ху:

Неизрече́нно твое́ чадолю́бие, о́тче, превосходя́ще оте́ческую любо́вь: всегда́ у́бо неви́димо на́с посеща́еши, непреста́нными твои́ми моли́твами спасе́ние на́м испроша́я и подава́я на́м с ти́хостию, Пе́тре, ра́достная.

И ны́не и при́сно и во ве́ки веко́в. Ами́нь.

Богородичен: Всего́ мя́, па́дша, Богоро́дице Де́во, и погуби́вша, е́же по о́бразу, Чи́стая, Бо́г, Своего́ созда́ния не презре́в, Тобо́ю всего́ мя́ обнови́. Его́же ра́ди Тебе́, вину́ спасе́ния на́шего, вся́ тва́рь воспева́ет, зову́щи: благослове́нна Ты́ в жена́х еси́, Всенепоро́чная Влады́чице.

Песнь 9

Ирмос: Та́инство стра́нное ви́жу и пресла́вное: не́бо — верте́п; престо́л херуви́мский — Де́ву; я́сли — вмести́лище, в ни́хже возлеже́ Невмести́мый — Христо́с Бо́г, Его́же, воспева́юще, велича́ем.

Припев: Святителю отче Петре, моли Бога о нас.

Сла́ву твою́ воспе́ти по досто́инству невозмо́жно, чудеса́ бо премно́га и исцеле́ния безчи́сленная оби́льно подае́ши с те́плою ве́рою приходя́щим к тебе́, Пе́тре святи́телю, похвало́ земли́ на́шея.

Припев: Святителю отче Петре, моли Бога о нас.

Положи́ тебе́ Це́ркве Своея́ основа́ние Христо́с, и столпа́ кре́пка и непозы́бленна во ве́к, соблюда́юща и подтвержда́юща гра́д тво́й пребы́ти непоколеби́м до конца́ и от враго́в ненаве́туемь.

Сла́ва Отцу́ и Сы́ну и Свято́му Ду́ху:

Святи́телие у́бо, ца́рие же, и кня́зи, и сано́вницы, и вси́ лю́дие, му́жие и жены́, ста́рцы со младе́нцы, и вся́к во́зраст, и вся́кое досто́инство, святи́теля на́шего све́тло па́мять да пра́зднуем.

И ны́не и при́сно и во ве́ки веко́в. Ами́нь.

Богородичен: Притеце́м чу́до превели́кое ви́дети, Де́ва бо гряде́т, Младе́нца нося́щи во утро́бе, младе́нцы оживля́ющаго; па́стырие со Ангелы о́бщую пе́снь воспева́ют, в пеще́ре спасе́ние возвеща́юще.

Стихи́ры свята́го Петра́, гла́с 8.

Преподо́бне о́тче Пе́тре, / ты́ еще́ во утро́бе ма́терни / святи́тельства прозва́ние прия́л еси́, / нарече́нное от Бо́га. / Ты́ измла́да Христа́ возлюби́л еси́, / прие́м от Него́ па́ству слове́сных ове́ц, / до́бре па́сл еси́ Це́рковь Бо́жию. / Те́м твое́ пра́зднуем успе́ние, / ра́дующеся, Христа́ велича́ем.

Сти́х: Уста́ моя́ возглаго́лют прему́дрость, / и поуче́ние се́рдца моего́ ра́зум.

Преподо́бне святи́телю Пе́тре, / испроси́ к Бо́гу моли́твами твои́ми Це́ркви утвержде́ние, / архиере́ю па́ствы попече́ние и управле́ние, /  и на вся́ враги́ одоле́ние, / неподви́жимо и непобори́мо пребыва́ние гра́да твоего́ / и ве́рным лю́дем грехо́в оставле́ние, / все́м, притека́ющим к ра́це моще́й твои́х, / за ны́, святи́телю, моля́ся.

Сти́х: Уста́ пра́веднаго поуча́тся прему́дрости, / и язы́к его́ возглаго́лет су́д.

Преподо́бне о́тче богому́дре, / ты́ и́стинно яви́лся еси́, / прельще́нная сердца́ наставля́я / на пу́ть и́стинный. / Ты́ бы́л еси́ убо́гих и вдо́в защи́тник, / вельмо́ж тве́рдое наказа́ние, / и все́м ве́рным, / притека́ющим ко Пречи́стей Бо́жии Ма́тери, / испроси́, свя́те, грехо́в оставле́ние.

И ны́не Сла́ва, гла́с 6:

Вся́к гра́д и страна́, сла́вному гра́ду на́шему Москве́, ра́дуйтеся, спра́зднующе дне́сь: ди́вный бо вра́чь и спаси́тель на́ш вели́кий Пе́тр небе́снаго врачевства́ лечбы́ предлага́ет на́м, к безме́здным лечба́м свои́м вся́ любе́зно созва́, не хитростьми́ челове́ческими, ни обвяза́ньми, но де́йством Свята́го Ду́ха душе́вное и теле́сное исцеле́ние преесте́ственное подава́я. Еже прие́млюще оби́льне, ро́д вся́к и во́зраст, сла́вим Христа́ Бо́га, подаю́щаго ра́ди уго́дника Своего́ того́ воспева́ющим ве́лию ми́лость.

Молитва святителю Петру, митрополиту Московскому, всея России чудотворцу

О, вели́кий святи́телю, пресла́вный чудотво́рче, Росси́йския Це́ркве первопресто́льниче, гра́да Москвы́ храни́телю и о всех нас усе́рдный моли́твенниче, о́тче наш Пе́тре! К тебе́ смире́нно припа́даем и мо́лимся: простри́ ру́це твои́ ко Го́споду Бо́гу и помоли́ся за ны, гре́шныя и недосто́йныя рабы́ Его́: да проба́вит нам ми́лость Свою́ и низпосле́т нам вся благопотре́бная к вре́менному житию́ и ве́чному спасе́нию на́шему дары́ бла́гости Его́, наипа́че же да огради́т нас ми́ром, братолю́бием и благоче́стием от всех искуше́ний врага́ диа́вола, и да́рует нам бы́ти ве́рными ча́дами твои́ми, не по и́мени то́кмо, но и все́м житие́м на́шим. Ей, уго́дниче Бо́жий! Услы́ши нас благоутро́бно, и бу́ди всем нам помо́щник и засту́пник во вся́ких беда́х и напа́стех, не забу́ди нас и в час кончи́ны на́шея, егда́ наипа́че твоего́ заступле́ния потре́буем, да, при по́мощи моли́тв твои́х святы́х, сподо́бимся и мы, гре́шнии, кончи́ну благу́ю получи́ти и Ца́рствие Небе́сное унасле́дити, сла́вяще ди́внаго во святы́х Свои́х Бо́га на́шего, Отца́ и Сы́на и Свята́го Ду́ха, во ве́ки веко́в. Ами́нь.